໕. ປຎ຺ຈໂມ ປຣິຈ຺ເຉໂທ

ນິພ຺ພານປຎ຺ຎຕ຺ຕິປຣິທີປໂນ

໓໐໔. ຣາຄາທີນໍ ຂຍໍ ວຸຕ຺ຕໍ, ນິພ຺ພານໍ ສນ຺ຕິລກ຺ຂຓໍ;

ສໍສາຣທຸກ຺ຂສນ຺ຕາປຕຕ຺ຕສ຺ສາລໍ ສເມຕເວ.

໓໐໕. ຂຍມຕ຺ຕໍ ນ ນິພ຺ພານໍ, ສຄມ຺ຠີຣາທິວາຈໂຕ;

ອຠາວສ຺ສ ຫິ ກຸມ຺ມານໍ, ໂລມສ຺ເສວ ນ ວາຈຕາ.

໓໐໖. ຂໂຍຕິ ວຸຈ຺ຈເຕ ມຄ຺ໂຄ, ຕປ຺ປາປຕ຺ຕາ ອິທໍ ຂຍໍ;

ອຣຫຕ຺ຕໍ ວິຍຸປ຺ປາທ-ວຍາຠາວາ ຘຸວຎ຺ຈ ຕໍ.

໓໐໗. ສງ຺ຂຕໍ ສມ຺ມຸຕິຎ຺ຈາປິ, ຎາຓມາລມ຺ພ ເນວ ຫິ;

ຉິນ຺ເທ ມເລ ຕໂຕ ວຕ຺ຖຸ, ອິຈ຺ຉິຕພ຺ພມສງ຺ຂຕໍ.

໓໐໘. ປຕ຺ຕຸກາເມນ ຕໍ ສນ຺ຕິໍ, ຉພ຺ພິສຸທ຺ຘິໍ ສມາທິຍ;

ຎາຓທສ຺ສນສຸທ຺ຘີ ຕຸ, ສາເຘຕພ຺ພາ ຫິຕຕ຺ຖິນາ.

໓໐໙. ເຈຕນາທິວິຘາ ສີລ-ສຸທ຺ຘິ ຕຕ຺ຖ ຈຕຸພ຺ພິຘາ;

ໂສປຈາຣສມາຘີ ຕຸ, ຈິຕ຺ຕສຸທ຺ຘີຕິ ວຸຈ຺ຈເຕ.

໓໑໐. ສມ຺ປາເທຕ຺ວາທິທ຺ເວສຸທ຺ຘິໍ, ນມນາ ນາມໍ ຕຸ ຣຸປ຺ປ-

ໂຕ ຣູປໍ ນຕ຺ຖິ ອຕ຺ຕາທິວຕ຺ຖູຕິ ຈ ວວຕ຺ຖເປ.

໓໑໑. ມຓິນ຺ຘນາຕເປ ອຄ຺ຄິ, ອສນ຺ໂຕປິ ສມາຄເມ;

ຍຖາ ໂຫຕິ ຕຖາ ຈິຕ຺ຕໍ, ວຕ຺ຖາລມ຺ພາທິສງ຺ຄເມ.

໓໑໒. ປງ຺ຄຸລນ຺ຘາ ຍຖາ ຄນ຺ຕຸໍ, ປຈ຺ເຈກມສມຕ຺ຖກາ;

ຍນ຺ຕິ ຍຸຕ຺ຕາ ຍຖາ ເອວໍ, ນາມຣູປວ຺ຫຍາ ກ຺ຣິຍາ.

໓໑໓. ນ ນາມຣູປໂຕ ອຎ຺ໂຎ, ອຕ຺ຕາທິ ອິຕິ ທສ຺ສນໍ;

ໂສຘນຕ຺ຕາ ຫິ ທຸທ຺ທິຏ຺ຐິໍ, ທິຏ຺ຐິສຸທ຺ຘີຕິ ວຸຈ຺ຈຕິ.

໓໑໔. ອວິຊ຺ຊາຕຓ຺ຫຸປາທານ-ກມ຺ເມນາທິມ຺ຫິ ຕໍ ທ຺ວຍໍ;

ຣູປໍ ກມ຺ມາທິໂຕ ນາມໍ, ວຕ຺ຖາທີຫິ ປວຕ຺ຕິຍໍ.

໓໑໕. ສທາ ສພ຺ພຕ຺ຖ ສພ຺ເພສໍ, ສທິສໍ ນ ຍໂຕ ຕໂຕ;

ນາເຫຕຸນາຎ຺ໂຎ ອຕ຺ຕາທິນິຈ຺ຈເຫຕູຕິ ປສ຺ສຕິ.

໓໑໖. ເອວໍ ຕີຣຍເຕ ກງ຺ຂາ, ຍາຍ ປຎ຺ຎາຍ ປຈ຺ຈເຍ;

ທິຏ຺ຐຕ຺ຕາ ສຸທ຺ຘິ ສາ ກງ຺ຂາຕຣຓໍ ອິຕິ ວຸຈ຺ຈຕິ.

໓໑໗. ປຕ຺ຕຎ຺ຎາຕປຣິຎ຺ໂຎ ໂສ, ອຕ຺ຣຏ຺ໂຐ ຍຕເຕຍຕິ;

ຕີຣຓວ຺ຫປຣິຎ຺ຎາຍ, ວິສຸທ຺ຘຕ຺ຖໍ ສທາທໂຣ.

໓໑໘. ຕິກາລາທິວສາ ຂນ຺ເຘ, ສມາເສຕ຺ວາ ກລາປໂຕ;

ອນິຈ຺ຈາ ທຸກ຺ຂານຕ຺ຕາຕິ, ອາໂທ ເອວໍ ວິປສ຺ສຕິ.

໓໑໙. ຂນ຺ຘານິຈ຺ຈາ ຂຍຏ຺ເຐນ, ຠຍຏ຺ເຐນ ທຸຂາວ ເຕ;

ອນຕ຺ຕາສາຣກຏ຺ເຐນ, ອິຕິ ປສ຺ເສ ປຸນປ຺ປຸນໍ.

໓໒໐. ອາກາເຣຫິ ອນິຈ຺ຈາທິຈຕ຺ຕາລີເສຫິ ສມ຺ມເສ;

ລກ຺ຂຓານໍ ວິຠູຕຕ຺ຖໍ, ຂນ຺ຘານໍ ປນ ສພ຺ພໂສ.

໓໒໑. ເອວຎ຺ຈາປິ ອສິຊ຺ຌນ຺ເຕ, ນວຘາ ນິສິຕິນ຺ທ຺ຣິໂຍ;

ສຕ຺ຕກທ຺ວຍໂຕ ສມ຺ມາ, ຣູປາຣູເປ ວິປສ຺ສເຍ.

໓໒໒. ຣູປມາທານນິກ຺ເຂປາ, ວໂຍວຸທ຺ຘຕ຺ຕຄາມິໂຕ;

ສມ຺ມເສວນ຺ນຊາທີຫິ, ຘມ຺ມຕາຣູປໂຕປິ ຈ.

໓໒໓. ນາມໍ ກລາປຍມໂຕ, ຂຓໂຕ ກມໂຕປິ ຈ;

ທິຏ຺ຐິມານນິກນ຺ຕີນໍ, ປສ຺ເສ ອຸຄ຺ຆາຏນາທິໂຕ.

໓໒໔. ອວິຊ຺ຊາຕຓ຺ຫາກມ຺ມນ຺ນ-ເຫຕຸໂຕ ຣູປໍ ອຸພ຺ຠເວ;

ວິນາຫາຣໍ ສຜສ຺ເສຫິ, ເວທນາທິຕ຺ຕຍໍ ຠເວ.

໓໒໕. ເຕຫິເຍວ ວິນາ ຜສ຺ສໍ,

ນາມຣູປາຘິເກຫິ ຕຸ;

ຈິຕ຺ຕໍ ເຫຕຸກ຺ຂຍາ ໂສ ໂສ,

ເວຕິ ເວ ຕສ຺ສ ຕສ຺ສ ຕຸ.

໓໒໖. ເຫຕຸໂຕທຍນາເສວໍ, ຂໂຓທຍວເຍນປິ;

ອິຕິ ປຎ຺ຎາສາກາເຣຫິ, ປສ຺ເສ ປຸນູທຍພ຺ພຍໍ.

໓໒໗. ໂຍຄິສ຺ເສວໍ ສມາຣທ຺ຘອຸທຍພ຺ພຍທສ຺ສິໂນ;

ປາຕຸໂຠນ຺ຕິ ອຸປກ຺ເລສາ, ສຠາວາ ເຫຕຸໂຕປິ ຈ.

໓໒໘. ເຕ ໂອຠາສມຕຸສ຺ສາຫປສ຺ສທ຺ຘິສຸຂຸເປກ຺ຂນາ;

ສຕິ ປີຕາຘິໂມກ຺ໂຂ ຈ, ນິກນ຺ຕິ ຈ ທສີຣິຕາ.

໓໒໙. ຕຓ຺ຫາທິຏ຺ຐຸນ຺ນຕິຄ຺ຄາຫວຕ຺ຖຸໂຕ ຕິໍສຘາ ເຕ ຈ;

ຕທຸປ຺ປນ຺ເນ ຈເລ ພາໂລ, ອມຄ຺ເຄ ມຄ຺ຄທສ຺ສໂກ.

໓໓໐. ວິປສ຺ສນາ ປໂຖກ຺ກນ຺ຕາ, ຕທາສິ ມຕິມາຘຸນາ;

ນ ມຄ຺ໂຄ ຄາຫວຕ຺ຖຸຕ຺ຕາ, ເຕສໍ ອິຕິ ວິປສ຺ສຕິ.

໓໓໑. ອຸປກ຺ເລເສ ອນິຈ຺ຈາທິ-ວສເຄ ໂສທຍພ຺ພເຍ;

ປສ຺ສໂຕ ວີຖິໂນກ຺ກນ຺ຕທສ຺ສນໍ ວຸຈ຺ຈເຕ ປໂຖ.

໓໓໒. ມຄ຺ຄາມຄ຺ເຄ ວວຕ຺ເຖຕ຺ວາ, ຍາ ປຎ຺ຎາ ເອວມຸຏ຺ຐິຕາ;

ມຄ຺ຄາມຄ຺ຄິກ຺ຂສງ຺ຂາຕາ, ສຸທ຺ຘິ ສາ ປຎ຺ຈມີ ຠເວ.

໓໓໓. ປຫານວ຺ຫປຣິຎ຺ຎາຍ, ອາທິໂຕ ສຸທ຺ຘິສິທ຺ຘິຍາ;

ຕີຣຓວ຺ຫປຣິຎ຺ຎາຍ, ອນ຺ຕໂຄ ຍຕເຕຘຸນາ.

໓໓໔. ຊາຍເຕ ນວຎາຓີ ສາ, ວິສຸທ຺ຘິ ກມໂຕທຍ-

ພ຺ພຍາທີ ຆຏມານສ຺ສ, ນວ ໂຫນ຺ຕິ ປເນຕ຺ຖ ຫິ.

໓໓໕. ສນ຺ຕຕີຣິຍໂຕ ເຈວ, ຆເນນາປິ ຈ ຉນ຺ນໂຕ;

ລກ຺ຂຓານິ ນ ຂາຍນ຺ເຕ, ສໍກິລິຏ຺ຐາ ວິປສ຺ສນາ.

໓໓໖. ຕໂຕຕ຺ຣ ສມ຺ມເສ ຠິຍ຺ໂຍ, ປຸນເທວຸທຍພ຺ພຍໍ;

ເຕນານິຈ຺ຈາທິສມ຺ປສ຺ສໍ, ປຏຸຕໍ ປຣມໍ ວເຊ.

໓໓໗. ອາວຏ຺ເຏຕ຺ວາ ຍທຸປ຺ປາທຏ຺ຐິຕິອາທີຫິ ປສ຺ສໂຕ;

ຠງ຺ເຄວ ຕິຏ຺ຐເຕ ຎາຓໍ, ຕທາ ຠງ຺ຄມຕີ ສິຍາ.

໓໓໘. ເອວໍ ປສ຺ສຍໂຕ ຠງ຺ຄໍ, ຕິຠໂວ ຂາຍເຕ ຍທາ;

ສີຫາທິວ ຠຍໍ ຫຸຕ຺ວາ, ສິຍາ ລທ຺ຘາ ຠຍິກ຺ຂຓາ.

໓໓໙. ສາທີນວາ ປຕິຏ຺ຐນ຺ເຕ, ຂນ຺ຘາທິຕ຺ຕຆຣໍ ວິຍ;

ຍທາ ຕທາ ສິຍາ ລທ຺ຘາ, ອາທີນວານຸປສ຺ສນາ.

໓໔໐. ສງ຺ຂາຣາທີນວໍ ທິສ຺ວາ, ຣມເຕ ນ ຠວາທິສຸ;

ມຕິ ຍທາ ຕທາ ລທ຺ຘາ, ສິຍາ ນິພ຺ພິທປສ຺ສນາ.

໓໔໑. ຎາຓໍ ມຸຈ຺ຈິຕຸກາມໍ ເຕ, ສພ຺ພຠູສງ຺ຂເຕ ຍທາ;

ຊາລາທີຫິ ຈ ມຈ຺ຉາທີ, ຕທາ ລທ຺ຘາ ຈຊ຺ຊມຕິ.

໓໔໒. ສງ຺ຂາເຣ ອສຸຠານິຈ຺ຈທຸກ຺ຂໂຕນຕ຺ຕໂຕ ມຕິ;

ປສ຺ສນ຺ຕີ ຈຕ຺ຕຸມຸສ຺ສຸກ຺ກາ, ປຏິສງ຺ຂານຸປສ຺ສນາ.

໓໔໓. ວຸຕ຺ຕາຕ຺ຣ ປຏຸຠາວາຍ, ສພ຺ພຎາຓປວຕ຺ຕິຍາ;

ມີນສຎ຺ຎາຍ ສປ຺ປສ຺ສ, ຄາຫລຸທ຺ທສໂມປມາ.

໓໔໔. ອຕ຺ຕຕ຺ຕນິຍໂຕ ສຸຎ຺ຎໍ, ທ຺ວິຘາ ‘‘ນາຫໍ ກ຺ວຈາ’’ທິນາ;

ຈຕຸຘາ ຉພ຺ພິຘາ ຈາປິ, ພຫຸຘາ ປສ຺ສໂຕ ຠຸສໍ.

໓໔໕. ອາວຏ຺ຏຕິຄ຺ຄິມາສຊ຺ຊ,

ນ຺ຫາຣູວ ມຕິ ສງ຺ຂຕໍ;

ຈຕ຺ຕຠຣິໂຍ ຍຖາ ໂທເສ,

ຕຖາ ຕໍ ສມຸເປກ຺ຂເຕ.

໓໔໖. ຕາວ ສາທີນວານມ຺ປິ, ລກ຺ຂເຓ ຕິຏ຺ຐເຕ ມຕິ;

ນ ປສ຺ເສ ຍາວ ສາ ຕີຣໍ, ສາມຸທ຺ທສກຸຓີ ຍຖາ.

໓໔໗. ສງ຺ຂາຣຸເປກ຺ຂາຎາຓາຍໍ, ສິຂາປຕ຺ຕາ ວິປສ຺ສນາ;

ວຸຏ຺ຐານຄາມິນີຕິ ຈ, ສານຸໂລມາຕິ ວຸຈ຺ຈຕິ.

໓໔໘. ປຕ຺ວາ ໂມກ຺ຂມຸຂໍ ສຕ຺ຕ, ສາເຘຕິຣິຍປຸຄ຺ຄເລ;

ຌານງ຺ຄາທິປ຺ປເຠເທ ຈ, ປາທກາທິວເສນ ສາ.

໓໔໙. ອນິຈ຺ຈໂຕ ຫິ ວຸຏ຺ຐານໍ, ຍທິ ຍສ຺ສາສິ ໂຍຄິໂນ;

ໂສຘິໂມກ຺ຂສ຺ສ ພາຫຸລ຺ລາ, ຕິກ຺ຂສທ຺ຘິນ຺ທ຺ຣິໂຍ ຠເວ.

໓໕໐. ທຸກ຺ຂໂຕນຕ຺ຕໂຕ ຕຎ຺ເຈ, ສິຍາ ໂຫນ຺ຕິ ກເມນ ເຕ;

ປສ຺ສທ຺ຘິເວທພາຫຸລ຺ລາ, ຕິກ຺ເຂກຄ຺ຄມຕິນ຺ທ຺ຣິຍາ.

໓໕໑. ປຎ຺ຎາຘຸຣຕ຺ຕມຸທ຺ທິຏ຺ຐໍ, ວຸຏ຺ຐານໍ ຍທິນຕ຺ຕໂຕ;

ສທ຺ຘາຘຸຣຕ຺ຕໍ ເສເສຫິ, ຕໍ ວິຍາຠິນິເວສໂຕ.

໓໕໒. ທ຺ເວ ຕິກ຺ຂສທ຺ຘສມຖາ, ສິຍຸໍ ສທ຺ຘານຸສາຣິໂນ;

ອາໂທ ມຊ຺ເຌສຸ ຐາເນສຸ, ຉສຸ ສທ຺ຘາວິມຸຕ຺ຕກາ.

໓໕໓. ອິຕໂຣ ຘມ຺ມານຸສາຣີໂທ, ທິຏ຺ຐິປ຺ປຕ຺ໂຕ ອນນ຺ຕເກ;

ປຎ຺ຎາມຸຕ຺ໂຕຠຍຕ຺ຖນ຺ເຕ, ອຌານິຌານິກາ ຈ ເຕ.

໓໕໔. ຕິກ຺ຂສທ຺ຘສ຺ສ ຈນ຺ເຕປິ, ສທ຺ຘາມຸຕ຺ຕຕ຺ຕມີຣິຕໍ;

ວິສຸທ຺ຘິມຄ຺ເຄ ມຊ຺ຌສ຺ສ, ກາຍສກ຺ຂິຕ຺ຕມຏ຺ຐສຸ.

໓໕໕. ວຸຕ຺ຕໍ ໂມກ຺ຂກຖາຍໍ ຍໍ, ຕິກ຺ຂປຎ຺ຎາຣຫສ຺ສ ຕຸ;

ທິຏ຺ຐິປຕ຺ຕຕ຺ຕໍ ເຫຕຎ຺ຈ, ຕຎ຺ຈ ນຕ຺ຖາຠິຘມ຺ມິເກ.

໓໕໖. ເຕ ສພ຺ເພ ອຏ຺ຐໂມກ຺ຂານໍ, ລາຠີ ເຈ ຉສຸ ມຊ຺ຌສຸ;

ກາຍສກ຺ຂີ ສິຍຸໍ ອນ຺ເຕ, ອຸຠໂຕຠາຄມຸຕ຺ຕກາ.

໓໕໗. ອນຸໂລມານິ ຈຕ຺ຕາຣິ, ຕີຓິ ທ຺ເວ ວາ ຠວນ຺ຕິ ຫິ;

ມຄ຺ຄສ຺ສ ວີຖິຍໍ ມນ຺ທມຊ຺ຌຕິກ຺ຂມຕິພ຺ພສາ.

໓໕໘. ວິສຸທ຺ຘິມຄ຺ເຄ ຈຕ຺ຕາຣິ, ປຏິສິທ຺ຘານິ ສພ຺ພຖາ;

ເອວມຏ຺ຐສາລິນິຍາ, ວຸຕ຺ຕຕ຺ຕາ ເອວມີຣິຕໍ.

໓໕໙. ຠວງ຺ຄາສນ຺ນໂທໂສປິ, ນປ຺ປນາຍ ຖິຣຕ຺ຕໂຕ;

ສຸທ຺ຘິໍ ປຏິປທາຎາຓທສ຺ສເນວໍ ລເຠ ຍຕິ.

໓໖໐. ອາວຊ຺ຊໍ ວິຍ ມຄ຺ຄສ຺ສ, ຉຏ຺ຐສຕ຺ຕມສຸທ຺ຘິນໍ;

ອນ຺ຕຣາ ສນ຺ຕິມາຣພ຺ຠ, ເຕຫິ ໂຄຕ຺ຣຠຸ ຊາຍເຕ.

໓໖໑. ສໍໂຍຊນຕ຺ຕຍຈ຺ເຉທີ, ມຄ຺ໂຄ ອຸປ຺ປຊ຺ຊເຕ ຕໂຕ;

ຜລານິ ເອກໍ ທ຺ເວ ຕີຓິ, ຕໂຕ ວຸຕ຺ຕມຕິກ຺ກມາ.

໓໖໒. ຕຖາ ຠາວຍໂຕ ໂຫຕິ, ຣາຄໂທສຕນູກຣໍ;

ທຸຕິໂຍ ຕປ຺ຜລໍ ຕມ຺ຫາ, ສກທາຄາມິ ຕປ຺ຜລີ.

໓໖໓. ເອວໍ ຠາວຍໂຕ ຣາຄໂທສນາສກຣຸພ຺ຠເວ;

ຕຕິໂຍ ຕປ຺ຜລໍ ຕມ຺ຫາ, ຕປ຺ຜລຏ຺ໂຐນາຄາມິໂກ.

໓໖໔. ເອວໍ ຠາວຍໂຕ ເສສໂທສນາສກຣຸພ຺ຠເວ;

ຈຕຸຕ຺ໂຖ ຕປ຺ຜລໍ ຕມ຺ຫາ, ອຣຫາ ຕປ຺ຜລຏ຺ຐໂກ.

໓໖໕. ກຕກິຈ຺ໂຈ ຠວຈ຺ເຉໂທ, ທກ຺ຂິເຓຍ຺ໂຍປຘິກ຺ຂຍາ;

ນິພ຺ພຸຕິໍ ຍາຕິ ທີໂປວ, ສພ຺ພທຸກ຺ຂນ຺ຕສຎ຺ຎິຕໍ.

໓໖໖. ເອວໍ ສິທ຺ຘາ ສິຍາ ສຸທ຺ຘິ, ຎາຓທສ຺ສນສຎ຺ຎິຕາ;

ວຸຕ຺ຕໍ ເອຕ຺ຕາວຕາ ສຈ຺ຈໍ, ປຣມຕ຺ຖໍ ສມາສໂຕ.

໓໖໗. ສຈ຺ຈໍ ສມ຺ມຸຕິ ສຕ຺ຕາທິອວຕ຺ຖຸ ວຸຈ຺ຈເຕ ຍໂຕ;

ນ ລພ຺ຠາລາຕຈກ຺ກໍວ, ຕໍ ຫິ ຣູປາທໂຍ ວິນາ.

໓໖໘. ເຕນ ເຕນ ປກາເຣນ, ຣູປາທິໍ ນ ວິຫາຍ ຕຸ;

ຕຖາ ຕຖາຠິຘານຎ຺ຈ, ຄາຫຎ຺ຈ ວຕ຺ຕເຕ ຕໂຕ.

໓໖໙. ລພ຺ຠເຕ ປຣິກປ຺ເປນ, ຍໂຕ ຕໍ ນ ມຸສາ ຕໂຕ;

ອວຸຕ຺ຕາລມ຺ພມິຈ຺ຈາຫຸ, ປຣິຕ຺ຕາທີສ຺ວວາຈໂຕ.

໓໗໐. ປາປກລ຺ຍາຓມິຕ຺ໂຕຍໍ, ສຕ຺ໂຕຕິ ຂນ຺ຘສນ຺ຕຕິ;

ເອກຕ຺ເຕນ ຄເຫຕ຺ວານ, ໂວຫຣນ຺ຕີຘ ປຓ຺ຑິຕາ.

໓໗໑. ປຖວາທິ ວິເຍໂກປິ, ປຸຄ຺ຄໂລ ນ ຍໂຕ ຕໂຕ;

ກຸທິຏ຺ຐິວຕ຺ຖຸຠາເວນ, ປຸຄ຺ຄລຄ຺ຄຫຓໍ ຠເວ.

໓໗໒. ເອຕໍ ວິສຍໂຕ ກຕ຺ວາ, ສງ຺ຂາທີຫິ ປເທຫິ ຕຸ;

ອວິຊ຺ຊມານປຎ຺ຎຕ຺ຕິ, ອິຕິ ຕຎ຺ຎູຫິ ຠາສິຕາ.

໓໗໓. ປຎ຺ຎຕ຺ຕິ ວິຊ຺ຊມານສ຺ສ, ຣູປາທິວິສຍຕ຺ຕໂຕ;

ກາຍໍ ປຎ຺ຎຕ຺ຕິ ເຈ ສຸຏ຺ຐຸ, ວທໂຕ ສຸຓ ສຈ຺ຈໂຕ.

໓໗໔. ສວິຎ຺ຎຕ຺ຕິວິກາໂຣ ຫິ, ສທ຺ໂທ ສຈ຺ຈທ຺ວຍສ຺ສ ຕຸ;

ປຎ຺ຎາປນຕ຺ຕາ ປຎ຺ຎຕ຺ຕິ, ອິຕິ ຕຎ຺ຎູຫິ ຠາສິຕາ.

໓໗໕. ປຈ຺ຈຸປ຺ປນ຺ນາທິອາລມ຺ພໍ, ນິຣຸຕ຺ຕິປຏິສມ຺ຠິທາ-

ຎາຓສ຺ສາຕິ ອິທຎ຺ເຈວໍ, ສຕິ ຍຸຊ຺ຊຕິ ນາຎ຺ຎຖາ.