໗-໘. ມຫາໂມຄ຺ຄລ຺ລານສຸຕ຺ຕາທິວຓ຺ຓນາ

໑໖໗-໑໖໘. ສຕ຺ຕມຏ຺ຐເມສຸ ມຫາໂມຄ຺ຄລ຺ລານຕ຺ເຖຣສ຺ສາຕິອາທິນາ ໂມຄ຺ຄລ຺ລານຕ຺ເຖຣສ຺ສ ເຫຏ຺ຐາ ຕິຓ຺ຓໍ ມຄ຺ຄານໍ ສຸຂປຏິປທທນ຺ຘາຠິຎ຺ຎຠາໂວ, ອຣຫຕ຺ຕມຄ຺ຄສ຺ສ ທຸກ຺ຂປຏິປທຂິປ຺ປາຠິຎ຺ຎຠາໂວ ວຸຕ຺ໂຕ, ສາຣິປຸຕ຺ຕຕ຺ເຖຣສ຺ສ ປນ ເຫຏ຺ຐິມານໍ ຕິຓ຺ຓໍ ມຄ຺ຄານໍ ສຸຂປຏິປທທນ຺ຘາຠິຎ຺ຎຠາໂວ, ອຣຫຕ຺ຕມຄ຺ຄສ຺ສ ຈ ສຸຂປຏິປທຂິປ຺ປາຠິຎ຺ຎຠາໂວ ທສ຺ສິໂຕ. ຍໍ ປນ ວຸຕ຺ຕໍ ວິສຸທ຺ຘິມຄ຺ເຄ (ວິສຸທ຺ຘິ. ໒.໘໐໑) ‘‘ພຸທ຺ຘານໍ ປນ ຈຕ຺ຕາໂຣປິ ມຄ຺ຄາ ສຸຂປຏິປທຂິປ຺ປາຠິຎ຺ຎາວ ອເຫສຸໍ, ຕຖາ ຘມ຺ມເສນາປຕິສ຺ສ. ມຫາໂມຄ຺ຄລ຺ລານຕ຺ເຖຣສ຺ສ ປນ ປຐມມຄ຺ໂຄ ສຸຂປຏິປທຂິປ຺ປາຠິຎ຺ໂຎ ອໂຫສິ, ອຸປຣິ ຕໂຍ ທຸກ຺ຂປຏິປທທນ຺ຘາຠິຎ຺ຎາ’’ຕິ. ຍຎ຺ຈ ວຸຕ຺ຕໍ ອຏ຺ຐສາລິນິຍໍ (ຘ. ສ. ອຏ຺ຐ. ໑໔໗໖) ‘‘ຕຖາຄຕສ຺ສ ຫິ ສາຣິປຸຕ຺ຕຕ຺ເຖຣສ຺ສ ຈ ຈຕ຺ຕາໂຣປິ ມຄ຺ຄາ ສຸຂປຏິປທຂິປ຺ປາຠິຎ຺ຎາວ ອເຫສຸໍ, ມຫາໂມຄ຺ຄລ຺ລານຕ຺ເຖຣສ຺ສ ປນ ປຐມມຄ຺ໂຄ ສຸຂປຏິປທຂິປ຺ປາຠິຎ຺ໂຎ ອຸປຣິ ຕໂຍ ທຸກ຺ຂປຏິປທຂິປ຺ປາຠິຎ຺ຎາ’’ຕິ, ຕໍ ສພ຺ພໍ ອຎ຺ຎມຎ຺ຎໍ ນານຸໂລເມຕິ. ອິມາຍ ປາຬິຍາ ອິມາຍ ຈ ອຏ຺ຐກຖາຍ ນ ສເມຕິ, ຕສ຺ມາ ວີມໍສິຕພ຺ພເມຕໍ. ຕໍຕໍຠາຓການໍ ວາ ມເຕນ ຕຕ຺ຖ ຕຕ຺ຖ ຕຖາ ຕຖາ ວຸຕ຺ຕນ຺ຕິ ຄເຫຕພ຺ພໍ.

ມຫາໂມຄ຺ຄລ຺ລານສຸຕ຺ຕາທິວຓ຺ຓນາ ນິຏ຺ຐິຕາ.