໑໐. ປເຠທກຖາ

໓໕໒. ເອກຸປ຺ປາທາ ນິໂຣຘາ ຈ, ເອກາລມ຺ພຓວຕ຺ຖຸກາ;

ສຫຄຕາ ສຫຊາຕາ, ສໍສຏ຺ຐາ ສຫວຸຕ຺ຕິໂນ.

໓໕໓. ເຕປຎ຺ຎາສ ປນິຈ຺ເຈເຕ, ສມ຺ປຍຸຕ຺ຕາ ຍຖາຣຫໍ;

ຈິຕ຺ຕເຈຕສິກາ ຘມ຺ມາ, ອຏ຺ຐາຣສວິຘາປິ ຈ.

໓໕໔. ເອກຘາ ຉພ຺ພິຘາ ເຈວ, ຈຕຸຘາ ສຕ຺ຕຘາ ຐິຕາ;

ຈິຕ຺ຕຸປ຺ປາທປເຠເທນ, ຠິນ຺ທິຕພ຺ພາ ວິຠາວິນາ.

໓໕໕. ອຏ຺ຐ ຘມ຺ມາວິນິພ຺ໂຠຄາ, ຠິນ຺ນາສີຕິ ນວຸຕ຺ຕຣາ;

ສຕ຺ຕສຕໍ ທສ ທ຺ເວ ຈ, ສພ຺ເພ ໂຫນ຺ຕິ ສມິສ຺ສິຕາ.

໓໕໖. ສນ຺ຕີຣຓມໂນຘາຕຸ, ສິຕໂວຏ຺ຐພ຺ພນາ ຕຖາ;

ອປຸຎ຺ຎາ ກາມປຸຎ຺ຎາ ຈ, ມຫາປາກາ ມຫາກ຺ຣິຍາ.

໓໕໗. ປຐມຊ຺ຌານຘມ຺ມາ ຈ, ໂລກຸຕ຺ຕຣມຫຄ຺ຄຕາ;

ປຎ຺ຈປຎ຺ຎາສ ສພ຺ເພປິ, ວິຕກ຺ກາ ໂຫນ຺ຕິ ເຠທິຕາ.

໓໕໘. ວິຈາຣາປິ ຈ ເຕເຍວ, ທຸຕິຍຊ຺ຌານນາມກາ;

ເອກາທສາປເຣ ເຈຕິ, ຉສຏ຺ຐິ ປຣິທີປິຕາ.

໓໕໙. ອປຸຎ຺ຎາ ກາມປຸຎ຺ຎາ ຈ, ມຫາປາກາ ມຫາກ຺ຣິຍາ;

ຈຕຸກ຺ກາ ເຈວ ຈຕ຺ຕາໂຣ, ສິຕຎ຺ຈ ສຸຂຕີຣຓໍ.

໓໖໐. ປຐມາທິຕິກຊ຺ຌານາ, ໂລກຸຕ຺ຕຣມຫຄ຺ຄຕາ;

ອິຈ຺ເຈວເມກປຎ຺ຎາສ, ປີຕິໂຍ ໂຫນ຺ຕິ ສພ຺ພຖາ.

໓໖໑. ສິຕໂວຏ຺ຐພ຺ພນາ ທ຺ເວ ຈ, ສາວຊ຺ຊາ ຈານວຊ຺ຊກາ;

ຠິນ຺ນເມວໍ ຕຸ ວີຣິຍໍ, ເຕສຕ຺ຕຕິວິຘໍ ຠເວ.

໓໖໒. ສາວຊ຺ຊາ ຈານວຊ຺ຊາ ຈ, ໂມມູຫທ຺ວຍວຊ຺ຊິຕາ;

ຉນ຺ທາ ຠວນ຺ຕິ ສພ຺ເພປິ, ສຏ຺ຐິເຠທາ ນວຸຕ຺ຕຣາ.

໓໖໓. ສນ຺ຕີຣຓມໂນຘາຕຸ, ສິຕໂວຏ຺ຐພ຺ພນາ ຕຖາ;

ສາວຊ຺ຊາ ຈານວຊ຺ຊາ ຈ, ວິຈິກິຈ຺ຉາວິວຊ຺ຊິຕາ.

໓໖໔. ອຘິໂມກ຺ຂາ ປນິຈ຺ເຈວໍ, ອຏ຺ຐສຕ຺ຕຕິ ເຠທິຕາ;

ຕິສຕໍ ນວຸຕິ ທ຺ເວ ຈ, ຠິນ຺ນາ ໂຫນ຺ຕິ ປກິຓ຺ຓກາ.

໓໖໕. ເອກູນສຏ຺ຐິ ວາ ໂຫນ຺ຕິ, ສທ຺ຘາເທກູນວີສຕິ;

ສຫສ຺ສຎ຺ຈ ສຕຎ຺ເຈກໍ, ເອກວີສຎ຺ຈ ສພ຺ພຖາ.

໓໖໖. ຎາເຓນ ສມ຺ປຍຸຕ຺ຕາ ຈ, ກາເມ ທ຺ວາທສຘາປເຣ;

ປຎ຺ຈຕິໍສາຕິ ປຎ຺ຎາປິ, ສຕ຺ຕຕາລີສຘາ ກຖາ.

໓໖໗. ຣູປຊ຺ຌານຈຕຸກ຺ກາ ຈ, ກາມປຸຎ຺ຎາ ມຫາກ຺ຣິຍາ;

ອຏ຺ຐວີສປ຺ປມຎ຺ເຎວໍ, ຉປ຺ປຎ຺ຎາສ ຠວນ຺ຕິ ຈ.

໓໖໘. ອນຸຕ຺ຕຣາ ກາມປຸຎ຺ຎາ, ຕິສ຺ໂສ ວິຣຕິໂຍ ປນ;

ໂຫນ຺ຕິ ໂສຬສຘາ ຠິນ຺ນາ, ອຏ຺ຐຕາລີສ ປິຓ຺ຑິຕາ.

໓໖໙. ປຎ຺ຈວີສານວຊ຺ເຊວໍ, ສມ຺ປຍຸຕ຺ຕາ ຈຕຸພ຺ພິຘາ;

ສຫສ຺ສທ຺ວິສຕຎ຺ເຈວ, ທ຺ວິ ຈ ສຕ຺ຕຕິ ເຠທໂຕ.

໓໗໐. ຈຕ຺ຕາໂຣ ປາປສາມຎ຺ຎາ, ຠິນ຺ນາ ທ຺ວາທສຘາ ປນ;

ອຏ຺ຐຕາລີສຘາ ໂຫນ຺ຕິ, ເຕ ສພ຺ເພ ປຣິປິຓ຺ຑິຕາ.

໓໗໑. ໂລໂຠ ປນຏ຺ຐຘາ ຠິນ຺ໂນ, ຖິນມິທ຺ຘຎ຺ຈ ປຎ຺ຈຘາ;

ຈຕຸຘາ ທິຏ຺ຐິມາໂນ ຈ, ຈຕຸຘາ ທິຏ຺ຐິໂຍ ວິສຸໍ.

໓໗໒. ທ຺ວິຘາ ໂທສາທິຈຕ຺ຕາໂຣ, ວິຈິກິຈ຺ເຉກຘາຕິ ຈ;

ສາວຊ຺ຊາ ສຕ຺ຕຘາ ວຸຕ຺ຕາ, ຠິນ຺ນາສີຕິ ຕິກຸຕ຺ຕຣາ.

໓໗໓. ອິຈ຺ຈຏ຺ຐາຣສຘາ ວຸຕ຺ຕາ, ເຕປຎ຺ຎາສາປິ ເຠທໂຕ;

ທ຺ວິສຫສ຺ສຎ຺ຈ ຕຸ ສຕໍ, ຠວນ຺ເຕກູນສຏ຺ຐິ ຈ.

໓໗໔. ວິຕກ຺ກວິຈາຣປີຕິສຸໂຂເປກ຺ຂາສຸ ປຎ຺ຈສຸ;

ຠິນ຺ທິຕ຺ວາ ຌານເຠເທນ, ຄເຫຕພ຺ພາ ອນຸຕ຺ຕຣາ.

໓໗໕. ອຎ຺ຎຕ຺ຣ ປນ ສພ຺ພຕ຺ຖ, ນຕ຺ຖິ ເຠທປ຺ປໂຍຊນໍ;

ອຏ຺ເຐວ ກສ຺ມາ ຄຍ຺ຫນ຺ຕິ, ອເຠເທນາຕິ ລກ຺ຂເຍ.

໓໗໖. ປຐມາທິຈຕຸຊ຺ຌານາ, ໂລກຸຕ຺ຕຣມຫຄ຺ຄຕາ;

ອິຈ຺ເຈກເມກທສຘາ, ຈຕຸຕາລີສ ປິຓ຺ຑິຕາ.

໓໗໗. ເຕວີສ ປຎ຺ຈມາ ເຈຕິ, ສຕ຺ຕສຏ຺ຐິ ສມິສ຺ສິຕາ;

ອປ຺ປນາ ຕຕ຺ຖ ສພ຺ພາປິ, ອຏ຺ຐປຎ຺ຎາສ ທີປິຕາ.

໓໗໘. ປຎ຺ຈຕິໍເສວ ສງ຺ເຂປາ, ໂລກຸຕ຺ຕຣມຫຄ຺ຄຕາ;

ອປ຺ປນາ ຕຕ຺ຖ ສພ຺ພາປິ, ຉພ຺ພີສຕິ ປກາສິຕາ.

໓໗໙. ອິທ຺ຘິວິຘໍ ທິພ຺ພໂສຕໍ, ເຈໂຕປຣິຍນາມກາ;

ປຸພ຺ເພນິວາສານຸສ຺ສຕິ, ທິພ຺ພຈກ຺ຂູຕິ ປຎ຺ຈຘາ.

໓໘໐. ອຠິຎ຺ຎາຎາຓມີເຣນ຺ຕິ, ຣູປາວຈຣປຎ຺ຈມາ;

ກຸສລຎ຺ຈ ກ຺ຣິຍາ ເຈຕິ, ເຠທິຕໍ ທຸວິຘມ຺ປິ ຈ.

໓໘໑. ຕໍ ທ຺ວຍມ຺ປິ ສມ຺ມິສ຺ເສຕ຺ວາ, ປຎ຺ຈາຠິຎ຺ຎາ ຈ ໂລກິຍາ;

ອາສວກ຺ຂຍຎາຓຎ຺ຈ, ຉຬຠິຎ຺ຎາ ປວຸຈ຺ຈເຣ.

໓໘໒. ໂລກິຍາ ຈ ທສາຠິຎ຺ຎາ, ຠິນ຺ທິຕ຺ວາ ກຸສລກ຺ຣິຍາ;

ສຕ຺ຕສຕ຺ຕຕິ ຌານານິ, ອຏ຺ຐສຏ຺ຐິ ປນປ຺ປນາ.

໓໘໓. ສຕ຺ຕສຕ຺ຕຕິ ຈິຕ຺ຕານິ, ຈຕຸປຎ຺ຎາສ ສພ຺ພຖາ;

ປຈິຕານິ ຈ ຈິຕ຺ຕານິ, ເອກຕິໍສສຕໍ ສິຍຸນ຺ຕິ.

ອິຕິ ເຈຕສິກວິຠາເຄ ປເຠທກຖາ ນິຏ຺ຐິຕາ.

ທສໂມ ປຣິຈ຺ເຉໂທ.