(໑໑) ໑. ສມຓສຎ຺ຎາວຄ຺ໂຄ

໑-໑໒. ສມຓສຎ຺ຎາສຸຕ຺ຕາທິວຓ຺ຓນາ

໑໐໑-໑໑໒. ຕຕິຍສ຺ສ ປຐມາທີນິ ອຸຕ຺ຕານານິ. ຉຏ຺ເຐ ນິຊ຺ຊຣກາຣຓານີຕິ ປຊຫນກາຣຓານິ. ອິມສ຺ມິໍ ມຄ຺ໂຄ ກຖີຍຕີຕິ ກຕ຺ວາ ‘‘ອຍໍ ເຫຏ຺ຐາ…ເປ… ປຸນ ຄຫິຕາ’’ຕິ ວຸຕ຺ຕໍ. ກິຎ຺ຈາປິ ນິຊ຺ຊິຓ຺ຓາ ມິຈ຺ຉາທິຏ຺ຐີຕິ ອາເນຕ຺ວາ ສມ຺ພນ຺ຘິຕພ຺ພໍ. ຍຖາ ມິຈ຺ຉາທິຏ຺ຐິ ວິປສ຺ສນາຍ ນິຊ຺ຊິຓ຺ຓາປິ ນ ສມຸຈ຺ຉິນ຺ນາຕິ ສມຸຈ຺ເຉທປ຺ປຫານທສ຺ສນຕ຺ຖໍ ປຸນ ຄຫິຕາ, ເອວໍ ມິຈ຺ຉາສງ຺ກປ຺ປາທໂຍປິ ວິປສ຺ສນາຍ ປຫີນາປິ ອສມຸຈ຺ຉິນ຺ນຕາຍ ອິຘ ປຸນ ຄຫິຕາຕິ ອຍມຕ຺ໂຖ ‘‘ມິຈ຺ຉາສງ຺ກປ຺ປສ຺ສາ’’ຕິອາທີສຸ ສພ຺ພປເທສຸ ວຕ຺ຕພ຺ໂພຕິ ທສ຺ເສຕິ ‘‘ເອວໍ ສພ຺ພປເທສຸ ໂຍເຊຕພ຺ໂພ’’ຕິ ອິມິນາ. ເອຕ຺ຖ ຈາຕິ ‘‘ສມ຺ມາວິມຸຕ຺ຕິປຈ຺ຈຍາ ຈ ອເນເກ ກຸສລາ ຘມ຺ມາ ຠາວນາປາຣິປູຣິໍ ຄຈ຺ຉນ຺ຕີ’’ຕິ ເອຕສ຺ມິໍ ປາຬິປເທ. ເອຕ຺ຖ ຈ ສມຸຈ຺ເຉທວເສນ ຈ ປຏິປ຺ປສ຺ສທ຺ຘິວເສນ ຈ ປຏິປກ຺ຂຘມ຺ມານໍ ສມ຺ມເທວ ວິມຸຈ຺ຈນໍ ສມ຺ມາວິມຸຕ຺ຕິ. ຕປ຺ປຈ຺ຈຍາ ຈ ມຄ຺ຄຜເລສຸ ອຏ຺ຐ ອິນ຺ທ຺ຣິຍານິ ຠາວນາປາຣິປູຣິໍ ອຸປຄຈ຺ຉນ຺ຕີຕິ ມຄ຺ຄສມ຺ປຍຸຕ຺ຕານິປິ ສທ຺ຘາທີນິ ອິນ຺ທ຺ຣິຍານິ ອຸທ຺ຘຏານິ. ມຄ຺ຄວເສນ ຫິ ຜເລສຸ ຠາວນາປາຣິປູຣີ ນາມາຕິ. ອຠິນນ຺ທນຏ຺ເຐນາຕິ ອຕິວິຍ ສິເນຫນຏ຺ເຐນ. ອິທຎ຺ຫິ ໂສມນສ຺ສິນ຺ທ຺ຣິຍໍ ອຸກ຺ກໍສຄຕສາຕສຠາວໂຕ ສມ຺ປຍຸຕ຺ຕຘມ຺ເມ ສິເນຫນ຺ຕໍ ເຕເມນ຺ຕໍ ວິຍ ປວຕ຺ຕຕິ. ປວຕ຺ຕສນ຺ຕຕິອາຘິປເຕຍ຺ຍຏ຺ເຐນາຕິ ວິປາກສນ຺ຕານສ຺ສ ຊີວເນ ອຘິປຕິຠາເວນ. ເອວນ຺ຕິອາທິ ວຸຕ຺ຕສ຺ເສວ ອຕ຺ຖສ຺ສ ນິຄມນໍ. ສຕ຺ຕມາທີນິ ອຸຕ຺ຕານຕ຺ຖານິ.

ສມຓສຎ຺ຎາສຸຕ຺ຕາທິວຓ຺ຓນາ ນິຏ຺ຐິຕາ.

ສມຓສຎ຺ຎາວຄ຺ຄວຓ຺ຓນາ ນິຏ຺ຐິຕາ.