໑. ກມ຺ມກາຣຓວຄ຺ໂຄ

໑. ວຊ຺ຊສຸຕ຺ຕວຓ຺ຓນາ

໑. ທຸກນິປາຕສ຺ສ ປຐເມ ປຫາຣສາຘນຕ຺ຖນ຺ຕິ ທຓ຺ຑປ຺ປຫາຣສ຺ສ ສຸຂສິທ຺ຘິ-ອຕ຺ຖໍ. ກຎ຺ຊິໂຕ ນິພ຺ພຕ຺ຕໍ ກຎ຺ຊິຍໍ, ອາຣນາລໍ, ຍໍ ພິລງ຺ຄນ຺ຕິປິ ວຸຈ຺ຈຕິ, ຕໍ ຍຕ຺ຖ ສິຎ຺ຈຕິ, ສາ ກຎ຺ຊິຍອຸກ຺ຂລິກາ ພິລງ຺ຄຖາລິກາ, ຕໍສທິສໍ ກາຣຓໍ ພິລງ຺ຄຖາລິກໍ. ສີສກຏາຫໍ ອຸປ຺ປາເຏຕ຺ວາຕິ ອໂຍຄຸຬປ຺ປເວສປ຺ປມາຓໍ ຉິທ຺ທໍ ກຕ຺ວາ. ສງ຺ຂມຸຓ຺ຑກມ຺ມກາຣຓນ຺ຕິ ສງ຺ຂໍ ວິຍ ມຸຓ຺ຑກຣຓໍ ກມ຺ມກາຣຓໍ. ຣາຫຸມຸຂກມ຺ມກາຣຓນ຺ຕິ ຣາຫຸມຸຂຄຕສູຣິຍສທິສກມ຺ມກາຣຓໍ.

ໂຊຕິມາລິກນ຺ຕິ ໂຊຕິມາລວນ຺ຕໍ ກມ຺ມກາຣຓໍ. ຫຕ຺ຖປຊ຺ໂຊຕິກນ຺ຕິ ຫຕ຺ຖສ຺ສ ປຊ຺ໂຊຕນກມ຺ມກາຣຓໍ. ເອຣກວຕ຺ຕກມ຺ມກາຣຓນ຺ຕິ ເອຣກວຕ຺ຕສທິເສ ສຣີຣໂຕ ຈມ຺ມວຕ຺ເຕ ອຸປ຺ປາຏນກມ຺ມກາຣຓໍ. ຈີຣກວາສິກກມ຺ມກາຣຓນ຺ຕິ ສຣີຣໂຕ ອຸປ຺ປາຏິຕວຕ຺ຕຈີຣເກຫິ ນິວາສາປນກມ຺ມກາຣຓໍ. ຕໍ ກໂຣນ຺ຕາ ຍຖາ ຄີວໂຕ ປຏ຺ຐາຍ ວທ຺ເຘ ກນ຺ຕິຕ຺ວາ ກຏິຍໍ ຐເປນ຺ຕິ, ເອວໍ ໂຄປ຺ຜກໂຕ ປຏ຺ຐາຍ ກນ຺ຕິຕ຺ວາປິ ກຏິຍເມວ ຐເປນ຺ຕິ. ອຏ຺ຐກຖາຍໍ ປນ ‘‘ກຏິໂຕ ປຏ຺ຐາຍ ກນ຺ຕິຕ຺ວາ ໂຄປ຺ຜເກສຸ ຐເປນ຺ຕີ’’ຕິ ວຸຕ຺ຕໍ. ເອເຓຍ຺ຍກກມ຺ມກາຣຓນ຺ຕິ ເອຓິມິຄສທິສກມ຺ມກາຣຓໍ. ອຍວລຍານິ ທຕ຺ວາຕິ ອຍວລຍານິ ປຏິມຸຎ຺ຈິຕ຺ວາ. ອຍສູລານິ ໂກຏ຺ເຏນ຺ຕີຕິ ກປ຺ປຣຊຓ຺ຓຸກໂກຏີສຸ ອຍສູລານິ ປເວເສນ຺ຕິ. ຕນ຺ຕິ ຕໍ ຕຖາກຕກມ຺ມກາຣຓໍ ສຕ຺ຕໍ.

ພຬິສມໍສິກນ຺ຕິ ພລິເສຫິ ມໍສຸປ຺ປາຏນກມ຺ມກາຣຓໍ. ກຫາປຓິກນ຺ຕິ ກຫາປຓມຕ຺ຕໂສ ຉິນ຺ທນກມ຺ມກາຣຓໍ. ໂກຏ຺ເຏນ຺ຕີຕິ ຉິນ຺ທນ຺ຕິ. ຂາຣາປຕຈ຺ຉິກນ຺ຕິ ຕຈ຺ເຉຕ຺ວາ ຂາຣາປສິຎ຺ຈນກມ຺ມກາຣຓໍ. ປລິຆປຣິວຕ຺ຕິກນ຺ຕິ ປລິຆສ຺ສ ວິຍ ປຣິວຕ຺ຕນກມ຺ມກາຣຓໍ. ເອກາພທ຺ຘໍ ກໂຣນ຺ຕິ ອຍສູລສ຺ສ ໂກຏ຺ຏເນນ. ປລາລປີຐກນ຺ຕິ ປລາລປີຐສ຺ສ ວິຍ ສຣີຣສ຺ສ ສໍເວລ຺ລນກມ຺ມກາຣຓໍ. ກາຣຓິກາຕິ ຆາຕນກາຣກາ. ປລາລວຏ຺ຏິໍ ວິຍ ກຕ຺ວາຕິ ຍຖາ ປລາລປີຐໍ ກໂຣນ຺ຕາ ປລາລໍ ວຏ຺ຏິໍ ກຕ຺ວາ ສໍເວລ຺ລນວເສນ ປຸນ ເວເຐນ຺ຕິ, ເອວໍ ກໂຣນ຺ຕີຕິ ອຕ຺ໂຖ. ຉາຕກສຸນເຂຫີຕິ ຂຸທ຺ທເກຫິ ໂກເລຍ຺ຍກສຸນເຂຫິ. ເຕ ຫິ ພລວນ຺ຕາ ຊວໂຍຄາ ສູຣາ ຈ ໂຫນ຺ຕິ. ສຫສ຺ສຠຓ຺ຑິກນ຺ຕິ ສຫສ຺ສຕ຺ຖວິກໍ.

ຍາຫນ຺ຕິ ຍໍ ອຫໍ. ຍນ຺ຕິ ຈ ກາຣຓວຈນໍ. ເຕນາຫ ‘‘ເຍນ ອຫ’’ນ຺ຕິ. ຉິນ຺ນມູລເກຕິ ຕຓ຺ຫາມູລສ຺ສ ອຸຈ຺ຉິນ຺ນຕ຺ຕາ ສຎ຺ຉິນ຺ນມູລເກ.

ວຊ຺ຊສຸຕ຺ຕວຓ຺ຓນາ ນິຏ຺ຐິຕາ.

໒. ປຘານສຸຕ຺ຕວຓ຺ຓນາ

໒. ທຸຕິເຍ ອຸຠໂຕພ຺ຍູຬ຺ຫສງ຺ຄາມປ຺ປເວສນສທິສນ຺ຕິ ຍຸທ຺ຘຕ຺ຖາຍ ອຸຠໂຕຣາສິກຕຈຕຸຣງ຺ຄິນິເສນາມຊ຺ຌປ຺ປເວສນສທິສໍ. ທານຎ຺ຈ ຍຸທ຺ຘຎ຺ຈ ສມານມາຫູຕິ ເອຕ຺ຖ ກຖໍ ປນີທມຸຠຍໍ ສມານໍ? ຊີວິຕວິນາສຠີຣຸໂກ ຫິ ຍຸຊ຺ຌິຕຸໍ ນ ສກ຺ໂກຕິ, ໂຠຄກ຺ຂຍຠີຣຸໂກ ທານໍ ທາຕຸໍ ນ ສກ຺ໂກຕິ. ‘‘ຊີວິຕຎ຺ຈ ຣກ຺ຂິສ຺ສາມິ, ຍຸຊ຺ຌິສ຺ສາມີ’’ຕິ ຫິ ວທນ຺ໂຕ ນ ຍຸຊ຺ຌຕິ, ຊີວິເຕ ປນ ອາລຍໍ ວິສ຺ສຊ຺ເຊຕ຺ວາ ‘‘ຫຕ຺ຖປາທາທິຈ຺ເຉໂທ ວາ ໂຫຕຸ ມຣຓໍ ວາ, ຄຓ຺ຫິສ຺ສາເມຕໍ ອິສ຺ສຣິຍ’’ນ຺ຕິ ອຸສ຺ສຫນ຺ໂຕວ ຍຸຊ຺ຌຕິ. ‘‘ໂຠເຄ ຈ ຣກ຺ຂິສ຺ສາມິ, ທານຎ຺ຈ ທສ຺ສາມີ’’ຕິ ວທນ຺ໂຕປິ ນ ທທາຕິ, ໂຠເຄສຸ ປນ ອາລຍໍ ປິສ຺ສຊ຺ເຊຕ຺ວາ ‘‘ມຫາທານໍ ທສ຺ສາມີ’’ຕິ ອຸສ຺ສຫນ຺ໂຕວ ເທຕິ. ເອວໍ ທານຎ຺ຈ ຍຸທ຺ຘຎ຺ຈ ສມໍ ໂຫຕິ. ກິຎ຺ຈ ຠິຍ຺ໂຍ – ອປ຺ປາປິ ສນ຺ຕາ ພຫຸເກ ຊິນນ຺ຕິ, ຍຖາ ຈ ຍຸທ຺ເຘ ອປ຺ປກາປິ ວີຣປຸຣິສາ ພຫຸເກ ຠີຣຸປຸຣິເສ ຊິນນ຺ຕິ, ເອວໍ ສທ຺ຘາທິສມ຺ປນ຺ໂນ ອປ຺ປກມ຺ປິ ທານໍ ທທນ຺ໂຕ ພຫຸວິຘໍ ໂລຠໂທສອິສ຺ສາມຈ຺ຉຣິຍທິຏ຺ຐິວິຈິກິຈ຺ຉາທິເຠທໍ ຕປ຺ປຏິປກ຺ຂໍ ອຠິຠວຕິ, ພຫຸຎ຺ຈ ທານວິປາກໍ ອຘິຄຈ຺ຉຕິ. ເອວມ຺ປິ ທານຎ຺ຈ ຍຸທ຺ຘຎ຺ຈ ສມານໍ. ເຕນາຫ ‘‘ອປ຺ປມ຺ປິ ເຈ ສທ຺ທຫາໂນ ທທາຕິ, ເຕເນວ ໂສ ໂຫຕິ ສຸຂີ ປຣຕ຺ຖາ’’ຕິ.

ອຄາຣສ຺ສ ຫິຕໍ ກສິໂຄຣກ຺ຂາທິ ອຄາຣິຍໍ, ຕໍ ນຕ຺ຖິ ເອຕ຺ຖາຕິ ອນຄາຣິຍໍ, ປພ຺ພຊ຺ຊາຕິ ອາຫ ‘‘ອຄາຣສ຺ສ…ເປ… ອນຄາຣິຍໍ ປພ຺ພຊ຺ຊ’’ນ຺ຕິ. ສພ຺ພູປຘິປຏິນິສ຺ສຄ຺ຄຕ຺ຖາຍາຕິ ເອຕ຺ຖ ຈຕ຺ຕາໂຣ ອຸປຘີ – ກາມຸປຘິ, ຂນ຺ຘຸປຘິ, ກິເລສຸປຘິ, ອຠິສງ຺ຂາຣຸປຘີຕິ. ກາມາປິ ຫິ ‘‘ຍໍ ປຎ຺ຈ ກາມຄຸເຓ ປຏິຈ຺ຈ ອຸປ຺ປຊ຺ຊຕິ ສຸຂໍ ໂສມນສ຺ສໍ, ອຍໍ ກາມານໍ ອສ຺ສາໂທ’’ຕິ (ອ. ນິ. ໙.໓໔) ເອວໍ ວຸຕ຺ຕສ຺ສ ສຸຂສ຺ສ, ຕທສ຺ສາທນິມິຕ຺ຕສ຺ສ ວາ ທຸກ຺ຂສ຺ສ ອຘິຏ຺ຐານຠາວໂຕ ອຸປຘີຍຕິ ເອຕ຺ຖ ສຸຂນ຺ຕິ ອິມິນາ ວຈນຕ຺ເຖນ ‘‘ອຸປຘີ’’ຕິ ວຸຈ຺ຈນ຺ຕິ. ຂນ຺ຘາປິ ຂນ຺ຘມູລກສ຺ສ ທຸກ຺ຂສ຺ສ ອຘິຏ຺ຐານຠາວໂຕ, ກິເລສາປິ ອປາຍທຸກ຺ຂສ຺ສ ອຘິຏ຺ຐານຠາວໂຕ, ອຠິສງ຺ຂາຣາປິ ຠວທຸກ຺ຂສ຺ສ ອຘິຏ຺ຐານຠາວໂຕ ‘‘ອຸປຘີ’’ຕິ ວຸຈ຺ຈນ຺ຕິ. ສພ຺ເພສໍ ອຸປຘີນໍ ປຏິນິສ຺ສຄ຺ໂຄ ປຫານໍ ເອຕ຺ຖາຕິ ສພ຺ພູປຘິປຏິນິສ຺ສຄ຺ຄໍ, ນິພ຺ພານໍ. ເຕນາຫ ‘‘ສພ຺ເພສໍ ຂນ຺ຘູປຘິ…ເປ… ນິພ຺ພານສ຺ສ ອຕ຺ຖາຍາ’’ຕິ.

ປຘານສຸຕ຺ຕວຓ຺ຓນາ ນິຏ຺ຐິຕາ.

໓. ຕປນີຍສຸຕ຺ຕວຓ຺ຓນາ

໓. ຕຕິເຍ ຕປນີຍາຕິ ເອຕ຺ຖ ກຕ຺ຕຸອຕ຺ເຖ ອນີຍ-ສທ຺ໂທຕິ ອາຫ ‘‘ຕປນ຺ຕີຕິ ຕປນີຍາ’’ຕິ. ຕປນ຺ຕີຕິ ວິພາເຘນ຺ຕິ, ວິເຫເຐນ຺ຕີຕິ ອຕ຺ໂຖ. ຕປນໍ ວາ ທຸກ຺ຂໍ, ທິຏ຺ເຐ ເຈວ ຘມ຺ເມ ອຠິສມ຺ປຣາຍຎ຺ຈ ຕສ຺ສ ອຸປ຺ປາທເນນ ເຈວ ອນຸພລປ຺ປທາເນນ ຈ ຫິຕາຕິ ຕປນີຍາ. ອຖ ວາ ຕປນ຺ຕິ ເຕນາຕິ ຕປນໍ, ອນຸຕາໂປ, ວິປ຺ປຏິສາໂຣຕິ ອຕ຺ໂຖ. ຕສ຺ສ ເຫຕຸຠາວໂຕ ຫິຕາຕິ ຕປນີຍາ. ອນຸໂສຈຕີຕິ ວິປ຺ປຏິສາຣີ ຫຸຕ຺ວາ ກຕາກຕໍ ອນຸຄມ຺ມ ໂສຈຕິ. ໂສຈນຎ຺ຫິ ກຕຕ຺ຕາ ຈ ໂຫຕິ ອກຕຕ຺ຕາ ຈ. ຕຖາ ເຈວ ປາຬິຍໍ ວິຠຕ຺ຕໍ. ນນ຺ທຍກ຺ຂາທີນໍ ວຕ຺ຖູນິ ປາກຏານີຕິ ຕານິ ອທສ຺ເສຕ຺ວາ ທ຺ເວຠາຕິກວຕ຺ຖຸໍ ທສ຺ເສນ຺ໂຕ ‘‘ເຕ ກິຣາ’’ຕິ ອາທິມາຫ. ຕຕ຺ຖ ເຕຕິ ທ຺ເວ ຠາຕໂຣ. ປຸນ ກິໍ ມຄ຺ຄສີຕິ ປຸນ ກິໍ ອິຈ຺ຉສິ.

ຕປນີຍສຸຕ຺ຕວຓ຺ຓນາ ນິຏ຺ຐິຕາ.

໕. ອຸປຎ຺ຎາຕສຸຕ຺ຕວຓ຺ຓນາ

໕. ປຎ຺ຈເມ ອິມຎ຺ຫິ ຘມ຺ມທ຺ວຍນ຺ຕິ ກຸສເລສຸ ຘມ຺ເມສຸ ອສນ຺ຕຸຏ຺ຐິຕາ, ປຘານສ຺ມິໍ ອໂນສກ຺ກນສງ຺ຂາຕໍ ຘມ຺ມທ຺ວຍໍ. ອິມິນາຕິ ‘‘ອສນ຺ຕຸຏ຺ຐິຕາ ກຸສເລສຸ ຘມ຺ເມສູ’’ຕິ ວຈເນນ. ອິມໍ ທີເປຕີຕິ ‘‘ຍາວ ໂສ ອຸປ຺ປຊ຺ຊຕິ, ນ ຕາວາຫໍ ສນ຺ຕຸຏ຺ໂຐ ອໂຫສິ’’ນ຺ຕິ ເອຕໍ ປຣິຍນ຺ຕໍ ກຕ຺ວາ ວກ຺ຂມານຕ຺ຖໍ ທີເປຕິ. ປຘານສ຺ມິນ຺ຕິ ວີຣິຍາຣມ຺ເຠ. ອິມມຕ຺ຖນ຺ຕິ ‘‘ປຘານສ຺ມິຎ຺ຈາ’’ຕິອາທິນາ ວຸຕ຺ຕມຕ຺ຖໍ. ວີຣິຍປ຺ປວາເຫ ວຕ຺ຕມາເນ ອນ຺ຕຣາ ເອວ ປຏິຄມນໍ ນິວຕ຺ຕນໍ ປຏິວານໍ, ຕທສ຺ສ ອຕ຺ຖີຕິ ປຏິວານີ, ນ ປຏິວານີ ອປ຺ປຏິວານີ, ຕສ຺ສ ຠາໂວ ອປ຺ປຏິວານິຕາ, ອໂນສກ຺ກນາຕິ ອາຫ ‘‘ອປ຺ປຏິວານິຕາຕິ ອປ຺ປຏິກ຺ກມນາ ອໂນສກ຺ກນາ’’ຕິ. ຕຕ຺ຖ ອໂນສກ຺ກນາຕິ ອປ຺ປຏິນິວຕ຺ຕິ.

ອາຄມນີຍປຏິປທາຕິ ສມຖວິປສ຺ສນາສງ຺ຂາຕາ ປຸພ຺ພຠາຄປຏິປຕ຺ຕິ. ສາ ຫິ ອາຄຈ຺ຉນ຺ຕິ ວິເສສມຘິຄຈ຺ຉນ຺ຕິ ເອຕາຍ, ອາຄຈ຺ຉຕິ ວາ ວິເສສາຘິຄໂມ ເອຕາຍາຕິ ອາຄມນີຍາ, ສາ ເອວ ປຏິປຊ຺ຊິຕພ຺ພໂຕ ປຏິປທາຕິ ອາຄມນີຍປຏິປທາ. ອປ຺ປຏິວານປຘານນ຺ຕິ ໂອສກ຺ກນາຣຫິຕປ຺ປຘານໍ, ອນ຺ຕຣາ ອໂນສກ຺ກິຕ຺ວາ ກຕວີຣິຍນ຺ຕິ ອຕ຺ໂຖ.

ອຸປຎ຺ຎາຕສຸຕ຺ຕວຓ຺ຓນາ ນິຏ຺ຐິຕາ.

໖. ສໍໂຍຊນສຸຕ຺ຕວຓ຺ຓນາ

໖. ຉຏ຺ເຐ ສໍໂຍຊນານໍ ຫິຕາ ປຈ຺ຈຍຠາເວນາຕິ ສໍໂຍຊນິຍາ, ເຕຠູມກາ ຘມ຺ມາ. ເຕນາຫ ‘‘ທສນ຺ນໍ ສໍໂຍຊນານ’’ນ຺ຕິອາທິ. ສໍໂຍຊນິເຍ ຘມ຺ເມ ອສ຺ສາທໂຕ ອນຸປສ຺ສຕິ ສີເລນາຕິ ອສ຺ສາທານຸປສ຺ສີ, ຕສ຺ສ ຠາໂວ ອສ຺ສາທານຸປສ຺ສິຕາ. ນິພ຺ພິທານຸປສ຺ສິຕາຕິ ເອຕ຺ຖາປິ ເອເສວ ນໂຍ. ອຸກ຺ກຓ຺ຐນວເສນາຕິ ສໍໂຍຊນິເຍສຸ ເຕຠູມກຘມ຺ເມສຸ ນິພ຺ພິນ຺ທນວເສນ. ຊນນໍ ຊາຕິ, ຂນ຺ຘານໍ ປາຕຸຠາໂວຕິ ອາຫ ‘‘ຊາຕິຍາຕິ ຂນ຺ຘນິພ຺ພຕ຺ຕິໂຕ’’ຕິ, ຂນ຺ຘານໍ ຕຕ຺ຖ ຕຕ຺ຖ ຠເວ ອປຣາປຣໍ ນິພ຺ພຕ຺ຕິໂຕຕິ ອຕ຺ໂຖ. ຂນ຺ຘປຣິປາໂກ ເອກຠວປຣິຍາປນ຺ນານໍ ຂນ຺ຘານໍ ປຸຣາຓຠາໂວ. ເອກຠວປຣິຍາປນ຺ນຊີວິຕິນ຺ທ຺ຣິຍປ຺ປພນ຺ຘວິຈ຺ເຉທວເສນ ຂນ຺ຘານໍ ເຠໂທ ອິຘ ມຣຓນ຺ຕິ ອາຫ ‘‘ມຣເຓນາຕິ ຂນ຺ຘເຠທໂຕ’’ຕິ. ອນ຺ໂຕນິຊ຺ຌານໍ ຈິຕ຺ຕສນ຺ຕາໂປ. ປຣິເທໂວ ນາມ ຎາຕິພ຺ຍສນາທີຫິ ຜຸຏ຺ຐສ຺ສ ວາຈາວິປ຺ປລາໂປ. ໂສ ຈ ໂສກສມຸຏ຺ຐາໂນຕິ ອາຫ ‘‘ຕນ຺ນິສ຺ສິຕລາລປ຺ປິຕລກ຺ຂເຓຫິ ປຣິເທເວຫີ’’ຕິ. ລາລປ຺ປິຕໍ ວາຈາວິປ຺ປລາໂປ, ໂສ ຈ ອຕ຺ຖໂຕ ສທ຺ໂທເຍວ.

ທຸກ຺ຂນ຺ຕິ ອິຘ ກາຍິກໍ ທຸກ຺ຂໍ ອຘິປ຺ເປຕນ຺ຕິ ອາຫ ‘‘ກາຍປຏິປີຬນທຸກ຺ເຂຫີ’’ຕິ. ມໂນວິຆາຕໂທມນສ຺ເສຫີຕິ ມນໂສ ວິຆາຕກເຣຫິ ໂທມນສ຺ເສຫິ. ພ຺ຍາປາທສມ຺ປໂຍເຄນ ມນໂສ ວິຫນນຣສຎ຺ຫິ ໂທມນສ຺ສໍ. ຠຸໂສ ອາຍາໂສ ອຸປາຍາໂສ ຍຖາ ‘‘ຠຸສມາທານໍ ອຸປາທານ’’ນ຺ຕິ, ໂສ ຈ ອຕ຺ຖໂຕ ຎາຕິພ຺ຍສນາທີຫິ ຜຸຏ຺ຐສ຺ສ ອຘິມຕ຺ຕເຈໂຕທຸກ຺ຂປ຺ປຠາວິໂຕ ໂທໂສເຍວ. ກາຍຈິຕ຺ຕານຎ຺ຫິ ອາຍາສນວເສນ ໂທສສ຺ເສວ ປວຕ຺ຕິອາກາໂຣ ອຸປາຍາໂສຕິ ວຸຈ຺ຈຕິ ສງ຺ຂາຣກ຺ຂນ຺ຘປຣິຍາປນ຺ໂນ. ຕໍ ຈຸທ຺ທສຫິ ອກຸສລເຈຕສິເກຫິ ອຎ຺ໂຎ ເອໂກ ເຈຕສິກຘມ຺ໂມຕິ ເອເກ. ຍໍ ວິສາໂທຕິ ຈ ວທນ຺ຕິ.

ສໍໂຍຊນສຸຕ຺ຕວຓ຺ຓນາ ນິຏ຺ຐິຕາ.

໗. ກຓ຺ຫສຸຕ຺ຕວຓ຺ຓນາ

໗. ສຕ຺ຕເມ ຍຖາ ‘‘ກຓ຺ຫາ ຄາວີ’’ຕິອາທີສຸ ກາຬວຓ຺ເຓນ ສມນ຺ນາຄຕາ ‘‘ກຓ຺ຫາ’’ຕິ ວຸຈ຺ຈຕິ, ນ ເອວໍ ກາຬວຓ຺ຓຕາຍ ຘມ຺ມາ ‘‘ກຓ຺ຫາ’’ຕິ ວຸຈ຺ຈນ຺ຕິ, ອຖ ໂຂ ກຓ຺ຫາຠິຊາຕິນິພ຺ພຕ຺ຕິເຫຕຸໂຕ ອປ຺ປຠສ຺ສຣຠາວກຣຓໂຕ ວາ ‘‘ກຓ຺ຫາ’’ຕິ ວຸຈ຺ຈນ຺ຕີຕິ ທສ຺ເສນ຺ໂຕ ‘‘ນ ກາຬວຓ຺ຓຕາຍາ’’ຕິອາທິມາຫ. ກຓ຺ຫຕາຍາຕິ ກຓ຺ຫາຠິຊາຕິຕາຍ. ກຓ຺ຫາຠິຊາຕີຕິ ຈ ອປາຍາ ວຸຈ຺ຈນ຺ຕິ ມນຸສ຺ເສສຸ ຈ ໂທຠຄ຺ຄິຍໍ. ສຣເສນາຕິ ສຠາເວນ. ນ ຫິຣີຍຕິ ນ ລຊ຺ຊຕີຕິ ອຫິຣິໂກ, ປຸຄ຺ຄໂລ, ຈິຕ຺ຕໍ, ຕໍ ສມ຺ປຍຸຕ຺ຕຘມ຺ມສມຸທາໂຍ ວາ. ຕສ຺ສ ຠາໂວ ອຫິຣິກ຺ກນ຺ຕິ ວຕ຺ຕພ຺ເພ ເອກສ຺ສ ກ-ກາຣສ຺ສ ໂລປໍ ກຕ຺ວາ ອຫິຣິກນ຺ຕິ ວຸຕ຺ຕນ຺ຕິ ອາຫ ‘‘ອຫິຣິກນ຺ຕິ ອຫິຣິກຠາໂວ’’ຕິ. ນ ໂອຕ຺ຕປ຺ປຕີຕິ ອໂນຕ຺ຕາປີ, ປຸຄ຺ຄໂລ, ຍຖາວຸຕ຺ຕຘມ຺ມສມຸທາໂຍ ວາ, ຕສ຺ສ ຠາໂວ ອໂນຕ຺ຕປ຺ປນ຺ຕິ ອາຫ ‘‘ອໂນຕ຺ຕາປິຠາໂວ’’ຕິ.

ກຓ຺ຫສຸຕ຺ຕວຓ຺ຓນາ ນິຏ຺ຐິຕາ.

໘. ສຸກ຺ກສຸຕ຺ຕວຓ຺ຓນາ

໘. ອຏ຺ຐເມ ‘‘ສຸກ຺ກໍ ວຕ຺ຖ’’ນ຺ຕິອາທີສຸ ວິຍ ນ ວຓ຺ຓສຸກ຺ກຕາຍ ຘມ຺ມານໍ ສຸກ຺ກຕາ, ອຖ ໂຂ ສຸກ຺ກາຠິຊາຕິເຫຕຸໂຕ ປຠສ຺ສຣຠາວກຣຓໂຕ ຈາຕິ ທສ຺ເສນ຺ໂຕ ‘‘ນ ວຓ຺ຓສຸກ຺ກຕາຍາ’’ຕິອາທິມາຫ. ສຸກ຺ກຕາຍາຕິ ສຸກ຺ກາຠິຊາຕິຕາຍ. ຫິຣີ ປາປຘມ຺ເມ ຄູຖໍ ວິຍ ປສ຺ສນ຺ຕີ ຊິຄຸຈ຺ຉຕີຕິ ອາຫ ‘‘ປາປໂຕ ຊິຄຸຈ຺ຉນລກ຺ຂຓາ ຫິຣີ’’ຕິ. ໂອຕ຺ຕປ຺ປໍ ເຕ ອຸຓ຺ຫໍ ວິຍ ປສ຺ສນ຺ຕໍ ຕໂຕ ຠາຍຕີຕິ ວຸຕ຺ຕໍ ‘‘ຠາຍນລກ຺ຂຓໍ ໂອຕປ຺ປ’’ນ຺ຕິ. ອິທຎ຺ຈ ຫິໂຣຕ຺ຕປ຺ປໍ ອຎ຺ຎມຎ຺ຎວິປ຺ປໂຍຄີ ປາປໂຕ ວິມຸຂຠູຕຎ຺ຈ, ຕສ຺ມາ ເນສໍ ອິທໍ ນານາກຣຓໍ – ອຊ຺ຌຕ຺ຕສມຸຏ຺ຐານາ ຫິຣີ, ພຫິທ຺ຘາສມຸຏ຺ຐານໍ ໂອຕ຺ຕປ຺ປໍ. ອຕ຺ຕາຘິປຕິ ຫິຣີ, ໂລກາຘິປຕິ ໂອຕປ຺ປໍ. ລຊ຺ຊາສຠາວສຓ຺ຐິຕາ ຫິຣີ, ຠຍສຠາວສຓ຺ຐິຕໍ ໂອຕ຺ຕປ຺ປໍ. ສປ຺ປຕິສ຺ສວລກ຺ຂຓາ ຫິຣີ, ວຊ຺ຊຠີຣຸກຠຍທສ຺ສາວິລກ຺ຂຓໍ ໂອຕ຺ຕປ຺ປນ຺ຕິ.

ຕຕ຺ຖ ອຊ຺ຌຕ຺ຕສມຸຏ຺ຐານໍ ຫິຣິໍ ຈຕູຫິ ກາຣເຓຫິ ສມຸຏ຺ຐາເປຕິ ຊາຕິໍ ປຈ຺ຈເວກ຺ຂິຕ຺ວາ, ວຍໍ, ສູຣຠາວໍ, ພາຫຸສຈ຺ຈໍ ປຈ຺ຈເວກ຺ຂິຕ຺ວາ. ກຖໍ? ‘‘ປາປກຣຓໍ ນາເມຕໍ ນ ຊາຕິສມ຺ປນ຺ນານໍ ກມ຺ມໍ, ຫີນຊຈ຺ຈານໍ ເກວຏ຺ຏາທີນໍ ກມ຺ມໍ, ມາທິສສ຺ສ ຊາຕິສມ຺ປນ຺ນສ຺ສ ອິທໍ ກາຕຸໍ ນ ຍຸຕ຺ຕ’’ນ຺ຕິ ເອວໍ ຕາວ ຊາຕິໍ ປຈ຺ຈເວກ຺ຂິຕ຺ວາ ປາປໍ ອກໂຣນ຺ໂຕ ຫິຣິໍ ສມຸຏ຺ຐາເປຕິ. ຕຖາ ‘‘ປາປກຣຓໍ ນາເມຕໍ ທຫເຣຫິ ກຕ຺ຕພ຺ພໍ ກມ຺ມໍ, ມາທິສສ຺ສ ວເຍ ຐິຕສ຺ສ ອິທໍ ກາຕຸໍ ນ ຍຸຕ຺ຕ’’ນ຺ຕິ ເອວໍ ວຍໍ ປຈ຺ຈເວກ຺ຂິຕ຺ວາ ປາປໍ ອກໂຣນ຺ໂຕ ຫິຣິໍ ສມຸຏ຺ຐາເປຕິ. ຕຖາ ‘‘ປາປກຣຓໍ ນາເມຕໍ ທຸພ຺ພລຊາຕິການໍ ກມ຺ມໍ, ມາທິສສ຺ສ ສູຣຠາວສມ຺ປນ຺ນສ຺ສ ອິທໍ ກາຕຸໍ ນ ຍຸຕ຺ຕ’’ນ຺ຕິ ເອວໍ ສູຣຠາວໍ ປຈ຺ຈເວກ຺ຂິຕ຺ວາ ປາປໍ ອກໂຣນ຺ໂຕ ຫິຣິໍ ສມຸຏ຺ຐາເປຕິ. ຕຖາ ‘‘ປາປກມ຺ມໍ ນາເມຕໍ ອນ຺ຘພາລານໍ ກມ຺ມໍ, ນ ປຓ຺ຑິຕານໍ, ມາທິສສ຺ສ ປຓ຺ຑິຕສ຺ສ ພຫຸສ຺ສຸຕສ຺ສ ອິທໍ ກາຕຸໍ ນ ຍຸຕ຺ຕ’’ນ຺ຕິ ເອວໍ ພາຫຸສຈ຺ຈໍ ປຈ຺ຈເວກ຺ຂິຕ຺ວາ ປາປໍ ອກໂຣນ຺ໂຕ ຫິຣິໍ ສມຸຏ຺ຐາເປຕິ. ເອວໍ ອຊ຺ຌຕ຺ຕສມຸຏ຺ຐານໍ ຫິຣິໍ ຈຕູຫິ ກາຣເຓຫິ ສມຸຏ຺ຐາເປຕິ, ສມຸຏ຺ຐາເປນ຺ໂຕ ຈ ຫິຣິໍ ນິສ຺ສາຍ ປາປກມ຺ມໍ ນ ກໂຣຕິ.

ກຖໍ ພຫິທ຺ຘາສມຸຏ຺ຐານໍ ໂອຕ຺ຕປ຺ປໍ? ‘‘ສເຈ ຕ຺ວໍ ປາປກມ຺ມໍ ກຣິສ຺ສສິ, ຈຕູສຸ ປຣິສາສຸ ຄຣຫປ຺ປຕ຺ໂຕ ຠວິສ຺ສສິ, ຕໂຕ ຕໍ ສີລວນ຺ໂຕ ສພ຺ຣຫ຺ມຈາຣີ ວິວຊ຺ຊິສ຺ສນ຺ຕີ’’ຕິ ປຈ຺ຈເວກ຺ຂິຕ຺ວາ ພຫິທ຺ຘາສມຸຏ຺ຐານໍ ໂອຕ຺ຕປ຺ປໍ ນິສ຺ສາຍ ປາປກມ຺ມໍ ນ ກໂຣຕິ. ເອວໍ ພຫິທ຺ຘາສມຸຏ຺ຐານໍ ໂອຕ຺ຕປ຺ປໍ.

ກຖໍ ອຕ຺ຕາຘິປຕິ ຫິຣີ? ອິເຘກຈ຺ໂຈ ກຸລປຸຕ຺ໂຕ ອຕ຺ຕານໍ ອຘິປຕິໍ ເຊຏ຺ຐກໍ ກຕ຺ວາ ‘‘ມາທິສສ຺ສ ສທ຺ຘາປພ຺ພຊິຕສ຺ສ ພຫຸສ຺ສຸຕສ຺ສ ຘຸຕຘຣສ຺ສ ນ ຍຸຕ຺ຕໍ ປາປກມ຺ມໍ ກາຕຸ’’ນ຺ຕິ ປາປໍ ນ ກໂຣຕິ. ເອວໍ ອຕ຺ຕາຘິປຕິ ຫິຣີ. ເຕນາຫ ຠຄວາ ‘‘ໂສ ອຕ຺ຕານໍເຍວ ອຘິປຕິໍ ກຣິຕ຺ວາ ອກຸສລໍ ປຊຫຕິ, ກຸສລໍ ຠາເວຕິ, ສາວຊ຺ຊໍ ປຊຫຕິ, ອນວຊ຺ຊໍ ຠາເວຕິ, ສຸທ຺ຘໍ ອຕ຺ຕານໍ ປຣິຫຣຕີ’’ຕິ (ອ. ນິ. ໓.໔໐).

ກຖໍ ໂລກາຘິປຕິ ໂອຕ຺ຕປ຺ປໍ? ອິເຘກຈ຺ໂຈ ກຸລປຸຕ຺ໂຕ ໂລກໍ ອຘິປຕິໍ ເຊຏ຺ຐກໍ ກຕ຺ວາ ‘‘ສເຈ ໂຂ ຕ຺ວໍ ປາປກມ຺ມໍ ກເຣຍ຺ຍາສິ, ສພ຺ຣຫ຺ມຈາຣິໂນ ຕາວ ຕໍ ຊານິສ຺ສນ຺ຕິ, ມຫິທ຺ຘິກາ ມຫານຸຠາວາ ໂລເກ ຈ ສມຓພ຺ຣາຫ຺ມຓາ ເທວຕາ ຈ, ຕສ຺ມາ ເຕ ນ ຍຸຕ຺ຕໍ ປາປໍ ກາຕຸ’’ນ຺ຕິ ປາປກມ຺ມໍ ນ ກໂຣຕິ. ຍຖາຫ – ‘‘ມຫາ ໂຂ ປນາຍໍ ໂລກສນ຺ນິວາໂສ, ມຫນ຺ຕສ຺ມິໍ ໂຂ ປນ ໂລກສນ຺ນິວາເສ ສນ຺ຕິ ສມຓພ຺ຣາຫ຺ມຓາ ອິທ຺ຘິມນ຺ໂຕ ທິພ຺ພຈກ຺ຂຸກາ ປຣຈິຕ຺ຕວິທຸໂນ. ເຕ ທູຣໂຕປິ ປສ຺ສນ຺ຕິ, ອາສນ຺ນາປິ ນ ທິສ຺ສນ຺ຕິ, ເຈຕສາປິ ຈິຕ຺ຕໍ ຊານນ຺ຕິ, ເຕປິ ມໍ ເອວໍ ຊານິສ຺ສນ຺ຕິ ‘ປສ຺ສຖ, ໂຠ, ອິມໍ ກຸລປຸຕ຺ຕໍ, ສທ຺ຘາ ອຄາຣສ຺ມາ ອນຄາຣິຍໍ ປພ຺ພຊິໂຕ ສມາໂນ ໂວກິຓ຺ໂຓ ວິຫຣຕິ ປາປເກຫິ ອກຸສເລຫິ ຘມ຺ເມຫີ’ຕິ. ສນ຺ຕິ ເທວຕາ ອິທ຺ຘິມນ຺ຕິນິໂຍ ທິພ຺ພຈກ຺ຂຸກາ ປຣຈິຕ຺ຕວິທຸນິໂຍ, ຕາ ທູຣໂຕປິ ປສ຺ສນ຺ຕິ, ອາສນ຺ນາປິ ນ ທິສ຺ສນ຺ຕິ, ເຈຕສາປິ ຈິຕ຺ຕໍ ຊານນ຺ຕິ, ຕາປິ ມໍ ຊານິສ຺ສນ຺ຕິ ‘ປສ຺ສຖ, ໂຠ, ອິມໍ ກຸລປຸຕ຺ຕໍ, ສທ຺ຘາ ອຄາຣສ຺ມາ ອນຄາຣິຍໍ ປພ຺ພຊິໂຕ ສມາໂນ ໂວກິຓ຺ໂຓ ວິຫຣຕິ ປາປເກຫິ ອກຸສເລຫິ ຘມ຺ເມຫີ’ຕິ…ເປ… ໂສ ໂລກໍເຍວ ອຘິປຕິໍ ກຣິຕ຺ວາ ອກຸສລໍ…ເປ… ປຣິຫຣຕີ’’ຕິ. ເອວໍ ໂລກາຘິປຕິ ໂອຕ຺ຕປ຺ປໍ.

ລຊ຺ຊາສຠາວສຓ຺ຐິຕາຕິ ເອຕ຺ຖ ລຊ຺ຊາຕິ ລຊ຺ຊນາກາໂຣ, ເຕນ ສຠາເວນ ສຓ຺ຐິຕາ ຫິຣີ. ຠຍນ຺ຕິ ອປາຍຠຍໍ, ເຕນ ສຠາເວນ ສຓ຺ຐິຕໍ ໂອຕ຺ຕປ຺ປໍ. ຕທຸຠຍໍ ປາປປຣິວຊ຺ຊເນ ປາກຏໍ ໂຫຕິ. ຕຕ຺ຖ ຍຖາ ທ຺ວີສຸ ອໂຍຄຸເຬສຸ ເອໂກ ສີຕໂລ ຠເວຍ຺ຍ ຄູຖມກ຺ຂິໂຕ, ເອໂກ ອຸຓ຺ໂຫ ອາທິຕ຺ໂຕ. ເຕສຸ ຍຖາ ສີຕລໍ ຄູຖມກ຺ຂິຕຕ຺ຕາ ຊິຄຸຈ຺ຉນ຺ໂຕ ວິຎ຺ຎຸຊາຕິໂກ ນ ຄຓ຺ຫາຕິ, ອິຕຣໍ ຑາຫຠເຍນ. ເອວໍ ປຓ຺ຑິໂຕ ລຊ຺ຊາຍ ຊິຄຸຈ຺ຉນ຺ໂຕ ປາປໍ ນ ກໂຣຕິ, ໂອຕ຺ຕປ຺ເປນ ອປາຍຠຍຠີໂຕ ປາປໍ ນ ກໂຣຕິ, ເອວໍ ລຊ຺ຊາສຠາວສຓ຺ຐິຕາ ຫິຣີ, ຠຍສຠາວສຓ຺ຐິຕໍ ໂອຕ຺ຕປ຺ປໍ.

ກຖໍ ສປ຺ປຕິສ຺ສວລກ຺ຂຓາ ຫິຣີ, ວຊ຺ຊຠີຣຸກຠຍທສ຺ສາວິລກ຺ຂຓໍ ໂອຕ຺ຕປ຺ປໍ? ເອກຈ຺ໂຈ ຫິ ຊາຕິມຫຕ຺ຕປຈ຺ຈເວກ຺ຂຓາ, ສຕ຺ຖຸມຫຕ຺ຕປຈ຺ຈເວກ຺ຂຓາ, ທາຍຊ຺ຊມຫຕ຺ຕປຈ຺ຈເວກ຺ຂຓາ, ສພ຺ຣຫ຺ມຈາຣິມຫຕ຺ຕປຈ຺ຈເວກ຺ຂຓາຕິ ເອວໍ ຈຕູຫິ ກາຣເຓຫິ ຕຕ຺ຖ ຄາຣເວນ ສປ຺ປຕິສ຺ສວລກ຺ຂຓໍ ຫິຣິໍ ສມຸຏ຺ຐາເປຕ຺ວາ ປາປໍ ນ ກໂຣຕິ. ເອກຈ຺ໂຈ ອຕ຺ຕານຸວາທຠຍໍ, ປຣານຸວາທຠຍໍ, ທຓ຺ຑຠຍໍ, ທຸຄ຺ຄຕິຠຍນ຺ຕິ ເອວໍ ຈຕູຫິ ກາຣເຓຫິ ວຊ຺ຊໂຕ ຠາຍນ຺ໂຕ ວຊ຺ຊຠີຣຸກຠຍທສ຺ສາວິລກ຺ຂຓໍ ໂອຕ຺ຕປ຺ປໍ ປຈ຺ຈຸປຏ຺ຐາເປຕ຺ວາ ປາປກມ຺ມໍ ນ ກໂຣຕິ. ເອຕ຺ຖ ຈ ອຊ຺ຌຕ຺ຕສມຸຏ຺ຐານາທິຕາ ຫິໂຣຕ຺ຕປ຺ປານໍ ຕຕ຺ຖ ຕຕ຺ຖ ປາກຏຠາເວນ ວຸຕ຺ຕາ, ນ ປນ ເນສໍ ກທາຈິ ອຎ຺ຎມຎ຺ຎວິປ຺ປໂຍໂຄ. ນ ຫິ ລຊ຺ຊນໍ ນິພ຺ຠຍໍ, ປາປຠຍໍ ວາ ອລຊ຺ຊນໍ ອຕ຺ຖີຕິ. ເອວເມຕ຺ຖ ວິຕ຺ຖາຣໂຕ ອຕ຺ຖວຓ຺ຓນາ ເວທິຕພ຺ພາ.

ສຸກ຺ກສຸຕ຺ຕວຓ຺ຓນາ ນິຏ຺ຐິຕາ.

໙. ຈຣິຍສຸຕ຺ຕວຓ຺ຓນາ

໙. ນວເມ ໂລກນ຺ຕິ ສຕ຺ຕໂລກໍ. ສນ຺ຘາເຣນ຺ຕີຕິ ອາຈາຣສນ຺ຘາຣຓວເສນ ຘາເຣນ຺ຕິ. ຐເປນ຺ຕີຕິ ມຣິຍາທາຍໍ ຐເປນ຺ຕິ. ຣກ຺ຂນ຺ຕີຕິ ອາຈາຣສນ຺ຘາຣເຓນ ມຣິຍາທາຍໍ ຐເປຕ຺ວາ ຣກ຺ຂນ຺ຕິ. ຄຣຸຈິຕ຺ຕີກາຣວເສນ ນ ປຎ຺ຎາເຍຖາຕິ ຄຣຸໍ ກຕ຺ວາ ຈິຕ຺ເຕ ກຣຓວເສນ ນ ປຎ຺ຎາເຍຖ, ອຍມາຈາໂຣ ນ ລພ຺ເຠຍ຺ຍ. ມາຕຸຈ຺ຉາຕິ ວາຕິ ເອຕ຺ຖ ອິຕິ-ສທ຺ໂທ ອາທ຺ຍຕ຺ໂຖ. ເຕນ ມາຕຸລານີຕິ ວາ ອາຈຣິຍຠຣິຍາຕິ ວາ ຄຣູນໍ ທາຣາຕິ ວາຕິ ອິເມ ສງ຺ຄຓ຺ຫາຕິ. ຕຕ຺ຖ ມາຕຸ ຠຄິນີ ມາຕຸຈ຺ຉາ. ມາຕຸລຠຣິຍາ ມາຕຸລານີ. ຄຣູນໍ ທາຣາ ມຫາປິຕຸຈູຬປິຕຸເຊຏ຺ຐຠາຕຸອາທີນໍ ຄຣຸຏ຺ຐານິຍານໍ ຠຣິຍາ. ຍຖາ ອເຊຬກາຕິອາທີສຸ ອຍໍ ສງ຺ເຂປຕ຺ໂຖ – ຍຖາ ອເຊຬກາທໂຍ ຕິຣຈ຺ຉານາ ຫິໂຣຕ຺ຕປ຺ປຣຫິຕາ ມາຕາຕິ ສຎ຺ຎໍ ອກຕ຺ວາ ຠິນ຺ນມຣິຍາທາ ສພ຺ພຕ຺ຖ ສມ຺ເຠເທນ ວຕ຺ຕນ຺ຕິ, ເອວມຍໍ ມນຸສ຺ສໂລໂກ ຍທິ ໂລກປາລຘມ຺ມາ ນ ຠເວຍ຺ຍຸໍ, ສພ຺ພຕ຺ຖ ສມ຺ເຠເທນ ວຕ຺ເຕຍ຺ຍ. ຍສ຺ມາ ປນິເມ ໂລກປາລກຘມ຺ມາ ໂລກໍ ປາເລນ຺ຕິ, ຕສ຺ມາ ນຕ຺ຖິ ສມ຺ເຠໂທຕິ.

ຈຣິຍສຸຕ຺ຕວຓ຺ຓນາ ນິຏ຺ຐິຕາ.

໑໐. ວສ຺ສູປນາຍິກສຸຕ຺ຕວຓ຺ຓນາ

໑໐. ທສເມ ອປຎ຺ຎຕ຺ຕາຕິ ອນນຸຎ຺ຎາຕາ, ອວິຫິຕາ ວາ. ວສ຺ເສຕິ ວສ຺ສາຣຕ຺ຕໍ ສນ຺ຘາຍ ວທຕິ, ອຸຕຸວສ຺ເສຕິ ເຫມນ຺ຕໍ ສນ຺ຘາຍ. ເອກິນ຺ທ຺ຣິຍໍ ຊີວໍ ວິເຫເຐນ຺ຕາຕິ ຣຸກ຺ຂລຕາທີສຸ ຊີວສຎ຺ຎິຕາຍ ເອວມາຫໍສຸ. ເອກິນ຺ທ຺ຣິຍນ຺ຕິ ຈ ກາຍິນ຺ທ຺ຣິຍໍ ອຕ຺ຖີຕິ ມຎ຺ຎມານາ ວທນ຺ຕິ. ສງ຺ຆາຕໍ ອາປາເທນ຺ຕາຕິ ວິນາສໍ ອາປາເທນ຺ຕາ. ສໍກສາຍິສ຺ສນ຺ຕີຕິ ອປ຺ໂປສ຺ສຸກ຺ກາ ນິພທ຺ຘວາສໍ ວສິສ຺ສນ຺ຕິ. ອປຣຊ຺ຊຸຄຕາຍ ອາສາຬ຺ຫິຍາ ອຸປຄນ຺ຕພ຺ພາຕິ ເອຕ຺ຖ ອປຣຊ຺ຊຸ ຄຕາຍ ອສ຺ສາຕິ ອປຣຊ຺ຊຸຄຕາ, ຕສ຺ສາ ອປຣຊ຺ຊຸຄຕາຍ ອຕິກ຺ກນ຺ຕາຍ, ອປຣສ຺ມິໍ ທິວເສຕິ ອຕ຺ໂຖ, ຕສ຺ມາ ອາສາຬ຺ຫິປຸຓ຺ຓມາຍ ອນນ຺ຕເຣ ປາຏິປທທິວເສ ອຸປຄນ຺ຕພ຺ພາຕິ ເອວເມຕ຺ຖ ອຕ຺ໂຖ ທຏ຺ຐພ຺ໂພ. ມາສຄຕາຍ ອາສາຬ຺ຫິຍາ ອຸປຄນ຺ຕພ຺ພາຕິ ມາໂສ ຄຕາຍ ອສ຺ສາຕິ ມາສຄຕາ, ຕສ຺ສາ ມາສຄຕາຍ ອຕິກ຺ກນ຺ຕາຍ, ມາເສ ປຣິປຸຓ຺ເຓຕິ ອຕ຺ໂຖ. ຕສ຺ມາ ອາສາຬ຺ຫິປຸຓ຺ຓມໂຕ ປຣາຍ ປຸຓ຺ຓມາຍ ອນນ຺ຕເຣ ປາຏິປທທິວເສ ອຸປຄນ຺ຕພ຺ພາຕິ ອຕ຺ໂຖ ທຏ຺ຐພ຺ໂພ.

ວສ຺ສູປນາຍິກສຸຕ຺ຕວຓ຺ຓນາ ນິຏ຺ຐິຕາ.

ກມ຺ມກາຣຓວຄ຺ຄວຓ຺ຓນາຍ ລີນຕ຺ຖປ຺ປກາສນາ ນິຏ຺ຐິຕາ.