໔. ຈຕຸຕ຺ໂຖ ປຣິຈ຺ເຉໂທ

ວິຎ຺ຎາຓກ຺ຂນ຺ຘປກິຓ຺ຓກນຍສງ຺ເຂໂປ

໑໙໒. ເອກຘາທິນໂຍທານິ, ປຏຸວຑ຺ຒາຍ ໂຍຄິນໍ;

ວຸຈ຺ຈເຕ ວິສຍຄ຺ຄາຫາ, ສພ຺ພເມກວິຘໍ ມນໍ.

໑໙໓. ເອກາສີຕິ ຕິຠູມຏ຺ຐໍ, ໂລກິຍໍ ສຸຕ຺ຕຣຎ຺ຈ ຕໍ;

ເສສໍ ໂລກຸຕ຺ຕຣໍ ອຏ຺ຐ, ອນຸຕ຺ຕຣຎ຺ຈິຕີ ທ຺ວິຘາ.

໑໙໔. ໂລກປາກກ຺ຣິຍາເຫຕູ, ເຈກເຫຕູຕິ ສຕ຺ຕຫິ;

ຕິໍສ ນາຘິປຕິ ສາຘິ-ປຕິ ເສສາຕິປີ ທ຺ວິຘາ.

໑໙໕. ຉນ຺ທຈິຕ຺ຕີຫວີມໍສາ-ສ຺ເວເກນ ມຕິມາ ຍຸຕໍ;

ວິນາ ວີມໍສເມເກນ, ຎາຓຫີນມນໍ ຍຸຕໍ.

໑໙໖. ປຣິຕ຺ຕານປ຺ປມາຓານິ, ມຫຄ຺ຄຕມນານິຕິ;

ຕິຘາ ຉນວ ຈຏ຺ຐ ຈ, ຕິນວາ ຈ ຍຖາກ຺ກມໍ.

໑໙໗. ທ຺ວິປຎ຺ຈ ຈິຕ຺ຕໍ ວິຎ຺ຎາຓໍ, ຕິສ຺ໂສ ຫິ ມໂນຘາຕຸໂຍ;

ຉສຕ຺ຕຕິ ມໂນຎາຓ-ຘາຕູຕິ ຕິວິຘາ ປຸນ.

໑໙໘. ເອກາຣມ຺ມຓຈິຕ຺ຕານິ, ອນຠິຎ຺ຎໍ ມຫຄ຺ຄຕໍ;

ອມລໍ ປຎ຺ຈວິຎ຺ຎາຓໍ, ນວປຎ຺ຈ ຠວນ຺ຕິເມ.

໑໙໙. ປຎ຺ຈາລມ຺ພໍ ມໂນຘາຕຸ, ສາຠິຎ຺ຎໍ ກາມຘາຕຸຊໍ;

ເສສໍ ຉາຣມ຺ມຓໍ ຕໍ ຫິ, ເຕຈຕ຺ຕາລີສ ສງ຺ຂ຺ຍໂຕ.

໒໐໐. ກາມປາກທຸສາ ຈາທິ-ມຄ຺ໂຄ ຈາທິກ຺ຣິຍາ ທຸເວ;

ຣູປາ ສພ຺ເພຕິຣູເປ ນ, ເຕຈຕ຺ຕາລີສ ໂຫນ຺ຕິເມ.

໒໐໑. ວິນາວ ຣູເປນາຣຸປ຺ປ-ວິປາກາ ຈຕຸໂຣ ສິຍຸໍ;

ທ຺ເວຈຕ຺ຕາລີສ ເສສານິ, ວຕ຺ຕນ຺ຕຸຠຍຖາປິ ຈ.

໒໐໒. ຈຕຸຘາປິ ອເຫຕ຺ເວກທ຺ວິເຫຕຸກຕິເຫຕຸໂຕ;

ອຏ຺ຐາຣສ ທ຺ເວ ພາວີສ, ສຕ຺ຕຈຕ຺ຕາລິສໍ ຠເວ.

໒໐໓. ກາເມ ຊວາ ສໂວຏ຺ຐພ຺ພາ, ອຠິຎ຺ຎາທ຺ວຍເມວ ຈ;

ຣູປິຣິຍາປຖວິຎ຺ຎຕ຺ຕິກຣາເມ ຈຕຸຣຏ຺ຐກາ.

໒໐໔. ຉພ຺ພີສຕິ ຊວາ ເສສາ, ກຣາ ຣູປິຣິຍາປເຖ;

ທ຺ວິປຎ຺ຈມນວຊ຺ຊານິ, ກາມຣູປຜລານິ ຈ.

໒໐໕. ອາທິກ຺ຣິຍາຕິ ເຈກູນ-ວີສ ຣູປກຣາ ອິເມ;

ເສສາ ຈຸທ຺ທສ ຠິນ຺ນາວຈຸຕິ ສນ຺ຘິ ນ ຕີຓິປິ.

໒໐໖. ເອກກິຈ຺ຈາທິໂຕ ປຎ຺ຈ-ວິຘາ ຕຕ຺ເຖກກິຈ຺ຈກາ;

ທ຺ວິປຎ຺ຈຈິຕ຺ຕໍ ຊວນໍ, ມໂນຘາຕຸຏ຺ຐສຏ຺ຐິເມ.

໒໐໗. ທ຺ວິກິຈ຺ຈາທີນິ ໂວຏ຺ຐພ຺ພໍ, ສຸຂຕີຣໍ ມຫຄ຺ຄເຕ;

ປາກາ ກາມມຫາປາກາ, ເສສາ ຕີຣາ ຍຖາກ຺ກມໍ.

໒໐໘. ທສ຺ສນໍ ສວນໍ ທິຏ຺ຐໍ, ສຸຕໍ ຆາຍນກາທິກໍ;

ຕຍໍ ມຸຕໍ ມໂນຘາຕຸຕ຺ຕຍໍ ທິຏ຺ຐໍ ສຸຕໍ ມຸຕໍ.

໒໐໙. ທິຏ຺ຐໍ ສຸຕໍ ມຸຕໍ ຎາຕໍ, ສາຠິຎ຺ຎໍ ເສສກາມິກໍ;

ວິຎ຺ຎາຕາຣມ຺ມຓໍ ເສສເມວໍ ຉພ຺ພິຘມີຣເຍ.

໒໑໐. ສຕ຺ຕຘາ ສຕ຺ຕວິຎ຺ຎາຓຘາຕູນໍ ຕຸ ວສາ ຠເວ;

ວຸຈ຺ຈເຕທານິ ຕສ຺ເສວ, ອນນ຺ຕຣນຍກ຺ກໂມ.

໒໑໑. ປຸຎ຺ເຎສ຺ວາທິທ຺ວຍາ ກາເມ, ຣູປປຸຎ຺ຎມນນ຺ຕກໍ;

ຕປ຺ປາທກຸຕ຺ຕຣານນ຺ຕໍ, ຠວງ຺ຄຎ຺ຈາທິຕີຣຓໍ.

໒໑໒. ທຸຕິຍນ຺ຕທ຺ວຍາ ຕີຣໍ, ຠວງ຺ຄໍ ຕຕິຍທ຺ວຍາ;

ເຕ ອນນ຺ຕາມລໍ ປຸຎ຺ຎໍ, ມຊ຺ຌຕ຺ຕຎ຺ຈ ມຫຄ຺ຄຕໍ.

໒໑໓. ສພ຺ພວາເຣ ສຍຎ຺ເຈຕິ, ເຕປຎ຺ຎາສ ຕິສຕ຺ຕ ຈ;

ເຕຕ຺ຕິໍສ ຈ ຠວນ຺ເຕເຕ, ຣູເປສຸ ປນ ປຸຎ຺ຎໂຕ.

໒໑໔. ຕປ຺ປາກາ ຈ ມຕິຍຸຕ຺ຕ-ກາມປາກາ ສຍໍ ທສ;

ອາຣຸປ຺ປປຸຎ຺ຎໂຕ ເຕ ຈ, ສໂກ ປາໂກ ສຍໍ ປຸນ.

໒໑໕. ອໂຘປາກາ ຈ ອນ຺ຕມ຺ຫາ, ຕຕິຍຎ຺ຈ ຜລນ຺ຕິເມ;

ທເສກທ຺ວິຕິປຎ຺ຈາຫິ, ມຄ຺ຄາ ເຈກໍ ສກໍ ຜລໍ.

໒໑໖. ໂລຠມູເລກເຫຕູຫິ, ອນ຺ຕກາມສຸຠາ ວິຍ;

ສຕ຺ຕ ໂທສທ຺ວຍາ ກາມ-ຠວງ຺ຄເປກ຺ຂວາ ສຍໍ.

໒໑໗. ມຫາປາກຕິເຫຕູຫິ, ສາວຊ຺ຊາ ສພ຺ພສນ຺ຘິໂຍ;

ກາມຈ຺ຈຸຕີຫິ ເສສາຫິ, ສາວຊ຺ຊາ ກາມສນ຺ຘິໂຍ.

໒໑໘. ກາມຈ຺ຈຸຕິ ຈ ໂວຏ຺ຐພ຺ພໍ, ສຍຎ຺ຈ ສຸຂຕີຣໂຕ;

ປຏິຈ຺ຉາ ຕີຣຓານິ ທ຺ເວ, ອິຕຣາ ສກຕີຣຓໍ.

໒໑໙. ສກໍ ສກໍ ປຏິຈ຺ຉໍ ຕຸ, ວິຎ຺ຎາເຓຫິ ທ຺ວິປຎ຺ຈຫິ;

ຣູປປາເກຫິ ສາວຊ຺ຊາ, ສນ຺ຘິໂຍເຫຕຸວຊ຺ຊິຕາ.

໒໒໐. ອຣູປປາເກສ຺ວາທິມ຺ຫາ, ກາມປາກາ ຕິເຫຕຸກາ;

ອນ຺ຕາວຊ຺ຊມ຺ປິ ຈາຣຸປ຺ປ-ປາກາ ຈ ນວ ໂຫນ຺ຕິເມ.

໒໒໑. ທຸຕິຍາທີຫິ ເຕເຍວ, ອໂຘປາກໍ ວິນາ ວິນາ;

ຜລາ ຕິເຫຕຸກາ ປາກາ, ສຍຎ຺ເຈຕິ ຈຕຸທ຺ທສ.

໒໒໒. ທ຺ວິປຎ຺ຈາທິກ຺ຣິຍາ ຫາສາ, ສຍຎ຺ຈາຣຸປ຺ປວຊ຺ຊິຕາ;

ຎາຓຍຸຕ຺ຕຠວງ຺ຄາຕິ, ທສ ໂວຏ຺ຐພ຺ພໂຕ ປນ.

໒໒໓. ກາເມ ຊວາ ຠວງ຺ຄາ ຈ, ກາມຣູເປ ສຍມ຺ປິ ວາ;

ນວປຎ຺ຈ ສເຫຕາທິ-ກິຣິຍທ຺ວຍໂຕ ປນ.

໒໒໔. ສຍໍ ຠວງ຺ຄມຕິມາ, ຣູເປ ສາຕກ຺ຣິຍາປິ ຈ;

ຕປ຺ປາທກນ຺ຕິມຎ຺ເຈຕິ, ພາວີສ ຕຕິຍາ ປນ.

໒໒໕. ເຕ ຈ ປາກາ ສຍຎ຺ຈນ຺ເຕ, ຜລໍ ມຊ຺ຌາ ມຫຄ຺ຄຕາ;

ກ຺ຣິຍາຕິ ວີສຕິ ໂຫນ຺ຕິ, ເສສທ຺ວີຫິ ທຸເກຫິ ຕຸ.

໒໒໖. ວຸຕ຺ຕປາກາ ສຍຎ຺ເຈຕິ, ຈຸທ຺ທເສວໍ ກ຺ຣິຍາຊວາ;

ຕທາຣມ຺ມຓໍ ມຸຎ຺ຈິຕ຺ວາ, ປຏ຺ຐານນຍໂຕ ນເຍ.

໒໒໗. ອຖ ສາຕກ຺ຣິຍາ ສາຕໍ, ເສສໍ ເສສກ຺ຣິຍາປິ ຈ;

ຕທາລມ຺ພໍ ຍຖາໂຍຄໍ, ວເທ ອຏ຺ຐກຖານຍາ.

໒໒໘. ມຫຄ຺ຄຕາ ກ຺ຣິຍາ ສພ຺ພາ, ສກປຸຎ຺ຎສມາ ຕຫິໍ;

ອນ຺ຕາ ຜລນ຺ຕິມໍ ໂຫຕິ, ອຍເມວ ວິເສສຕາ.

໒໒໙. ອິມສ຺ສານນ຺ຕຣາ ຘມ຺ມາ, ເອຕ຺ຕກາຕິ ປກາສິຕາ;

ອິມໍ ປເນຕ຺ຕເກຫີຕິ, ວຸຈ຺ຈເຕຍໍ ນໂຍຘຸນາ.

໒໓໐. ທ຺ວີຫິ ກາມຊວາ ຕີຫິ, ຣູປາຣູປາ ຈຕູຫິ ຕຸ;

ມຄ຺ຄາ ຉຫິ ຜລາທິ ທ຺ເວ, ເສສາ ທ຺ເວ ປນ ສຕ຺ຕຫິ.

໒໓໑. ເອກມ຺ຫາ ທສ ປຎ຺ຈຫິ, ປຏິຈ຺ຉາ ສຸຂຕີຣຓໍ;

ກາເມ ໂທສກ຺ຣິຍາຫີນ-ຊເວຫິ ຄຫໂຕ ສກາ.

໒໓໒. ກາເມ ຊວາ ກ຺ຣິຍາຫີນາ, ຕທາລມ຺ພາ ສໂວຏ຺ຐພ຺ພາ;

ສຄຫຎ຺ເຈຕິ ເຕຕ຺ຕິໍສຈິຕ຺ເຕຫິ ປຣຕີຣຓາ.

໒໓໓. ກາມປຸຎ຺ຎສຸຂີຕີຣກຓ຺ຫໂວຏ຺ຐພ຺ພໂຕ ທ຺ວຍໍ;

ມຫາປາກນ຺ຕິມໍ ໂຫຕິ, ອນາຣຸປ຺ປຈຸຕີຫິ ຈ.

໒໓໔. ສຕ຺ຕຕິໍສ ປເນຕານິ, ເອຕ຺ຖ ຫິຕ຺ວາ ທຸສທ຺ວຍໍ;

ເອເຕຫິ ປຎ຺ຈຕິໍເສຫິ, ຊາຍເຕ ທຸຕິຍທ຺ວຍໍ.

໒໓໕. ສຸຂຕີຣາທິ ສຕ຺ເຕເຕ, ກ຺ຣິຍໂຕ ຈາປິ ສມ຺ຠວາ;

ເຎຍ຺ຍາ ເສສານິ ຈຕ຺ຕາຣິ, ຠວງ຺ເຄນ ຈ ລພ຺ຠເຣ.

໒໓໖. ມຄ຺ຄວຊ຺ຊາ ສໂວຏ຺ຐພ຺ພສຸຂິຕີຣຊວາຂິລາ;

ຈຸຕີຕິ ນວກຏ຺ຐາຫິ, ຕຕິຍທ຺ວຍມາທິເສ.

໒໓໗. ເອເຕຫິ ໂທສວຊ຺ເຊຫິ, ສຕ຺ຕຕີຫິຕຣທ຺ວຍໍ;

ຣູປປາກາ ວິນາຣຸປ຺ປປາກາເຫຕຸທຸເຫຕຸເກ.

໒໓໘. ເຕເຫເວກູນສຏ຺ຐີຫິ, ໂຫນ຺ຕິຣຸປ຺ປາທິກໍ ວິນາ;

ຫາສາວຊ຺ເຊ ຊເວ ຣູເປ, ອຏ຺ຐຉກ຺ເກຫິ ເຕຫິ ຕຸ.

໒໓໙. ສາໂຘປາເກຫິ ເຕເຫວ, ທຸຕິຍາທີນິ ອຕ຺ຕນາ;

ອໂຘໂຘຊວຫີເນຫິ, ເອເກກູເນຫິ ຊາຍເຣ.

໒໔໐. ສຸຂຕີຣຠວງ຺ຄານິ, ສຍຎ຺ຈາຕິ ຕິສຕ຺ຕຫິ;

ອນ຺ຕາວຊ຺ຊໍ ອນາຣຸປ຺ປຠວງ຺ເຄຫິ ປເນຕຣໍ.

໒໔໑. ວຸຕ຺ຕານນ຺ຕຣສງ຺ຂາໂຕ, ນໂຍ ທານິ ອເນກຘາ;

ປຸຄ຺ຄລາທິປ຺ປເຠທາປິ, ປວຕ຺ຕິ ຕສ຺ສ ວຸຈ຺ຈເຕ.

໒໔໒. ປຸຖຸຊ຺ຊນສ຺ສ ຊາຍນ຺ເຕ, ທິຏ຺ຐິກງ຺ຂາຍຸຕານິ ເວ;

ເສກ຺ຂສ຺ເສວາມລາ ສຕ຺ຕ, ອນນ຺ຕານິຕຣສ຺ສ ຕຸ.

໒໔໓. ອນ຺ຕາມລໍ ອນາວຊ຺ຊກ຺ຣິຍາ ເຈກູນວີສຕິ;

ກຸສລາກຸສລາ ເສສາ, ໂຫນ຺ຕິ ເສກ຺ຂປຸຖຸຊ຺ຊເນ.

໒໔໔. ອິຕຣານິ ປນາວຊ຺ຊທ຺ວຍໍ ປາກາ ຈ ສາສວາ;

ຕິຓ຺ຓນ຺ນມ຺ປິ ສິຍຸໍ ເອວໍ, ປຎ຺ຈຘາ ສຕ຺ຕເຠທໂຕ.

໒໔໕. ກາເມ ໂສຬສ ຆານາທິຕ຺ຕຍໍ ໂທສມຫາຜລາ;

ຣູປາຣູເປ ສປາໂກຕິ, ປຎ຺ຈວີສຕິ ເອກຊາ.

໒໔໖. ກາມປາກາ ຈ ເສສາທິມຄ຺ໂຄ ອາທິກ຺ຣິຍາ ທຸເວ;

ຣູເປ ຊວາຕິ ພາວີສ, ທ຺ວິຊາ ເສສາ ຕິຘາຕຸຊາ.

໒໔໗. ວິຕ຺ຖາໂຣປິ ຈ ຠູມີສຸ, ເຎຍ຺ໂຍ ກາມສຸຠາສຸຠໍ;

ຫາສວຊ຺ຊມເຫຕຸຎ຺ຈ, ອປາເຍ ສຕ຺ຕຕິໍສິເມ.

໒໔໘. ຫິຕ຺ວາ ມຫຄ຺ຄເຕ ປາເກ, ອສີຕິ ເສສກາມິສຸ;

ຈກ຺ຂຸໂສຕມໂນຘາຕຸ, ຕີຣຓໍ ໂວຏ຺ຐພ຺ພມ຺ປິ ຈ.

໒໔໙. ໂທສຫີນຊວາ ໂສ ໂສ, ປາໂກ ຣູເປ ອນາຣິເຍ;

ປຎ຺ຈສຏ຺ຐິ ຉສຏ຺ຐີ ຕຸ, ປຣິຕ຺ຕາຠາທີສຸ ຕີສຸ.

໒໕໐. ອາທິປຎ຺ຈາມລາ ກງ຺ຂາທິຏ຺ຐິຍຸຕ຺ເຕ ວິນາ ຕຫິໍ;

ເຕເຍວ ປຎ຺ຈປຎ຺ຎາສ, ຊາຍເຣ ສຸທ຺ຘຠູມິສຸ.

໒໕໑. ອາທິມຄ຺ຄທຸສາຫາສຣູປຫີນຊວາ ສໂກ;

ປາໂກ ໂວຏ຺ຐພ຺ພນຎ຺ຈາຕິ, ຕິຕາລີສໍ ສິຍຸໍ ນເຠ.

໒໕໒. ອໂຘໂຘມນວຊ຺ຊາ ເຕ,

ປາໂກ ເຈວ ສໂກ ສໂກ;

ທຸຕິຍາທີສຸ ຊາຍນ຺ເຕ,

ທ຺ເວ ທ຺ເວ ອູນາ ຕໂຕ ຕໂຕ.

໒໕໓. ອຣູເປສ຺ເວກເມກສ຺ມິໍ, ຣູເປສ຺ວາທິຕ຺ຕິເກປິ ຈ;

ຕິເກ ຈ ຕຕິເຍ ເອກໍ, ທ຺ເວ ໂຫນ຺ຕິ ທຸຕິຍຕ຺ຕິເກ.

໒໕໔. ອນ຺ຕິມໍ ຣູປປາກໍ ຕຸ, ຉສຸ ເວຫປ຺ຜລາທິສຸ;

ກາມສຸຄຕິຍໍເຍວ, ມຫາປາກາ ປວຕ຺ຕເຣ.

໒໕໕. ຆາຍນາທິຕ຺ຕຍໍ ກາເມ, ປຏິຆທ຺ວຍເມວ ຈ;

ສຕ຺ຕຣເສສຸ ປຐມໍ, ອມລໍ ມານວາທິສຸ.

໒໕໖. ອຣິຍາປາຍວຊ຺ເຊສຸ, ຈຕຸໂຣທິປ຺ຜລາທິກາ;

ອປາຍາຣຸປ຺ປວຊ຺ເຊສຸ, ຫາສຣູປສຸຠກ຺ຣິຍໍ.

໒໕໗. ອປາຍຸທ຺ຘຕ຺ຕຍໍ ຫິຕ຺ວາ, ໂຫຕາກາສສຸຠກ຺ຣິຍໍ;

ຕຖາປາຍຸທ຺ຘທ຺ເວ ຫິຕ຺ວາ, ວິຎ຺ຎາຓກຸສລກ຺ຣິຍໍ.

໒໕໘. ຠວຄ຺ຄາປາຍວຊ຺ເຊສຸ, ອາກິຎ຺ຈຎ຺ຎສຸຠກ຺ຣິຍໍ;

ທິຏ຺ຐິກງ຺ຂາຍຸຕາ ສຸທ຺ເຘ, ວິນາ ສພ຺ພາສຸ ຠູມິສຸ.

໒໕໙. ອມລານິ ຈ ຕີຓນ຺ເຕ,

ຠວຄ຺ເຄ ຈ ສຸຠກ຺ຣິຍາ;

ມຫາກ຺ຣິຍາ ຈ ໂຫນ຺ເຕເຕ,

ເຕຣເສວານປາຍິສຸ.

໒໖໐. ອນາຣຸປ຺ເປ ມໂນຘາຕຸ, ທສ຺ສນໍ ສວຕີຣຓໍ;

ກາເມ ອນິຏ຺ຐສໍໂຍເຄ, ພ຺ຣຫ຺ມານໍ ປາປຊໍ ຜລໍ.

໒໖໑. ໂວຏ຺ຐພ຺ພໍ ກາມປຸຎ຺ຎຎ຺ຈ, ທິຏ຺ຐິຫີນໍ ສອຸທ຺ຘວໍ;

ຈຸທ຺ທເສຕານິ ຈິຕ຺ຕານິ, ຊາຍເຣ ຕິໍສຠູມິສຸ.

໒໖໒. ອິນ຺ທ຺ຣິຍານິ ທຸເວ ອນ຺ຕທ຺ວຍວຊ຺ເຊສ຺ວເຫຕຸສຸ;

ຕີຓິ ກງ຺ເຂຕຣາເຫຕຸປາເປ ຈຕ຺ຕາຣິ ເຕຣສ.

໒໖໓. ຉ ຎາຓຫີເນ ຕພ຺ພນ຺ຕສາສເວ ສຕ຺ຕ ນິມ຺ມເລ;

ຈຕ຺ຕາລີເສ ປນຏ຺ເຐວໍ, ເຎຍ຺ຍມິນ຺ທ຺ຣິຍເຠທໂຕ.