ມຫາປຊາປຕິໂຄຕມີເຖຣີວຕ຺ຖຸ

໒໓໕. ເຖຣິປາຬິສໍວຓ຺ຓນາຍ ປຐເມ ຍທິທໍ ມຫາໂຄຕມີຕິ ເອຕ຺ຖ ‘‘ຍທິທໍ ມຫາປຊາປຕິ ໂຄຕມີ’’ຕິ ຈ ປຐນ຺ຕິ. ຕຕ຺ຖ ໂຄຕມີຕິ ໂຄຕ຺ຕໍ. ນາມກຣຓທິວເສ ປນສ຺ສາ ລທ຺ຘສກ຺ກາຣາ ພ຺ຣາຫ຺ມຓາ ລກ຺ຂຓສມ຺ປຕ຺ຕິໍ ທິສ຺ວາ ‘‘ສເຈ ອຍໍ ຘີຕຣໍ ລຠິສ຺ສຕິ, ຈກ຺ກວຕ຺ຕິຣຎ຺ໂຎ ມເຫສີ ຠວິສ຺ສຕິ. ສເຈ ປຸຕ຺ຕໍ ລຠິສ຺ສຕິ, ຈກ຺ກວຕ຺ຕິຣາຊາ ຠວິສ຺ສຕີ’’ຕິ ອຸຠຍຖາປິ ‘‘ມຫຕີເຍວສ຺ສາ ປຊາ ຠວິສ຺ສຕີ’’ຕິ ພ຺ຍາກຣິໍສຸ, ຕສ຺ມາ ປຸຕ຺ຕປຊາຍ ເຈວ ຘີຕຸປຊາຍ ຈ ມຫນ຺ຕຕາຍ ‘‘ມຫາປຊາປຕີ’’ຕິ ໂວຫຣິໍສຸ. ຕທຸຠຍໍ ປນ ສໍສນ຺ເທຕ຺ວາ ‘‘ມຫາປຊາປຕິໂຄຕມີ’’ຕິ ວຸຕ຺ຕໍ. ວາຣຠິກ຺ຂນ຺ຕິ ວາເຣນ ທາຕພ຺ພໍ ຠິກ຺ຂໍ. ນາມໍ ອກໍສູຕິ ໂຄຕ຺ຕໍເຍວ ນາມໍ ອກໍສຸ. ມາຕຸຈ຺ຉນ຺ຕິ ຈູຬມາຕຣໍ. ມາຕຸຠຄິນີ ຫິ ມາຕຸຈ຺ຉາຕິ ວຸຈ຺ຈຕິ. ກລຫວິວາທສຸຕ຺ຕປຣິໂຍສາເນຕິ ‘‘ກຸໂຕປຫູຕາ ກລຫາ ວິວາທາ’’ຕິອາທິນາ ສຸຕ຺ຕນິປາເຕ ອາຄຕສ຺ສ ກລຫວິວາທສຸຕ຺ຕສ຺ສ (ສຸ. ນິ. ໘໖໘ ອາທໂຍ) ປຣິໂຍສາເນ. ອິທຎ຺ຈ ອງ຺ຄຸຕ຺ຕຣຠາຓການໍ ກຖາມຄ຺ຄານຸສາເຣນ ວຸຕ຺ຕໍ. ອປເຣ ປນ ‘‘ຕສ຺ມິໍເຍວ ສຸຕ຺ຕນິປາເຕ ‘ອຕ຺ຕທຓ຺ຑາຠຍໍ ຊາຕ’ນ຺ຕິອາທິນາ ອາຄຕສ຺ສ ອຕ຺ຕທຓ຺ຑສຸຕ຺ຕສ຺ສ (ສຸ. ນິ. ໙໔໑ ອາທໂຍ) ປຣິໂຍສາເນ’’ຕິ ວທນ຺ຕິ. ນິກ຺ຂມິຕ຺ວາ ປພ຺ພຊິຕານນ຺ຕິ ເອຕ຺ຖ ເອຫິຠິກ຺ຂຸປພ຺ພຊ຺ຊາຍ ເອເຕ ປພ຺ພຊິຕາຕິ ວທນ຺ຕິ. ເຕເນວ ສຸຕ຺ຕນິປາເຕ ອຕ຺ຕທຓ຺ຑສຸຕ຺ຕສໍວຓ຺ຓນາຍ (ສຸ. ນິ. ອຏ຺ຐ. ໒.໙໔໒ ອາທໂຍ) ວຸຕ຺ຕໍ – ‘‘ເທສນາປຣິໂຍສາເນ ປຎ຺ຈສຕາ ສາກິຍກຸມາຣາ ໂກຬິຍກຸມາຣາ ຈ ເອຫິຠິກ຺ຂຸປພ຺ພຊ຺ຊາຍ ປພ຺ພຊິຕາ. ເຕ ຄເຫຕ຺ວາ ຠຄວາ ມຫາວນໍ ປາວິສີ’’ຕິ. ເສສເມຕ຺ຖ ສຸວິຎ຺ເຎຍ຺ຍເມວ.