໑໑. ນິມິຕ຺ຕສຸຕ຺ຕວຓ຺ຓນາ

໑໐໓. ເອກາທສເມ ເຍຫິ ຜລໍ ນິມີຍຕິ, ອຸປ຺ປຊ຺ຊນຏ຺ຐາເນ ປກ຺ຂິປມານໍ ວິຍ ໂຫຕິ, ຕານິ ນິມິຕ຺ຕານິ. ເຕນາຫ ‘‘ຕີຓິ ກາຣຓານີ’’ຕິ. ກາເລນ ກາລນ຺ຕິ ເອຕ຺ຖ ກາເລນາຕິ ຠຸມ຺ມຕ຺ເຖ ກຣຓວຈນໍ. ກາລນ຺ຕິ ຈ ອຸປໂຍຄວຈນນ຺ຕິ ອາຫ ‘‘ກາເລ ກາເລ’’ຕິ. ມນສິ ກາຕພ຺ພາຕິ ຈິຕ຺ເຕ ກາຕພ຺ພາ, ອຸປ຺ປາເທຕພ຺ພາຕິ ອຕ຺ໂຖ. ອຸປລກ຺ຂິຕສມາຘານາກາໂຣ ສມາຘິເຍວ ອິຘ ສມາຘິນິມິຕ຺ຕນ຺ຕິ ອາຫ ‘‘ເອກຄ຺ຄຕາ ຫິ ອິຘ ສມາຘິນິມິຕ຺ຕນ຺ຕິ ວຸຕ຺ຕາ’’ຕິ. ຐານໍ ຕໍ ຈິຕ຺ຕໍ ໂກສຊ຺ຊາຍ ສໍວຕ຺ເຕຍ຺ຍາຕິ ເອຕ຺ຖ ຐານໍ ອຕ຺ຖີຕິ ວຈນເສໂສ. ຕໍ ຠາວນາຈິຕ຺ຕໍ ໂກສຊ຺ຊາຍ ສໍວຕ຺ເຕຍ຺ຍ, ຕສ຺ສ ສໍວຕ຺ຕນສ຺ສ ກາຣຓໍ ອຕ຺ຖີຕິ ອຕ຺ໂຖ. ຕໍ ວາ ມນສິກຣຓໍ ຈິຕ຺ຕໍ ໂກສຊ຺ຊາຍ ສໍວຕ຺ເຕຍ຺ຍ, ເອຕສ຺ສ ຐານໍ ກາຣຓໍ ອຕ຺ຖີຕິ ອຕ຺ໂຖ. ເຕນາຫ ‘‘ກາຣຓໍ ວິຊ຺ຊຕີ’’ຕິອາທິ. ຎາຓຊວນ຺ຕິ ສງ຺ຂາເຣສຸ ອນິຈ຺ຈາທິວເສນ ປວຕ຺ຕມານໍ ປຎ຺ຎາຊວໍ.

ຍໍ ກິຎ຺ຈິ ສຸວຓ຺ຓຕາປນໂຍຄ຺ຄອງ຺ຄາຣຠາຊນໍ ອິຘ ‘‘ອຸກ຺ກາ’’ຕິ ອຘິປ຺ເປຕນ຺ຕິ ອາຫ ‘‘ອງ຺ຄາຣກປລ຺ລ’’ນ຺ຕິ. ສຊ຺ເຊຍ຺ຍາຕິ ຍຖາ ຕຕ຺ຖ ປກ຺ຂິຕ຺ຕໍ ສຸວຓ຺ຓໍ ຕປ຺ປຕິ, ເອວໍ ປຏິຍາທິເຍຍ຺ຍ. ອາລິມ຺ເປຍ຺ຍາຕິ ອາທິເຍຍ຺ຍ, ຊເລຍ຺ຍາຕິ ອຕ຺ໂຖ. ເຕນາຫ ‘‘ຕຕ຺ຖ ອງ຺ຄາເຣ…ເປ… ຄາຫາເປຍ຺ຍາ’’ຕິ. ມູສາຍ ວາ ປກ຺ຂິເປຍ຺ຍາຕິ ຕຕ຺ຕເກ ວາ ປກ຺ຂິເປຍ຺ຍ. ອຸປຘາເຣຕີຕິ ສລ຺ລກ຺ເຂຕິ.

ນິມິຕ຺ຕສຸຕ຺ຕວຓ຺ຓນາ ນິຏ຺ຐິຕາ.

ໂລຓກປລ຺ລວຄ຺ຄວຓ຺ຓນາ ນິຏ຺ຐິຕາ.

ທຸຕິຍປຓ຺ຓາສກໍ ນິຏ຺ຐິຕໍ.