໑໗. ປສາທກຣຘມ຺ມວຄ຺ຄວຓ຺ຓນາ

໓໖໖. ອທ຺ຘມິທນ຺ຕິ ສນ຺ຘິວເສນ ປາຬິຍໍ ຣສ຺ສໍ ກຕ຺ວາ ວຸຕ຺ຕໍ, ມ-ກາໂຣ ປທສນ຺ຘິກໂຣຕິ ອາຫ – ‘‘ອທ຺ຘາ ອິທ’’ນ຺ຕິ. ເອກໍໂສ ເອສາຕິ ເອກໍໂສ ເຫຕຸ ເອສ ລາຠານໍ. ປາປກໍ ນາມາຕິ ອປ຺ປກມ຺ປິ ປາປໍ ນາມ ພ຺ຍຕ຺ຕໍ ເອກໍເສນ ນ ກໂຣຕິ. ຕຖສ຺ສາຕິ ຕຖາ ສມ຺ມາປຏິປຊ຺ຊມານສ຺ສ ອສ຺ສ. ອາຣຎ຺ຎິກຕ຺ຕໍ…ເປ… ເຕຈີວຣິກຕ຺ຕນ຺ຕິ ອິເມສໍ ຘຸຕຘມ຺ມານໍ ຄຫເຓເນວ ອິຕເຣສມ຺ປິ ຕໍສຠາຄານໍ ຄຫິຕຠາໂວ ທຏ຺ຐພ຺ໂພ. ຖາວຣປ຺ປຕ຺ຕຠາໂວຕິ ສາສເນ ຖິຣຠາວປ຺ປຕ຺ຕິ ເຖຣຠາໂວ. ອາກປ຺ປສ຺ສ ສມ຺ປຕ຺ຕີຕິ ‘‘ອຎ຺ໂຎ ເມ ອາກປ຺ໂປ ກຣຓີໂຍ’’ຕິ ເອວໍ ວຸຕ຺ຕສ຺ສ ອາກປ຺ປສ຺ສ ສມ຺ປຕ຺ຕິ. ໂກລປຸຕ຺ຕີຕິ ໂກລປຸຕ຺ຕິຍນ຺ຕິ ອາຫ – ‘‘ກຸລປຸຕ຺ຕຠາໂວ’’ຕິ. ສມ຺ປນ຺ນຣູປຕາຕິ ອຸປຘິສມ຺ປທາ. ວຈນກິຣິຍາຍາຕິ ວຈນປ຺ປໂຍຄສ຺ສ ມຘຸຣຠາໂວ ມຎ຺ຊຸສ຺ສຣຕາ. ເຕນສ຺ສ ລາໂຠ ອຸປ຺ປຊ຺ຊຕີຕິ ອິທໍ ນ ລາຠຸປ຺ປາທນູປາຍທສ຺ສນປຣໍ, ອຖ ໂຂ ເອວໍ ສມ຺ມາປຏິປຊ຺ຊມານສ຺ສ ອນິຈ຺ຉນ຺ຕສ຺ເສວ ລາໂຠ ອຸປ຺ປຊ຺ຊຕີຕິ ລາຠສ຺ສ ອພ຺ຍຠິຈາຣເຫຕຸທສ຺ສນປຣໍ ທຏ຺ຐພ຺ພໍ. ຍຖາຫ –

‘‘ອາກງ຺ເຂຍ຺ຍ ເຈ, ຠິກ຺ຂເວ, ຠິກ຺ຂຸ ລາຠີ ອສ຺ສໍ ຈີວຣປິຓ຺ຑປາຕເສນາສນຄິລານປ຺ປຈ຺ຈຍເຠສຊ຺ຊປຣິກ຺ຂາຣານນ຺ຕິ, ສີເລສ຺ເວວສ຺ສ ປຣິປູຣກາຣີ’’ຕິ (ມ. ນິ. ໑.໖໕).

ປສາທກຣຘມ຺ມວຄ຺ຄວຓ຺ຓນາ ນິຏ຺ຐິຕາ.