໔. ອຸປ຺ປາທາສຸຕ຺ຕວຓ຺ຓນາ

໑໓໗. ຈຕຸຕ຺ເຖ ອຸປ຺ປາທາ ວາ ຕຖາຄຕານນ຺ຕິ ຕຖາຄຕານໍ ອຸປ຺ປາເທປິ ເວເນຍ຺ຍປຸຄ຺ຄລານໍ ມຄ຺ຄຜລຸປ຺ປຕ຺ຕິ ວິຍ ສງ຺ຂາຣານໍ ອນິຈ຺ຈາທິສຠາໂວ ນ ຕຖາຄຕຸປ຺ປາທາຍຕ຺ໂຕ, ອຖ ໂຂ ຕຖາຄຕານໍ ອຸປ຺ປາເທປິ ອນຸປ຺ປາເທປິ ໂຫຕິເມວາຕິ ວຸຕ຺ຕໍ ໂຫຕິ. ຐິຕາວ ສາ ຘາຕູຕິ ຐິໂຕ ເອວ ໂສ ອນິຈ຺ຈສຠາໂວ ພ຺ຍຠິຈາຣາຠາວໂຕ ນ ກທາຈິ ສງ຺ຂາຣາ ອນິຈ຺ຈາ ນ ໂຫຕິ. ກາມໍ ອສງ຺ຂຕາ ວິຍ ຘາຕຸ ນ ນິຈ຺ໂຈ ໂສ ສຠາໂວ, ຕຖາປິ ສພ຺ພກາລິໂກເຍວາຕິ ອຘິປ຺ປາໂຍ.

ອປໂຣ ນໂຍ – ຐິຕາວ ສາ ຘາຕູຕິ ‘‘ສພ຺ເພ ສງ຺ຂາຣາ ອນິຈ຺ຈາ’’ຕິ ເອສາ ຘາຕຸ ເອສ ສຠາໂວ ຕຖາຄຕານໍ ອຸປ຺ປາທໂຕ ປຸພ຺ເພ ອຸທ຺ຘຎ຺ຈ ອປ຺ປຏິວິຊ຺ຌິຍມາໂນ ນ ຕຖາຄເຕຫິ ອຸປ຺ປາທິໂຕ, ອຖ ໂຂ ສພ຺ພກາລໍ ສພ຺ເພ ສງ຺ຂາຣາ ອນິຈ຺ຈາ, ຐິຕາວ ສາ ຘາຕຸ, ເກວລໍ ປນ ສຍມ຺ຠຸຎາເຓນ ອຠິສມ຺ພຸຊ຺ຌນໂຕ ‘‘ອຍໍ ຘມ຺ໂມ ຕຖາຄເຕນ ອຠິສມ຺ພຸທ຺ໂຘ’’ຕິ ປເວທນໂຕ ຈ ຕຖາຄໂຕ ຘມ຺ມສ຺ສາມີຕິ ວຸຈ຺ຈຕິ ອປຸພ຺ພສ຺ສ ຕສ຺ສ ອຸປ຺ປາທນໂຕ. ເຕນ ວຸຕ຺ຕໍ ‘‘ຐິຕາວ ສາ ຘາຕູ’’ຕິ.

ອຠິສມ຺ພຸຊ຺ຌຕີຕິ ຎາເຓນ ອຠິສມ຺ພຸຊ຺ຌຕິ. ອຠິສເມຕີຕິ ຎາເຓນ ອຠິສມາຄຈ຺ຉຕິ. ອາຈິກ຺ຂຕີຕິ ກເຖຕິ. ເທເສຕີຕິ ທສ຺ເສຕິ. ປຎ຺ຎາເປຕີຕິ ຊານາເປຕິ. ປຏ຺ຐເປຕີຕິ ຎາຓມຸເຂ ຐເປຕິ. ວິວຣຕີຕິ ວິວຣິຕ຺ວາ ທສ຺ເສຕິ. ວິຠຊຕີຕິ ວິຠາຄໂຕ ທສ຺ເສຕິ. ອຸຕ຺ຕານີກໂຣຕີຕິ ປາກຏໍ ກໂຣຕິ.

ອຖ ວາ ອຠິສມ຺ພຸຊ຺ຌຕີຕິ ປຈ຺ຈກ຺ຂກຣເຓນ ອຠິມຸຂໍ ພຸຊ຺ຌຕິ, ຍາຖາວໂຕ ປຏິວິຊ຺ຌຕິ. ຕໂຕ ເອວ ອຠິສເມຕິ ອຠິມຸຂໍ ສມາຄຈ຺ຉຕິ. ອາທິໂຕ ກເຖນ຺ໂຕ ອາຈິກ຺ຂຕິ, ອຸທ຺ທິສຕີຕິ ອຕ຺ໂຖ. ຕເມວ ອຸທ຺ເທສໍ ປຣິໂຍສາເປນ຺ໂຕ ເທເສຕິ. ຍຖາອຸທ຺ທິຏ຺ຐມຕ຺ຖໍ ນິທສ຺ສນວເສນ ປກາເຣຫິ ຎາເປນ຺ໂຕ ປຎ຺ຎາເປຕິ. ປກາເຣຫິ ເອຕມຕ຺ຖໍ ປຕິຏ຺ຐເປນ຺ໂຕ ປຏ຺ຐເປຕິ. ຍຖາອຸທ຺ທິຏ຺ຐໍ ປຏິນິທສ຺ສນວເສນ ວິວຣຕິ ວິຠຊຕິ. ວິວຏໍ ວິຠຕ຺ຕຎ຺ຈ ອຕ຺ຖໍ ເຫຕູທາຫຣຓທສ຺ສເນຫິ ປາກຏໍ ກໂຣນ຺ໂຕ ອຸຕ຺ຕານີກໂຣຕິ.

ອຸປ຺ປາທາສຸຕ຺ຕວຓ຺ຓນາ ນິຏ຺ຐິຕາ.