(໑໒) ໒. ປຈ຺ໂຈໂຣຫຓິວຄ຺ໂຄ

໑-໔. ປຐມອຘມ຺ມສຸຕ຺ຕາທິວຓ຺ຓນາ

໑໑໓-໖. ທຸຕິຍສ຺ສ ປຐມທຸຕິຍານິ ອຸຕ຺ຕານຕ຺ຖານິ. ຕຕິເຍ ຊານໍ ຊານາຕີຕິ ສພ຺ພຎ຺ຎຸຕຎ຺ຎາເຓນ ຊານິຕພ຺ພໍ ສພ຺ພໍ ຊານາຕິ ເອວ. ນ ຫິ ປເທສຎາເຓ ຐິໂຕ ຊານິຕພ຺ພໍ ສພ຺ພໍ ຊານາຕິ. ອຸກ຺ກຏ຺ຐນິທ຺ເທເສນ ຫິ ອວິເສສຄ຺ຄຫເຓນ ຈ ‘‘ຊານ’’ນ຺ຕິ ອິມິນາ ນິຣວເສສໍ ເຎຍ຺ຍຊາຕໍ ປຣິຄ຺ຄຍ຺ຫຕີຕິ ຕພ຺ພິສຍາຍ ຊານນກິຣິຍາຍ ສພ຺ພຎ຺ຎຸຕຎ຺ຎາຓເມວ ກຣຓໍ ຠວິຕຸໍ ຍຸຕ຺ຕໍ, ປກຣຓວເສນ ‘‘ຠຄວາ’’ຕິ ສທ຺ທນ຺ຕຣສນ຺ນິຘາເນນ ຈ ອຍມຕ຺ໂຖ ວິຠາເວຕພ຺ໂພ. ປສ຺ສິຕພ຺ພເມວ ປສ຺ສຕີຕິ ທິພ຺ພຈກ຺ຂຸປຎ຺ຎາຈກ຺ຂຸຘມ຺ມຈກ຺ຂຸພຸທ຺ຘຈກ຺ຂຸສມນ຺ຕຈກ຺ຂຸສງ຺ຂາເຕຫິ ຎາຓຈກ຺ຂູຫິ ປສ຺ສິຕພ຺ພໍ ປສ຺ສຕິ ເອວ. ອຖ ວາ ຊານໍ ຊານາຕີຕິ ຍຖາ ອຎ຺ເຎ ສວິປລ຺ລາສາ ກາມຣູປປຣິຎ຺ຎາວາທິໂນ ຊານນ຺ຕາປິ ວິປລ຺ລາສວເສນ ຊານນ຺ຕິ, ນ ເອວໍ ຠຄວາ. ຠຄວາ ປນ ປຫີນວິປລ຺ລາສຕ຺ຕາ ຊານນ຺ໂຕ ຊານາຕິ ເອວ, ທິຏ຺ຐິທສ຺ສນສ຺ສ ອຠາວາ ປສ຺ສນ຺ໂຕ ປສ຺ສຕິເຍວາຕິ ອຕ຺ໂຖ. ຈກ຺ຂຸ ວິຍ ຠູໂຕຕິ ທສ຺ສນປຣິຓາຍກຏ຺ເຐນ ຈກ຺ຂຸ ວິຍ ຠູໂຕ. ຍຖາ ຫິ ຈກ຺ຂຸ ສຕ຺ຕານໍ ທສ຺ສນຕ຺ຖໍ ປຣິເຓຕິ ສາເຘຕິ, ເອວໍ ໂລກສ຺ສ ຍາຖາວທສ຺ສນສາຘນໂຕປິ ທສ຺ສນກິຈ຺ຈປຣິຓາຍກຏ຺ເຐນ ຈກ຺ຂຸ ວິຍ ຠູໂຕ, ປຎ຺ຎາຈກ຺ຂຸມຍຕ຺ຕາ ວາ ສຍມ຺ຠຸຎາເຓນ ປຎ຺ຎາຈກ຺ຂຸໍ ຠູໂຕ ປຕ຺ໂຕຕິ ວາ ຈກ຺ຂຸຠູໂຕ.

ຎາຓສຠາໂວຕິ ວິທິຕກຣຓຏ຺ເຐນ ຎາຓສຠາໂວ. ອວິປຣີຕສຠາວຏ຺ເຐນ ປຣິຍຕ຺ຕິຘມ຺ມປ຺ປວຕ຺ຕນໂຕ ວາ ຫທເຍນ ຈິນ຺ເຕຕ຺ວາ ວາຈາຍ ນິຈ຺ຉາຣິຕຘມ຺ມມໂຍຕິ ຘມ຺ມຠູໂຕ. ເຕນາຫ ‘‘ຘມ຺ມສຠາໂວ’’ຕິ. ຘມ຺ມາ ວາ ໂພຘິປກ຺ຂິຍາ ເຕຫິ ອຸປ຺ປນ຺ນຕ຺ຕາ ໂລກສ຺ສ ຈ ຕທຸປ຺ປາທນໂຕ, ອນຎ຺ຎສາຘາຣຓໍ ວາ ຘມ຺ມໍ ປຕ຺ໂຕ ອຘິຄໂຕຕິ ຘມ຺ມຠູໂຕ. ເສຏ຺ຐຏ຺ເຐນ ພ຺ຣຫ຺ມຠູໂຕຕິ ອາຫ ‘‘ເສຏ຺ຐສຠາໂວ’’ຕິ. ອຖ ວາ ພ຺ຣຫ຺ມາ ວຸຈ຺ຈຕິ ມຄ຺ໂຄ, ເຕນ ອຸປ຺ປນ຺ນຕ຺ຕາ ໂລກສ຺ສ ຈ ຕທຸປ຺ປາທນໂຕ, ຕຎ຺ຈ ສຍມ຺ຠຸຎາເຓນ ປຕ຺ໂຕຕິ ພ຺ຣຫ຺ມຠູໂຕ. ຈຕຸສຈ຺ຈຘມ຺ມໍ ວທຕີຕິ ວຕ຺ຕາ. ຈິຣໍ ສຈ຺ຈປ຺ປຏິເວຘໍ ປວຕ຺ເຕນ຺ໂຕ ວທຕີຕິ ປວຕ຺ຕາ. ອຕ຺ຖໍ ນີຫຣິຕ຺ວາຕິ ທຸກ຺ຂາທິອຕ຺ຖໍ ຕຕ຺ຖາປິ ປີຬນາທິອຕ຺ຖໍ ອຸທ຺ຘຣິຕ຺ວາ. ປຣມຕ຺ຖໍ ວາ ນິພ຺ພານໍ ປາປຍິຕາ ນິນ຺ເນຕາ. ອມຕາຘິຄມປຏິປຕ຺ຕິເທສນາຍ ອມຕສຈ຺ຉິກິຣິຍໍ ສຕ຺ເຕສຸ ອຸປ຺ປາເທນ຺ໂຕ ອມຕໍ ທທາຕີຕິ ອມຕສ຺ສ ທາຕາ. ໂພຘິປກ຺ຂິຍຘມ຺ມານໍ ຕທາຍຕ຺ຕຠາວໂຕ ຘມ຺ມສາມີ. ຈຕຸຕ຺ເຖ ນຕ຺ຖິ ວຕ຺ຕພ຺ພໍ.

ປຐມອຘມ຺ມສຸຕ຺ຕາທິວຓ຺ຓນາ ນິຏ຺ຐິຕາ.

໕-໔໒. ສງ຺ຄາຣວສຸຕ຺ຕາທິວຓ຺ຓນາ

໑໑໗-໑໕໔. ປຎ຺ຈເມ ອປ຺ປກາຕິ ໂຖກາ, ນ ພຫູ. ອຖາຍໍ ອິຕຣາ ປຊາຕິ ຍາ ປນາຍໍ ອວເສສາ ປຊາ ສກ຺ກາຍທິຏ຺ຐິຕີຣເມວ ອນຸຘາວຕິ, ອຍເມວ ພຫຸຕຣາຕິ ອຕ຺ໂຖ. ສມ຺ມທກ຺ຂາເຕຕິ ສມ຺ມາ ອກ຺ຂາເຕ ສຸກຖິເຕ. ຘມ຺ເມຕິ ຕວ ເທສນາຘມ຺ເມ. ຘມ຺ມານຸວຕ຺ຕິໂນຕິ ຕໍ ຘມ຺ມໍ ສຸຕ຺ວາ ຕທນຸຈ຺ຉວິກໍ ປຏິປທໍ ປູເຣຕ຺ວາ ມຄ຺ຄຜລສຈ຺ຉິກຣເຓນ ຘມ຺ມານຸວຕ຺ຕິໂນ. ມຈ຺ຈຸໂນ ຐານຠູຕນ຺ຕິ ກິເລສມາຣສງ຺ຂາຕສ຺ສ ມຈ຺ຈຸໂນ ນິວາສຏ຺ຐານຠູຕໍ. ສຸທຸຕ຺ຕຣໍ ຕຣິຕ຺ວາ ປາຣເມສ຺ສນ຺ຕີຕິ ເຍ ຊນາ ຘມ຺ມານຸວຕ຺ຕິໂນ, ເຕ ເອຕໍ ສຸທຸຕ຺ຕຣໍ ທຸຣຕິກ຺ກມໍ ມາຣເຘຍ຺ຍໍ ຕຣິຕ຺ວາ ອຕິກ຺ກມິຕ຺ວາ ນິພ຺ພານປາຣໍ ຄມິສ຺ສນ຺ຕິ.

ກຓ຺ຫໍ ຘມ຺ມໍ ວິປ຺ປຫາຍາຕິ ກາຍທຸຈ຺ຈຣິຕາທິເຠທໍ ອກຸສລໍ ຘມ຺ມໍ ຊຫິຕ຺ວາ. ສຸກ຺ກໍ ຠາເວຖາຕິ ປຓ຺ຑິໂຕ ຠິກ຺ຂຸ ອຠິນິກ຺ຂມນໂຕ ປຏ຺ຐາຍ ຍາວ ອຣຫຕ຺ຕມຄ຺ຄາ ກາຍສຸຈຣິຕາທິເຠທໍ ສຸກ຺ກໍ ຘມ຺ມໍ ຠາເວຍ຺ຍ. ໂອກາ ອໂນກມາຄມ຺ມາຕິ ໂອກໍ ວຸຈ຺ຈຕິ ອາລໂຍ, ອໂນກໍ ວຸຈ຺ຈຕິ ອນາລໂຍ. ອາລຍໂຕ ນິກ຺ຂມິຕ຺ວາ ອນາລຍສງ຺ຂາຕໍ ນິພ຺ພານໍ ປຏິຈ຺ຈ ອາຣພ຺ຠ.

ຕຕ຺ຣາຠິຣຕິມິຈ຺ເຉຍ຺ຍາຕິ ຍສ຺ມິໍ ອນາລຍສງ຺ຂາເຕ ວິເວເກ ນິພ຺ພາເນ ອິເມຫິ ສຕ຺ເຕຫິ ທຸຣຠິຣມໍ, ຕຕ຺ຣາຠິຣຕິມິຈ຺ເຉຍ຺ຍ. ທຸວິເຘປິ ກາເມຕິ ວຕ຺ຖຸກາມກິເລສກາເມ. ຈິຕ຺ຕກ຺ເລເສຫີຕິ ປຎ຺ຈຫິ ນີວຣເຓຫິ ອຕ຺ຕານໍ ປຣິໂຍທເປຍ຺ຍ ໂວທາເປຍ຺ຍ, ປຣິໂສເຘຍ຺ຍາຕິ ອຕ຺ໂຖ.

ສມ຺ໂພຘິຍງ຺ເຄສູຕິ ສມ຺ໂພຊ຺ຌງ຺ເຄສຸ. ສມ຺ມາ ຈິຕ຺ຕໍ ສຸຠາວິຕນ຺ຕິ ສມ຺ມາ ເຫຕຸນາ ນເຍນ ຈິຕ຺ຕໍ ສຸຏ຺ຐຸ ຠາວິຕໍ ວຑ຺ຒິຕໍ. ຊຸຕິມນ຺ໂຕຕິ ອານຸຠາວວນ຺ໂຕ, ອຣຫຕ຺ຕມຄ຺ຄຎາຓຊຸຕິຍາ ຂນ຺ຘາທິເຠເທ ຘມ຺ເມ ໂຊເຕຕ຺ວາ ຐິຕາຕິ ອຕ຺ໂຖ. ເຕ ໂລເກ ປຣິນິພ຺ພຸຕາຕິ ເຕ ອິມສ຺ມິໍ ຂນ຺ຘາທິໂລເກ ປຣິນິພ຺ພຸຕາ ນາມ ອຣຫຕ຺ຕປ຺ປຕ຺ຕິໂຕ ປຏ຺ຐາຍ ກິເລສວຏ຺ຏສ຺ສ ເຂປິຕຕ຺ຕາ ສອຸປາທິເສເສນ, ຈຣິມຈິຕ຺ຕນິໂຣເຘນ ຂນ຺ຘວຏ຺ຏສ຺ສ ເຂປິຕຕ຺ຕາ ອນຸປາທິເສເສນ ຈາຕິ ທ຺ວີຫິ ປຣິນິພ຺ພາເນຫິ ປຣິນິພ຺ພຸຕາ, ອນຸປາທາໂນ ວິຍ ປທີໂປ ອປຓ຺ຓຕ຺ຕິກຠາວໍ ຄຕາຕິ ອຕ຺ໂຖ.

ອິໂຕ ປຣໍ ຍາວ ຕຕິໂຍ ປຓ຺ຓາສໂກ, ຕາວ ອຸຕ຺ຕານຕ຺ຖເມວ.

ສງ຺ຄາຣວສຸຕ຺ຕາທິວຓ຺ຓນາ ນິຏ຺ຐິຕາ.

ຕຕິຍປຓ຺ຓາສກໍ ນິຏ຺ຐິຕໍ.

໔. ຈຕຸຕ຺ຖປຓ຺ຓາສກໍ

໑໕໕-໑໖໖. ຈຕຸຕ຺ຖສ຺ສ ປຐມວຄ຺ໂຄ ອຸຕ຺ຕານຕ຺ໂຖເຍວ.

໑-໔໔. ພ຺ຣາຫ຺ມຓປຈ຺ໂຈໂຣຫຓີສຸຕ຺ຕາທິວຓ຺ຓນາ

໑໖໗-໒໑໐. ທຸຕິເຍ ຈ ປຐມາທີນິ ອຸຕ຺ຕານຕ຺ຖານິ. ທສເມ ປຈ຺ຉາຠູມິວາສິໂນຕິ ປຈ຺ຈນ຺ຕເທສວາສິໂນ. ເສວາລມາລິກາຕິ ປາໂຕວ ອຸທກໍ ໂອໂຣຫິຕ຺ວາ ເສວາລຎ຺ເຈວ ອຸປ຺ປລາທີນິ ຈ ຄເຫຕ຺ວາ ອຕ຺ຕໂນ ອຸທກສຸທ຺ຘິກຠາວຊານນຕ຺ຖຎ຺ເຈວ ‘‘ໂລກສ຺ສ ຈ ອຸທເກນ ສຸທ຺ຘິ ໂຫຕີ’’ຕິ ອິມສ຺ສ ອຕ຺ຖສ຺ສ ຊານນຕ຺ຖຎ຺ຈ ມາລໍ ກຕ຺ວາ ປິລນ຺ຘນກາ. ອຸທໂກໂຣຫກາຕິ ປາໂຕ ມຊ຺ຌນ຺ເຫ ສາຍນ຺ເຫ ຈ ອຸທກໂອໂຣຫຓກາ. ເຕນາຫ ‘‘ສາຍຕຕິຍກໍ ອຸທໂກໂຣຫຓານຸໂຍຄມນຸຍຸຕ຺ຕາ’’ຕິ. ເອກາທສມາທີນິ ອຸຕ຺ຕານຕ຺ຖານິ. ຈຕຸຕ຺ເຖ ປຓ຺ຓາສເກ ນຕ຺ຖິ ວຕ຺ຕພ຺ພໍ.

ພ຺ຣາຫ຺ມຓປຈ຺ໂຈໂຣຫຓີສຸຕ຺ຕາທິວຓ຺ຓນາ ນິຏ຺ຐິຕາ.

ຈຕຸຕ຺ຖປຓ຺ຓາສກໍ ນິຏ຺ຐິຕໍ.