ກິສາໂຄຕມີເຖຣີວຕ຺ຖຸ

໒໔໖. ທ຺ວາທສເມ ຕີຫິ ລູເຂຫີຕິ ວຕ຺ຖລູຂສຸຕ຺ຕລູຂຣຊນລູຂສງ຺ຂາເຕຫິ ຕີຫິ ລູເຂຫິ. ສິທ຺ຘຕ຺ຖກນ຺ຕິ ສາສປພີຊໍ.

ຕໍ ປຸຕ຺ຕປສຸສມ຺ມຕ຺ຕນ຺ຕິ ຕໍ ຣູປພລາທິສມ຺ປນ຺ເນ ປຸຕ຺ເຕ ຈ ປສູ ຈ ລຠິຕ຺ວາ ‘‘ມມ ປຸຕ຺ຕາ ອຠິຣູປາ ພລສມ຺ປນ຺ນາ ປຓ຺ຑິຕາ ສພ຺ພກິຈ຺ຈສມຕ຺ຖາ, ມມ ໂຄໂຓ ອໂຣໂຄ ອຠິຣູໂປ ມຫາຠາຣວໂຫ, ມມ ຄາວີ ພຫຸຂີຣາ’’ຕິ ເອວໍ ປຸຕ຺ເຕຫິ ຈ ປສູຫິ ຈ ສມ຺ມຕ຺ຕໍ ນຣໍ. ພ຺ຍາສຕ຺ຕມນສນ຺ຕິ ຈກ຺ຂຸວິຎ຺ເຎຍ຺ຍາທີສຸ ອາຣມ຺ມເຓສຸ ຫິຣຎ຺ຎສຸວຓ຺ຓາທີສຸ ປຕ຺ຕຈີວຣາທີສຸ ວາ ຍໍ ຍໍ ລທ຺ຘໍ ໂຫຕິ, ຕຕ຺ຖ ຕຕ຺ເຖວ ລຄ຺ຄນາຍ ສຕ຺ຕມານສໍ. ສຸຕ຺ຕໍ ຄາມນ຺ຕິ ນິທ຺ທໍ ອຸປຄຕໍ ສຕ຺ຕກາຍໍ. ມໂຫໂຆວາຕິ ຍຖາ ເອວຣູປໍ ຄາມໍ ຄມ຺ຠີຣໂຕ ວິຕ຺ຖາຣໂຕ ຈ ມຫນ຺ໂຕ ມຫານທິໂອໂຆ ອນ຺ຕມໂສ ສຸນຂມ຺ປິ ອເສເສຕ຺ວາ ສພ຺ພໍ ອາທາຍ ຄຈ຺ຉຕິ, ເອວໍ ວຸຕ຺ຕປ຺ປກາຣໍ ນຣໍ ມຈ຺ຈຸ ອາທາຍ ຄຈ຺ຉຕີຕິ ອຕ຺ໂຖ. ອມຕໍ ປທນ຺ຕິ ມຣຓຣຫິຕໍ ໂກຏ຺ຐາສໍ, ອມຕໍ ມຫານິພ຺ພານນ຺ຕິ ອຕ຺ໂຖ. ເສສເມຕ຺ຖ ອຸຕ຺ຕານເມວ.