໙-໑໐. ໂກກາລິກສຸຕ຺ຕາທິວຓ຺ຓນາ

໘໙-໙໐. ນວເມ (ສໍ. ນິ. ຏີ. ໑.໑.໑໘໑) ໂກກາລິກນາມກາ ທ຺ເວ ຠິກ຺ຂູ. ຕໂຕ ອິຘາຘິປ຺ເປຕໍ ນິທ຺ຘາເຣຕ຺ວາ ທສ຺ເສຕຸໍ ‘‘ໂກຍໍ ໂກກາລິໂກ’’ຕິ ປຸຈ຺ຉາ. ສຸຕ຺ຕສ຺ສ ອຏ຺ຐຸປ຺ປຕ຺ຕິໍ ທສ຺ເສຕຸໍ ‘‘ກສ຺ມາ ຈ ອຸປສງ຺ກມີ’’ຕິ ປຸຈ຺ຉາ. ອຍໍ ກິຣາຕິອາທິ ຍຖາກ຺ກມໍ ຕາສໍ ວິສ຺ສຊ຺ຊນໍ. ວິເວກວາສໍ ວສິຕຸກາມຕ຺ຕາ ອປ຺ປິຈ຺ຉຕາຍ ຈ ມາ ໂນ ກສ຺ສຈິ…ເປ… ວສິໍສຸ. ອາຆາຕໍ ອຸປ຺ປາເທສິ ອຕ຺ຕໂນ ອິຈ຺ຉາວິຆາຕນໂຕ. ເຖຣາ ຠິກ຺ຂຸສງ຺ຆສ຺ສ ນິຍ຺ຍາທຍິໍສຸ ປຍຸຕ຺ຕວາຈາຍ ອກຕຕ຺ຕາ ເຖເຣຫິ ຈ ອທາປິຕຕ຺ຕາ. ປຸພ຺ເພປິ…ເປ… ມຎ຺ເຎຕິ ອິມິນາ ເຖຣານໍ ໂກຫຎ຺ເຎ ຐິຕຠາວໍ ອາສງ຺ກຕິ ອວເຓ ວຓໍ ປສ຺ສນ຺ໂຕ ວິຍ, ສຸປຣິສຸທ຺ເຘ ອາທາສຕເລ ຊລ຺ລໍ ອຸຏ຺ຐາເປນ຺ໂຕ ວິຍ ຈ.

ອປຣຊ຺ຌິຕ຺ວາຕິ ຠຄວໂຕ ສມ຺ມຸຂາ ‘‘ປາປຠິກ຺ຂູ ຊາຕາ’’ຕິ ວຕ຺ວາ. ມຫາສາວຊ຺ຊທສ຺ສນຕ຺ຖນ຺ຕິ ມຫາສາວຊ຺ຊຠາວທສ຺ສນຕ຺ຖໍ, ອຍເມວ ວາ ປາໂຐ. ມາເຫວນ຺ຕິ ມາ ເອວມາຫ, ມາ ເອວໍ ຠຓິ. ສທ຺ຘາຍ ອໂຍ ອຸປ຺ປາໂທ ສທ຺ຘາໂຍ, ຕໍ ອາວຫຕີຕິ ສທ຺ຘາຍິໂກຕິ ອາຫ ‘‘ສທ຺ຘາຍ ອາຄມກໂຣ’’ຕິ. ສທ຺ຘາຍິໂກຕິ ວາ ສທ຺ຘາຍ ອຍິຕພ຺ໂພ, ສທ຺ເຘຍ຺ໂຍຕິ ອຕ຺ໂຖ. ເຕນາຫ ‘‘ສທ຺ຘາຕພ຺ພວຈໂນ ວາ’’ຕິ.

ປີຬກາ ນາມ ພາຫິຣໂຕ ປຏ຺ຐາຍ ອຏ຺ຐີນິ ຠິນ຺ທນ຺ຕິ, ອິມາ ປນ ປຐມໍເຍວ ອຏ຺ຐີນິ ຠິນ຺ທິຕ຺ວາ ອຸຄ຺ຄຕາ. ເຕນາຫ ‘‘ອຏ຺ຐີນິ ຠິນ຺ທິຕ຺ວາ ອຸຄ຺ຄຕາຫິ ປິຬກາຫີ’’ຕິ. ຕຣຸຓເພລຸວມຕ຺ຕິໂຍຕິ ຕຣຸຓພິລ຺ລຜລມຕ຺ຕິໂຍ. ວິສຄິລິໂຕຕິ ຂິຕ຺ຕປຫຣໂຓ. ຕຎ຺ຈ ພຬິສໍ ວິສສມຎ຺ຎາ ໂລເກ. ອາຣກ຺ຂເທວຕານໍ ສທ຺ທໍ ສຸຕ຺ວາຕິ ປທໍ ອາເນຕ຺ວາ ສມ຺ພນ຺ໂຘ.

ພ຺ຣຫ຺ມໂລເກຕິ ສຸທ຺ຘາວາສໂລເກ. ວຣາໂກຕິ ອນຸຄ຺ຄຫວຈນເມຕໍ. ຫີນປຣິຍາໂຍຕິ ເກຈິ. ປິຍສີລາຕິ ອິມິນາ ເອຕສ຺ມິໍ ອຕ຺ເຖ ນິຣຸຕ຺ຕິນເຍນ ເປສລາຕິ ປທສິທ຺ຘີຕິ ທສ຺ເສຕິ. ກພຣກ຺ຂີນີຕິ ພ຺ຍາຘິພເລນ ປຣິຠິນ຺ນວຓ຺ຓຕາຍ ກພຣຠູຕານິ ອກ຺ຂີນິ. ຍຕ຺ຕກນ຺ຕິ ຠຄວໂຕ ວຈນໍ ອຎ຺ຎຖາ ກໂຣນ຺ເຕນ ຍຕ຺ຕກໍ ຕຍາ ອປຣທ຺ຘໍ, ຕສ຺ສ ປມາຓໍ ນຕ຺ຖີຕິ ອຕ຺ໂຖ. ຍສ຺ມາ ອນາຄາມິໂນ ນາມ ປຫີນກາມຈ຺ຉນ຺ທພ຺ຍາປາທາ ໂຫນ຺ຕິ, ຕ຺ວຎ຺ຈ ທິຏ຺ຐິກາມຈ຺ຉນ຺ທພ຺ຍາປາທວເສນ ອິຘາຄໂຕ, ຕສ຺ມາ ຍາວຎ຺ຈ ເຕ ອິທໍ ອປຣທ຺ຘນ຺ຕິ ເອວເມຕ຺ຖ ອຕ຺ໂຖ ທຏ຺ຐພ຺ໂພ.

ອທິຏ຺ຐິປ຺ປຕ຺ໂຕຕິ ອປ຺ປຕ຺ຕທິຏ຺ຐິໂກ. ຄິລິຕວິໂສ ວິຍ ວິສໍ ຄິລິຕ຺ວາ ຐິໂຕ ວິຍ. ກຸຐາຣິສທິສາ ມູລປຈ຺ຉິນ຺ທນຏ຺ເຐນ. ອຸຕ຺ຕມຕ຺ເຖຕິ ອຣຫຕ຺ເຕ. ຂີຓາສໂວຕິ ວທຕິ ສຸນກ຺ຂຕ຺ໂຕ ວິຍ ອເຈລໍ ໂກຣກ຺ຂຕ຺ຕິຍໍ. ໂຍ ອຄ຺ຄສາວໂກ ວິຍ ປສໍສິຕພ຺ໂພ ຂີຓາສໂວ, ຕໍ ‘‘ທຸສ຺ສີໂລ ອຍ’’ນ຺ຕິ ວທຕິ. ວິຈິນາຕີຕິ ອາຈິໂນຕິ ປສວຕິ. ປສໍສິຍນິນ຺ທາ ຕາວ ສມ຺ປນ຺ນຄຸຓປຣິຘໍສນວເສນ ປວຕ຺ຕິຍາ ສາວຊ຺ຊຕາຍ ກຏຸກວິປາກາ, ນິນ຺ທິຍປ຺ປສໍສາ ປນ ກຖໍ ຕາຍ ສມວິປາກາຕິ? ຕຕ຺ຖ ອວິຊ຺ຊມານຄຸຓສມາໂຣປເນນ ອຕ຺ຕໂນ ປເຣສຎ຺ຈ ມິຈ຺ຉາປຏິປຕ຺ຕິເຫຕຸຠາວໂຕ ປສໍສິເຍນ ຕສ຺ສ ສມຠາວກຣຓໂຕ ຈ. ໂລເກປິ ຫິ ອສູຣໍ ສູເຣນ ສມໍ ກໂຣນ຺ໂຕ ຄາຣຍ຺ໂຫ ໂຫຕິ, ປເຄວ ທຸປ຺ປຏິປນ຺ນໍ ສຸປ຺ປຏິປນ຺ເນນ ສມໍ ກໂຣນ຺ໂຕຕິ.

ສເກນ ຘເນນາຕິ ອຕ຺ຕໂນ ສາປເຕຍ຺ເຍນ. ອຍໍ ອປ຺ປມຕ຺ຕໂກ ອປຣາໂຘ ທິຏ຺ຐຘມ຺ມິກຕ຺ຕາ ສປ຺ປຕິກາຣຕ຺ຕາ ຈ ຕສ຺ສ. ອຍໍ ມຫນ຺ຕຕໂຣ ກລິ ກຕູປຈິຕສ຺ສ ສມ຺ປຣາຍິກຕ຺ຕາ ອປ຺ປຕິກາຣຕ຺ຕາ ຈ.

ນິຣພ຺ພຸໂທຕິ ຄຓນາວິເສໂສ ເອໂສຕິ ອາຫ ‘‘ນິຣພ຺ພຸທຄຓນາຍາ’’ຕິ, ສຕສຫສ຺ສໍ ນິຣພ຺ພຸທານນ຺ຕິ ອຕ຺ໂຖ. ຍມຣິຍຄຣຫີ ນິຣຍໍ ອຸເປຕີຕິ ເອຕ຺ຖ ຍຖາວຸຕ຺ຕອາຍຸປ຺ປມາຓໍ ປາກຕິກວເສນ ອຣິຍູປວາທິນາ ວຸຕ຺ຕນ຺ຕິ ເວທິຕພ຺ພໍ. ອຄ຺ຄສາວການໍ ປນ ຄຸຓມຫນ຺ຕຕາຍ ຕໂຕປິ ອຕິວິຍ ມຫນ຺ຕຕຣເມວາຕິ ວທນ຺ຕິ.

ອຖ ໂຂ ພ຺ຣຫ຺ມາ ສຫມ຺ປຕີຕິ ໂກ ອຍໍ ພ຺ຣຫ຺ມາ, ກສ຺ມາ ຈ ປນ ຠຄວນ຺ຕໍ ອຸປສງ຺ກມິຕ຺ວາ ເອຕທໂວຈາຕິ? ອຍໍ ກສ຺ສປສ຺ສ ຠຄວໂຕ ສາສເນ ສຫໂກ ນາມ ຠິກ຺ຂຸ ອນາຄາມີ ຫຸຕ຺ວາ ສຸທ຺ຘາວາເສສຸ ອຸປ຺ປນ຺ໂນ, ຕຕ຺ຖ ສຫມ຺ປຕິ ພ຺ຣຫ຺ມາຕິ ສຎ຺ຊານນ຺ຕິ. ໂສ ປນາຫໍ ຠຄວນ຺ຕໍ ອຸປສງ຺ກມິຕ຺ວາ ‘‘ປທຸມນິຣຍໍ ກິຕ຺ເຕສ຺ສາມິ, ຕໂຕ ຠຄວາ ຠິກ຺ຂູນໍ ອາໂຣເຈສ຺ສຕິ, ອຖານຸສນ຺ຘິກຸສລາ ຠິກ຺ຂູ ຕຕ຺ຖາຍຸປ຺ປມາຓໍ ປຸຈ຺ຉິສ຺ສນ຺ຕິ, ຠຄວາ ອາຈິກ຺ຂນ຺ໂຕ ອຣິຍູປວາເທ ອາທີນວໍ ປກາເສສ຺ສຕີ’’ຕິ ອິມິນາ ກາຣເຓນ ຠຄວນ຺ຕໍ ອຸປສງ຺ກມິຕ຺ວາ ເອຕທໂວຈ.

ມຄຘຣຏ຺ເຐ ສໍໂວຫາຣໂຕ ມາຄຘໂກ ປຕ຺ໂຖ, ເຕນ. ປຈ຺ຈິຕພ຺ພຏ຺ຐານສ຺ສາຕິ ນິຣຍທຸກ຺ເຂນ ປຈ຺ຈິຕພ຺ພປ຺ປເທສສ຺ສ ເອຕໍ ອພ຺ພຸໂທຕິ ນາມໍ. ວສ຺ສຄຓນາຕິ ເອກໂຕ ປຏ຺ຐາຍ ທສຄຸຓິຕໍ ອພ຺ພຸທອາຍຸມ຺ຫິ ຕໂຕ ອປຣໍ ວີສຕິຄຸຓິຕໍ ນິຣພ຺ພຸທາທີສຸ ວສ຺ສຄຓນາ ເວທິຕພ຺ພາ. ອຍຎ຺ຈ ຄຓນາ ອປຣິຈິຕານໍ ທຸກ຺ກຣາຕິ ວຸຕ຺ຕໍ ‘‘ນ ຕໍ ສຸກຣໍ ສງ຺ຂາຕຸ’’ນ຺ຕິ. ເກຈິ ປນ ‘‘ຕຕ຺ຖ ຕຕ຺ຖ ປຣິເທວນານຕ຺ເຕນ ກມ຺ມກາຣຓນານຕ຺ເຕນປິ ອິມານິ ນາມານິ ລທ຺ຘານີ’’ຕິ ວທນ຺ຕິ, ອປເຣ ‘‘ສີຕນຣກາ ເອເຕ’’ຕິ. ສພ຺ພຕ຺ຖາຕິ ອພພາທີສຸ ປທຸມປຣິໂຍສາເນສຸ ສພ຺ເພສຸ ນິຣເຍສຸ. ເອສ ນໂຍຕິ ເຫຏ຺ຐິມໂຕ ອຸປຣິມສ຺ສ ວີສຕິຄຸຓຕໍ ອຕິທິສຕິ. ທສເມ ນຕ຺ຖິ ວຕ຺ຕພ຺ພໍ.

ໂກກາລິກສຸຕ຺ຕາທິວຓ຺ຓນາ ນິຏ຺ຐິຕາ.

ເຖຣວຄ຺ຄວຓ຺ຓນາ ນິຏ຺ຐິຕາ.