(໙) ໔. ຘມ຺ມວຄ຺ຄວຓ຺ຓນາ

໘໘. ຈຕຸຕ຺ຖສ຺ສ ປຐເມ ຜລສມາຘີຕິ ຈຕູສຸປິ ອຣິຍຜເລສຸ ສມາຘິ. ຕຖາ ຜລປຎ຺ຎາ ເວທິຕພ຺ພາ.

໘໙. ທຸຕິເຍ ສມ຺ປຍຸຕ຺ຕຘມ຺ເມ ປຣິຄ຺ຄຓ຺ຫາຕີຕິ ປຄ຺ຄາໂຫ. ນ ວິກ຺ຂິປຕີຕິ ອວິກ຺ເຂໂປ.

໙໐. ຕຕິເຍ ນມນຏ຺ເຐນ ນາມໍ. ຣຸປ຺ປນຏ຺ເຐນ ຣູປໍ. ສມ຺ມສນຈາຣສ຺ສ ອຘິປ຺ເປຕຕ຺ຕາ ‘‘ຈຕ຺ຕາໂຣ ອຣູປກ຺ຂນ຺ຘາ’’ຕ຺ເວວ ວຸຕ຺ຕໍ. ເຕນາຫ ‘‘ຘມ຺ມ-ໂກຏ຺ຐາສປຣິຈ຺ເຉທຎາຓໍ ນາມ ກຖິຕ’’ນ຺ຕິ.

໙໑. ຈຕຸຕ຺ເຖ ວິຊານນຏ຺ເຐນ ວິຊ຺ຊາ. ວິມຸຈ຺ຈນຏ຺ເຐນ ວິມຸຕ຺ຕິ.

໙໒. ປຎ຺ຈເມ ຠໂວ ນາມ ສສ຺ສຕໍ ສທາ ຠາວໂຕ, ສສ຺ສຕວເສນ ອຸປ຺ປຊ຺ຊນທິຏ຺ຐິ ຠວທິຏ຺ຐິ. ວິຠໂວ ນາມ ອຸຈ຺ເຉໂທ ວິນາສນຏ຺ເຐນ, ວິຠວວເສນ ອຸປ຺ປຊ຺ຊນທິຏ຺ຐິ ວິຠວທິຏ຺ຐິ. ອຸຕ຺ຕານຕ຺ຖາເນວ ເຫຏ຺ຐາ ວຸຕ຺ຕນຍຕ຺ຕາ.

໙໕. ອຏ຺ຐເມ ທຸກ຺ຂໍ ວໂຈ ເອຕສ຺ມິໍ ວິປ຺ປຏິກູລຄາຫິມ຺ຫິ ວິປຈ຺ຈນີກສາເຕ ອນາທເຣ ປຸຄ຺ຄເລຕິ ທຸພ຺ພໂຈ, ຕສ຺ສ ກມ຺ມໍ ໂທວຈສ຺ສໍ, ຕສ຺ສ ທຸພ຺ພຈສ຺ສ ປຸຄ຺ຄລສ຺ສ ອນາທຣິຍວເສນ ປວຕ຺ຕາ ເຈຕນາ. ຕສ຺ສ ຠາໂວ ໂທວຈສ຺ສຕາ. ຕສ຺ສ ຠາໂວຕິ ຈ ຕສ຺ສ ຍຖາວຸຕ຺ຕສ຺ສ ໂທວຈສ຺ສສ຺ສ ອຕ຺ຖິຠາໂວ, ອຕ຺ຖໂຕ ໂທວຈສ຺ສເມວ. ວິຕ຺ຖາຣໂຕ ປເນສາ ‘‘ຕຕ຺ຖ ກຕມາ ໂທວຈສ຺ສຕາ? ສຫຘມ຺ມິເກ ວຸຈ຺ຈມາເນ ໂທວຈສ຺ສາຍ’’ນ຺ຕິ ອຠິຘມ຺ເມ ອາຄຕາ. ສາ ອຕ຺ຖໂຕ ສງ຺ຂາຣກ຺ຂນ຺ໂຘ ໂຫຕິ. ຈຕຸນ຺ນໍ ວາ ຂນ຺ຘານໍ ເອເຕນາກາເຣນ ປວຕ຺ຕານໍ ເອຕໍ ອຘິວຈນນ຺ຕິ ວທນ຺ຕິ.

ປາປໂຍຄໂຕ ປາປາ ອສ຺ສທ຺ຘາທໂຍ ປຸຄ຺ຄລາ ເອຕສ຺ສ ມິຕ຺ຕາຕິ ປາປມິຕ຺ໂຕ, ຕສ຺ສ ຠາໂວ ປາປມິຕ຺ຕຕາ. ວິຕ຺ຖາຣໂຕ ປເນສາ ‘‘ຕຕ຺ຖ ກຕມາ ປາປມິຕ຺ຕຕາ? ເຍ ເຕ ປຸຄ຺ຄລາ ອສ຺ສທ຺ຘາ ທຸສ຺ສີລາ ອປ຺ປສ຺ສຸຕາ ມຈ຺ຉຣິໂນ ທຸປ຺ປຎ຺ຎາ. ຍາ ເຕສໍ ເສວນາ ນິເສວນາ ສໍເສວນາ ຠຊນາ ສມ຺ຠຊນາ ຠຕ຺ຕິ ສມ຺ຠຕ຺ຕິ ຕໍສມ຺ປວງ຺ກຕາ’’ຕິ (ຘ. ສ. ໑໓໓໓) ເອວໍ ອາຄຕາ. ສາປິ ອຕ຺ຖໂຕ ໂທວຈສ຺ສຕາ ວິຍ ທຏ຺ຐພ຺ພາ. ຍາຍ ຫິ ເຈຕນາຍ ປຸຄ຺ຄໂລ ປາປສມ຺ປວງ຺ໂກ ນາມ ໂຫຕິ, ສາ ເຈຕນາ ຈຕ຺ຕາໂຣປິ ວາ ອຣູປິໂນ ຂນ຺ຘາ ຕທາກາຣປ຺ປວຕ຺ຕາ ປາປມິຕ຺ຕຕາ.

໙໖. ນວເມ ສຸຂໍ ວໂຈ ເອຕສ຺ມິໍ ປທກ຺ຂິຓຄາຫິມ຺ຫິ ອນຸໂລມສາເຕ ສາທເຣ ປຸຄ຺ຄເລຕິ ສຸພ຺ພໂຈຕິອາທິນາ, ກລ຺ຍາຓາ ສທ຺ຘາທໂຍ ປຸຄ຺ຄລາ ເອຕສ຺ສ ມິຕ຺ຕາຕິ ກລ຺ຍາຓມິຕ຺ໂຕຕິອາທິນາ ວຸຕ຺ຕວິປຣິຍາເຍນ ອຕ຺ໂຖ ເວທິຕພ຺ໂພ.

໙໗. ທສເມ ປຖວີຘາຕຸອາທໂຍ ສຸຂຘາຕຸກາມຘາຕຸອາທໂຍ ຈ ເອຕາສ຺ເວວ ອນ຺ໂຕຄຘາຕິ ເອຕາສຸ ໂກສລ຺ເລ ທສ຺ສິເຕ ຕາສຸປິ ໂກສລ຺ລໍ ທສ຺ສິຕເມວ ໂຫຕີຕິ ‘‘ອຏ຺ຐາຣສ ຘາຕຸໂຍ’’ຕິ ວຸຕ຺ຕໍ. ຘາຕູຕິ ຊານນນ຺ຕິ ອິມິນາ ອຏ຺ຐາຣສນ຺ນໍ ຘາຕູນໍ ສຠາວປຣິຈ຺ເຉທິກາ ສວນຘາຣຓສມ຺ມສນປ຺ປຏິເວຘປຎ຺ຎາ ວຸຕ຺ຕາ. ຕຕ຺ຖ ຘາຕູນໍ ສວນຘາຣຓປຎ຺ຎາ ສຸຕມຍາ, ອິຕຣາ ຠາວນາມຍາ. ຕຕ຺ຖາປິ ສມ຺ມສນປຎ຺ຎາ ໂລກິຍາ. ວິປສ຺ສນາ ຫິ ສາ, ອິຕຣາ ໂລກຸຕ຺ຕຣາ. ລກ຺ຂຓາທິວເສນ ອນິຈ຺ຈາທິວເສນ ຈ ມນສິກຣຓໍ ມນສິກາໂຣ, ຕຕ຺ຖ ໂກສລ຺ລໍ ມນສິກາຣກຸສລຕາ. ອຏ຺ຐາຣສນ຺ນໍເຍວ ຘາຕູນໍ ສມ຺ມສນປ຺ປຏິເວຘປຈ຺ຈເວກ຺ຂຓປຎ຺ຎາ ມນສິກາຣກຸສລຕາ, ສາ ອາທິມຊ຺ຌປຣິໂຍສານວເສນ ຕິຘາ ຠິນ຺ນາ. ຕຖາ ຫິ ສມ຺ມສນປຎ຺ຎາ ຕສ຺ສາ ອາທິ, ປຏິເວຘປຎ຺ຎາ ມຊ຺ເຌ, ປຈ຺ຈເວກ຺ຂຓປຎ຺ຎາ ປຣິໂຍສານໍ.

໙໘. ເອກາທສເມ ອາປຕ຺ຕິໂຍວ ອາປຕ຺ຕິກ຺ຂນ຺ຘາ. ຕາ ປນ ອນ຺ຕຣາປຕ຺ຕີນໍ ອຄ຺ຄຫເຓນ ປຎ຺ຈ, ຕາສໍ ຄຫເຓນ ສຕ຺ຕ ໂຫນ຺ຕີຕິ ອາຫ ‘‘ປຎ຺ຈນ຺ນຎ຺ຈ ສຕ຺ຕນ຺ນຎ຺ຈ ອາປຕ຺ຕິກ຺ຂນ຺ຘານ’’ນ຺ຕິ. ຊານນນ຺ຕິ ‘‘ອິມາ ອາປຕ຺ຕິໂຍ, ເອຕ຺ຕກາ ອາປຕ຺ຕິໂຍ, ເອວຎ຺ຈ ຕາສໍ ອາປຊ຺ຊນໍ ໂຫຕີ’’ຕິ ຊານນໍ. ເອວໍ ຕິປ຺ປກາເຣນ ຊານນປຎ຺ຎາ ຫິ ອາປຕ຺ຕິກຸສລຕາ ນາມ. ອາປຕ຺ຕິໂຕ ວຸຏ຺ຐາປນປ຺ປໂຍຄຕາຍ ກມ຺ມຠູຕາ ວາຈາ ກມ຺ມວາຈາ, ຕຖາຠູຕາ ອນຸສ຺ສາວນວາຈາ. ‘‘ອິມາຍ ກມ຺ມວາຈາຍ ອິໂຕ ອາປຕ຺ຕິໂຕ ວຸຏ຺ຐານໍ ໂຫຕິ, ໂຫນ຺ຕຎ຺ຈ ປຐເມ, ຕຕິເຍ ວາ ອນຸສ຺ສາວເນ ຍ຺ຍ-ກາຣໍ ປຕ຺ເຕ, ‘ສໍວຣິສ຺ສາມີ’ຕິ ວາ ປເທ ປຣິໂຍສິເຕ ໂຫຕີ’’ຕິ ເອວໍ ຕໍ ຕໍ ອາປຕ຺ຕີຫິ ວຸຏ຺ຐານປຣິຈ຺ເຉທຊານນປຎ຺ຎາ ອາປຕ຺ຕິວຸຏ຺ຐານກຸສລຕາ. ວຸຏ຺ຐານນ຺ຕິ ຈ ຍຖາປນ຺ນາຍ ອາປຕ຺ຕິຍາ ຍຖາ ຕຖາ ອນນ຺ຕຣາຍຕາປາທນໍ. ເອວໍ ວຸຏ຺ຐານຄ຺ຄຫເຓເນວ ເທສນາຍປິ ສງ຺ຄໂຫ ສິທ຺ໂຘ ໂຫຕິ.

ຘມ຺ມວຄ຺ຄວຓ຺ຓນາ ນິຏ຺ຐິຕາ.