(໑໖) ໔. ເອກຘມ຺ມປາຬິ-ຈຕຸຕ຺ຖວຄ຺ຄວຓ຺ຓນາ

໓໒໒. ຈຕຸຕ຺ຖສ຺ສ ປຐເມ ສຎ຺ຎາຓຠູຕາຕິ ອຸປລກ຺ຂຓຠູຕາ. ປຎ຺ຈທສໂຍຊນາວຏ຺ຏກ຺ຂນ຺ຘາຕິ ປຎ຺ຈທສໂຍຊນກ຺ຂນ຺ຘປຣິກ຺ເຂປາ. ຍຖາ ຈາຕິ ຈ-ສທ຺ເທນ ກທມ຺ພຣຸກ຺ຂາທີນໍ ກປ຺ປຏ຺ຐາຍິຠາວໍ ວິຍ ໂຍຊນສຕຸພ຺ເພຘາທິຠາວໍ ສມຸຈ຺ຈິໂນຕິ, ນ ປນ ຊມ຺ພຸຍາ ຊມ຺ພຸທີປສ຺ສ ວິຍ ເຕຫິ ອປຣໂຄຍານາທີນໍ ສຎ຺ຎາຓຠາວໍ. ຣາມເຓຍ຺ຍກນ຺ຕິ ຣມຓີຍຠາວໍ. ເສສປເທສູຕິ ວນຣາມເຓຍ຺ຍກາທິປເທສຸ. ອຸຄ຺ຄຕໍ ກູລໍ ອຸສ຺ສິຕຠາໂວ ເອຕສ຺ສາຕິ ອຸກ຺ກູລໍ, ວິຄຕໍ ອປຄຕໍ ກູລໍ ເອຕສ຺ສາຕິ ວິກູລນ຺ຕິ ອາຫ – ‘‘ອຸນ຺ນຕຏ຺ຐານໍ ນິນ຺ນຏ຺ຐານ’’ນ຺ຕິ ຈ. ນນ຺ທິຍາວຏ຺ຏມຈ຺ຉປິຏ຺ເຐເນວາຕິ ກຸຊ຺ຊກກຸລິສກມຈ຺ຉສງ຺ຆາຕປິຏ຺ເຐເນວ.

໓໒໓. ທຸຕິຍາທີສຸ ຈຕ຺ຕາໂຣ ອປາຍາ ອຎ຺ຎຕ຺ຣ ມນຸສ຺ເສຫີຕິ ອຘິປ຺ເປຕາ, ນ ເທວາ ອຎ຺ຎຕ຺ຣ ມນຸສ຺ເສຫີຕິ ຫີນາຍ ຊາຕິຍາ ອຘິປ຺ເປຕຕ຺ຕາ. ອຸປາທາຍຸປາທາຍາປິ ມຊ຺ຌິມເທໂສ ລພ຺ຠຕິ, ຍຕ຺ຖ ຄຕິ ຠິກ຺ຂູນໍ ຠິກ຺ຂຸນີນໍ ອຸປາສການໍ ອຸປາສິການໍ ອຎ຺ເຎສມ຺ປິ ກມ຺ມວາທິກິຣິຍວາທິວິຎ຺ຎຸຊາຕິການໍ, ໂຍ ປຕິຣູປເທໂສຕິ ວຸຈ຺ຈຕິ. ເຕນາຫ – ‘‘ສກໂລປິ ຫີ’’ຕິອາທິ.

໓໒໔. ເອຬາຕິ ໂທໂສ. ເຕນາຫ – ‘‘ນິທ຺ໂທສມຸຂາຕິ ອຕ຺ໂຖ’’ຕິ.

໓໒໖. ຕຖາຄຕສ຺ສ ຄຸເຓ ຊານິຕ຺ວາ ຈກ຺ຂຸນາປິ ທສ຺ສນໍ ທສ຺ສນເມວ, ອຊານິຕ຺ວາ ປນ ທສ຺ສນໍ ຕິຣຈ຺ຉານຄຕານມ຺ປິ ໂຫຕິເຍວາຕິ ອາຫ – ‘‘ເຍ ຕຖາຄຕສ຺ສ ຄຸເຓ ຊານິຕ຺ວາ’’ຕິອາທິ.

໓໒໗. ປກາເສຕ຺ວາ ກຖິຕນ຺ຕິ ສຈ຺ຈານິ ປກາເສຕ຺ວາ ກຖິຕໍ.

໓໒໘. ສຸຕານໍ ຘມ຺ມານໍ ອສມ຺ໂມໂສ ຘາຣຓນ຺ຕິ ອາຫ – ‘‘ຘາເຣນ຺ຕີຕິ ນ ປມ຺ມຸສ຺ສນ຺ຕີ’’ຕິ.

໓໒໙. ອຕ຺ຖານຕ຺ຖໍ ອຸປປຣິກ຺ຂນ຺ຕີຕິ ‘‘ອຍໍ ອິມິສ຺ສາ ປາຬິຍາ ອຕ຺ໂຖ, ອຍໍ ນ ອຕ຺ໂຖ’’ຕິ ອຕ຺ຖານຕ຺ຖໍ ອຸປປຣິກ຺ຂນ຺ຕິ. ອນຕ຺ຖປຣິຫາເຣນ ຫິ ອຕ຺ຖຄ຺ຄຫຓໍ ຍຖາ ອຘມ຺ມປຣິວຊ຺ຊເນນ ຘມ຺ມປ຺ປຏິປຕ຺ຕິ.

໓໓໐. ອນຸໂລມປຏິປທນ຺ຕິ ນິພ຺ພານສ຺ສ ອນຸໂລມິກໍ ປຏິປທໍ.

໓໓໑. ສໍເວຄຊນເກສຸ ກາຣເຓສູຕິ ສໍເວຄຊນເກສຸ ຊາຕິອາທີສຸ ກາຣເຓສຸ. ສໍເວຊນີເຍສຸ ຐາເນສຸ ສໂຫຕ຺ຕປ຺ປຎາຓໍ ສໍເວໂຄ.

໓໓໒. ອຸປາເຍນາຕິ ເຍນ ອຸປາເຍນ ວຏ຺ຏູປຈ຺ເຉໂທ, ເຕນ ອຸປາເຍນ. ປຘານວີຣິຍໍ ກໂຣນ຺ຕີຕິ ສມ຺ມປ຺ປຘານສງ຺ຂາຕໍ ວີຣິຍໍ ກໂຣນ຺ຕິ ອຸປ຺ປາເທນ຺ຕິ.

໓໓໓. ວວສ຺ສຊີຍນ຺ຕິ ວິສ຺ສຊ຺ຊີຍນ຺ຕິ ເອຕ຺ຖ ສງ຺ຂາຣາຕິ ວວສ຺ສຄ຺ໂຄ, ອສງ຺ຂຕາ ຘາຕູຕິ ອາຫ – ‘‘ວວສ຺ສຄ຺ໂຄ ວຸຈ຺ຈຕິ ນິພ຺ພານ’’ນ຺ຕິ.

໓໓໔. ອຸຕ຺ຕມນ຺ນານນ຺ຕິ ອຸຕ຺ຕມານໍ ປຎ຺ຈນ຺ນໍ ໂຠຊນານໍ. ອຸຕ຺ຕມຣສານນ຺ຕິ ອຸຕ຺ຕມານໍ ຣສານໍ. ອຸຎ຺ຉາຈາເຣນາຕິ ອຸຎ຺ຉາຈຣິຍາຍ ກສ຺ສຈິ ອປຣິຄ຺ຄຫຠູຕສ຺ສ ກິຎ຺ຈິ ອຍາຈິຕ຺ວາ ຄຫຓໍ ອຸຎ຺ຉາຈາໂຣ. ເອຕ຺ຖ ຈາຕິອາທິນາ ອນ຺ນາທີນໍ ອຄ຺ຄຠາໂວ ນາມ ມນາປປຣໂມ ອິຈ຺ຉິຕກ຺ຂຓລາໂຠ, ນ ເຕສໍ ລາຠິຕາມຕ຺ຕນ຺ຕິ ທສ຺ເສຕິ. ປຏິລຠນ຺ຕີຕິ ເທນ຺ຕິ ປຓີຕຠາເວນ. ຠຕ຺ຕສ຺ສ ເອກປາຕີຕິ ເອກປາຕິປູຣໍ ຠຕ຺ຕໍ. ອິທໍ ກິໍ ນາມາຕິ ‘‘ອິທໍ ອນ຺ນຄ຺ຄຣສຄ຺ຄໍ ນາມ ໂຫຕິ, ນ ໂຫຕີ’’ຕິ ປຸຈ຺ຉຕິ. ອຸຎ຺ເຉນ ກປາລາຠເຕນາຕິ ມິສ຺ສກຠຕ຺ເຕນ. ຍາເປນ຺ເຕຕິ ຍາປນສີເສນ ຍາປນເຫຕຸໍ ຠຕ຺ຕໍ ວທຕິ. ອຸປາທາຍ ອຄ຺ຄຣສໍ ນາມາຕິ ຕໍ ຕໍ ອຸປາທາຍຸປາທາຍ ອນ຺ນຄ຺ຄຣສຄ຺ຄໍ ທຏ຺ຐພ຺ພນ຺ຕິ ທສ຺ເສຕິ. ຈກ຺ກວຕ຺ຕິອາຫາຣໂຕ ຫິ ຈາຕຸມຫາຣາຊິການໍ ອາຫາໂຣ ອຄ຺ໂຄຕິ ເອວໍ ຍາວ ປຣນິມ຺ມິຕວສວຕ຺ຕິເທວາ ເນຕພ຺ພໍ.

໓໓໕. ອຕ຺ຖຣໂສ ນາມ ຈຕ຺ຕາຣິ ສາມຎ຺ຎຜລານິ ‘‘ອຣິຍມຄ຺ຄານໍ ຜລຠູໂຕ ຣໂສ’’ຕິ ກຕ຺ວາ. ຘມ຺ມຣໂສ ນາມ ຈຕ຺ຕາໂຣ ມຄ຺ຄາ ‘‘ສາມຎ຺ຎຜລສ຺ສ ເຫຕຸຠູໂຕ ຣໂສ’’ຕິ ກຕ຺ວາ ວິມຸຕ຺ຕິຣໂສ ນາມ ອມຕໍ ນິພ຺ພານໍ ‘‘ສພ຺ພສງ຺ຂາຣສມໂຖ’’ຕິ ກຕ຺ວາ.

ຈຕຸຕ຺ຖວຄ຺ຄວຓ຺ຓນາ ນິຏ຺ຐິຕາ.

ຊມ຺ພຸທີປເປຍ຺ຍາໂລ ນິຏ຺ຐິໂຕ.