໑. ອານິສໍສວຄ຺ໂຄ

໑. ກິມຕ຺ຖິຍສຸຕ຺ຕວຓ຺ຓນາ

໑. ທສກນິປາຕສ຺ສ ປຐເມ ອວິປ຺ປຏິສາຣຕ຺ຖານີຕິ ອວິປ຺ປຏິສາຣປ຺ປໂຍຊນານິ. ອວິປ຺ປຏິສາຣານິສໍສານີຕິ ອວິປ຺ປຏິສາຣຸທຍານິ. ເອເຕນ ອວິປ຺ປຏິສາໂຣ ນາມ ສີລສ຺ສ ອຸທຍມຕ຺ຕໍ, ສໍວທ຺ຘິຕສ຺ສ ຣຸກ຺ຂສ຺ສ ຉາຍາປຸປ຺ຜສທິສໍ, ອຎ຺ໂຎ ເອວ ປນາເນນ ນິປ຺ຜາເທຕພ຺ໂພ ສມາຘິອາທິຄຸໂຓຕິ ທສ຺ເສຕິ. ‘‘ຍາວ ມຄ຺ຄາມຄ຺ຄຎາຓທສ຺ສນວິສຸທ຺ຘິ, ຕາວ ຕຣຸຓວິປສ຺ສນາ’’ຕິ ຫິ ວຈນໂຕ ອຸປກ຺ກິເລສວິມຸຕ຺ຕອຸທຍພ຺ພຍຎາຓໂຕ ປຣໍ ອຍຎ຺ຈ ວິປສ຺ສນາ ວິຣຊ຺ຊຕິ ໂຍຄາວຈໂຣ ວິຣຕ຺ໂຕ ປຸຣິໂສ ວິຍ ຠຣິຍາຍ ສງ຺ຂາຣໂຕ ເອເຕນາຕິ ວິຣາໂຄ.

ກິມຕ຺ຖິຍສຸຕ຺ຕວຓ຺ຓນາ ນິຏ຺ຐິຕາ.

໒-໕. ເຈຕນາກຣຓີຍສຸຕ຺ຕາທິວຓ຺ຓນາ

໒-໕. ທຸຕິເຍ ສໍສາຣມໂຫຆສ຺ສ ປຣຕີຣຠາວໂຕ ໂຍ ນໍ ອຘິຄຈ຺ຉຕິ, ຕໍ ປາເຣຕິ ຄເມຕີຕິ ປາຣໍ, ນິພ຺ພານໍ. ຕພ຺ພິທູຣຕາຍ ນຕ຺ຖິ ເອຕ຺ຖ ປາຣນ຺ຕິ ອປາຣໍ, ສໍສາໂຣ. ເຕນາຫ ‘‘ໂອຣິມຕີຣຠູຕາ ເຕຠູມກວຏ຺ຏາ’’ຕິອາທິ. ຕຕິຍາທີສຸ ນຕ຺ຖິ ວຕ຺ຕພ຺ພໍ.

ເຈຕນາກຣຓີຍສຸຕ຺ຕາທິວຓ຺ຓນາ ນິຏ຺ຐິຕາ.

໖. ສມາຘິສຸຕ຺ຕວຓ຺ຓນາ

໖. ຉຏ຺ເຐ ສນ຺ຕໍ ສນ຺ຕນ຺ຕິ ອປ຺ເປຕ຺ວາ ນິສິນ຺ນສ຺ສາຕິອາທີສຸ ສນ຺ຕໍ ສນ຺ຕໍ ປຓີຕໍ ປຓີຕນ຺ຕິອາທີນິ ວທຕິ. ອິມິນາ ປນ ອາກາເຣນ ຕໍ ປຏິວິຊ຺ຌິຕ຺ວາ ຕຕ຺ຖ ຈິຕ຺ຕໍ ອຸປສໍຫຣໂຕ ຜລສມາປຕ຺ຕິສງ຺ຂາໂຕ ຈິຕ຺ຕຸປ຺ປາໂທ ຕຖາ ປວຕ຺ຕຕີຕິ ເວທິຕພ຺ໂພ. ເສສໍ ສພ຺ພຕ຺ຖ ອຸຕ຺ຕານເມວ.

ສມາຘິສຸຕ຺ຕວຓ຺ຓນາ ນິຏ຺ຐິຕາ.

ອານິສໍສວຄ຺ຄວຓ຺ຓນາ ນິຏ຺ຐິຕາ.