໒. ຕິຐານສຸຕ຺ຕວຓ຺ຓນາ

໔໒. ທຸຕິເຍ ມຈ຺ຉຣິຍເມວ ມລໍ ມຈ຺ຉຣິຍມລໍ, ຈິຕ຺ຕສ຺ສ ມລີນສຠາວາປາທນໂຕ ວິຄຕໍ ມຈ຺ຉຣິຍມລໍ ເອຕ຺ຖາຕິ ວິຄຕມຈ຺ຉຣິຍມລໍ. ເຄຘາຠາເວນ ໂກຈິ ກິຎ຺ຈິ ເທນ຺ໂຕປິ ຕຕ຺ຖ ອາສຕ຺ຕິໍ ນ ວິສ຺ສຊ຺ເຊຕິ, ອຍໍ ປນ ນ ຕາທິໂສຕິ ອາຫ ‘‘ວິສ຺ສຏ຺ຐຈາໂຄ’’ຕິ. ມລີນຫຕ຺ໂຖວ ຈິຕ຺ຕວິສຸທ຺ຘິຍາ ອຠາວໂຕ. ໂຘຕຫຕ຺ໂຖວ ໂຘຕຫຕ຺ເຖນ ກາຕພ຺ພກິຈ຺ຈສາຘນໂຕ. ເຕນ ວຸຕ຺ຕໍ – ‘‘ຈິຕ຺ເຕ ສຸທ຺ເຘ ວິສຸຊ຺ຌນ຺ຕິ, ອິຕິ ວຸຕ຺ຕໍ ມເຫສິນາ’’ຕິ. ຍາຈິຕຸໍ ຍຸຕ຺ໂຕ ຍາຈການໍ ມໂນຣຖປູຣຓໂຕ. ຍາຈໂຍໂຄ ປໂຍຄາສເຫຫິ ຍາຈເກຫິ ສຸຏ຺ຐຸ ຍຸຕ຺ຕຠາວໂຕ. ຕໍສມງ຺ຄີ ເອວ ຕຕ຺ຖ ຣໂຕ ນາມ, ນ ຈິຕ຺ຕມຕ຺ເຕເນວາຕິ ອາຫ ‘‘ທານໍ…ເປ… ຣໂຕ ນາມ ໂຫຕີ’’ຕິ.

‘‘ອຸຈ຺ຈາ, ຠນ຺ເຕ’’ຕິ ວຕ຺ວາ ອຍໍ ມໍ ອຸຈ຺ຈໂຕ ວທຕີຕິ ຈິນ຺ເຕຍ຺ຍາຕິ ປຸນ ‘‘ນາຕິອຸຈ຺ຈາ ຕຸມ຺ເຫ’’ຕິ ອາຫ, ສຣີເຣນາຕິ ອຘິປ຺ປາໂຍ. ເມຈກວຓ຺ຓສ຺ສາຕິ ນີໂລຠາສສ຺ສ. ປຸຈ຺ຉີຕິ ຠິກ຺ຂູ ປຸຈ຺ຉິ. ຠູມິຍໍ ເລຂໍ ລິຂນ຺ໂຕ ອຈ຺ຉີຕິ ປຐມໍ ມຎ຺ເຈ ນິປຊ຺ຊິຕ຺ວາ ອຸຏ຺ຐາຍ ຠູມິຍໍ ເລຂໍ ລິຂນ຺ໂຕ ອຈ຺ຉິ ‘‘ອຂີຓາສໂວຕິ ມຎ຺ຎນາ ໂຫຕູ’’ຕິ. ຕຖາ ຫິ ຣາຊາ ຂີຓາສວສ຺ສ ນາມ…ເປ… ນິວຕ຺ຕິ. ຘຊປຄ຺ຄຫິຕາວາຕິ ປຄ຺ຄຫິຕຘຊາວ. ສິລາເຈຕິຍຏ຺ຐານນ຺ຕິ ຖູປາຣາມສ຺ສ ຈ ມຫາເຈຕິຍສ຺ສ ຈ ອນ຺ຕເຣ ສິລາຍ ກຕເຈຕິຍຏ຺ຐານໍ. ເຈຕິຍໍ…ເປ… ອຏ຺ຐາສິ ສາວກສ຺ສ ຕໍ ກູຏາຄາຣນ຺ຕິ ກຕ຺ວາ.

ປຈ຺ຉາຠາເຄນາຕິ ຘມ຺ມກຖິກສ຺ສ ເຖຣສ຺ສ ປິຏ຺ຐິປສ຺ເສນ. ໂຄນໂສຕິ ມຓ຺ຑລສປ຺ໂປ. ຘມ຺ມສ຺ສວນນ຺ຕຣາຍ ພຫູນໍ ສຄ຺ຄມຄ຺ຄປ຺ປຏິລາຠນ຺ຕຣາໂຍ ຠເວຍ຺ຍາຕິ ອຘິປ຺ປາເຍນ ‘‘ຘມ຺ມສ຺ສວນນ຺ຕຣາຍໍ ນ ກຣິສ຺ສາມີ’’ຕິ ຈິນ຺ເຕສິ. ວິສໍ ວິກ຺ຂມ຺ເຠຕ຺ວາຕິ ວິປສ຺ສນາເຕເຊນ ວິສເວຄໍ ວິກ຺ຂມ຺ເຠຕ຺ວາ. ຄາຖາສຫສ຺ສນ຺ຕິ ຄາຖາສຫສ຺ສວນ຺ຕໍ. ປຏ຺ຐານຄາຖາຍາຕິ ປຏ຺ຐາປນຄາຖາຍ, ອາທິຄາຖາຍາຕິ ອຕ຺ໂຖ. ປຏ຺ຐານ…ເປ… ອວສານຄາຖໍ ເອວ ວວຕ຺ຖເປສິ, ນ ທ຺ວິນ຺ນໍ ອນ຺ຕເຣ ວຸຕ຺ຕໍ ກິລນ຺ຕກາຍຕ຺ຕາ. ສຣຠາຓໍ ສາຍນ຺ຫຘມ຺ມກຖາ. ປຄ຺ຄຓ຺ຫາຕີຕິ ປຈ຺ຈກ຺ຂໍ ກໂຣນ຺ຕີ ຄຓ຺ຫາຕິ, ສກ຺ກຈ຺ຈໍ ສຸຓາຕີຕິ ອຕ຺ໂຖ. ຘມ຺ມກຖນທິວເສ ຘມ຺ມກຖິການໍ ອກິລມນຕ຺ຖໍ ສທ຺ຘາ ອຸປາສກາ ສິນິທ຺ຘໂຠຊນໍ ມຘຸປານກຎ຺ຈ ເທນ຺ຕິ ສຣສ຺ສ ມຘຸຣຠາວາຍ ສປ຺ປິມຘຸກເຕລາທິຎ຺ຈ ເຠສຊ຺ຊໍ. ເຕນາຫ ‘‘ອຣິຍວໍສໍ ກເຖສ຺ສາມີ’’ຕິອາທິ. ຈຕູຫິ ທາຐາຫິ ຑໍສິຕ຺ວາຕິ ທຬ຺ຫທຏ຺ຐຠາວທສ຺ສນໍ. ຈຣິສ຺ສາມີຕິ ສມ຺ມາເນສ຺ສາມິ, ສກ຺ກຈ຺ຈໍ ສຸຓິສ຺ສາມີຕິ ອຕ຺ໂຖ. ນິມ຺ມເຖຕ຺ວາຕິ ນິມ຺ມທ຺ທິຕ຺ວາ, ອປເນຕ຺ວາຕິ ອຕ຺ໂຖ.

ຕິຐານສຸຕ຺ຕວຓ຺ຓນາ ນິຏ຺ຐິຕາ.