(໑໑) ໑. ສມ຺ໂພຘວຄ຺ໂຄ

໑-໓. ປຸພ຺ເພວສມ຺ໂພຘສຸຕ຺ຕາທິວຓ຺ຓນາ

໑໐໔-໑໐໖. ຕຕິຍສ຺ສ ປຐເມ ສມ຺ໂພຘິໂຕ ປຸພ຺ເພວາຕິ ສມ຺ໂພໂຘ ວຸຈ຺ຈຕິ ຈຕູສຸ ມຄ຺ເຄສຸ ຎາຓໍ ‘‘ສາມໍ ສມ຺ມາ ພຸຊ຺ຌິ ເອເຕນາ’’ຕິ ກຕ຺ວາ, ຕໂຕ ປຸພ຺ເພເຍວາຕິ ອຕ຺ໂຖ. ເຕນາຫ ‘‘ອຣິຍມຄ຺ຄປ຺ປຕ຺ຕິໂຕ ອປຣຠາເຄເຍວາ’’ຕິ. ໂພຘິສຕ຺ຕສ຺ເສວ ສໂຕຕິ ເອຕ຺ຖ ຍຖາ ອຸທກໂຕ ອຸຄ຺ຄນ຺ຕ຺ວາ ຐິຕໍ ປຣິປາກຄຕໍ ປທຸມໍ ສູຣິຍຣສ຺ມິສມ຺ຜສ຺ເສນ ອວສ຺ສໍ ພຸຊ຺ຌິສ຺ສຕີຕິ ພຸຊ຺ຌນກປທຸມນ຺ຕິ ວຸຈ຺ຈຕິ. ເອວໍ ພຸທ຺ຘານໍ ສນ຺ຕິເກ ພ຺ຍາກຣຓສ຺ສ ລທ຺ຘຕ຺ຕາ ອວສ຺ສໍ ອນນ຺ຕຣາເຍນ ປາຣມິໂຍ ປູເຣຕ຺ວາ ພຸຊ຺ຌິສ຺ສຕີຕິ ພຸຊ຺ຌນກສຕ຺ໂຕຕິ ໂພຘິສຕ຺ໂຕ. ເຕນາຫ ‘‘ພຸຊ຺ຌນກສຕ຺ຕສ຺ເສວ…ເປ… ອາຣຠນ຺ຕສ຺ເສວ ສໂຕ’’ຕິ. ຍາ ວາ ເອສາ ຈຕຸມຄ຺ຄຎາຓສງ຺ຂາຕາ ໂພຘິ, ‘‘ຕໍ ໂພຘິໍ ກຸທາສ຺ສຸ ນາມາຫໍ ປາປຸຓິສ຺ສາມີ’’ຕິ ປຕ຺ຖຍມາໂນ ປຏິປຊ຺ຊຕີຕິ ໂພຘິຍໍ ສຕ຺ໂຕ ອາສຕ຺ໂຕຕິປິ ໂພຘິສຕ຺ໂຕ. ເຕນາຫ ‘‘ສມ຺ໂພຘິຍາ ວາ ສຕ຺ຕສ຺ເສວ ລຄ຺ຄສ຺ເສວ ສໂຕ’’ຕິ.

ອຖ ວາ ໂພຘີຕິ ຎາຓໍ ‘‘ພຸຊ຺ຌຕິ ເອເຕນາ’’ຕິ ກຕ຺ວາ, ໂພຘິມາ ສຕ຺ໂຕ ໂພຘິສຕ຺ໂຕ, ປຸຣິມປເທ ອຸຕ຺ຕຣປທໂລປໍ ກຕ຺ວາ ຍຖາ ‘‘ຎາຓສຕ຺ໂຕ’’ຕິ, ຎາຓວາ ປຎ຺ຎວາ ປຓ຺ຑິໂຕ ສຕ຺ໂຕຕິ ອຕ຺ໂຖ. ພຸທ຺ຘານຎ຺ຫິ ປາທມູເລ ອຠິນີຫາຣໂຕ ປຏ຺ຐາຍ ປຓ຺ຑິໂຕວ ໂສ ສຕ຺ໂຕ, ນ ອນ຺ຘພາໂລຕິ ໂພຘິສຕ຺ໂຕ. ເອວໍ ຄຸຓວໂຕ ອຸປ຺ປນ຺ນນາມວເສນ ໂພຘິສຕ຺ຕສ຺ເສວ ສໂຕ. ອສ຺ສາທີຍຕີຕິ ອສ຺ສາໂທ, ສຸຂໍ. ຕຎ຺ຈ ສາຕາກາຣລກ຺ຂຓນ຺ຕິ ອາຫ ‘‘ອສ຺ສາໂທຕິ ມຘຸຣາກາໂຣ’’ຕິ. ຉນ຺ທຣາໂຄ ວິນີຍຕິ ເຈວ ປຫີຍຕິ ຈ ເອຕ຺ຖາຕິ ນິພ຺ພານໍ ‘‘ຉນ຺ທຣາຄວິນໂຍ ຉນ຺ທຣາຄປ຺ປຫານຎ຺ຈາ’’ຕິ ວຸຈ຺ຈຕິ. ເຕນາຫ ‘‘ນິພ຺ພານ’’ນ຺ຕິອາທິ. ຕຕ຺ຖ ອາຄມ຺ມາຕິ ອິທໍ ໂຍ ຊໂນ ຣາຄໍ ວິເນຕິ ປຊຫຕິ ຈ, ຕສ຺ສ ອາຣມ຺ມຓກຣຓໍ ສນ຺ຘາຍ ວຸຕ຺ຕໍ. ທຸຕິຍຕຕິຍານິ ອຸຕ຺ຕານຕ຺ຖາເນວ.

ປຸພ຺ເພວສມ຺ໂພຘສຸຕ຺ຕາທິວຓ຺ຓນາ ນິຏ຺ຐິຕາ.

໔-໙. ສມຓພ຺ຣາຫ຺ມຓສຸຕ຺ຕາທິວຓ຺ຓນາ

໑໐໗-໑໑໒. ຈຕຸຕ຺ເຖ ສາມຎ຺ຎນ຺ຕິ ອຣິຍມຄ຺ໂຄ, ເຕນ ອຣຓີຍໂຕ ອຸປຄນ຺ຕພ຺ພໂຕ ສາມຎ຺ຎຕ຺ຖໍ, ອຣິຍຜລນ຺ຕິ ອາຫ ‘‘ສາມຎ຺ຎຕ຺ຖນ຺ຕິ ຈຕຸພ຺ພິຘໍ ອຣິຍຜລ’’ນ຺ຕິ. ພ຺ຣຫ຺ມຎ຺ຎຕ຺ຖນ຺ຕິ ເອຕ຺ຖາປິ ເອເສວ ນໂຍ. ເຕນາຫ ‘‘ອິຕຣໍ ຕສ຺ເສວ ເວວຈນ’’ນ຺ຕິ. ອຣິຍມຄ຺ຄສງ຺ຂາຕໍ ສາມຎ຺ຎເມວ ວາ ອຣຓີຍໂຕ ສາມຎ຺ຎຕ຺ຖນ຺ຕິ ອາຫ ‘‘ສາມຎ຺ຎຕ຺ເຖນ ວາ ຈຕ຺ຕາໂຣ ມຄ຺ຄາ’’ຕິ. ປຎ຺ຈມາທີນິ ອຸຕ຺ຕານຕ຺ຖາເນວ.

ສມຓພ຺ຣາຫ຺ມຓສຸຕ຺ຕາທິວຓ຺ຓນາ ນິຏ຺ຐິຕາ.

໑໐. ທຸຕິຍນິທານສຸຕ຺ຕວຓ຺ຓນາ

໑໑໓. ທສເມ ວິວຏ຺ຏຄາມິກມ຺ມານນ຺ຕິ ວິວຏ຺ຏູປນິສ຺ສຍກມ຺ມານໍ. ຕທຠິນິວຕ຺ເຕຕີຕິ ເອຕ຺ຖ ຕໍ-ສທ຺ເທນ ປຈ຺ຈາມສນສ຺ສ ວິປາກສ຺ສ ປຣາມາໂສຕິ ອາຫ ‘‘ຕໍ ອຠິນິວຕ຺ເຕຕີ’’ຕິ, ຕໍ ວິປາກໍ ອຠິຠວິຕ຺ວາ ນິວຕ຺ເຕຕີຕິ ອຕ຺ໂຖ. ອິທານິ ນ ເກວລໍ ວິປາກສ຺ເສວ ປຣາມາໂສ ຕໍ-ສທ຺ເທນ, ອຖ ໂຂ ຉນ຺ທຣາຄຏ຺ຐານິຍານໍ ຘມ຺ມານໍ ຕພ຺ພິປາກສ຺ສ ຈ ປຣາມາໂສ ທຏ຺ຐພ຺ໂພຕິ ອາຫ ‘‘ຍທາ ວາ ເຕນາ’’ຕິອາທິ. ເຕ ເຈວ ຘມ຺ເມຕິ ເຕ ຉນ຺ທຣາຄຏ຺ຐານິເຍ ຘມ຺ເມ. ນິພ຺ພິຊ຺ຌິຕ຺ວາ ປສ຺ສຕີຕິ ກິເລເສ ນິພ຺ພິຊ຺ຌິຕ຺ວາ ວິຠູຕໍ ປາກຏໍ ກຕ຺ວາ ປສ຺ສຕີຕິ.

ທຸຕິຍນິທານສຸຕ຺ຕວຓ຺ຓນາ ນິຏ຺ຐິຕາ.

ສມ຺ໂພຘວຄ຺ຄວຓ຺ຓນາ ນິຏ຺ຐິຕາ.