໙-໑໐. ອຸປາລິສຸຕ຺ຕາທິວຓ຺ຓນາ

໙໙-໑໐໐. ນວເມ ອຊ຺ໂຌຄາເຫຕ຺ວາ ອຘິປ຺ເປຕມຕ຺ຖໍ ສມ຺ຠວິຕຸໍ ສາເຘຕຸໍ ທຸກ຺ຂານິ ທຸຣຠິສມ຺ຠວານິ. ອຏ຺ຐກຖາຍໍ ປນ ຕຕ຺ຖ ນິວາໂສເຍວ ທຸກ຺ໂຂຕິ ທສ຺ເສຕຸໍ ‘‘ສມ຺ຠວິຕຸໍ ທຸກ຺ຂານິ ທຸສ຺ສຫານີ’’ຕິ ວຸຕ຺ຕໍ. ອຣຎ຺ຎວນປຕ຺ຖານີຕິ ອຣຎ຺ຎລກ຺ຂຓປ຺ປຕ຺ຕານິ ວນສຓ຺ຑານິ. ວນປຕ຺ຖສທ຺ໂທ ຫິ ສຓ຺ຑຠູເຕ ຣຸກ຺ຂສມູເຫປິ ວຕ຺ຕຕີຕິ ອຣຎ຺ຎຄ຺ຄຫຓໍ. ປວິເວກນ຺ຕິ ປກາຣໂຕ, ປກາເຣຫິ ວາ ວິເວຈນໍ, ຣູປາທິປຸຖຸຕ຺ຕາຣມ຺ມເຓ ປກາຣໂຕ ຄມນາທິອິຣິຍາປຖປ຺ປກາເຣຫິ ອຕ຺ຕໂນ ກາຍສ຺ສ ວິເວຈນໍ, ຄຈ຺ຉໂຕປິ ຕິຏ຺ຐໂຕປິ ນິສຊ຺ຊໂຕປິ ນິປຊ຺ຊໂຕປິ ເອກສ຺ເສວ ປວຕ຺ຕິ. ເຕເນວ ຫິ ວິເວເຈຕພ຺ພານໍ ວິເວຈນາກາຣສ຺ສ ຈ ເຠທໂຕ ພຫຸວິຘຕ຺ຕາ ເຕ ເອກຕ຺ເຕນ ຄເຫຕ຺ວາ ‘‘ປວິເວກ’’ນ຺ຕິ ເອກວຈເນນ ວຸຕ຺ຕໍ. ທຸກ຺ກຣໍ ປວິເວກນ຺ຕິ ວາ ປວິເວກໍ ກຕ຺ຕຸໍ ນ ສຸຂນ຺ຕິ ອຕ຺ໂຖ. ເອກີຠາເວຕິ ເອກຕ຺ຕຠາເວ. ທ຺ວຍໍທ຺ວຍາຣາໂມຕິ ທ຺ວິນ຺ນໍ ທ຺ວິນ຺ນໍ ຠາວາຠິຣໂຕ. ຫຣນ຺ຕິ ວິຍາຕິ ສໍຫຣນ຺ຕິ ວິຍ ວິຆາຕຸປ຺ປາທເນນ. ເຕນາຫ ‘‘ຆສນ຺ຕິ ວິຍາ’’ຕິ. ຠຍສນ຺ຕາສຸປ຺ປາທເນນ ຂາທິຕຸໍ ອາຄຕາ ຍກ຺ຂຣກ຺ຂສປິສາຈາທໂຍ ວິຍາຕິ ອຘິປ຺ປາໂຍ. ອີທິສສ຺ສາຕິ ອລທ຺ຘສມາຘິໂນ. ຕິຓປຓ຺ຓມິຄາທິສທ຺ເທຫີຕິ ວາເຕຣິຕານໍ ຕິຓປຓ຺ຓາທີນໍ ມິຄປກ຺ຂິອາທີນຎ຺ຈ ຠີສນເກຫິ ເຠຣເວຫິ ສທ຺ເທຫິ. ວິວິເຘຫິ ຈ ອຎ຺ເຎຫິ ຂາຓຸອາທີຫິ ຍກ຺ຂາທິອາກາເຣຫິ ອຸປຏ຺ຐິເຕຫິ ຠີສນເກຫິ. ຆເຏນ ກີຬາ ຆຏິກາຕິ ເອເກ. ທສມໍ ອຸຕ຺ຕານເມວ.

ອຸປາລິສຸຕ຺ຕາທິວຓ຺ຓນາ ນິຏ຺ຐິຕາ.

ອຸປາລິວຄ຺ຄວຓ຺ຓນາ ນິຏ຺ຐິຕາ.

ທຸຕິຍປຓ຺ຓາສກໍ ນິຏ຺ຐິຕໍ.