(໑໖) ໒. ເອກຘມ຺ມປາຬິ-ທຸຕິຍວຄ຺ຄວຓ຺ຓນາ

໒໙໘. ມິຈ຺ຉາ ປສ຺ສຕິ ຕາຍ, ສຍໍ ວາ ມິຈ຺ຉາ ປສ຺ສຕິ, ມິຈ຺ຉາທສ຺ສນເມວ ວາ ຕນ຺ຕິ ມິຈ຺ຉາທິຏ຺ຐິ, ຍໍ ກິຎ຺ຈິ ວິປຣີຕທສ຺ສນໍ. ເຕນາຫ – ‘‘ທ຺ວາສຏ຺ຐິວິຘາຍາ’’ຕິອາທິ. ມິຈ຺ຉາທິຏ຺ຐິ ເອຕສ຺ສາຕິ ມິຈ຺ຉາທິຏ຺ຐິໂກ. ຕສ຺ສ ມິຈ຺ຉາທິຏ຺ຐິກສ຺ສ.

໒໙໙. ສມ຺ມາ ປສ຺ສຕິ ຕາຍ, ສຍໍ ວາ ສມ຺ມາ ປສ຺ສຕິ, ສມ຺ມາທສ຺ສນມຕ຺ຕເມວ ວາ ຕນ຺ຕິ ສມ຺ມາທິຏ຺ຐິ. ປຎ຺ຈວິຘາຍາຕິ ກມ຺ມສ຺ສກຕາຌານວິປສ຺ສນາມຄ຺ຄຜລວເສນ ປຎ຺ຈວິຘາຍ. ຕຕ຺ຖ ຌານຈິຕ຺ຕຸປ຺ປາທປຣິຍາປນ຺ນໍ ຎາຓໍ ຌານສມ຺ມາທິຏ຺ຐິ, ວິປສ຺ສນາຎາຓໍ ວິປສ຺ສນາສມ຺ມາທິຏ຺ຐິ.

໓໐໒. ປຎ຺ຈສຸ ຂນ຺ເຘສຸ ‘‘ນິຈ຺ຈ’’ນ຺ຕິອາທິນາ ປວຕ຺ໂຕ ອນຸປາຍມນສິກາໂຣ.

໓໐໓. ‘‘ອນິຈ຺ຈ’’ນ຺ຕິອາທິນາ ປວຕ຺ໂຕ ອຸປາຍມນສິກາໂຣ. ຍາວ ນິຍາໂມກ຺ກມນາຕິ ຍາວ ມິຈ຺ຉຕ຺ຕນິຍາໂມກ຺ກມນາ. ມິຈ຺ຉຕ຺ຕນິຍາໂມກ຺ກມນນໂຍ ປນ ສາມຎ຺ຎຜລສຸຕ຺ຕວຓ຺ຓນາຍໍ ຕຏ຺ຏີກາຍ ຈ ວຸຕ຺ຕນເຍເນວ ເວທິຕພ຺ໂພ.

໓໐໔. ອຍໍ ຕິວິຘາ ສຄ຺ຄາວຣຓາ ເຈວ ໂຫຕີຕິ ກມ຺ມປຖປ຺ປຕ຺ຕິຍາ ມຫາສາວຊ຺ຊຠາວໂຕ ວຸຕ຺ຕໍ. ສຄ຺ຄາວຣຓາຍ ໂຫນ຺ຕິຍາ ມຄ຺ຄວິພນ຺ຘກຠາເວ ວຕ຺ຕພ຺ພເມວ ນຕ຺ຖີຕິ ວຸຕ຺ຕໍ – ‘‘ມຄ຺ຄາວຣຓາ ຈາ’’ຕິ. ‘‘ສສ຺ສໂຕ ໂລໂກ’’ຕິອາທິກາ ທສວຕ຺ຖຸກາ ອນ຺ຕຄ຺ຄາຫິກາ ມິຈ຺ຉາທິຏ຺ຐິ. ມຄ຺ຄາວຣຓາວ ໂຫຕິ ວິປຣີຕທສ຺ສນຠາວໂຕ, ນ ສຄ຺ຄາວຣຓາ ອກມ຺ມປຖປຕ຺ຕິໂຕຕິ ອຘິປ຺ປາໂຍ. ອິທໍ ປນ ວິຘານໍ ປຏິກ຺ຂິປິຕ຺ວາຕິ ວິປຣີຕທສ຺ສນຎ຺ຈ ນ ມຄ຺ຄາວຣຓຎ຺ຈາຕິ ວິຣຸທ຺ຘເມຕໍ ອຸທ຺ຘມ຺ມຠາວໂຕ. ຕຖາ ຫິ ສຕິ ອປ຺ປຫີນາຍ ເອວ ສກ຺ກາຍທິຏ຺ຐິຍາ ມຄ຺ຄາຘິຄເມນ ຠວິຕພ຺ພນ຺ຕິ ອຘິປ຺ປາເຍນ ຍຖາວຸຕ຺ຕວິຘານໍ ປຏິກ຺ຂິປິຕ຺ວາ. ‘‘ນ ສຄ຺ຄາວຣຓາ’’ຕິ ສຄ຺ຄູປປຕ຺ຕິຍາ ອວິພນ຺ຘກຕ຺ຕໍ ວທນ຺ເຕຫິ ທິຏ຺ຐິຍາ ສຄ຺ຄາວຫຕາປິ ນາມ ອນຸຎ຺ຎາຕາ ໂຫຕີຕິ ຕໍ ວາທໍ ປຏິກ຺ຂິປນ຺ເຕນ ‘‘ທິຏ຺ຐິ ນາມ ສຄ຺ຄໍ ອຸປເນຕຸໍ ສມຕ຺ຖາ ນາມ ນຕ຺ຖີ’’ຕິ ວຸຕ຺ຕໍ. ກສ຺ມາ? ເອກນ຺ຕຄຣຸຕຣສາວຊ຺ຊຠາວໂຕ. ເຕນາຫ – ‘‘ເອກນ຺ຕໍ ນິຣຍສ຺ມິໍເຍວ ນິມຸຊ຺ຊາເປຕີ’’ຕິອາທິ.

໓໐໕. ວຏ຺ຏໍ ວິທ຺ຘໍເສຕີຕິ ມຄ຺ຄສມ຺ມາທິຏ຺ຐິ ກິເລສວຏ຺ຏໍ ກມ຺ມວຏ຺ຏຎ຺ຈ ວິທ຺ຘໍເສຕິ. ວິປາກວຏ຺ຏໍ ກາ ນຸ ວິທ຺ຘໍເສຕິ ນາມ. ເອວໍ ປນ ອຕ຺ຕໂນ ກາຣເຓນ ວິທ຺ຘສ຺ຕຠວໍ ຜລສມ຺ມາທິຏ຺ຐິ ປຏິພາຫຕີຕິ ວຸຕ຺ຕໍ ອວສຣທານໂຕ. ອິຈ຺ເຈຕໍ ກຸສລນ຺ຕິ ອຣຫຕ຺ຕໍ ປາເປຕຸໍ ສເຈ ສກ຺ໂກຕິ, ເອວເມຕໍ ວິປສ຺ສນາຍ ປຏິສນ຺ຘິອນາກຑ຺ຒນໍ ກຸສລໍ ອນວຊ຺ຊໍ. ສຕ຺ຕ ຠເວ ເທຕີຕິ ໂສຕາປຕ຺ຕິມຄ຺ຄສ຺ສ ປຈ຺ຈຍຠູຕາ ວິປສ຺ສນາສມ຺ມາທິຏ຺ຐິ ຕສ຺ສ ປຸຄ຺ຄລສ຺ສ ສຕ຺ຕ ຠເວ ເທຕິ. ເອວມຍນ຺ຕິ ປຎ຺ຈວິຘມ຺ປິ ສມ຺ມາທິຏ຺ຐິໍ ສນ຺ຘາຍ ວຸຕ຺ຕໍ. ເຕນາຫ – ‘‘ໂລກິຍໂລກຸຕ຺ຕຣາ ສມ຺ມາທິຏ຺ຐິ ກຖິຕາ’’ຕິ. ອິມສ຺ມິໍ ປນຕ຺ເຖຕິ ‘‘ນາຫໍ, ຠິກ຺ຂເວ, ອຎ຺ຎໍ ເອກຘມ຺ມມ຺ປິ ສມນຸປສ຺ສາມີ’’ຕິອາທິນາ ວຸຕ຺ເຕ ຄຕິມຄ຺ຄສງ຺ຂາເຕ ອຕ຺ເຖ. ‘‘ສຸຄຕິໍ ສຄ຺ຄໍ ໂລກໍ ອຸປປຊ຺ຊນ຺ຕີ’’ຕິ ວຸຕ຺ຕຕ຺ຕາ ‘‘ໂລກິກາ ຠວນິປ຺ຜາທິກາວ ເວທິຕພ຺ພາ’’ຕິ ວຸຕ຺ຕໍ.

໓໐໖. ຍຖາທິຏ຺ຐີຕິ ອຕ຺ຖພ຺ຍາປນິຈ຺ຉາຍໍ ຍຖາ-ສທ຺ໂທ, ເຕນ ອຸຕ຺ຕຣປທຕ຺ຖປ຺ປຘາໂນ ສມາໂສຕິ ອາຫ – ‘‘ຍາ ຍາ ທິຏ຺ຐີ’’ຕິ. ຕສ຺ສາ ຕສ຺ສາ ອນຸຣູປນ຺ຕິ ຕໍຕໍທິຏ຺ຐິອນຸຣູປນ຺ຕິ ອຕ຺ໂຖ. ສມຕ຺ຕນ຺ຕິ ອນວເສສໍ. ເຕນາຫ – ‘‘ປຣິປຸຓ຺ຓ’’ນ຺ຕິ. ສມາທິນ຺ນນ຺ຕິ ອາທິມຊ຺ຌປຣິໂຍສາເນສຸ ສມໍ ເອກສທິສໍ ກຕ຺ວາ ອາທິນ຺ນໍ ຄຫິຕໍ ອນິສ຺ສຏ຺ຐໍ. ຕເທຕນ຺ຕິ ຍເທຕໍ ‘‘ຍຎ຺ເຈວ ກາຍກມ຺ມ’’ນ຺ຕິອາທິນາ ວຸຕ຺ຕໍ, ຕເທຕໍ ກາຍກມ຺ມໍ. ຍຖາທິຏ຺ຐິຍໍ ຐິຕກາຍກມ຺ມນ຺ຕິ ຍາ ປນ ທິຏ຺ຐິ ‘‘ນຕ຺ຖິ ຕໂຕນິທານໍ ປາປ’’ນ຺ຕິອາທິນາ ປວຕ຺ຕາ, ຕສ຺ສໍ ທິຏ຺ຐິຍໍ ຐິຕກສ຺ສ ຐິຕມຕ຺ຕສ຺ສ ອນິສ຺ສຏ຺ຐສ຺ສ ຕໍທິຏ຺ຐິກສ຺ສ ກາຍກມ຺ມໍ. ທິຏ຺ຐິສຫຊາຕໍ ກາຍກມ຺ມນ຺ຕິ ຕສ຺ສ ຍຖາທິຏ຺ຐິກສ຺ສ ປເຣສໍ ຫຕ຺ຖມຸທ຺ທາທິນາ ວິຎ຺ຎາປນກາເລ ຕາຍ ທິຏ຺ຐິຍາ ສຫຊາຕໍ ກາຍກມ຺ມໍ. ນ ເຈຕ຺ຖ ວຈີກມ຺ມາສງ຺ກາ ອຸປ຺ປາເທຕພ຺ພາ ປາຓຆາຕາທີນໍເຍວ ອຘິປ຺ເປຕຕ຺ຕາ. ທິຏ຺ຐານຸໂລມິກໍ ກາຍກມ຺ມນ຺ຕິ ຍຖາ ປເຣສໍ ປາກຏໍ ໂຫຕິ, ເອວໍ ທິຏ຺ຐິຍາ ອນຸໂລມິກໍ ກຕ຺ວາ ປວຕ຺ຕິຕໍ ກາຍກມ຺ມໍ. ເຕນາຫ – ‘‘ສມາທິນ຺ນໍ ຄຫິຕໍ ປຣາມຏ຺ຐ’’ນ຺ຕິ. ຕຕ຺ຖາຕິອາທິ ສຸວິຎ຺ເຎຍ຺ຍເມວ. ເອເສວ ນໂຍຕິ ອິມິນາ ຍຖາວຸຕ຺ຕາຍ ທິຏ຺ຐິຍາ ຐິຕວຈີກມ຺ມໍ, ທິຏ຺ຐິສຫຊາຕໍ ວຈີກມ຺ມໍ, ທິຏ຺ຐານຸໂລມິກໍ ວຈີກມ຺ມນ຺ຕິ ຕິວິຘໍ ໂຫຕີຕິ ເອວມາທິ ອຕິທິສຕິ. ມິຈ຺ຉາທິຏ຺ຐິກສ຺ສາຕິ ກມ຺ມປຖປ຺ປຕ຺ຕາຍ ມິຈ຺ຉາທິຏ຺ຐິຍາ ມິຈ຺ຉາທິຏ຺ຐິກສ຺ສ. ‘‘ຍາຍ ກາຍຈິ ມິຈ຺ຉາທິຏ຺ຐິຍາ ມິຈ຺ຉາທິຏ຺ຐິກສ຺ສ ສໂຕ’’ຕິ ອປເຣ.

ທິຏ຺ຐິສຫຊາຕາຕິ ຍຖາວຸຕ຺ຕາຍ ທິຏ຺ຐິຍາ ສຫຊາຕາ ເຈຕນາ. ເອສ ນໂຍ ເສສປເທສຸປິ. ປຕ຺ຖນາຕິ ‘‘ອິທໍ ນາມ ກເຣຍ຺ຍ’’ນ຺ຕິ ຕຓ຺ຫາປຕ຺ຖນາ. ເຈຕນາປຕ຺ຖນານໍ ວເສນາຕິ ຍຖາວຸຕ຺ຕທິຏ຺ຐິຄຕນິສ຺ສິຕເຈຕສິກນິກາມນານໍ ວເສນ. ຈິຕ຺ຕຏ຺ຐປນາຕິ ຈິຕ຺ຕສ຺ສ ປຓິທຫນາ. ຜສ຺ສາທໂຍຕິ ເຈຕນາທິຏ຺ຐິຕຓ຺ຫາທິວິນິມຸຕ຺ຕາ ຜສ຺ສາທິຘມ຺ມາ. ຍສ຺ມາ ທິຏ຺ຐິ ປາປິກາ, ຕສ຺ມາ ຕສ຺ສ ປຸຄ຺ຄລສ຺ສ ສພ຺ເພ ເຕ ຘມ຺ມາ ອນິຏ຺ຐາຍ…ເປ… ສໍວຕ຺ຕນ຺ຕີຕິ ໂຍຊນາ. ປຸຣິມສ຺ເສວາຕິ ຕິຕ຺ຕກປທສ຺ເສວ. ຕິຕ຺ຕກໍ ກຏຸກນ຺ຕິ ຈ ອຸຠຍໍ ອິຘ ອນິຏ຺ຐປຣິຍາຍໍ ທຏ຺ຐພ຺ພໍ ‘‘ປຈ຺ຉາ ເຕ ກຏຸກໍ ຠວິສ຺ສຕີ’’ຕິອາທີສຸ ວິຍ.

ອມ຺ໂພຍນ຺ຕິ ອມ຺ໂພ ອຍໍ. ຕເມວ ປູຊນ຺ຕິ ຕເມວ ປຸພ຺ເພ ລທ຺ຘປຣິສິຎ຺ຈນທານາທິປູຊໍ. ນິເວສເຣຕິ ປວິສິໍສຸ. ອສາຕສນ຺ນິວາເສນາຕິ ອມຘຸຣນິມ຺ພມູລສໍສຄ຺ເຄນ.

ຕໍ ປນ ປຏິກ຺ຂິປິຕ຺ວາ…ເປ… ວຸຕ຺ຕນ຺ຕິ ສພ຺ພາປິ ມິຈ຺ຉາທິຏ຺ຐິ ເອກນ຺ຕສາວຊ຺ຊຕ຺ຕາ ອນິຏ຺ຐາຍ ທຸກ຺ຂາຍ ສໍວຕ຺ຕຕີຕິ ອຘິປ຺ປາເຍນ ວຸຕ຺ຕໍ. ອນນ຺ຕຣສຸຕ຺ເຕຕິ ທສມສຸຕ຺ເຕ. ໂຍເຊຕ຺ວາ ເວທິຕພ຺ພານີຕິ ນວມສຸຕ຺ເຕ ວິຍ ໂຍເຊຕ຺ວາ ເວທິຕພ຺ພານິ. ຈິຕ຺ຕຏ຺ຐປນາວ ປຕ຺ຖນາຕິ ເອຕ຺ຖ ປຓິຘິ ຈາຕິ ວຕ຺ຕພ຺ພໍ.

ທຸຕິຍວຄ຺ຄວຓ຺ຓນາ ນິຏ຺ຐິຕາ.