(໘) ໓. ສນິມິຕ຺ຕວຄ຺ຄວຓ຺ຓນາ

໗໘-໗໙. ຕຕິຍສ຺ສ ປຐເມ ນິມີຍຕິ ເອຕ຺ຖ ຜລໍ ອວເສສປຈ຺ຈເຍຫິ ປກ຺ຂິປີຍຕິ ວິຍາຕິ ນິມິຕ຺ຕໍ, ກາຣຓນ຺ຕິ ອາຫ ‘‘ສນິມິຕ຺ຕາຕິ ສກາຣຓາ’’ຕິ. ທຸຕິຍາທີສູຕິ ທຸຕິຍສຸຕ຺ຕາທີສຸ. ເອເສວ ນໂຍຕິ ອິມິນາ ນິທານາທິປທານມ຺ປິ ກາຣຓປຣິຍາຍເມວ ທີເປຕິ. ນິທທາຕິ ຜລນ຺ຕິ ນິທານໍ, ຫິໂນຕິ ຜລໍ ປຕິຏ຺ຐາຕິ ເອເຕນາຕິ ເຫຕຸ, ສງ຺ຂໂຣຕິ ຜລນ຺ຕິ ສງ຺ຂາໂຣ, ປຏິຈ຺ຈ ເອຕສ຺ມາ ຜລໍ ເອຕີຕິ ປຈ຺ຈໂຍ, ຣຸປ຺ປຕິ ນິຣຸປ຺ປຕິ ຜລໍ ເອຕ຺ຖາຕິ ຣູປນ຺ຕິ ເອວໍ ນິທານາທິປທານມ຺ປິ ເຫຕຸປຣິຍາຍຕາ ເວທິຕພ຺ພາ.

໘໔. ສຕ຺ຕເມ ປຈ຺ຈຍຠູຕາຍາຕິ ສຫຊາຕາທິປຈ຺ຈຍຠູຕາຍ.

໘໗. ທສເມ ສເມຈ຺ຈ ສມ຺ຠຸຍ຺ຍ ປຈ຺ຈເຍຫິ ກໂຕຕິ ສງ຺ຂໂຕ, ສງ຺ຂໂຕ ຘມ຺ໂມ ອາຣມ຺ມຓໍ ເອເຕສນ຺ຕິ ສງ຺ຂຕາຣມ຺ມຓາ. ມຄ຺ຄກ຺ຂເຓ ນ ໂຫນ຺ຕິ ນາມ ປຫີຍນ຺ຕີຕິ ກຕ຺ວາ. ນາເຫສຸນ຺ຕິ ເອຕ຺ຖ ‘‘ວຸຈ຺ຈນ຺ຕີ’’ຕິ ອຊ຺ຌາຫຣິຕພ຺ພໍ. ຍາວ ອຣຫຕ຺ຕາ ເທສນາ ເທສິຕາ ຕໍຕໍສຸຕ຺ຕປຣິໂຍສາເນ ‘‘ນ ໂຫນ຺ຕີ’’ຕິ ວຸຕ຺ຕຕ຺ຕາ.

ສນິມິຕ຺ຕວຄ຺ຄວຓ຺ຓນາ ນິຏ຺ຐິຕາ.