ອຏ຺ຐໂມ ປຣິຈ຺ເຉໂທ

໒. ເຈຕສິກວິຠາໂຄ

໘. ເຈຕສິກສມ຺ປໂຍຄກຖາ

໒໘໖. ອິຕິ ຈິຕ຺ຕວິຘິໍ ຎຕ຺ວາ, ທ຺ເວປຎ຺ຎາສ ວິຠາວິນາ;

ເຎຍ຺ຍາ ເຈຕສິ ສມ຺ຠູຕາ, ຘມ຺ມາ ເຈຕສິກາ ກຖໍ.

໒໘໗. ຜສ຺ໂສ ຈ ເວທນາ ສຎ຺ຎາ, ເຈຕເນກຄ຺ຄຕາ ຕຖາ;

ຊີວິຕໍ ມນສິກາໂຣ, ສຕ຺ຕ ສາຘາຣຓາ ອິເມ.

໒໘໘. ວິຕກ຺ໂກ ຈ ວິຈາໂຣ ຈ, ປີຕິ ຈ ວີຣິຍໍ ຕຖາ;

ຉນ຺ໂທ ຈ ອຘິໂມກ຺ໂຂ ຈ, ຉ ປກິຓ຺ຓກນາມກາ.

໒໘໙. ປຸຎ຺ຎາປຸຎ຺ເຎສຸ ປາເກສຸ, ກ຺ຣິຍາສຸ ຈ ຍຖາຣຫໍ;

ມານເສສຸ ປວຕ຺ຕນ຺ຕິ, ວິປ຺ປກິຓ຺ຓາ ປກິຓ຺ຓກາ.

໒໙໐. ສທ຺ຘາ ສຕິນ຺ທ຺ຣິຍຎ຺ເຈວ, ຫິໂຣຕ຺ຕປ຺ປພລທ຺ວຍໍ;

ອໂລໂຠ ຈ ອໂທໂສ ຈ, ປຎ຺ຎາ ມຊ຺ຌຕ຺ຕຕາປິ ຈ.

໒໙໑. ອຏ຺ເຐເຕ ອຸຕ຺ຕມາ ນາມ, ຘມ຺ມາ ອຸຕ຺ຕມສາຘນາ;

ນິວຊ຺ຊາຕິ ປວຸຈ຺ຈນ຺ຕິ, ຍຸຄຬາ ຉ ຕໂຕປເຣ.

໒໙໒. ປສ຺ສທ຺ຘິ ກາຍຈິຕ຺ຕານໍ, ລຫຸຕາ ມຸທຸຕາ ຕຖາ;

ກມ຺ມຎ຺ຎຕາ ຈ ປາຄຸຎ຺ຎ-ຕາ ຈ ອຸຊຸກຕາຕິ ຈ.

໒໙໓. ອປ຺ປມຎ຺ຎາທ຺ວຍໍ ນາມ, ກຣຸຓາມຸທິຕາ ສິຍຸໍ;

ສມ຺ມາວາຈາ ຈ ກມ຺ມນ຺ຕາ-ຊີວາ ຈ ວິຣຕິຕ຺ຕຍໍ.

໒໙໔. ປຎ຺ຈວີສ ປນິຈ຺ເຈເຕ, ອນວຊ຺ຊາ ຍຖາຣຫໍ;

ປາປາເຫຕຸກມຸຕ຺ເຕສຸ, ອນວຊ຺ເຊສຸ ຊາຍເຣ.

໒໙໕. ໂລໂຠ ໂທໂສ ຈ ໂມໂຫ ຈ,

ມາໂນ ທິຏ຺ຐິ ຈ ສໍສໂຍ;

ຖິນມິທ຺ຘຎ຺ຈ ອຸທ຺ຘຈ຺ຈໍ,

ກຸກ຺ກຸຈ຺ຈຎ຺ຈ ຕຖາ ທສ.

໒໙໖. ອຫິຣີກມໂນຕ຺ຕປ຺ປໍ, ອິສ຺ສາ ມຈ຺ຉຣິຍນ຺ຕິ ຈ;

ໂຫນ຺ຕິ ຈຸທ຺ທສ ສາວຊ຺ຊາ, ສາວຊ຺ເຊສ຺ເວວ ສມ຺ຠວາ.

໒໙໗. ທ຺ເວປຎ຺ຎາສ ຈຕຸທ຺ເຘວໍ, ຘມ຺ມາ ເຈຕສິກາ ຐິຕາ;

ເຕສໍ ທານິ ປວກ຺ຂາມິ, ສມ຺ປໂຍຄຎ຺ຈ ສງ຺ຄຫໍ.

໒໙໘. ສຕ຺ຕ ສາຘາຣຓາ ສພ຺ພ-ຈິຕ຺ຕສາຘາຣຓາ ຕໂຕ;

ຈິຕ຺ເຕນ ສທ຺ຘິ ອຏ຺ຐນ຺ນໍ, ວິປ຺ປໂຍໂຄ ນ ກຕ຺ຖຈິ.

໒໙໙. ວິຕກ຺ໂກ ປຎ຺ຈວິຎ຺ຎາຓໍ, ທຸຕິຍາທິວິວຊ຺ຊິເຕ;

ວິຈາໂຣປິ ຈ ຕຕ຺ເຖວ, ຕຕິຍາທິວິວຊ຺ຊິເຕ.

໓໐໐. ໂສມນສ຺ສຍຸເຕ ປີຕິ-ຈຕຸຕ຺ຖຊ຺ຌານວຊ຺ຊິເຕ;

ວີຣິຍໍ ປຐມາວຊ຺ຊ-ວິປາກາເຫຕຸວຊ຺ຊິເຕ.

໓໐໑. ຉນ຺ໂທ ສມ຺ໂຠຕິ ສພ຺ພຕ຺ຖ, ໂມມູຫາເຫຕຸວຊ຺ຊິເຕ;

ອຘິໂມກ຺ໂຂ ວິຈິກິຈ຺ຉາ-ປຎ຺ຈວິຎ຺ຎາຓວຊ຺ຊິເຕ.

໓໐໒. ຉສຏ຺ຐິ ປຎ຺ຈປຎ຺ຎາສ, ສຕ຺ຕຕິ ເຈວ ໂສຬສ;

ວີສເຕກາທເສວາຖ, ປກິຓ຺ຓກວິວຊ຺ຊິຕາ.

໓໐໓. ມານສາ ປຎ຺ຈປຎ຺ຎາສ, ສວິຕກ຺ກາ ຉສຏ຺ຐິ ຈ;

ສວິຈາເຣກປຎ຺ຎາສ, ສປ຺ປີຕິກມນາ ຕຖາ.

໓໐໔. ເຕສຕ຺ຕຕິ ສວີຣິຍາ, ສຉນ຺ເທກູນສຕ຺ຕຕິ;

ສາຘິໂມກ຺ຂາ ປວຸຈ຺ຈນ຺ຕິ, ອຏ຺ຐສຕ຺ຕຕິ ມານສາ.

໓໐໕. ປຎ຺ຎາປ຺ປມຎ຺ຎາວິຣຕີ, ຫິຕ຺ວາ ເອກູນສຏ຺ຐິສຸ;

ປາປາເຫຕຸກມຸຕ຺ເຕສຸ, ສທ຺ຘາເທກູນວີສຕິ.

໓໐໖. ທ຺ວິເຫຕຸກາເຫຕຸປາປວຊ຺ຊິເຕສຸ ສມາສໂຕ;

ປຎ຺ຎາ ຕຸ ຊາຍເຕ ສຕ຺ຕຈຕ຺ຕາລີເສສຸ ສພ຺ພຖາ.

໓໐໗. ມຫາກ຺ຣິຍາກາມປຸຎ຺ຎ-ຣູປຊ຺ຌາເນສຸ ຊາຍເຣ;

ອປ຺ປມຎ຺ຎາຏ຺ຐວີເສສຸ, ຫິຕ຺ວາ ຌານໍ ຕຸ ປຎ຺ຈມໍ.

໓໐໘. ໂລກຸຕ຺ຕເຣສຸ ສພ຺ພຕ຺ຖ, ສເຫວ ວິຣຕິຕ຺ຕຍໍ;

ກາມປຸຎ຺ເຎສຸ ສມ຺ໂຠຕິ, ຍຖາສມ຺ຠວໂຕ ວິສຸໍ.

໓໐໙. ວິຣຕີອປ຺ປມຎ຺ຎາສຸ, ປຎ຺ຈສ຺ວປິ ຍຖາຣຫໍ;

ກທາຈິເທວ ສມ຺ໂຠຕິ, ເອເກໂກວ ນ ເຈກໂຕ.

໓໑໐. ອຫິຣີກມໂນຕ຺ຕປ຺ປໍ, ໂມຫອຸທ຺ຘຈ຺ຈເມວ ຈ;

ປາປສາຘາຣຓາ ນາມ, ຈຕ຺ຕາໂຣ ປາປສມ຺ຠວາ.

໓໑໑. ໂລໂຠ ຈ ໂລຠມູເລສຸ, ທິຏ຺ຐິຍຸຕ຺ເຕສຸ ທິຏ຺ຐິ ຈ;

ມາໂນ ທິຏ຺ຐິວິຍຸຕ຺ເຕສຸ, ທິຏ຺ຐິມານາ ນ ເຈກໂຕ.

໓໑໒. ໂທສມູເລສຸ ໂທໂສ ຈ, ອິສ຺ສາ ມຈ຺ຉຣິຍໍ ຕຖາ;

ກຸກ຺ກຸຈ຺ຈມິຕິ ຈຕ຺ຕາໂຣ, ວິຈິກິຈ຺ຉາ ຕຸ ກງ຺ຂິເຕ.

໓໑໓. ສເຫວ ຖິນມິທ຺ຘໍ ຕຸ, ສສງ຺ຂາເຣສຸ ປຎ຺ຈສຸ;

ອິຕິ ຈຸທ຺ທສ ສາວຊ຺ຊາ, ສາວຊ຺ເຊສ຺ເວວ ນິຈ຺ຉິຕາ.

໓໑໔. ມາໂນ ຈ ຖິນມິທ຺ຘຎ຺ຈ, ສຫ ວາຖ ວິສຸໍ ນ ວາ;

ອິສ຺ສາມຈ຺ເຉຣກຸກ຺ກຸຈ຺ຈາ, ອຎ຺ຎມຎ຺ຎໍ ວິສຸໍ ນ ວາຕິ.

ອິຕິ ເຈຕສິກວິຠາເຄ ເຈຕສິກສມ຺ປໂຍຄກຖາ ນິຏ຺ຐິຕາ.

ອຏ຺ຐໂມ ປຣິຈ຺ເຉໂທ.