໓. ພາລວຄ຺ຄວຓ຺ຓນາ

໒໒-໒໔. ຕຕິຍສ຺ສ ປຐມທຸຕິຍຕຕິຍານິ ອຸຕ຺ຕານຕ຺ຖາເນວ.

໒໕. ຈຕຸຕ຺ເຖ ເນຕພ຺ໂພຕິ ອຎ຺ຎໂຕ ອາຫຣິຕ຺ວາ ໂພເຘຕພ຺ໂພ, ຎາເປຕພ຺ໂພຕິ ອຕ຺ໂຖ.

໒໗. ຉຏ຺ເຐ ໂນ ເຈປິ ປຏິຈ຺ຉາເທຕ຺ວາ ກໂຣນ຺ຕີຕິ ປາຓາຕິປາຕາທີນິ ກໂຣນ຺ໂຕ ສເຈປິ ອປ຺ປຏິຈ຺ຉາເທຕ຺ວາ ກໂຣນ຺ຕິ. ປຏິຈ຺ຉນ຺ນເມວາຕິ ວິຎ຺ຎູຫິ ຄຣຫິຕພ຺ພຠາວໂຕ ປຏິຈ຺ຉາທນາຣຫຕ຺ຕາ ປຏິຈ຺ຉນ຺ນເມວາຕິ ວຸຈ຺ຈຕິ. ອວີຈິອາທໂຍ ປເທສວິເສສາ ຕຕ຺ຖູປປນ຺ນາ ສຕ຺ຕາ ຈ ນິຣຍຄ຺ຄຫເຓນ ຄຫິຕາຕິ ອາຫ ‘‘ນິຣໂຍຕິ ສໂຫກາສກາ ຂນ຺ຘາ’’ຕິ. ຕິຣຈ຺ຉານໂຍນິ ນາມ ວິສຸໍ ປເທສວິເສໂສ ນຕ຺ຖີຕິ ອາຫ ‘‘ຕິຣຈ຺ຉານໂຍນິຍໍ ຂນ຺ຘາວ ລພ຺ຠນ຺ຕີ’’ຕິ.

໓໑. ທສເມ ອຕ຺ໂຖ ຜລໍ ຕທຘີນວຸຕ຺ຕິຕາຍ ວໂສ ເອຕສ຺ສາຕິ ອຕ຺ຖວໂສ, ເຫຕູຕິ ອາຫ ‘‘ອຕ຺ຖວເສຕິ ກາຣຓານີ’’ຕິ. ອຣຎ຺ຎວນປຕ຺ຖານີຕິ ອຣຎ຺ຎລກ຺ຂຓປ຺ປຕ຺ຕານິ ວນປຕ຺ຖານິ. ວນປຕ຺ຖ-ສທ຺ໂທ ຫິ ສຓ຺ຑຠູເຕ ຣຸກ຺ຂສມູເຫປິ ວຕ຺ຕຕີຕິ ອຣຎ຺ຎຄ຺ຄຫຓໍ. ວນີຍຕິ ວິເວກກາເມຫິ ຠຊີຍຕິ, ວນຸເຕ ວາ ເຕ ອຕ຺ຕສມ຺ປຕ຺ຕິຍາ ວສນຕ຺ຖາຍ ຍາຈນ຺ໂຕ ວິຍ ໂຫຕີຕິ ວນໍ, ປຕິຏ຺ຐຫນ຺ຕິ ເອຕ຺ຖ ວິເວກກາມາ ຍຖາຘິປ຺ເປຕວິເສສາຘິຄເມນາຕິ ປຕ຺ຖໍ, ວເນສຸ ປຕ຺ຖໍ ຄຫນຏ຺ຐາເນ ເສນາສນໍ ວນປຕ຺ຖໍ. ກິຎ຺ຈາປີຕິ ອນຸຊານນສມ຺ຠາວນຕ຺ເຖ ນິປາໂຕ. ກິໍ ອນຸຊານາຕິ? ນິປ຺ປຣິຍາຍໂຕ ອຣຎ຺ຎຠາວໍ ຄາມໂຕ ພຫິ ອຣຎ຺ຎນ຺ຕິ. ເຕນາຫ ‘‘ນິປ຺ປຣິຍາເຍນາ’’ຕິອາທິ. ກິໍ ສມ຺ຠາເວຕິ? ອາຣຎ຺ຎກງ຺ຄນິປ຺ຜາທກຕ຺ຕໍ. ຍຎ຺ຫິ ອາຣຎ຺ຎກງ຺ຄນິປ຺ຜາທກໍ, ຕໍ ວິເສສໂຕ ອຣຎ຺ຎນ຺ຕິ ວຕ຺ຕພ຺ພນ຺ຕິ. ເຕນາຫ ‘‘ຍໍ ຕໍ ປຎ຺ຈຘນຸສຕິກ’’ນ຺ຕິອາທິ. ນິກ຺ຂມິຕ຺ວາ ພຫິ ອິນ຺ທຂີລາຕິ ອິນ຺ທຂີລໂຕ ພຫິ ນິກ຺ຂມິຕ຺ວາ, ຕໂຕ ພຫິ ປຏ຺ຐາຍາຕິ ອຕ຺ໂຖ. ພຫິ ອິນ຺ທຂີລາຕິ ວາ ຍຕ຺ຖ ທ຺ເວ ຕີຓິ ອິນ຺ທຂີລານິ, ຕຕ຺ຖ ພຫິທ຺ຘາ ອິນ຺ທຂີລໂຕ ປຏ຺ຐາຍ. ຍຕ຺ຖ ຕໍ ນຕ຺ຖິ, ຕທຣຫຏ຺ຐານໂຕ ປຏ຺ຐາຍາຕິ ວທນ຺ຕິ. ຄາມນ຺ຕນ຺ຕິ ຄາມສມີປໍ. ອນຸປຈາຣຏ຺ຐານນ຺ຕິ ນິຈ຺ຈກິຈ຺ຈວເສນ ນ ອຸປຈຣິຕພ຺ພຏ຺ຐານໍ. ເຕນາຫ ‘‘ຍຕ຺ຖ ນ ກສີຍຕິ ນ ວປີຍຕີ’’ຕິ.

ອຕ຺ຕໂນ ຈ ທິຏ຺ຐຘມ຺ມສຸຂວິຫາຣນ຺ຕິ ເອເຕນ ສຕ຺ຖາ ອຕ຺ຕໂນ ວິເວກາຠິຣຕິໍ ປກາເສຕິ. ຕຕ຺ຖ ທິຏ຺ຐຘມ຺ໂມ ນາມ ອຍໍ ປຈ຺ຈກ຺ໂຂ ອຕ຺ຕຠາໂວ, ສຸຂວິຫາໂຣ ນາມ ຈຕຸນ຺ນໍ ອິຣິຍາປຖວິຫາຣານໍ ຜາສຸຕາ. ເອກກສ຺ສ ຫິ ອຣຎ຺ເຎ ອນ຺ຕມໂສ ອຸຈ຺ຈາຣວສ຺ສາວກິຈ຺ຈໍ ອຸປາທາຍ ສພ຺ເພ ອິຣິຍາປຖາ ຜາສຸກາ ໂຫນ຺ຕິ, ຕສ຺ມາ ທິຏ຺ຐຘມ຺ເມ ສຸຂວິຫາຣໍ ທິຏ຺ຐຘມ຺ມສຸຂວິຫາຣນ຺ຕິ ເອວໍ ວາ ເອຕ຺ຖ ອຕ຺ໂຖ ທຏ຺ຐພ຺ໂພ.

ປຈ຺ຉິມຎ຺ຈ ຊນຕໍ ອນຸກມ຺ປມາໂນຕິ ກຖໍ ອຣຎ຺ຎວາເສນ ປຈ຺ຉິມາ ຊນຕາ ອນຸກມ຺ປິຕາ ໂຫຕິ? ສທ຺ຘາປພ຺ພຊິຕາ ຫິ ກຸລປຸຕ຺ຕາ ຠຄວໂຕ ອຣຎ຺ຎວາສໍ ທິສ຺ວາ ‘‘ຠຄວາປິ ນາມ ອຣຎ຺ຎເສນາສນານິ ນ ມຸຎ຺ຈຕິ, ຍສ຺ສ ເນວຕ຺ຖິ ປຣິຎ຺ຎາຕພ຺ພໍ ນ ປຫາຕພ຺ພໍ ນ ຠາເວຕພ຺ພໍ ນ ສຈ຺ຉິກາຕພ຺ພໍ, ກິມງ຺ຄໍ ປນ ມຍ’’ນ຺ຕິ ຈິນ຺ເຕຕ຺ວາ ຕຕ຺ຖ ວສິຕພ຺ພເມວ ມຎ຺ຎິສ຺ສນ຺ຕິ, ເອວໍ ຂິປ຺ປເມວ ທຸກ຺ຂສ຺ສນ຺ຕກຣາ ຠວິສ຺ສນ຺ຕິ. ເອວໍ ປຈ຺ຉິມາ ຊນຕາ ອນຸກມ຺ປິຕາ ໂຫຕິ. ເອຕມຕ຺ຖໍ ທສ຺ເສນ຺ໂຕ ອາຫ ‘‘ປຈ຺ຉິເມ ມມ ສາວເກ ອນຸກມ຺ປນ຺ໂຕ’’ຕິ.

໓໒. ເອກາທສເມ ວິຊ຺ຊໍ ຠຊນ຺ຕີຕິ ວິຊ຺ຊາຠາຄິຍາ, ວິຊ຺ຊາຠາເຄ ວິຊ຺ຊາໂກຏ຺ຐາເສ ວຕ຺ຕນ຺ຕີຕິປິ ວິຊ຺ຊາຠາຄິຍາ. ປທໍ ປຈ຺ຉິນ຺ທຕີຕິ ມຄ຺ຄຈິຕ຺ຕສ຺ສ ປຕິຏ຺ຐໍ ອຸປຈ຺ຉິນ຺ທຕິ, ມຄ຺ຄຈິຕ຺ຕໍ ປຕິຏ຺ຐາເປຕຸໍ ນ ເທຕີຕິ ອຕ຺ໂຖ. ອຸພ຺ພຏ຺ເຏຕ຺ວາຕິ ສມຸຈ຺ເຉທວເສນ ສມູລໍ ອຸທ຺ຘຣິຕ຺ວາ. ອຏ຺ຐສຸ ຐາເນສູຕິ ພຸທ຺ຘາທີສຸ ອຏ຺ຐສຸ ຐາເນສຸ. ຣາຄສ຺ສ ຂຍວິຣາເຄນາຕິ ຣາຄສ຺ສ ຂຍສງ຺ຂາເຕນ ວິຣາເຄນ, ຣາຄສ຺ສ ອນຸປ຺ປຕ຺ຕິຘມ຺ມຕາປາທເນນາຕິ ວຸຕ຺ຕໍ ໂຫຕິ.

ພາລວຄ຺ຄວຓ຺ຓນາ ນິຏ຺ຐິຕາ.