(໑໒) ໒. ອາປາຍິກວຄ຺ໂຄ

໑. ອາປາຍິກສຸຕ຺ຕວຓ຺ຓນາ

໑໑໔. ທຸຕິຍສ຺ສ ປຐເມ ອປາເຍສຸ ນິພ຺ພຕ຺ຕນສີລຕາຍ ອປາຍູປຄາ ອາປາຍິກາຕິ ອາຫ ‘‘ອປາຍໍ ຄຈ຺ຉິສ຺ສນ຺ຕີຕິ ອາປາຍິກາ’’ຕິ. ອຎ຺ເຎ ພ຺ຣຫ຺ມຈາຣິໂນ ສຸນິວຕ຺ເຖ ສຸປາຣຸເຕ ສຸມ຺ຠກປຕ຺ຕຘເຣ ຄາມນິຄມຣາຊຘານີສຸ ປິຓ຺ຑາຍ ຈຣິຕ຺ວາ ຊີວິກໍ ກປ຺ເປນ຺ເຕ ທິສ຺ວາ ສຍມ຺ປິ ຕາທິເສນ ອາກາເຣນ ຕຖາປຏິປຊ຺ຊນໂຕ ‘‘ອຫໍ ພ຺ຣຫ຺ມຈາຣີ’’ຕິ ປຏິຎ຺ຎໍ ເທນ຺ໂຕ ວິຍ ໂຫຕີຕິ ອາຫ ‘‘ພ຺ຣຫ຺ມຈາຣິປຏິຎ຺ໂຎຕິ ພ຺ຣຫ຺ມຈາຣິປຏິຣູປໂກ’’ຕິ. ‘‘ອຫມ຺ປິ ຠິກ຺ຂູ’’ຕິ ວຕ຺ວາ ອຸໂປສຖງ຺ຄາທີນິ ປວິສນ຺ໂຕ ປນ ພ຺ຣຫ຺ມຈາຣິປຏິຎ຺ໂຎ ໂຫຕິເຍວ, ຕຖາ ສງ຺ຆິກໍ ລາຠໍ ຄຓ຺ຫນ຺ໂຕ. ເຕນາຫ ‘‘ເຕສໍ ວາ…ເປ… ເອວໍປຏິຎ຺ໂຎ’’ຕິ. ອກ຺ໂກສຕີຕິ ‘‘ອສ຺ສມໂຓສິ, ສມຓປຏິຎ຺ໂຎສີ’’ຕິອາທິນາ ອກ຺ໂກສຕິ. ປຣິຠາສຕີຕິ ‘‘ໂສ ຕ຺ວໍ ‘ໂຫຕຸ, ມຸຓ຺ຑກສມໂຓ ອຫ’ນ຺ຕິ ມຎ຺ຎສິ, ອິທານິ ເຕ ອສ຺ສມຓຠາວໍ ອາໂຣເປສ຺ສາມີ’’ຕິອາທິນາ ວທນ຺ໂຕ ປຣິຠາສຕິ.

ກິເລສກາໂມປິ ອສ຺ສາທິຍມາໂນ ວຕ຺ຖຸກາມນ຺ໂຕຄໂຘເຍວ, ກິເລສກາມວເສນ ຈ ເຕສໍ ອສ຺ສາທນໍ ສິຍາຕິ ອາຫ ‘‘ກິເລສກາເມນ ວຕ຺ຖຸກາເມ ເສວນ຺ຕສ຺ສາ’’ຕິ. ກິເລສກາເມນາຕິ ກຣຓຕ຺ເຖ ກຣຓວຈນໍ. ນຕ຺ຖິ ໂທໂສຕິ ອສ຺ສາເທຕ຺ວາ ວິສຍປຣິໂຠເຄ ນຕ຺ຖິ ອາທີນໂວ, ຕປ຺ປຈ຺ຈຍາ ນ ໂກຈິ ອນ຺ຕຣາໂຍຕິ ອຘິປ຺ປາໂຍ. ປາຕພ຺ພຕໍ ອາປຊ຺ຊຕີຕິ ປຣິຠຸຎ຺ຊນກຕໍ ອຸປຄຈ຺ຉຕິ. ປຣິໂຠຄຕ຺ໂຖ ຫິ ອຍໍ ປາ-ສທ຺ໂທ, ກຕ຺ຕຸສາຘໂນ ຈ ຕພ຺ພ-ສທ຺ໂທ, ຍຖາຣຸຈິ ປຣິຠຸຎ຺ຊຕີຕິ ອຕ຺ໂຖ. ປິວິຕພ຺ພຕໍ ປຣິຠຸຎ຺ຊິຕພ຺ພຕນ຺ຕິ ເອຕ຺ຖາປິ ກຕ຺ຕຸວເສເນວ ອຕ຺ໂຖ ເວທິຕພ຺ໂພ.

ອາປາຍິກສຸຕ຺ຕວຓ຺ຓນາ ນິຏ຺ຐິຕາ.

໒. ທຸລ຺ລຠສຸຕ຺ຕວຓ຺ຓນາ

໑໑໕. ທຸຕິເຍ ປເຣນ ກຕສ຺ສ ອຸປກາຣສ຺ສ ອນຸຣູປປ຺ປວຕ຺ຕິ ອຕ຺ຕນິ ກຕໍ ອຸປກາຣໍ ອຸປກາຣໂຕ ຊານນ຺ໂຕ ເວທິຍນ຺ໂຕ ກຕຎ຺ຎູ ກຕເວທີຕິ ອາຫ ‘‘ອິມິນາ ມຍ຺ຫໍ ກຕ’’ນ຺ຕິອາທິ.

ທຸລ຺ລຠສຸຕ຺ຕວຓ຺ຓນາ ນິຏ຺ຐິຕາ.

໓. ອປ຺ປເມຍ຺ຍສຸຕ຺ຕວຓ຺ຓນາ

໑໑໖. ຕຕິເຍ ສຸເຂນ ເມຕພ຺ໂພຕິ ຍຖາ ປຣິຕ຺ຕສ຺ສ ອຸທກສ຺ສ ສຸເຂນ ປມາຓໍ ຄຍ຺ຫຕິ, ເອວເມວ ‘‘ອຸທ຺ຘໂຕ’’ຕິອາທິນາ ຍຖາວຸຕ຺ເຕຫິ ອຄຸຓງ຺ເຄຫິ ສມນ຺ນາຄຕສ຺ສ ສຸເຂນ ປມາຓໍ ຄຍ຺ຫຕີຕິ, ສຸເຂນ ເມຕພ຺ໂພ. ທຸກ຺ເຂນ ເມຕພ຺ໂພຕິ ຍຖາ ມຫາສມຸທ຺ທສ຺ສ ທຸກ຺ເຂນ ປມາຓໍ ຄຍ຺ຫຕິ, ເອວເມວ ‘‘ອນຸທ຺ຘໂຕ’’ຕິອາທິນາ ທສ຺ສິເຕຫິ ຄຸຓງ຺ເຄຫິ ສມນ຺ນາຄຕສ຺ສ ທຸກ຺ເຂນ ປມາຓໍ ຄຍ຺ຫຕິ, ‘‘ອນາຄາມີ ນຸ ໂຂ ຂີຓາສໂວ ນຸ ໂຂ’’ຕິ ວຕ຺ຕພ຺ພຕໍ ຄຈ຺ຉຕິ, ເຕເນສ ທຸກ຺ເຂນ ເມຕພ຺ໂພ. ປເມຕຸໍ ນ ສກ຺ໂກຕີຕິ ຍຖາ ອາກາສສ຺ສ ນ ສກ຺ກາ ປມາຓໍ ຄເຫຕຸໍ, ເອວໍ ຂີຓາສວສ຺ສ, ເຕເນສ ປເມຕຸໍ ນ ສກ຺ກາຕິ ອປ຺ປເມຍ຺ໂຍ.

ສາຣາຠາເວນ ຕຸຈ຺ຉຕ຺ຕາ ນໂຬ ວິຍ ນໂຬ, ມາໂນຕິ ອາຫ ‘‘ອຸນ຺ນໂຬຕິ ອຸຄ຺ຄຕນໂຬ’’ຕິ, ອຸຏ຺ຐິຕຕຸຈ຺ຉມາໂນຕິ ວຸຕ຺ຕໍ ໂຫຕິ. ເຕນາຫ ‘‘ຕຸຈ຺ຉມານໍ ອຸກ຺ຂິປິຕ຺ວາ ຐິໂຕຕິ ອຕ຺ໂຖ’’ຕິ. ມໂນ ຫິ ເສຍ຺ຍສ຺ສ ເສຍ຺ໂຍຕິ ສທິໂສຕິ ຈ ປວຕ຺ຕິຍາ ວິເສສໂຕ ຕຸຈ຺ໂຉ. ຈາປລ຺ເລນາຕິ ຈປລຠາເວນ, ຕຓ຺ຫາໂລລຸປ຺ເປນາຕິ ອຕ຺ໂຖ. ມຸຂໂຣຕິ ມຸເຂນ ຜຣຸໂສ, ຜຣຸສວາໂຈຕິ ອຕ຺ໂຖ. ວິກິຓ຺ຓວາໂຈຕິ ວິສຏວຈໂນ ສມ຺ຜປ຺ປລາປິຕາຍ ອປຣິຍນ຺ຕວຈໂນ. ເຕນາຫ ‘‘ອສຎ຺ຎຕວຈໂນ’’ຕິ, ທິວສມ຺ປິ ນິຣຕ຺ຖກວຈນໍ ປລາປີຕິ ວຸຕ຺ຕໍ ໂຫຕິ. ຈິຕ຺ເຕກຄ຺ຄຕາຣຫິໂຕຕິ ອຸປຈາຣປ຺ປນາສມາຘິຣຫິໂຕ ຈຓ຺ຑໂສເຕ ພທ຺ຘນາວາ ວິຍ ອນວຏ຺ຐິຕກິຣິໂຍ. ຠນ຺ຕຈິຕ຺ໂຕຕິ ອນວຏ຺ຐິຕຈິຕ຺ໂຕ ປຓ຺ຓາຣຸຬ຺ຫວາລມິຄສທິໂສ. ວິວຏິນ຺ທ຺ຣິໂຍຕິ ສໍວຣາຠາເວນ ຄິຫິກາເລ ວິຍ ອສໍວຸຕຈກ຺ຂາທິອິນ຺ທ຺ຣິໂຍ.

ອປ຺ປເມຍ຺ຍສຸຕ຺ຕວຓ຺ຓນາ ນິຏ຺ຐິຕາ.

໔. ອາເນຎ຺ຊສຸຕ຺ຕວຓ຺ຓນາ

໑໑໗. ຈຕຸຕ຺ເຖ ສຫ ພ຺ຍຍຕິ ຄຈ຺ຉຕີຕິ ສຫພ຺ໂຍ, ສຫປວຕ຺ຕນໂກ. ຕສ຺ສ ຠາໂວ ສຫພ຺ຍຕາ, ສຫປວຕ຺ຕີຕິ ອາຫ ‘‘ສຫຠາວໍ ອຸປປຊ຺ຊຕີ’’ຕິ. ‘‘ຍາວຕກໍ ເຕສໍ ເທວານໍ ອາຍຸປ຺ປມາຓໍ, ຕໍ ສພ຺ພໍ ເຂເປຕ຺ວາ ນິຣຍມ຺ປິ ຄຈ຺ຉຕີ’’ຕິອາທິວຈນໂຕ ອຣູປຠວໂຕ ຈຸຕສ຺ສ ອປາຍູປປຕ຺ຕິ ວຸຕ຺ຕາ ວິຍ ທິສ຺ສຕີຕິ ຕນ຺ນິວຕ຺ຕນຕ຺ຖໍ ຠຄວໂຕ ອຘິປ຺ປາຍໍ ວິວຣນ຺ໂຕ ‘‘ສນ຺ຘາຍຠາສິຕມິທໍ ວຈນ’’ນ຺ຕິ ທີເປຕິ ‘‘ນິຣຍາທີຫິ ອວິປ຺ປມຸຕ຺ຕຕ຺ຕາ’’ຕິອາທິນາ. ນ ຫິ ຕສ຺ສ ອຸປຈາຣຊ຺ຌານໂຕ ພລວຕຣໍ ອກຸສລໍ ອຕ຺ຖີຕິ. ອິມິນາ ຕໂຕ ຈວນ຺ຕານໍ ອຸປຈາຣຊ຺ຌານເມວ ປຏິສນ຺ຘິຊນກໍ ກມ຺ມນ຺ຕິ ທີເປຕິ. ອຘິກໍ ປຍສຕິ ປຍຸຊ຺ຊຕິ ເອເຕນາຕິ ອຘິປ຺ປຍາໂສ, ສວິເສສໍ ອິຕິກຕ຺ຕພ຺ພກິຣິຍາ. ເຕນາຫ ‘‘ອຘິກປ຺ປໂຍໂຄ’’ຕິ. ເສສເມຕ຺ຖ ອຸຕ຺ຕານເມວ.

ອາເນຎ຺ຊສຸຕ຺ຕວຓ຺ຓນາ ນິຏ຺ຐິຕາ.

໕. ວິປຕ຺ຕິສມ຺ປທາສຸຕ຺ຕວຓ຺ຓນາ

໑໑໘. ປຎ຺ຈເມ ທິນ຺ນນ຺ຕິ ເທຍ຺ຍຘມ຺ມສີເສນ ທານໍ ວຸຕ຺ຕນ຺ຕິ ອາຫ ‘‘ທິນ຺ນສ຺ສ ຜລາຠາວໍ ສນ຺ຘາຍ ວທຕີ’’ຕິ. ທິນ຺ນໍ ປນ ອນ຺ນາທິວຕ຺ຖຸໍ ກຖໍ ປຏິກ຺ຂິປຕິ. ເອສ ນໂຍ ‘‘ຍິຏ຺ຐໍ ຫຸຕ’’ນ຺ຕິ ເອຕ຺ຖາປິ. ມຫາຍາໂຄຕິ ສພ຺ພສາຘາຣຓໍ ມຫາທານໍ. ປເຫຓກສກ຺ກາໂຣຕິ ປາຫຸນການໍ ກາຕພ຺ພສກ຺ກາໂຣ. ຜລນ຺ຕິ ອານິສໍສຜລໍ ນິສ຺ສນ຺ທຜລຎ຺ຈ. ວິປາໂກຕິ ສທິສຜລໍ. ປຣໂລເກ ຐິຕສ຺ສ ອຍໍ ໂລໂກ ນຕ຺ຖີຕິ ປຣໂລເກ ຐິຕສ຺ສ ກມ຺ມຸນາ ລທ຺ຘພ຺ໂພ ອຍໍ ໂລໂກ ນ ໂຫຕິ. ອິຘໂລເກ ຐິຕສ຺ສປິ ປຣໂລໂກ ນຕ຺ຖີຕິ ອິຘໂລເກ ຐິຕສ຺ສ ກມ຺ມຸນາ ລທ຺ຘພ຺ໂພ ປຣໂລໂກ ນ ໂຫຕິ. ຕຕ຺ຖ ກາຣຓມາຫ ‘‘ສພ຺ເພ ຕຕ຺ຖ ຕຕ຺ເຖວ ອຸຈ຺ຉິຊ຺ຊນ຺ຕີ’’ຕິ. ອິເມ ສຕ຺ຕາ ຍຕ຺ຖ ຍຕ຺ຖ ຠວໂຍນິຄຕິອາທີສຸ ຐິຕາ, ຕຕ຺ຖ ຕຕ຺ເຖວ ອຸຈ຺ຉິຊ຺ຊນ຺ຕິ, ທ຺ວຍວິນາເສນ ວິນສ຺ສນ຺ຕິ.

ຜລາຠາວວເສນາຕິ ມາຕາປິຕູສຸ ສມ຺ມາປຏິປຕ຺ຕິມິຈ຺ຉາປຏິປຕ຺ຕີນໍ ຜລສ຺ສ ອຠາວວເສນ ‘‘ນຕ຺ຖິ ມາຕາ, ນຕ຺ຖິ ປິຕາ’’ຕິ ວທຕິ, ນ ມາຕາປິຕູນໍ, ນາປິ ເຕສຸ ສມ຺ມາປຏິປຕ຺ຕິມິຈ຺ຉາປຏິປຕ຺ຕີນໍ ອຠາວວເສນ ເຕສໍ ໂລກປຈ຺ຈກ຺ຂຕ຺ຕາ. ປຸພ຺ພຸຬກສ຺ສ ວິຍ ອິເມສໍ ສຕ຺ຕານໍ ອຸປ຺ປາໂທ ນາມ ເກວໂລ, ນ ຈ ຂນປຸພ຺ພໂກຕິ ທສ຺ສນຕ຺ຖໍ ‘‘ນຕ຺ຖິ ສຕ຺ຕາ ໂອປປາຕິກາ’’ຕິ ວຸຕ຺ຕນ຺ຕິ ອາຫ ‘‘ຈວິຕ຺ວາ ອຸປ຺ປຊ຺ຊນກາ ສຕ຺ຕາ ນາມ ນຕ຺ຖີຕິ ວທຕີ’’ຕິ. ສຍໍ ອຠິຎ຺ຎາ ສຈ຺ຉິກຕ຺ວາ ປເວເທນ຺ຕີຕິ ເຍ ອິມຎ຺ຈ ໂລກໍ ປຣຎ຺ຈ ໂລກໍ ອຠິວິສິຏ຺ຐາຍ ປຎ຺ຎາຍ ສຍໍ ປຈ຺ຈກ຺ຂໍ ກຕ຺ວາ ປເວເທນ຺ຕິ, ເຕ ນຕ຺ຖີຕິ ສພ຺ພຎ຺ຎຸພຸທ຺ຘານໍ ອຠາວໍ ທີເປຕິ.

ວິປຕ຺ຕິສມ຺ປທາສຸຕ຺ຕວຓ຺ຓນາ ນິຏ຺ຐິຕາ.

໖-໗. ອປຓ຺ຓກສຸຕ຺ຕາທິວຓ຺ຓນາ

໑໑໙-໑໒໐. ຉຏ຺ເຐ ຉຫິ ຕເລຫິ ສມນ຺ນາຄໂຕ ປາສໂກຕິ ຈຕູສຸ ປສ຺ເສສຸ ຈຕ຺ຕາຣິ ຕລານິ, ທ຺ວີສຸ ໂກຏີສຸ ທ຺ເວ ຕລານີຕິ ເອວໍ ຉຫິ ຕເລຫິ ສມນ຺ນາຄໂຕ ປາສກກີຬາປສຸຕານໍ ມຓິສທິໂສ ປາສກວິເສໂສ. ສຕ຺ຕມໍ ອຸຕ຺ຕານເມວ.

ອປຓ຺ຓກສຸຕ຺ຕາທິວຓ຺ຓນາ ນິຏ຺ຐິຕາ.

໘. ປຐມໂສເຈຍ຺ຍສຸຕ຺ຕວຓ຺ຓນາ

໑໒໑. ອຏ຺ຐເມ ສຸຈິຠາໂວຕິ ກິເລສາສຸຈິວິຄເມນ ສຸທ຺ຘຠາໂວ ອສໍກິລິຏ຺ຐຠາໂວ, ອຕ຺ຖໂຕ ກາຍສຸຈຣິຕາທີນິ.

ປຐມໂສເຈຍ຺ຍສຸຕ຺ຕວຓ຺ຓນາ ນິຏ຺ຐິຕາ.

໙. ທຸຕິຍໂສເຈຍ຺ຍສຸຕ຺ຕວຓ຺ຓນາ

໑໒໒. ນວເມ ສມຸຈ຺ເຉທວເສນ ປຫີນສພ຺ພກາຍທຸຈ຺ຈຣິຕຕາຍ ກາເຍ, ກາເຍນ ວາ ສຸຈິ ກາຍສຸຈິ. ເຕນາຫ ‘‘ກາຍທ຺ວາເຣ’’ຕິອາທິ. ໂສເຈຍ຺ຍສມ຺ປນ຺ນນ຺ຕິ ປຏິປ຺ປສ຺ສທ຺ຘກິເລສຕ຺ຕາ ປຣິສຸທ຺ຘາຍ ໂສເຈຍ຺ຍສມ຺ປຕ຺ຕິຍາ ອຸເປຕໍ. ນິນ຺ຫາຕາ ອຄ຺ຄມຄ຺ຄສລິເລນ ວິກ຺ຂາລິຕາ ປາປາ ເອເຕນາຕິ ນິນ຺ຫາຕປາປໂກ, ຂີຓາສໂວ. ເຕນາຫ ‘‘ຂີຓາສໂວວ ກຖິໂຕ’’ຕິ.

ທຸຕິຍໂສເຈຍ຺ຍສຸຕ຺ຕວຓ຺ຓນາ ນິຏ຺ຐິຕາ.

໑໐. ໂມເນຍ຺ຍສຸຕ຺ຕວຓ຺ຓນາ

໑໒໓. ທສເມ ມຸນິໂນ ຠາວາ ໂມເນຍ຺ຍານິ, ເຍຫິ ຘມ຺ເມຫິ ອຸຠຍຫິຕມຸນນໂຕ ມຸນິ ນາມ ໂຫຕິ, ເຕ ມຸນິຠາວກຣາ ໂມເນຍ຺ຍາ ປຏິປທາ ຘມ຺ມາ ເອວ ວຸຕ຺ຕາ. ມຸນິໂນ ວາ ເອຕານິ ໂມເນຍ຺ຍານິ, ຍຖາວຸຕ຺ຕຘມ຺ມາ ເອວ. ຕຕ຺ຖ ຍສ຺ມາ ກາເຍນ ອກຕ຺ຕພ຺ພສ຺ສ ອກຣຓໍ, ກຕ຺ຕພ຺ພສ຺ສ ຈ ກຣຓໍ, ‘‘ອຕ຺ຖິ ອິມສ຺ມິໍ ກາເຍ ເກສາ’’ຕິອາທິນາ (ທີ. ນິ. ໒.໓໗໗; ມ. ນິ. ໑.໑໑໐; ສໍ. ນິ. ໔.໑໒໗; ຂຸ. ປາ. ໓.ທ຺ວຕ຺ຕິໍສາກາຣ) ກາຍສງ຺ຂາຕສ຺ສ ອາຣມ຺ມຓສ຺ສ ຊານນໍ, ກາຍສ຺ສ ຈ ສມຸທຍໂຕ ອຕ຺ຖງ຺ຄມໂຕ ອສ຺ສາທໂຕ ອາທີນວໂຕ ນິສ຺ສຣຓໂຕ ຈ ຍາຖາວໂຕ ປຣິຊານນຕາ, ຕຖາ ປຣິຊານນວເສນ ປນ ປວຕ຺ໂຕ ວິປສ຺ສນາມຄ຺ໂຄ, ເຕນ ຈ ກາເຍ ຉນ຺ທຣາຄສ຺ສ ປຊຫນໍ, ກາຍສງ຺ຂາຣໍ ນິໂຣເຘຕ຺ວາ ປຕ຺ຕພ຺ພສມາປຕ຺ຕິ ວາ, ສພ຺ເພ ເອເຕ ກາຍມຸເຂນ ປວຕ຺ຕາ ໂມເນຍ຺ຍປ຺ປຏິປທາ ຘມ຺ມາ ກາຍໂມເນຍ຺ຍໍ ນາມ. ຕສ຺ມາ ຕມຕ຺ຖໍ ທສ຺ເສຕຸໍ ‘‘ກຕມໍ ກາຍໂມເນຍ຺ຍໍ? ຕິວິຘກາຍທຸຈ຺ຈຣິຕສ຺ສ ປຫານໍ ກາຍໂມເນຍ຺ຍໍ, ຕິວິຘກາຍສຸຈຣິຕມ຺ປິ ກາຍໂມເນຍ຺ຍ’’ນ຺ຕິອາທິນາ (ມຫານິ. ໑໔) ປາຬິ ອາຄຕາ. ອິຘາປິ ເຕເນວ ປາຬິນເຍນ ອຕ຺ຖໍ ທສ຺ເສນ຺ໂຕ ‘‘ຕິວິຘກາຍທຸຈ຺ຈຣິຕປ຺ປຫານໍ ກາຍໂມເນຍ຺ຍໍ ນາມາ’’ຕິອາທິມາຫ.

ອິທານິ ‘‘ກຕມໍ ວຈີໂມເນຍ຺ຍໍ? ຈຕຸພ຺ພິຘວຈີທຸຈ຺ຈຣິຕສ຺ສ ປຫານໍ ວຈີໂມເນຍ຺ຍໍ, ຈຕຸພ຺ພິຘໍ ວຈີສຸຈຣິຕໍ, ວາຈາຣມ຺ມເຓ ຎາຓໍ, ວາຈາປຣິຎ຺ຎາ, ປຣິຎ຺ຎາສຫຄໂຕ ມຄ຺ໂຄ, ວາຈາຍ ຉນ຺ທຣາຄສ຺ສ ປຫານໍ, ວຈີສງ຺ຂາຣນິໂຣໂຘ ທຸຕິຍຊ຺ຌານສມາປຕ຺ຕິ ວຈີໂມເນຍ຺ຍ’’ນ຺ຕິ ອິມາຍ ປາຬິຍາ ວຸຕ຺ຕມຕ຺ຖໍ ອຕິທີເປນ຺ໂຕ ‘‘ວຈີໂມເນຍ຺ເຍປິ ເອເສວ ນໂຍ’’ຕິອາທິມາຫ. ຕຕ຺ຖ ໂຈປນວາຈຎ຺ເຈວ ສທ຺ທວາຈຎ຺ຈ ອາຣພ຺ຠ ປວຕ຺ຕາ ປຎ຺ຎາ ວາຈາຣມ຺ມເຓ ຎາຓໍ. ຕສ຺ສາ ວາຈາຍ ສມຸທຍາທິໂຕ ປຣິຊານນໍ ວາຈາປຣິຎ຺ຎາ.

‘‘ກຕມໍ ມໂນໂມເນຍ຺ຍໍ? ຕິວິຘມໂນທຸຈ຺ຈຣິຕສ຺ສ ປຫານໍ ມໂນໂມເນຍ຺ຍໍ, ຕິວິຘໍ ມໂນສຸຈ຺ຈຣິຕໍ, ມນາຣມ຺ມເຓ ຎາຓໍ, ມນປຣິຎ຺ຎາ, ປຣິຎ຺ຎາສຫຄໂຕ ມຄ຺ໂຄ, ມນສ຺ມິໍ ຉນ຺ທຣາຄສ຺ສ ປຫານໍ, ຈິຕ຺ຕສງ຺ຂາຣນິໂຣໂຘ ສຎ຺ຎາເວທຍິຕນິໂຣຘສມາປຕ຺ຕິ ມໂນໂມເນຍ຺ຍ’’ນ຺ຕິ ອິມາຍ ປາຬິຍາ ອາຄຕນເຍນ ອຕ຺ຖໍ ວິຠາເວນ຺ໂຕ ‘‘ມໂນໂມເນຍ຺ເຍປິ ອິມິນາວ ນເຍນ ອຕ຺ຖໍ ຎຕ຺ວາ’’ຕິອາທິມາຫ. ຕຕ຺ຖ ຈ ເອກາສີຕິວິຘໍ ໂລກິຍຈິຕ຺ຕໍ ອາຣພ຺ຠ ປວຕ຺ຕຎາຓໍ ມນາຣມ຺ມເຓ ຎາຓໍ. ຕສ຺ສ ສມຸທຍາທິໂຕ ປຣິຊານນໍ ມນປຣິຎ຺ຎາຕິ ອຍໍ ວິເສໂສ.

ໂມເນຍ຺ຍສຸຕ຺ຕວຓ຺ຓນາ ນິຏ຺ຐິຕາ.

ອາປາຍິກວຄ຺ຄວຓ຺ຓນາ ນິຏ຺ຐິຕາ.