໔-໖. ທຸຕິຍນານາກຣຓສຸຕ຺ຕາທິວຓ຺ຓນາ

໑໒໔-໖. ຈຕຸຕ຺ເຖ ເຕ ຘມ຺ເມຕິ ເຕ ‘‘ຣູປຄຕ’’ນ຺ຕິອາທິນາ ນເຍນ ວຸຕ຺ເຕ ຣູປາທໂຍ ຘມ຺ເມ. ອນິຈ຺ຈໂຕຕິ ອິມິນາ ນິຈ຺ຈປ຺ປຏິກ຺ເຂປໂຕ ເຕສໍ ອນິຈ຺ຈຕມາຫ, ຕໂຕ ເອວ ຈ ອຸທຍວຍວນ຺ຕໂຕ ວິປຣິຓາມໂຕ ຕາວກາລິກໂຕ ຈ ເຕ ອນິຈ຺ຈາຕິ ໂຊຕິຕໍ ໂຫຕິ. ຍຎ຺ຫິ ນິພ຺ພຕ຺ຕໍ ໂຫຕິ, ຕໍ ອຸທຍວຍປຣິຈ຺ຉິນ຺ນໍ. ຊຣາຍ ມຣເຓນ ຈ ຕເທວ ວິປຣີຕໍ, ອິຕ຺ຕຣກ຺ຂຓເມວ ຈ ໂຫຕີຕິ. ທຸກ຺ຂໂຕຕິ ອິມິນາ ສຸຂປ຺ປຏິກ຺ເຂປໂຕ ເຕສໍ ທຸກ຺ຂຕມາຫ. ຕໂຕ ເອວ ຈ ອຠິຓ຺ຫປ຺ປຏິປີຬນໂຕ ທຸກ຺ຂວຕ຺ຖຸໂຕ ຈ ເຕ ທຸກ຺ຂາຕິ ໂຊຕິຕໍ ໂຫຕິ. ອຸທຍວຍວນ຺ຕຕາຍ ຫິ ເຕ ອຠິຓ຺ຫປ຺ປຏິປີຬນໂຕ ນິຣນ຺ຕຣທຸກ຺ຂຕາຍ ທຸກ຺ຂສ຺ເສວ ຈ ອຘິຏ຺ຐານຠູຕາ. ປຈ຺ຈຍຍາປນີຍຕາຍ ໂຣຄມູລຕາຍ ຈ ໂຣຄໂຕ. ທຸກ຺ຂຕາສູລໂຍຄໂຕ ກິເລສາສຸຈິປຄ຺ຆຣຓໂຕ ອຸປ຺ປາທຊຣາຠງ຺ເຄຫິ ອຸທ຺ຘຸມາຕປຣິປກ຺ກປຠິນ຺ນໂຕ ຈ ຄຓ຺ຑໂຕ. ປີຬາຊນນໂຕ, ອນ຺ໂຕຕຸທນໂຕ, ທຸນ຺ນີຫຣຓໂຕ ຈ ສລ຺ລໂຕ. ອວຑ຺ຒິອາວຫນໂຕ ອຆວຕ຺ຖຸໂຕ ຈ ອຆໂຕ. ອເສຣິຠາວຊນນໂຕ ອາພາຘປທຏ຺ຐານຕາຍ ຈ ອາພາຘໂຕ. ອວສວຕ຺ຕນໂຕ ອວິເຘຍ຺ຍຕາຍ ຈ ປຣໂຕ. ພ຺ຍາຘິຊຣາມຣເຓຫິ ປລຸຊ຺ຊນີຍຕາຍ ປໂລກໂຕ. ສາມິນິວາສິກາຣກເວທກອຘິຏ຺ຐາຍກວິຣຫໂຕ ສຸຎ຺ຎໂຕ. ອຕ຺ຕປ຺ປຏິກ຺ເຂປຏ຺ເຐນ ອນຕ຺ຕໂຕ. ຣູປາທິຘມ຺ມາ ຫິ ນ ເອຕ຺ຖ ອຕ຺ຕາ ອຕ຺ຖີຕິ ອນຕ຺ຕາ. ເອວໍ ສຍມ຺ປິ ອຕ຺ຕາ ນ ໂຫນ຺ຕີຕິ ອນຕ຺ຕາ. ເຕນ ອພ຺ຍາປາຣໂຕ ນິຣີຫໂຕ ຕຸຈ຺ຉໂຕ ອນຕ຺ຕາຕິ ທີປິຕໍ ໂຫຕິ. ລກ຺ຂຓຕ຺ຕຍເມວ ສຸຂາວໂພຘນຕ຺ຖໍ ເອກາທສຫິ ປເທຫິ ວິຠຊິຕ຺ວາ ຄຫິຕນ຺ຕິ ທສ຺ເສຕຸໍ ‘‘ຕຕ຺ຖາ’’ຕິອາທິ ວຸຕ຺ຕໍ. ປຎ຺ຈມຉຏ຺ຐານິ ອຸຕ຺ຕານຕ຺ຖາເນວ.

ທຸຕິຍນານາກຣຓສຸຕ຺ຕາທິວຓ຺ຓນາ ນິຏ຺ຐິຕາ.