(໑໔) ໔. ໂຍຘາຊີວວຄ຺ໂຄ

໑. ໂຍຘາຊີວສຸຕ຺ຕວຓ຺ຓນາ

໑໓໔. ຈຕຸຕ຺ຖສ຺ສ ປຐເມ ຍຸຊ຺ຌນໍ ໂຍໂຘ, ໂສ ອາຊີໂວ ເອຕສ຺ສາຕິ ໂຍຘາຊີໂວ. ຍຸທ຺ຘມຸປຊີວຕີຕິ ວາ ເອຕສ຺ມິໍ ອຕ຺ເຖ ໂຍຘາຊີໂວຕິ ນິຣຸຕ຺ຕິນເຍນ ປທສິທ຺ຘິ ເວທິຕພ຺ພາ. ເຕນາຫ ‘‘ຍຸທ຺ຘໍ ອຸປຊີວຕີຕິ ໂຍຘາຊີໂວ’’ຕິ. ສຫ…ເປ… ປສ຺ສຕີຕິ ປຸພ຺ພຠາເຄ ວິປສ຺ສນາປຎ຺ຎາຍ ສມ຺ມສນວເສນ, ມຄ຺ຄກ຺ຂເຓ ອຠິສມຍວເສນ ອຕ຺ຕປຈ຺ຈກ຺ເຂນ ຎາເຓນ ປສ຺ສຕິ.

ໂຍຘາຊີວສຸຕ຺ຕວຓ຺ຓນາ ນິຏ຺ຐິຕາ.

໒. ປຣິສາສຸຕ຺ຕວຓ຺ຓນາ

໑໓໕. ທຸຕິເຍ ອປ຺ປຏິປຸຈ຺ຉິຕ຺ວາ ວິນີຕາຕິ ‘‘ຕໍ ກິໍ ມຎ຺ຎຖ, ຠິກ຺ຂເວ, ຣູປໍ ນິຈ຺ຈໍ ວາ ອນິຈ຺ຈໍ ວາ’’ຕິອາທິນາ ອປ຺ປຏິປຸຈ຺ຉິຕ຺ວາ ເກວລໍ ຘມ຺ມເທສນາວເສເນວ ວິນີຕປຣິສາ. ທຸພ຺ພິນີຕປຣິສາຕິ ທຸກ຺ເຂນ ວິນີຕປຣິສາ. ປຸຈ຺ຉິຕ຺ວາ ວິນີຕາຕິ ‘‘ຕໍ ກິໍ ມຎ຺ຎຖ, ຠິກ຺ຂເວ’’ຕິອາທິນາ ປຸຈ຺ຉິຕ຺ວາ ອນຸມຕິຄ຺ຄຫຓວເສນ ວິນີຕາ. ສຸວິນີຕປຣິສາຕິ ສຸເຂນ ວິນີຕປຣິສາ. ອນຸມຕິຄ຺ຄຫຓວເສນ ວິນຍນຎ຺ຫິ ນ ທຸກ຺ກຣໍ ໂຫຕິ.

ປຣິສາສຸຕ຺ຕວຓ຺ຓນາ ນິຏ຺ຐິຕາ.

໔. ອຸປ຺ປາທາສຸຕ຺ຕວຓ຺ຓນາ

໑໓໗. ຈຕຸຕ຺ເຖ ອຸປ຺ປາທາ ວາ ຕຖາຄຕານນ຺ຕິ ຕຖາຄຕານໍ ອຸປ຺ປາເທປິ ເວເນຍ຺ຍປຸຄ຺ຄລານໍ ມຄ຺ຄຜລຸປ຺ປຕ຺ຕິ ວິຍ ສງ຺ຂາຣານໍ ອນິຈ຺ຈາທິສຠາໂວ ນ ຕຖາຄຕຸປ຺ປາທາຍຕ຺ໂຕ, ອຖ ໂຂ ຕຖາຄຕານໍ ອຸປ຺ປາເທປິ ອນຸປ຺ປາເທປິ ໂຫຕິເມວາຕິ ວຸຕ຺ຕໍ ໂຫຕິ. ຐິຕາວ ສາ ຘາຕູຕິ ຐິໂຕ ເອວ ໂສ ອນິຈ຺ຈສຠາໂວ ພ຺ຍຠິຈາຣາຠາວໂຕ ນ ກທາຈິ ສງ຺ຂາຣາ ອນິຈ຺ຈາ ນ ໂຫຕິ. ກາມໍ ອສງ຺ຂຕາ ວິຍ ຘາຕຸ ນ ນິຈ຺ໂຈ ໂສ ສຠາໂວ, ຕຖາປິ ສພ຺ພກາລິໂກເຍວາຕິ ອຘິປ຺ປາໂຍ.

ອປໂຣ ນໂຍ – ຐິຕາວ ສາ ຘາຕູຕິ ‘‘ສພ຺ເພ ສງ຺ຂາຣາ ອນິຈ຺ຈາ’’ຕິ ເອສາ ຘາຕຸ ເອສ ສຠາໂວ ຕຖາຄຕານໍ ອຸປ຺ປາທໂຕ ປຸພ຺ເພ ອຸທ຺ຘຎ຺ຈ ອປ຺ປຏິວິຊ຺ຌິຍມາໂນ ນ ຕຖາຄເຕຫິ ອຸປ຺ປາທິໂຕ, ອຖ ໂຂ ສພ຺ພກາລໍ ສພ຺ເພ ສງ຺ຂາຣາ ອນິຈ຺ຈາ, ຐິຕາວ ສາ ຘາຕຸ, ເກວລໍ ປນ ສຍມ຺ຠຸຎາເຓນ ອຠິສມ຺ພຸຊ຺ຌນໂຕ ‘‘ອຍໍ ຘມ຺ໂມ ຕຖາຄເຕນ ອຠິສມ຺ພຸທ຺ໂຘ’’ຕິ ປເວທນໂຕ ຈ ຕຖາຄໂຕ ຘມ຺ມສ຺ສາມີຕິ ວຸຈ຺ຈຕິ ອປຸພ຺ພສ຺ສ ຕສ຺ສ ອຸປ຺ປາທນໂຕ. ເຕນ ວຸຕ຺ຕໍ ‘‘ຐິຕາວ ສາ ຘາຕູ’’ຕິ.

ອຠິສມ຺ພຸຊ຺ຌຕີຕິ ຎາເຓນ ອຠິສມ຺ພຸຊ຺ຌຕິ. ອຠິສເມຕີຕິ ຎາເຓນ ອຠິສມາຄຈ຺ຉຕິ. ອາຈິກ຺ຂຕີຕິ ກເຖຕິ. ເທເສຕີຕິ ທສ຺ເສຕິ. ປຎ຺ຎາເປຕີຕິ ຊານາເປຕິ. ປຏ຺ຐເປຕີຕິ ຎາຓມຸເຂ ຐເປຕິ. ວິວຣຕີຕິ ວິວຣິຕ຺ວາ ທສ຺ເສຕິ. ວິຠຊຕີຕິ ວິຠາຄໂຕ ທສ຺ເສຕິ. ອຸຕ຺ຕານີກໂຣຕີຕິ ປາກຏໍ ກໂຣຕິ.

ອຖ ວາ ອຠິສມ຺ພຸຊ຺ຌຕີຕິ ປຈ຺ຈກ຺ຂກຣເຓນ ອຠິມຸຂໍ ພຸຊ຺ຌຕິ, ຍາຖາວໂຕ ປຏິວິຊ຺ຌຕິ. ຕໂຕ ເອວ ອຠິສເມຕິ ອຠິມຸຂໍ ສມາຄຈ຺ຉຕິ. ອາທິໂຕ ກເຖນ຺ໂຕ ອາຈິກ຺ຂຕິ, ອຸທ຺ທິສຕີຕິ ອຕ຺ໂຖ. ຕເມວ ອຸທ຺ເທສໍ ປຣິໂຍສາເປນ຺ໂຕ ເທເສຕິ. ຍຖາອຸທ຺ທິຏ຺ຐມຕ຺ຖໍ ນິທສ຺ສນວເສນ ປກາເຣຫິ ຎາເປນ຺ໂຕ ປຎ຺ຎາເປຕິ. ປກາເຣຫິ ເອຕມຕ຺ຖໍ ປຕິຏ຺ຐເປນ຺ໂຕ ປຏ຺ຐເປຕິ. ຍຖາອຸທ຺ທິຏ຺ຐໍ ປຏິນິທສ຺ສນວເສນ ວິວຣຕິ ວິຠຊຕິ. ວິວຏໍ ວິຠຕ຺ຕຎ຺ຈ ອຕ຺ຖໍ ເຫຕູທາຫຣຓທສ຺ສເນຫິ ປາກຏໍ ກໂຣນ຺ໂຕ ອຸຕ຺ຕານີກໂຣຕິ.

ອຸປ຺ປາທາສຸຕ຺ຕວຓ຺ຓນາ ນິຏ຺ຐິຕາ.

໕-໑໐. ເກສກມ຺ພລສຸຕ຺ຕາທິວຓ຺ຓນາ

໑໓໘-໑໔໓. ປຎ຺ຈເມ ຕນ຺ຕາວຸຕານໍ ວຕ຺ຖານນ຺ຕິ ອິທໍ ‘‘ຍານິ ການິຈີ’’ຕິ ອິມິນາ ສມານາຘິກຣຓນ຺ຕິ ອາຫ ‘‘ປຈ຺ຈຕ຺ເຕ ສາມິວຈນ’’ນ຺ຕິ. ວາຍິຕານນ຺ຕິ ວີຕານໍ. ລາມໂກຕິ ນິຫີໂນ, ມກ຺ຂລິ ໂມຆປຸຣິໂສຕິ ເອຕ຺ຖ ມກ຺ຂລີຕິ ຕສ຺ສ ນາມໍ. ຕໍ ກິຣ ສກທ຺ທມາຍ ຠູມິຍາ ເຕລຆຏໍ ຄເຫຕ຺ວາ ຄຈ຺ຉນ຺ຕໍ, ‘‘ຕາຕ, ມາ ຂລີ’’ຕິ ສາມິໂກ ອາຫ. ໂສ ປມາເທນ ຂລິຕ຺ວາ ປຕິຕ຺ວາ ສາມິກສ຺ສ ຠເຍນ ປລາຍິຕຸໍ ອາຣທ຺ໂຘ. ສາມິໂກ ອຸປຘາວິຕ຺ວາ ນໍ ທຸສ຺ສກຓ຺ເຓ ອຄ຺ຄເຫສິ, ສາຏກໍ ຉຑ຺ເຑຕ຺ວາ ອເຈລໂກ ຫຸຕ຺ວາ ປລາຍິ. ໂສ ປຓ຺ເຓນ ວາ ຕິເຓນ ວາ ປຏິຈ຺ຉາເທຕຸມ຺ປິ ອຊານນ຺ໂຕ ຊາຕຣູເປເນວ ເອກໍ ຄາມໍ ປາວິສິ. ມນຸສ຺ສາ ຕໍ ທິສ຺ວາ ‘‘ອຍໍ ສມໂຓ ອຣຫາ ອປ຺ປິຈ຺ໂຉ, ນຕ຺ຖິ ອິມິນາ ສທິໂສ’’ຕິ ປູວຠຕ຺ຕາທີນິ ຄເຫຕ຺ວາ ອຸປສງ຺ກມນ຺ຕິ. ໂສ ‘‘ມຍ຺ຫໍ ສາຏກໍ ອນິວຕ຺ຖຠາເວນ ອິທໍ ອຸປ຺ປນ຺ນ’’ນ຺ຕິ ຕໂຕ ປຏ຺ຐາຍ ສາຏກໍ ລຠິຕ຺ວາປິ ນ ນິວາເສສິ, ຕເທວ ຈ ປພ຺ພຊ຺ຊໍ ອຄ຺ຄເຫສິ. ຕສ຺ສ ສນ຺ຕິເກ ອຎ຺ເຎປິ ອຎ຺ເຎປີຕິ ປຎ຺ຈສຕາ ມນຸສ຺ສາ ປພ຺ພຊິໍສຸ. ຕໍ ສນ຺ຘາຍາຫ ‘‘ມກ຺ຂລິ ໂມຆປຸຣິໂສ’’ຕິ. ຉຏ຺ຐາທີນິ ອຸຕ຺ຕານຕ຺ຖານິ ເອວ.

ເກສກມ຺ພລສຸຕ຺ຕາທິວຓ຺ຓນາ ນິຏ຺ຐິຕາ.

໑໑-໑໓. ປຐມໂມຣນິວາປສຸຕ຺ຕາທິວຓ຺ຓນາ

໑໔໔-໑໔໖. ເອກາທສເມ ອກຸປ຺ປຘມ຺ມຕາຍ ຂຍວຍສງ຺ຂາຕໍ ອນ຺ຕໍ ອຕີຕາຕິ ອຈ຺ຈນ຺ຕາ, ເອວໍ ອປຣິຫາຍນສຠາວຕ຺ຕາ ອຈ຺ຈນ຺ຕາ ນິຏ຺ຐາ ອສ຺ສາຕິ ອຈ຺ຈນ຺ຕນິຏ຺ໂຐ. ເຕນາຫ ‘‘ອນ຺ຕໍ ອຕິກ຺ກນ຺ຕນິຏ຺ໂຐ’’ຕິອາທິ. ນ ຫິ ປຏິວິທ຺ຘສ຺ສ ໂລກຸຕ຺ຕຣຘມ຺ມສ຺ສ ທສ຺ສນໍ ກຸປ຺ປນໍ ນາມ ອຕ຺ຖິ. ຘຸວນິຏ຺ໂຐຕິ ສຕຕນິຏ຺ໂຐ. ອຈ຺ຈນ຺ຕເມວ ຈຕູຫິ ໂຍເຄຫິ ເຂໂມ ເອຕສ຺ສ ອຕ຺ຖີຕິ ອຈ຺ຈນ຺ຕໂຍຄກ຺ເຂມີ, ນິຈ຺ຈໂຍຄກ຺ເຂມີຕິ ອຕ຺ໂຖ. ມຄ຺ຄພ຺ຣຫ຺ມຈຣິຍສ຺ສ ວຸສິຕຕ຺ຕາ ຕສ຺ສ ອວິຫາຍນສຠາວຕ຺ຕາ ອຈ຺ຈນ຺ຕໍ ພ຺ຣຫ຺ມຈາຣີຕິ ອຈ຺ຈນ຺ຕພ຺ຣຫ຺ມຈາຣີ, ນິຈ຺ຈພ຺ຣຫ຺ມຈາຣີຕິ ອຕ຺ໂຖ. ປຣິໂຍສານນ຺ຕິ ພ຺ຣຫ຺ມຈຣິຍປຣິໂຍສານໍ ວຏ຺ຏທຸກ຺ຂປຣິໂຍສານຎ຺ຈ. ອຈ຺ຈນ຺ຕໍ ປຣິໂຍສານມສ຺ສາຕິ ອຈ຺ຈນ຺ຕປຣິໂຍສາໂນ. ທ຺ວາທສມເຕຣສມານິ ອຸຕ຺ຕານຕ຺ຖາເນວ.

ປຐມໂມຣນິວາປສຸຕ຺ຕາທິວຓ຺ຓນາ ນິຏ຺ຐິຕາ.

ໂຍຘາຊີວວຄ຺ຄວຓ຺ຓນາ ນິຏ຺ຐິຕາ.

໑໔໗-໑໕໖. ມງ຺ຄລວຄ຺ໂຄ ອຸຕ຺ຕານຕ຺ໂຖເຍວ.

ຕຕິຍປຓ຺ຓາສກໍ ນິຏ຺ຐິຕໍ.