໕. ປຓ຺ຑິຕສຸຕ຺ຕວຓ຺ຓນາ

໔໕. ປຎ຺ຈເມ ປຓ຺ຑິຕປຎ຺ຎຕ຺ຕານີຕິ ປຓ຺ຑິເຕຫິ ປຐມໍ ປຎ຺ຎຕ຺ຕານິ. ກຖິຕານີຕິ ເສຍ຺ຍໂສ ກຖິຕານິ. ມຫາປຸຣິເສຫີຕິ ພຸທ຺ຘໂພຘິສຕ຺ເຕຫິ. ກຣຸຓາຕິ ກຣຸຓາເຈໂຕວິມຸຕ຺ຕິ ວຸຕ຺ຕາ. ປຸພ຺ພຠາໂຄຕິ ຕສ຺ສ ອຸປຈາໂຣ. ທໂມຕິ ອິນ຺ທ຺ຣິຍສໍວໂຣ ‘‘ມນຈ຺ຉຏ຺ຐານໍ ອິນ຺ທ຺ຣິຍານໍ ທມນ’’ນ຺ຕິ ກຕ຺ວາ. ອຕ຺ຕທມນນ຺ຕິ ຈິຕ຺ຕທມນໍ. ປຸຓ຺ໂຓວາເທ (ມ. ນິ. ໓.໓໙໖) ‘‘ສກ຺ຂິສ຺ສສິ ໂຂ, ຕ຺ວໍ ປຸຓ຺ຓ, ອິມິນາ ທມູປສເມນາ’’ຕິ ອາຄຕຕ຺ຕາ ທໂມຕິ ວຸຕ຺ຕາ ຂນ຺ຕິປິ. ອາຬວເກ ອາຬວກສຸຕ຺ເຕ (ສໍ. ນິ. ໑.໒໔໖; ສຸ. ນິ. ໑໙໐) ‘‘ສຈ຺ຈາ ທມາ ຈາຄາ’’ຕິ ເອວໍ ວຸຕ຺ຕາ ປຎ຺ຎາປິ ອິມສ຺ມິໍ ສຸຕ຺ເຕ ‘‘ທໂມ’’ຕິ ວຕ຺ຕຸໍ ວຏ຺ຏຕິ. ຣກ຺ຂນໍ ໂຄປນໍ ປຏິຊຄ຺ຄນນ຺ຕິ ມາຕາປິຕູນໍ ມນຸສ຺ສາມນຸສ຺ສກຕູປທ຺ທວໂຕ ຣກ຺ຂນໍ, ພ຺ຍາຘິອາທິອນຕ຺ຖໂຕ ໂຄປນໍ, ຆາສຈ຺ຉາທນາທີຫິ ເວຍ຺ຍາວຈ຺ຈກຣເຓນ ປຏິຊຄ຺ຄນໍ. ສນ຺ໂຕ ນາມ ສພ຺ພກິເລສທຣຖປຣິຬາຫູປສເມນ ອຸປສນ຺ຕກາຍວຈີສມາຈາຣຕາຍ ຈ. ອຸຕ຺ຕມຏ຺ເຐນ ສນ຺ຕານນ຺ຕິ ມຕ຺ເຕຍ຺ຍຕາທີຫິ ເສຏ຺ຐຏ຺ເຐນ ສນ຺ຕານໍ.

ອິຘ ອິເມສໍເຍວ ຕິຓ຺ຓໍ ຐານານໍ ກຣເຓນາຕິ ອິມສ຺ມິໍ ສຸຕ຺ເຕ ອາຄຕານໍ ຕິຓ຺ຓໍ ຐານານໍ ກຣເຓນ ນິພ຺ພຕ຺ຕເນນ. ເອຕານິ…ເປ… ກາຣຓານີຕິ ມາຕຸປຏ຺ຐານໍ ປິຕຸປຏ຺ຐານນ຺ຕິ ເອຕານິ ທ຺ເວ ອຸຕ຺ຕມປຸຣິສານໍ ກາຣຓານິ. ອຸຕ຺ຕມກິຈ຺ຈກຣເຓນ ຫິ ມາຕາປິຕຸອຸປຏ຺ຐາກາ ‘‘ອຸຕ຺ຕມປຸຣິສາ’’ຕິ ວຸຕ຺ຕາ. ເຕນາຫ ‘‘ມາຕາປິຕຸ…ເປ… ວຸຕ຺ໂຕ’’ຕິ. ອນຸປທ຺ທວຠາເວນ ເຂມໍ.

ປຓ຺ຑິຕສຸຕ຺ຕວຓ຺ຓນາ ນິຏ຺ຐິຕາ.