໗. ມລ຺ລິກາເທວີສຸຕ຺ຕວຓ຺ຓນາ

໑໙໗. ສຕ຺ຕເມ ອປ຺ເປສກ຺ຂາຕິ ອປ຺ປານຸຠາວາ. ສາ ປນ ອປ຺ເປສກ຺ຂຕາ ອາຘິປເຕຍ຺ຍສມ຺ປຕ຺ຕິຍາ ປຣິວາຣສມ຺ປຕ຺ຕິຍາ ຈ ອຠາເວນ ປາກຏາ ໂຫຕິ. ຕຕ຺ຖ ປຣິວາຣສມ຺ປຕ຺ຕິຍາ ອຠາວໍ ທສ຺ເສນ຺ໂຕ ‘‘ອປ຺ປປຣິວາຣາ’’ຕິ ອາຫ. ອິສ຺ສຣາຕິ ອາຘິປເຕຍ຺ຍສໍວຕ຺ຕນກມ຺ມພເລນ ອີສນສີລາ. ສາ ປນສ຺ສາ ອິສ຺ສຣຕາ ວິຠວສມ຺ປຕ຺ຕິປຈ຺ຈຍາ ປາກຏາ ຊາຕາຕິ ອຑ຺ຒຕາປຣິຍາຍຠາເວນ ວທນ຺ໂຕ ‘‘ອຑ຺ຒາຕິ ອິສ຺ສຣາ’’ຕິ ອາຫ. ມຫນ຺ຕໍ ຘນເມຕິສ຺ສາ ຠູມິຄຕຎ຺ເຈວ ວຬຎ຺ຊນກຎ຺ຈາຕິ ມຫທ຺ຘນາ. ອິຘ ປນ ວຬຎ຺ຊນເກເນວ ຘເນນ ມຫທ຺ຘນຕໍ ທສ຺ເສນ຺ໂຕ ‘‘ວຬຎ຺ຊນກຘເນນ ມຫທ຺ຘນາ’’ຕິ ອາຫ. ອີສຕີຕິ ອີສາ, ອຠິຠູຕິ ອຕ຺ໂຖ. ມຫຕີ ອີສາ ມເຫສາ, ສຸປ຺ປຕິຏ຺ຐິຕມເຫສຕາຍ ປນ ປເຣຫິ ມເຫໂສຕິ ອກ຺ຂາຕພ຺ພຕາຍ ມເຫສກ຺ຂາ. ຍສ຺ມາ ປນ ໂສ ມເຫສກ຺ຂາຠາໂວ ອາຘິປເຕຍ຺ຍປຣິວາຣສມ຺ປຕ຺ຕິຍາ ວິຎ຺ຎາຍຕິ, ຕສ຺ມາ ‘‘ມຫາປຣິວາຣາ’’ຕິ ວຸຕ຺ຕໍ.

ສຓ຺ຐານປາຣິປູຣິຍາ ອຘິກໍ ຣູປມສ຺ສາຕິ ອຠິຣູປາ. ສຓ຺ຐານປາຣິປູຣິຍາຕິ ຈ ຫຕ຺ຖປາທາທິສຣີຣາວຍວານໍ ສຸສຓ຺ຐິຕຕາຍາຕິ ອຕ຺ໂຖ. ອວຍວປາຣິປູຣິຍາ ຫິ ສມຸທາຍປາຣິປູຣິສິທ຺ຘິ. ຣູປນ຺ຕິ ຈ ສຣີຣໍ ‘‘ຣູປວນ຺ເຕວ ສງ຺ຂ຺ຍໍ ຄຈ຺ຉຕີ’’ຕິອາທີສຸ ວິຍ. ທສ຺ສນຍຸຕ຺ຕາຕິ ສຸຣູປຠາເວນ ປສ຺ສິຕພ຺ພຍຸຕ຺ຕາ, ທິສ຺ສມານາ ຈກ຺ຂູນິ ປິຍາຍຕີຕິ ອຎ຺ຎກິຈ຺ຈວິກ຺ເຂປໍ ຫິຕ຺ວາປິ ທຏ຺ຐພ຺ພາຕິ ວຸຕ຺ຕໍ ໂຫຕິ. ທິສ຺ສມານາວ ໂສມນສ຺ສວເສນ ຈິຕ຺ຕໍ ປສາເທຕີຕິ ປາສາທິກາ. ເຕນາຫ ‘‘ທສ຺ສເນນ ປາສາທິກາ’’ຕິ. ໂປກ຺ຂຣຕາຕິ ວຸຈ຺ຈຕິ ສຸນ຺ທຣຠາໂວ, ວຓ຺ຓສ຺ສ ໂປກ຺ຂຣຕາ ວຓ຺ຓໂປກ຺ຂຣຕາ, ຕາຍ ວຓ຺ຓສມ຺ປຕ຺ຕິຍາຕິ ອຕ຺ໂຖ. ໂປຣາຓາ ປນ ໂປກ຺ຂຣນ຺ຕິ ສຣີຣໍ ວທນ຺ຕິ, ວຓ຺ຓໍ ວຓ຺ຓເມວ. ເຕສໍ ມເຕນ ວຓ຺ຓຎ຺ຈ ໂປກ຺ຂຣຎ຺ຈ ວຓ຺ຓໂປກ຺ຂຣານິ, ເຕສໍ ຠາໂວ ວຓ຺ຓໂປກ຺ຂຣຕາ. ອິຕິ ປຣມາຍ ວຓ຺ຓໂປກ຺ຂຣຕາຍາຕິ ອຸຕ຺ຕມປຣິສຸທ຺ເຘນ ວຓ຺ເຓນ ເຈວ ສຣີຣສຓ຺ຐານສມ຺ປຕ຺ຕິຍາ ຈາຕິ ອຕ຺ໂຖ ທຏ຺ຐພ຺ໂພ. ເຕເນວາຫ ‘‘ວຓ຺ເຓນ ເຈວ ສຣີຣສຓ຺ຐາເນນ ຈາ’’ຕິ. ຕຕ຺ຖ ວຓ຺ເຓນາຕິ ວຓ຺ຓຘາຕຸຍາ. ສຣີຣໍ ນາມ ສນ຺ນິເວສວິສິຏ຺ໂຐ ກຣຈຣຓຄີວາສີສາທິອວຍວສມຸທາໂຍ, ໂສ ຈ ສຓ຺ຐານມຸເຂນ ຄຍ຺ຫຕີຕິ ອາຫ ‘‘ສຣີຣສຓ຺ຐາເນນາ’’ຕິ.

ອຠິສຊ຺ຊຕີຕິ ກຸຊ຺ຌນວເສເນວ ກຸຏິລກຓ຺ຏໂກ ວິຍ ຕສ຺ມິໍ ຕສ຺ມິໍ ສມຸຏ຺ຐາເນ ມກຣທນ຺ໂຕ ວິຍ ລຄຕິ. ຍຎ຺ຫິ ໂກຘສ຺ສ ອຸປ຺ປຕ຺ຕິຏ຺ຐານຠູເຕ ອາຣມ຺ມເຓ ອຸປນາຫສ຺ສ ປຈ຺ຈຍຠູຕໍ ກຸຊ຺ຌນວເສນ ອຠິສຊ຺ຊນໍ, ຕໍ ອິຘາຘິປ຺ເປຕໍ, ນ ລຸພ຺ຠນວເສນ. ກຸປ຺ປຕີຕິອາທີສຸ ປຸພ຺ພຸປ຺ປຕ຺ຕິ ໂກໂປ, ຕໂຕ ພລວຕໂຣ ພ຺ຍາປາໂທ ລທ຺ຘາເສວນຕາຍ ຈິຕ຺ຕສ຺ສ ພ຺ຍາປຊ຺ຊນໂຕ. ສາຕິສຍໍ ລທ຺ຘາເສວນຕາຍ ຕໂຕ ພ຺ຍາປາທໂຕປິ ພລວຕຣາ ປຈ຺ຈຕ຺ຖິກຠາເວນ ຖາມປ຺ປຕ຺ຕິ ປຕິຕ຺ຖິຍນາ. ອນ຺ນໍ ປານນ຺ຕິອາທີສຸ ອທີຍໂຕ ອນ຺ນໍ, ຂາທນີຍໍ ໂຠຊນີຍຎ຺ຈ. ປາຕພ຺ຍໂຕ ປານໍ, ຍໍກິຎ຺ຈິ ປານໍ. ວສິຕພ຺ພໂຕ ອຈ຺ຉາເທຕພ຺ພໂຕ ວຕ຺ຖໍ, ນິວາສນປາວຸຣຓໍ. ຍນ຺ຕິ ເຕນາຕິ ຍານໍ, ຉຕ຺ຕຸປາຫນວຍ຺ຫສິວິກາທິ ຍໍກິຎ຺ຈິ ຄມນປຈ຺ຈຍໍ. ຉຕ຺ຕມ຺ປິ ຫິ ວສ຺ສາຕປທຸກ຺ຂນິວາຣເຓນ ມຄ຺ຄຄມນສາຘນນ຺ຕິ ກຕ຺ວາ ‘‘ຍານ’’ນ຺ຕິ ວຸຈ຺ຈຕິ. ມາລນ຺ຕິ ຍໍກິຎ຺ຈິ ສຸມນມາລາທິປຸປ຺ຜໍ. ຄນ຺ຘນ຺ຕິ ຍໍກິຎ຺ຈິ ຈນ຺ທນາທິວິເລປນໍ.

ມລ຺ລິກາເທວີສຸຕ຺ຕວຓ຺ຓນາ ນິຏ຺ຐິຕາ.