໑໐. ທສໂມ ປຣິຈ຺ເຉໂທ

ເສສກມ຺ມຏ຺ຐານວິຠາໂຄ

໑໒໙໘. ພ຺ຍາປາທາທີນວໍ ທິສ຺ວາ, ເຂມຠາວຎ຺ຈ ຂນ຺ຕິຍໍ;

ອປ຺ປມຎ຺ຎາ ຕຸ ຠາເວນ຺ໂຕ, ວິເນຍ຺ຍ ປຏິຆໍ ກຖໍ.

໑໒໙໙. ເຈໂຕສນ຺ຕາປໂນ ໂກໂຘ,

ສມ຺ປສາທວິໂກປໂນ;

ວິຣູປພີຠຈ຺ຉກໂຣ,

ມຸຂວຓ຺ຓປ຺ປຘໍສໂນ.

໑໓໐໐. ສີລກາລຸສ຺ສິຍຸປ຺ປາໂທ, ຈິຕ຺ຕວິກ຺ເຂປສມ຺ຠໂວ;

ປຎ຺ຎາປຊ຺ໂຊຕວິທ຺ຘໍສີ, ປຏິປຕ຺ຕິວິພນ຺ຘໂກ.

໑໓໐໑. ອປາເຍກາຍໂນ ມຄ຺ໂຄ, ປາປກຓ຺ຏກພນ຺ຘໂກ;

ຘມ຺ມມຄ຺ຄສມຸຈ຺ເຉທີ, ມຄ຺ຄທ຺ວາຣປິຘານໂກ.

໑໓໐໒. ຍໂສວຓ຺ຓວິສງ຺ຂາໂຣ, ຄຸຓມູລປ຺ປຠຎ຺ຊໂກ;

ທຸກ຺ຂຘມ຺ມສໂມຘາໂນ, ພ຺ຍສໂນປທ຺ທວາກໂຣ.

໑໓໐໓. ທຸນ຺ນິມິຕ຺ຕມິທໍ ຊາຕໍ, ສພ຺ພສມ຺ປຕ຺ຕິຘໍສນໍ;

ຘູມເກຕຸສມຸປ຺ປາໂທ, ສພ຺ພໂລກວິນາສໂກ.

໑໓໐໔. ສພ຺ພກລ຺ຍາຓຘມ຺ມານໍ, ອວມງ຺ຄລມຸຏ຺ຐິຕໍ;

ຫິຕາຣມ຺ຠສມຸຄ຺ຆາຕີ, ອນ຺ຕຣາຍສມາຄໂມ.

໑໓໐໕. ສພ຺ພາກາຣປຏິກ຺ກູລໍ, ສພ຺ພວິທ຺ເທສກາຣຓໍ;

ວິປຕ຺ຕິມຸຂມຸປ຺ປນ຺ນໍ, ອມິຕ຺ຕຊນປຕ຺ຖິຕໍ.

໑໓໐໖. ສປຕ຺ຕກຣຓໍ ໂຆຣໍ, ສພ຺ພານຕ຺ຖວິຘາຍກໍ;

ຠຍມນ຺ຕຣໂຕ ຊາຕໍ, ຕໍ ຊໂນ ນາວພຸຊ຺ຌຕິ.

໑໓໐໗. ຂຸຣຘາຣໍ ລິຫນ຺ຕາວ, ຄິລນ຺ຕາວ ຫຸຕາສນໍ;

ຕິຕ຺ຕລາພຸໍວ ຂາທນ຺ຕາ, ຄຓ຺ຫນ຺ຕາທິຕ຺ຕມາຍຸຘໍ.

໑໓໐໘. ພ຺ຍາປາທມຕ຺ຕສມ຺ຠວ-ມຕ຺ຕຆຎ຺ຎາຍ ເກວລໍ;

ອຸປລາເຬນ຺ຕິ ທຸມ຺ເມຘາ, ໂຆຣມາສີວິສໍ ຍຖາ.

໑໓໐໙. ໂທສເຕເຊນ ຣຸກ຺ໂຂວ, ສຸສິຣາຣຸຬ຺ຫປາວໂກ;

ອນ຺ໂຕນຸທຍ຺ຫມານາປິ, ວິປ຺ຜນ຺ທນ຺ຕິ ວິຆາຕິໂນ.

໑໓໑໐. ນາວພຸຊ຺ຌນ຺ຕິ ທຸມ຺ເມຘາ, ເຈໂຕສງ຺ກປ຺ປວາຍຸນາ;

ອຸກ຺ກາມຸຂາມິວາທິຕ຺ຕ-ມຸຊ຺ຊລນ຺ຕາ ປຸນປ຺ປຸນໍ.

໑໓໑໑. ຠຍມຄ຺ຄສມາຣຸຬ຺ຫາ, ເຂມມຄ຺ຄວິໂຣຘິໂນ;

ພ຺ຍາປນ຺ນາ ກິພ຺ພິສາກິຓ຺ຓາ, ອຕ຺ຖທ຺ວຍວິໂຣຘິໂນ.

໑໓໑໒. ອນາຖາ ສລ຺ລກາວິທ຺ຘາ, ວິສຏ຺ຏາ ອນຸໂສຈິໂນ;

ອນ຺ຘາ ວິຍ ມິຄາຣຎ຺ເຎ, ຠມນ຺ຕິ ຫຕຈກ຺ຂຸກາ.

໑໓໑໓. ອສໍວິຫິຕກມ຺ມນ຺ຕາ, ພາລາ ໂກຘວສານຸຄາ;

ຂິປ຺ປໍ ລກ຺ຂິໍ ປຣິຈ຺ຈຕ຺ຕາ, ຍໂສໂຠເຄຫິ ຘໍສເຣ.

໑໓໑໔. ທຸປ຺ປຏິປ຺ປາທິຕາຣມ຺ຠາ, ໂກຘສງ຺ໂຂຠໂມຫິຕາ;

ຘມ຺ມາມຕຣສສ຺ສາທໍ, ນ ວິນ຺ທນ຺ຕິ ອວິທ຺ທສຸ.

໑໓໑໕. ພຫ຺ວາທີນວມິຈ຺ເຈວ-ມນ຺ໂຕ ພ຺ຍາຘິມິວຸຏ຺ຐິຕໍ;

ຊາຕານລມິວຸຈ຺ຉງ຺ເຄ, ອຊ຺ຌຸເປກ຺ຂນ຺ຕິ ທຸຊ຺ຊນາ.

໑໓໑໖. ໂຈທຍມານາ ທຸກ຺ເຂຫິ, ກ຺ເລສາຈິຓ຺ຓມລີມຫາ;

ປາປກມ຺ເມຫິ ປູເຣນ຺ຕາ, ເສນ຺ຕິ ມຈ຺ຈຸປເຖ ຈິຣໍ.

໑໓໑໗. ຕເມວໍ ປຏິສງ຺ຂາຍ, ປຏິຆໍ ປນ ໂຍນິໂສ;

ວາຬມິຄໍວ ຘາວນ຺ຕໍ, ອາວິສນ຺ຕໍວ ຣກ຺ຂສໍ.

໑໓໑໘. ປາວກໍວ ປຣິພ຺ຍຸຬ຺ຫໍ, ຠາຍມານສ຺ສ ໂຍຄິໂນ;

ໂສຕ຺ຖິຠາວາຍ ເຂມນ຺ຕ-ມຸປຎ຺ຎຕ຺ຕໍ ມເຫສິນາ.

໑໓໑໙. ມາຕາ ກລ຺ຍາຓຘມ຺ມານໍ, ຂມາ ນາມ ມຫິທ຺ຘິກາ;

ສມປ຺ປວຕ຺ຕິ ສຕ຺ເຕສຸ, ສພ຺ພສມ຺ປຕ຺ຕິສາຘິກາ.

໑໓໒໐. ໂກຘານລຊລາເສໂກ,

ໂສໂກປາຍາສນາສນໍ;

ອາຆາຕສລ຺ລນິທ຺ຘາຣີ,

ອຸປນາຫວິໂມຈນໍ.

໑໓໒໑. ວຓ຺ຓກິຕ຺ຕິສມຸຏ຺ຐານໍ, ຄຸຓມູລາຠິເສວນໍ;

ອປາຣຸຕມຸຂໍເວຕ-ມຕ຺ຖທ຺ວຍສມິທ຺ຘິຍາ.

໑໓໒໒. ວິຆາຕປຣິຍາທານ-ມາສວານມເສສໂຕ;

ປຏິປສ຺ສມ຺ຠນໍ ເຈໂຕ-ປີຕິກຣຓຈນ຺ທນໍ.

໑໓໒໓. ສພ຺ພທຸກ຺ຂສມຸຄ຺ຆາຕິ, ສຸຂຸປຏ຺ຐານມຸຕ຺ຕມໍ;

ພ຺ຍສໂນທຍວິຈ຺ເຉໂທ, ຠຍເຠຣວນິຄ຺ຄໂມ.

໑໓໒໔. ເຈໂຕປສາທສນ຺ຘາໂນ, ປາສາທິກຜລາວໂຫ;

ປວໂຣ ໂພຘິສມ຺ຠາໂຣ, ນຣານຣນິເສວິໂຕ.

໑໓໒໕. ປາປກນ຺ຕາຣນິຕ຺ຖາໂຣ, ຈຕຸຣາປາຍໂຣຘໂກ;

ທ຺ວາຣາວາປຸຣຓຎ຺ເຈຕໍ, ເທວໂລກູປປຕ຺ຕິຍາ.

໑໓໒໖. ປຎ຺ຎາສີລສມາຘານໍ, ປຏິປຕ຺ຕິວິໂສຘໂນ;

ປິຍງ຺ກໂຣ ໂສມ຺ມຠາໂວ, ທຸລ຺ລໂຠ ພຫຸປຕ຺ຖິໂຕ.

໑໓໒໗. ກ຺ເລສສງ຺ໂຂຠວິກ຺ເຂປ-ວິປ຺ຜນ຺ທປຏິພນ຺ຘນໍ;

ຕິຕິກ຺ຂາຄຸຓມກ຺ຂາຕ-ມາຣກ຺ຂວິຘິມຕ຺ຕໂນ.

໑໓໒໘. ວິຫິໍສາຣຕິສາຣມ຺ຠ-ປຏິໂຣຘວິໂມຈນໍ;

ເວຣິກິພ຺ພິສວິທ຺ຘໍສີ, ໂລການຸຄ຺ຄຫກາຣຓໍ.

໑໓໒໙. ຘມ຺ມປຊ຺ໂຊຕກຣຓໍ, ສໍໂຍຄມລໂສຘນໍ;

ສມ຺ໂມຫຕິມິຣຸທ຺ຘາຣິ, ສມ຺ປຕ຺ຕິປຏິປາທນໍ.

໑໓໓໐. ອິຈ຺ຈຕ຺ຕຕ຺ຖໍ ປຣຕ຺ຖຎ຺ຈ, ສມ຺ປາເທຕ຺ວາ ຂມາປໂຣ;

ສາເຘຕິ ສພ຺ພສມ຺ປຕ຺ຕິ-ມິຘ ເຈວ ປຣຕ຺ຖ ຈ.

໑໓໓໑. ຕິຕິກ຺ຂາຄຸຓສມ຺ປນ຺ໂນ, ປາຓຠູຕານຸກມ຺ປໂກ;

ອນາກຸລິຕກມ຺ມນ຺ໂຕ, ໂສຣໂຕ ສຂິໂລ ສຸຈິ.

໑໓໓໒. ນິວາໂຕ ສມິຕາຈາໂຣ, ສຸຠໂຄ ປິຍທສ຺ສໂນ;

ປຏິສງ຺ຂາພລປ຺ປຕ຺ໂຕ, ຘິຕິມາ ມຕິປາຏໂວ.

໑໓໓໓. ອກ຺ໂຂໂຠ ອຘິວາເສນ຺ໂຕ,

ສພ຺ພານຕ຺ເຖ ປຣິສ຺ສເຍ;

ຠີມສງ຺ຄາມາວຈໂຣ,

ຫຕ຺ຖິນາໂຄວ ໂສຠຕິ.

໑໓໓໔. ອິຕ຺ຖໍ ສມນ຺ຕໂຕ ຠທ຺ທໍ, ຕິຕິກ຺ຂໍ ປຈ຺ຈເວກ຺ຂໂຕ;

ປສ຺ສມ຺ເຠຕິ ສມຸຏ຺ຐາຍ, ຂມາ ພ຺ຍາປາທສມ຺ຠມໍ.

໑໓໓໕. ທິພ຺ໂພສຘມິວາຕງ຺ກໍ, ເມຆຊ຺ຊວໍ ຫຸຕາສນໍ;

ຂິປ຺ປມນ຺ຕຣຘາເປຕິ, ຕິຕິກ຺ຂາ ໂກຘມຕ຺ຕໂນ.

໑໓໓໖. ຕໂຕເນກຄຸໂຓເປຕໍ, ເນກໂທສປ຺ປຠຎ຺ຊນໍ;

ຂນ຺ຕິຘມ຺ມມຘິຏ຺ຐາຍ, ປສນ຺ນຘີຣມານໂສ.

໑໓໓໗. ຠາເວຍ຺ຍ ປຐມໍ ຕາວ, ເມຕ຺ຕາຠາວນມຸຕ຺ຕມໍ;

ອຕ຺ຕານມຸປມໍ ກຕ຺ວາ, ສຕ຺ເຕສຸ ຫິຕວຸຑ຺ຒິຍາ.

໑໓໓໘. ສພ຺ເພ ສຕ຺ຕາ ຈ ປາຓາ ຈ, ຠູຕາ ຊີວາ ຈ ປຸຄ຺ຄລາ;

ອພ຺ຍາປຊ຺ຊາ ຕຖາເວຣາ, ອນີຆາ ຈ ສຸເຂຘິໂນ.

໑໓໓໙. ວິຊ຺ຊາສມ຺ປຕ຺ຕິໂຠເຄຫິ, ປວຑ຺ຒນ຺ຕຸ ຍສສ຺ສິໂນ;

ປຣິວາຣພລປ຺ປຕ຺ຕາ, ຠໂຍປທ຺ທວວຊ຺ຊິຕາ.

໑໓໔໐. ສຂິລາ ສຸຂສມ຺ຠາສາ, ອຎ຺ຎມຎ຺ຎາວິໂຣຘິໂນ;

ໂມທນ຺ຕຸ ສຸຫິຕາ ສພ຺ເພ, ມາ ກິຎ຺ຈິ ປາປມາຄມາ.

໑໓໔໑. ສທ຺ຘາປາໂມຊ຺ຊພຫຸລາ, ທານສີລມຫຸສ຺ສວາ;

ຄຸຓຠູສິຕສນ຺ຕານາ, ອາຍຸໍ ປາເລນ຺ຕນາມຍໍ.

໑໓໔໒. ສມ຺ມາທິຏ຺ຐິໍ ປຸໂຣຘາຍ, ສທ຺ຘມ຺ມປຏິປຕ຺ຕິຍາ;

ອາຣາເຘນ຺ຕຸ ຫິໂຕປາຍ-ມຈ຺ຈນ຺ຕໍ ສຸຂສາຘນໍ.

໑໓໔໓. ອິຕິ ນານປ຺ປກາເຣນ, ສຕ຺ເຕສຸ ຫິຕມານສໍ;

ມາຕາວ ປິຍປຸຕ຺ຕມ຺ຫິ, ປວຕ຺ເຕຍ຺ຍ ນິຣນ຺ຕຣໍ.

໑໓໔໔. ສິເນຫໍ ປຣິວຊ຺ເຊນ຺ໂຕ, ພ຺ຍາປາທຎ຺ຈ ວິນາສຍໍ;

ປຣິສຸທ຺ເຘນ ຈິຕ຺ເຕນ, ຫິຕກາໂມວ ເກວລໍ.

໑໓໔໕. ເມຕ຺ຕາຍ ມິຕ຺ເຕ ມຊ຺ຌຕ຺ເຕ, ເວຣິເກ ຈ ຍຖາກ຺ກມໍ;

ກໂຣນ຺ໂຕ ສີມສມ຺ເຠທໍ, ອຕ຺ຕນິ ຈ ສມໍ ຜເຣ.

໑໓໔໖. ອາເສວນ຺ຕສ຺ສ ຕສ຺ເສວໍ, ຫິຕາໂຠຄສມາຫິຕໍ;

ສຕ຺ຕປຎ຺ຎຕ຺ຕິມາຣພ຺ຠ, ສມາຘິຍຕິ ມານສໍ.

໑໓໔໗. ຕໂຕ ອນີໂຆ ເອກຄ຺ໂຄ, ອຸປສນ຺ຕມໂນຣໂຖ;

ຌານຕ຺ຕິກໍ ຈຕຸກ຺ກໍ ວາ, ເມຕ຺ຕາເຈໂຕວິມຸຕ຺ຕິຍາ.

໑໓໔໘. ຠູມິເທສທິສາສຕ຺ຕ-ເຠທຠິນ຺ເນສຸ ໂອຘິໂສ;

ຍຖາສມ຺ຠວມປ຺ເປຕິ, ສພ຺ພສຕ຺ເຕສ຺ວໂນຘິໂສ.

໑໓໔໙. ຕເທວເມກສຕ຺ຕມ຺ຫິ, ປຣິຈ຺ເຉທນິຍາມໂຕ;

ພຫຸເກສຸ ຈ ສຕ຺ເຕສຸ, ສພ຺ເພສຸ ຈ ປວຕ຺ຕຕິ.

໑໓໕໐. ຕຖາເສວິຕສນ຺ຕາໂນ,

ເມຕ຺ຕາເຈໂຕວິມຸຕ຺ຕິຍາ;

ກຣຸຓາຠາວນາໂຍຄ-

ມາຣເຠຍ຺ຍ ຕໂຕ ປຣໍ.

໑໓໕໑. ສຕ຺ຕານໍ ທຸກ຺ຂິຕາກາຣ-ມາວຊ຺ຊິຕ຺ວານ ໂຍນິໂສ;

‘‘ອໂຫ ທຸກ຺ຂາ ວິມຸຈ຺ຈນ຺ຕຸ, ສພ຺ເພ ສຕ຺ຕາ’’ຕິ ຈິນ຺ຕຍໍ.

໑໓໕໒. ກຖໍ ມາຓວໂກຍຎ຺ຈ, ຠຍເຠຣວກມ຺ປິໂຕ;

ພ຺ຍສໂນປທ຺ທວາວິທ຺ໂຘ, ວິປ຺ຜນ຺ທຕິ ວິຆາຕວາ.

໑໓໕໓. ຕຖາ ເຫເຕ ວິໂມສາຍ, ປຏິປນ຺ນາ ວິໂຣຘິໂນ;

ສພ຺ຍາປຊ຺ຊາ ວິຫຎ຺ຎນ຺ຕິ, ເຈໂຕທຸກ຺ຂສມປ຺ປິຕາ.

໑໓໕໔. ອຖຎ຺ເຎ ປຣິເທວນ຺ຕິ, ວິປຕ຺ຕິວິນິປາຕິກາ;

ປຘຸປາຍິກສງ຺ກປ຺ປາ, ໂສໂກປາຍາສຠາຄິໂນ.

໑໓໕໕. ອຖາປເຣ ປຣາຠູຕາ, ກາມກ຺ເລສວສີກຕາ;

ໂມຫນ຺ຘກາຣປກ຺ຂນ຺ຕາ, ສຕ຺ຕາ ຄຈ຺ຉນ຺ຕິ ທຸຄ຺ຄຕິໍ.

໑໓໕໖. ເຕ ຕຕ຺ຖ ກຏຸກໍ ໂຆຣມນຸໂຠນ຺ຕາ ສກໍ ຜລໍ;

ທຸກ຺ຂສູລສມາວິທ຺ຘາ, ພາຫາ ປຄ຺ຄຍ຺ຫ ກນ຺ທເຣ.

໑໓໕໗. ທີຆຣຕ຺ຕາຘິມຸຕ຺ຕາຍ, ເທວໂລກສມິທ຺ຘິຍາ;

ເທວກາຍາ ວິຫາຍນ຺ຕິ, ອກາມາ ປຣິວຕ຺ຕິໂນ.

໑໓໕໘. ຈິຣກາລໍ ຊລິຕ຺ວານ, ສູຣິໂຍວ ນຠນ຺ຕເຣ;

ພ຺ຣຫ຺ມາໂນປິ ປຕນ຺ເຕວ, ພ຺ຣຫ຺ມໂລກາປຣາຍຓາ.

໑໓໕໙. ຂນ຺ຘປຎ຺ຈກມິຈ຺ເຈວໍ, ທຸກ຺ຂາຄາຣໍ ສມຸພ຺ພຫໍ;

ນານາຄຕີສຸ ວິກ຺ຂິຕ຺ຕໍ, ປາຓຊາຕໍ ວິຫຎ຺ຎຕິ.

໑໓໖໐. ອນາຖມນຍາປນ຺ນໍ, ປຣິຫານິຠຍາກຸລໍ;

ວາຕມຓ຺ຑລິກກ຺ຂິຕ຺ຕປກ຺ຂີວ ປຣິວຕ຺ຕຕິ.

໑໓໖໑. ອິຕິ ທິສ຺ວານ ສຸຕ຺ວາ ວາ, ສມ຺ຠາເວຕ຺ວານ ວາ ປຸນ;

ທຸກ຺ຂາປຄມມິຈ຺ຉນ຺ໂຕ, ທຸກ຺ຂາປຄມ ປຕ຺ຖຍໍ.

໑໓໖໒. ສຸຂິເຕສຸ ຈ ເມຘາວີ, ທຸກ຺ຂາກາຣມນຸສ຺ສຣໍ;

ປວຕ຺ເຕຍ຺ຍ ທຍາປນ຺ໂນ, ກຣຸຓາຠາວນປ຺ປນໍ.

໑໓໖໓. ‘‘ອໂຫ ສຕ຺ຕາ ວິມຸຈ຺ຈນ຺ຕຸ, ທຸກ຺ຂຘມ຺ເມຫິ ສພ຺ພຖາ;

ສາຘຸ ສເມນ຺ຕຸປາຍາສາ, ໂສກາ ຈ ປຣິເທວນາ.

໑໓໖໔. ‘‘ຂີຍນ຺ຕຸ ປາປຘມ຺ມາ ຈ, ປສ຺ສມ຺ເຠນ຺ຕາມຍາ ຕຖາ;

ສໍກ຺ເລສາ ປລິໂພຘາ ຈ, ສມຸຈ຺ຉິຊ຺ຊນ຺ຕຸ ປາຓິນໍ.

໑໓໖໕. ‘‘ພ຺ຍາປາທາ ຈ ວິຫາຍນ຺ຕຸ, ວິນິວຕ຺ຕນ຺ຕຸປທ຺ທວາ;

ພ຺ຍສນານິ ວິນສ຺ສນ຺ຕຸ, ວິຄຈ຺ຉນ຺ຕຸ ວິປຕ຺ຕິໂຍ.

໑໓໖໖. ‘‘ວິເຫສາ ຈ ວິຆາຕາ ຈ, ຂີຍນ຺ຕຸ ຠຍເຠຣວາ;

ປຏິກ຺ກມນ຺ຕຸ ວິສ຺ສຏ຺ຐາ, ໂສຕ຺ຖິໍ ປສ຺ສນ຺ຕຸ ປາຓິໂນ’’.

໑໓໖໗. ອິຈ຺ເຈວມນຸກມ຺ປນ຺ໂຕ, ສພ຺ພສຕ຺ເຕປິ ສພ຺ພຖາ;

ສພ຺ພທຸກ຺ຂສມຸຄ຺ຆາຕໍ, ປຕ຺ເຖນ຺ໂຕ ກຣຸຓາຍຕິ.