໙. ຈຣິຍສຸຕ຺ຕວຓ຺ຓນາ

໙. ນວເມ ໂລກນ຺ຕິ ສຕ຺ຕໂລກໍ. ສນ຺ຘາເຣນ຺ຕີຕິ ອາຈາຣສນ຺ຘາຣຓວເສນ ຘາເຣນ຺ຕິ. ຐເປນ຺ຕີຕິ ມຣິຍາທາຍໍ ຐເປນ຺ຕິ. ຣກ຺ຂນ຺ຕີຕິ ອາຈາຣສນ຺ຘາຣເຓນ ມຣິຍາທາຍໍ ຐເປຕ຺ວາ ຣກ຺ຂນ຺ຕິ. ຄຣຸຈິຕ຺ຕີກາຣວເສນ ນ ປຎ຺ຎາເຍຖາຕິ ຄຣຸໍ ກຕ຺ວາ ຈິຕ຺ເຕ ກຣຓວເສນ ນ ປຎ຺ຎາເຍຖ, ອຍມາຈາໂຣ ນ ລພ຺ເຠຍ຺ຍ. ມາຕຸຈ຺ຉາຕິ ວາຕິ ເອຕ຺ຖ ອິຕິ-ສທ຺ໂທ ອາທ຺ຍຕ຺ໂຖ. ເຕນ ມາຕຸລານີຕິ ວາ ອາຈຣິຍຠຣິຍາຕິ ວາ ຄຣູນໍ ທາຣາຕິ ວາຕິ ອິເມ ສງ຺ຄຓ຺ຫາຕິ. ຕຕ຺ຖ ມາຕຸ ຠຄິນີ ມາຕຸຈ຺ຉາ. ມາຕຸລຠຣິຍາ ມາຕຸລານີ. ຄຣູນໍ ທາຣາ ມຫາປິຕຸຈູຬປິຕຸເຊຏ຺ຐຠາຕຸອາທີນໍ ຄຣຸຏ຺ຐານິຍານໍ ຠຣິຍາ. ຍຖາ ອເຊຬກາຕິອາທີສຸ ອຍໍ ສງ຺ເຂປຕ຺ໂຖ – ຍຖາ ອເຊຬກາທໂຍ ຕິຣຈ຺ຉານາ ຫິໂຣຕ຺ຕປ຺ປຣຫິຕາ ມາຕາຕິ ສຎ຺ຎໍ ອກຕ຺ວາ ຠິນ຺ນມຣິຍາທາ ສພ຺ພຕ຺ຖ ສມ຺ເຠເທນ ວຕ຺ຕນ຺ຕິ, ເອວມຍໍ ມນຸສ຺ສໂລໂກ ຍທິ ໂລກປາລຘມ຺ມາ ນ ຠເວຍ຺ຍຸໍ, ສພ຺ພຕ຺ຖ ສມ຺ເຠເທນ ວຕ຺ເຕຍ຺ຍ. ຍສ຺ມາ ປນິເມ ໂລກປາລກຘມ຺ມາ ໂລກໍ ປາເລນ຺ຕິ, ຕສ຺ມາ ນຕ຺ຖິ ສມ຺ເຠໂທຕິ.

ຈຣິຍສຸຕ຺ຕວຓ຺ຓນາ ນິຏ຺ຐິຕາ.