໑໑. ເອກາທສໂມ ປຣິຈ຺ເຉໂທ

ວິປສ຺ສນາວິຠາໂຄ

໑໕໐໖. ທ຺ວິຘາ ສມຸຏ຺ຐານຘຸຣາ, ຕິວິຘາ ຠູມິໂຍ ມຕາ;

ຕິວິຘາຠິນິເວສາ ຈ, ສຣີຣໍ ຕຸ ຈຕຸພ຺ພິຘໍ.

໑໕໐໗. ຕິວິຘາ ຠາວນາ ຕຕ຺ຖ, ສງ຺ຂາເຣສຸ ຍຖາຣຫໍ;

ທຸວິຘາກາຣມາຣພ຺ຠ, ນິຊ຺ຌາຍຕິ ຕິລກ຺ຂຓໍ.

໑໕໐໘. ອຏ຺ຐາຣສາກາຣຠິນ຺ນາ, ທສາວຕ຺ຖາ ວິຠາວິຕາ;

ຕິຘາ ວິຠາຄາ ສາເຘຕິ, ວິໂມກ຺ຂຕ຺ຕຍມຸຕ຺ຕມໍ.

໑໕໐໙. ຈຕຸສຈ຺ຈປຏິເວຘາ, ສຕ຺ຕຏ຺ຐາຣິຍປຸຄ຺ຄລາ;

ກ຺ເລສຫານີ ຍຖາໂຍຄໍ, ຈຕສ຺ໂສ ປຏິສມ຺ຠິທາ.

໑໕໑໐. ຕິວິຘາ ຈ ສມາປຕ຺ຕິ, ນິໂຣຘາ ຈ ຕຖາປຣາ;

ນິສ຺ສນ຺ທຜລມິຈ຺ຈາຫຸ, ຕສ຺ສາ ສາສນໂກວິທາ.

໑໕໑໑. ວິປສ຺ສນາຠາວນາຍ-ມິຕິ ຠາສນ຺ຕິ ປຓ຺ຑິຕາ;

ຕມິທານິ ປວກ຺ຂາມິ, ຍຖານຸກ຺ກມໂຕ ກຖໍ.

໑໕໑໒. ຠູມິຘມ຺ເມ ປຣິຄ຺ຄຍ຺ຫ, ວິຈິນນ຺ຕສ຺ສ ໂຍຄິໂນ;

ສຕິຍາ ສມຖາ ວາຖ, ສມຸຏ຺ຐາຕິ ວິປສ຺ສນາ.

໑໕໑໓. ສຠາວປຏິເວເຘ ຈ, ສທ຺ຘມ຺ມປຏິປຕ຺ຕິຍໍ;

ປຎ຺ຎາສທ຺ຘາທ຺ວຍໍ ຕສ຺ສາ, ຘຸຣມາຫຸ ຘຸຣນ຺ຘຣາ.

໑໕໑໔. ເຕຠູມກສຠາວານໍ, ສປ຺ປຈ຺ຈຍປຣິຄ຺ຄໂຫ;

ຎາຕປຣິຎ຺ຎາ ນາມາຍໍ, ຠູມີຕິ ປຐມາ ມຕາ.

໑໕໑໕. ກລາປໂຕ ສມ຺ມສນໍ, ອຸທຍພ຺ພຍທສ຺ສນໍ;

ປຣິຎ຺ຎາຕີຣຓາ ນາມ, ທຸຕິຍາ ຠູມິ ຠາສິຕາ.

໑໕໑໖. ປຫານປຣິຎ຺ຎາ ຠູມິ, ຕຕິຍາຫຸ ຕໂຕປຣໍ;

ຠງ຺ຄາທິຎາຓມິຈ຺ເຈວໍ, ຕິວິຘາ ຠູມິໂຍ ມຕາ.

໑໕໑໗. ຂຓສນ຺ຕຕິອທ຺ຘານ-ວເສເນຕ຺ຖ ສມີຣິຕາ;

ອນິຈ຺ຈາ ທຸກ຺ຂານຕ຺ຕາຕິ, ຕິວິຘາຠິນິເວສນາ.

໑໕໑໘. ທິຏ຺ຐິກງ຺ຂາວິຕຣຓາ, ມຄ຺ຄາມຄ຺ຄປຏິປ຺ປທາ;

ວິສຸທ຺ຘິໂຍ ຈຕສ຺ໂສປິ, ສຣີຣນ຺ຕິ ນິທສ຺ສິຕາ.

໑໕໑໙. ສລກ຺ຂຓວວຕ຺ຖານໍ, ປຈ຺ຈຍາກາຣນິຈ຺ຉໂຍ;

ກຸມ຺ມຄ຺ຄປຣິຫາໂຣ ຈ, ຕິລກ຺ຂຓວິປສ຺ສນາ.

໑໕໒໐. ອິຕິ ລກ຺ຂຓຠິນ຺ນຕ຺ຕາ, ລພ຺ຠນ຺ເຕກກ຺ຂເຓປິ ຈ;

ເທສິຕາ ເຫຕຸຠູເຕນ, ກເມເນວໍ ວິສຸທ຺ຘິໂຍ.

໑໕໒໑. ສີລພ຺ພິສຸທ຺ຘິອາທີນໍ, ຕຖາ ສາວ ປຣມ຺ປຣາ;

ຈິຕ຺ຕພ຺ພິສຸທ຺ຘິອາທີນມຕ຺ຖາຍາຕິ ປກາສິຕາ.

໑໕໒໒. ທິສ຺ສມານສຠາວານໍ, ປສ຺ສນ຺ໂຕ ປຈ຺ຈຍຏ຺ຐິຕິ;

ປຣິປນ຺ຖວິມຸຕ຺ໂຕ ຫິ, ປຏິປາເທຕິ ຠາວນໍ.

໑໕໒໓. ຕຖາປິ ຈ ວິເສເສນ, ປຏິປນ຺ນສ຺ສ ໂຍຄິໂນ;

ຕຕ຺ຖ ຕຕ຺ຖ ວິຠູຕຕ຺ຕາ, ຐານໂຕ ເຠທິຕາ ກຖໍ.

໑໕໒໔. ຣູປປຸພ຺ພງ຺ຄມໍ ວາຖ, ນາມປຸພ຺ພງ຺ຄມໍ ຕຖາ;

ອຊ຺ຌຕ຺ຕໍ ວາ ພຫິທ຺ຘາ ວາ, ຍຖາປາກຏຘມ຺ມໂຕ.

໑໕໒໕. ນາມຣູປາທິເຠເທນ, ຠູມິຘມ຺ມປຣິຄ຺ຄໂຫ;

ວຸຕ຺ຕາ ທິຏ຺ຐິວິສຸທ຺ຘີຕິ, ອຕ຺ຕທິຏ຺ຐິປ຺ປຫານໂຕ.

໑໕໒໖. ອາຫຈ຺ຈ ປຈ຺ຈຍຸປ຺ປນ຺ນາ, ຕຖາ ຕພ຺ຠາວຠາວິໂນ;

ປວຕ຺ຕນ຺ຕີຕິ ສງ຺ຂາເຣ, ປສ຺ສໂຕ ປນ ໂຍນິໂສ.

໑໕໒໗. ປຈ຺ຈຍຄ຺ຄາຫິນີ ປຎ຺ຎາ, ນາມຣູປປ຺ປວຕ຺ຕິຍາ;

ກງ຺ຂາ ຕຣນ຺ຕິ ຕາຍາຕິ, ກງ຺ຂາວິຕຣຓາ ມຕາ.

໑໕໒໘. ອນິຈ຺ຈາ ທຸກ຺ຂານຕ຺ຕາຕິ, ປຈ຺ຈຍາຍຕ຺ຕວຸຕ຺ຕິໂຕ;

ສງ຺ຂິປິຕ຺ວາ ກລາເປນ, ສມ຺ມສີຍນ຺ຕິ ສງ຺ຂຕາ.

໑໕໒໙. ອຸປ຺ປາທວຍຠາໂວປິ, ລກ຺ຂຓຕ຺ຕຍສາຘໂກ;

ປຈ຺ຈຍາກາຣມາຣພ຺ຠ, ລກ຺ຂີຍຕິ ວິເສສໂຕ.

໑໕໓໐. ຕສ຺ມາ ສມ຺ມສນຎາຓໍ, ອຸທຍພ຺ພຍທສ຺ສນໍ;

ກງ຺ຂາວິຕຣຓາຍໍ ຕຸ, ສງ຺ຄຍ຺ຫຕິ ວິສຸທ຺ຘິຍໍ.

໑໕໓໑. ຕຕ຺ຖ ສໍກ຺ເລສວິກ຺ເຂປໍ, ກຸມ຺ມຄ຺ຄໍ ປຣິວຊ຺ຊໂຕ;

ມຄ຺ຄາມຄ຺ຄວິສຸທ຺ຘີຕິ, ຎາຓທສ຺ສນມີຣິຕໍ.

໑໕໓໒. ຕໂຕ ກເຖນ຺ຕິ ອກ຺ລິຏ຺ຐມຸທຍພ຺ພຍທສ຺ສນໍ;

ອາທິໍ ກຕ຺ວາ ປຏິປທາຎາຓທສ຺ສນສຸທ຺ຘິຍໍ.

໑໕໓໓. ປຈ຺ຈຍປຈ຺ຈຍຸປ຺ປນ຺ເນ, ຍຖາວຕ຺ຖຸວວຕ຺ຖິເຕ;

ປຫາຕຸມີຫມານານໍ, ນິຍ຺ຍານປຏິປຕ຺ຕິໂຕ.

໑໕໓໔. ອຸປກ຺ເລສວິສຸທ຺ໂຘ ຫິ, ປຸນເທໂວທຍພ຺ພຍໍ;

ອຘິຏ຺ຐຫິຕ຺ວາ ຠງ຺ຄາທິ-ຎາເຓຫິ ປຏິປຊ຺ຊຕິ.

໑໕໓໕. ຕຖາ ຈາຠິນວຸປ຺ປນ຺ເນ, ຠິຊ຺ຊມາເນ ວິປສ຺ສໂຕ;

ສໍເວຄກຑ຺ຒິຕໍ ຎາຓໍ, ຠງ຺ຄາທິມນຸຕິຏ຺ຐຕິ.

໑໕໓໖. ຕໂຕ ປຸພ຺ເພ ປວຕ຺ຕາ ຫິ, ສໍກ຺ເລສາປາຍສມ຺ຠວາ;

ປຏິປຕ຺ຕິວິສຸທ຺ຘີຕິ, ນ ສງ຺ຄຍ຺ຫຕິ ຠາວນາ.

໑໕໓໗. ສມ຺ປາເທນ຺ໂຕ ປນິຈ຺ເຈຕາ, ຈຕສ຺ໂສປິ ວິສຸທ຺ຘິໂຍ;

ອນິຈ຺ຈາ ທຸກ຺ຂານຕ຺ຕາຕິ, ຠາເວຍ຺ຍ ຕິວິຘາ ກຖໍ.

໑໕໓໘. ປຈ຺ຈຍປຈ຺ຈຍຸປ຺ປນ຺ນາ, ຊາຕານນ຺ຕຣເຠທິໂນ;

ອນິຈ຺ຈາ ຈ ປຠງ຺ຄູ ຈ, ປລຸຊ຺ຊນ຺ຕິ ຈວນ຺ຕິ ຈ.

໑໕໓໙. ອທ຺ຘຸວາ ຈ ອສາຣາ ຈ, ວິຠວາ ຈ ວິນາສິໂນ;

ສງ຺ຂຕາ ວິປຣິຓາມ-ຘມ຺ມາ ອິຕ຺ຕຣກາລິກາ.

໑໕໔໐. ຂຍຘມ຺ມາ ວຍຘມ຺ມາ, ລຫຸກາລປ຺ປວຕ຺ຕິໂນ;

ຕາວກາລິກຘມ຺ມາ ຈ, ປຣິຕ຺ຕຏ຺ຐິຕິກາ ຕຖາ.

໑໕໔໑. ຂຓຕ຺ຕຍປຣິຈ຺ຉິນ຺ນາ, ປຸພ຺ພາປຣວິຈິຕ຺ຕກາ;

ປຸຣກ຺ຂຕາ ນິໂຣຘສ຺ສ, ສສ຺ສຕາ ນ ກຸທາຈນໍ.

໑໕໔໒. ຊາຍນ຺ຕິ ປຣິຫານາຍ, ນ ຕຸ ຊາຍນ຺ຕິ ວຸທ຺ຘິຍາ;

ຊິຍ຺ຍມານາວ ຕິຏ຺ຐນ຺ຕິ, ຊິຓ຺ຓາ ຠງ຺ຄປຣາຍຓາ.

໑໕໔໓. ອຫຸຕ຺ວາເຍວຸປ຺ປຊ຺ຊນ຺ຕິ, ນ ກຸໂຕຈິປິ ອາຄຕາ;

ຫຸຕ຺ວາ ອນ຺ຕຣຘາຍນ຺ຕິ, ນ ຕຸ ກຕ຺ຖຈິ ສຎ຺ຈິຕາ.

໑໕໔໔. ຕໍ ຕໍ ປຈ຺ຈຍສາມຄ຺ຄິ-ມຕ຺ຕລາຠາຍ ນິສ຺ສິຕາ;

ນິໂຣຘຘມ຺ມາ ຊາຍນ຺ຕິ, ຊາຕາ ພ຺ຍນ຺ຕິ ຠວນ຺ຕິ ເຕ.

໑໕໔໕. ຍຖາ ນທີ ປພ຺ພເຕຍ຺ຍາ, ຍຖາ ທີປສິຂາ ຕຖາ;

ສີຆສີຆໍ ປວຕ຺ຕນ຺ຕາ, ອຸປ຺ປຊ຺ຊນ຺ຕິ ວຍນ຺ຕິ ຈ.

໑໕໔໖. ຊາຕາ ຊາຕາ ນິຣຸຊ຺ຌນ຺ຕິ, ອຎ຺ເຎ ອຎ຺ເຎ ຕຸ ຊາຍເຣ;

ອວີຈິ ອນຸສມ຺ພນ຺ຘາ, ນ ຊານນ຺ຕິ ວິເສສໂຕ.

໑໕໔໗. ອິຕິ ນານປ຺ປກາເຣນ, ວິປສ຺ສນ຺ໂຕ ວິຈກ຺ຂໂຓ;

ອນິຈ຺ຈຠາວນໍ ຘີໂຣ, ປຣິປາເຈຕິ ສາຘຸກໍ.

໑໕໔໘. ທຸກ຺ຂາ ຈ ທຸກ຺ຂວຕ຺ຖູ ຈ, ອຠິຓ຺ຫປຣິປີຬິຕາ;

ໂຣຄາ ຄຓ຺ຑາ ຈ ສລ຺ລາ ຈ, ອຆໂຕ ຈ ອຸປທ຺ທວາ.

໑໕໔໙. ຠໂຍປສຄ຺ຄາຆມູລາ,

ສາສວາທີນວີຕິຕາ;

ອເລຓາສຣຓາຕາຓາ,

ວຘກາ ມາຣກາມິສາ.

໑໕໕໐. ຊາຕິຘມ຺ມາ ຊຣາພ຺ຍາຘິ-

ໂສໂກປາຍາສຠາຄິໂນ;

ປຣິເທວສຠາວາ ຈ,

ສໍກ຺ເລສາ ທຸກ຺ຂຠາຄິໂນ.

໑໕໕໑. ເຊຄຸຈ຺ຉາ ປຏິກູລາ ຈ, ພີຠຈ຺ຉາ ຈ ວິຣູປິໂນ;

ອຊຎ຺ຎາ ຈປລາ ຫີນາ, ທຸຄ຺ຄນ຺ຘາ ພາລເສວິຕາ.

໑໕໕໒. ໂສກນ຺ຕຣິກຕານິຈ຺ຈໍ, ຕຓ຺ຫາຍ ກຑ຺ຒິຕາ ຠຸສໍ;

ກປຓາ ທຸຄ຺ຄຕາ ທີນາ, ວິປນ຺ນາ ຈ ວິຆາຕິໂນ.

໑໕໕໓. ອຕ຺ຕລາຠໍ ຄເວສນ຺ຕິ, ຕໍຕໍປຈ຺ຈຍນິສ຺ສິຕາ;

ທຸກ຺ຂາຘິຏ຺ຐານມຈ຺ຈນ຺ຕໍ, ຊາຕາ ປຸນ ວິຫຎ຺ຎເຣ.

໑໕໕໔. ອຄ຺ຄິກູເປ ນິມຸຄ຺ຄາວ, ກ຺ເລສສນ຺ຕາປຠາຄິໂນ;

ໂອວິທ຺ຘາ ວິຍ ສຕ຺ຕີຫິ, ສງ຺ຂາຣາ ນິຈ຺ຈທຸກ຺ຂິຕາ.

໑໕໕໕. ຊາຍມານາ ຈ ຊິຍ຺ຍນ຺ຕາ, ມິຍ຺ຍນ຺ຕາ ຈ ຂເຓ ຂເຓ;

ປສຸກາ ວິຍ ນິຈ຺ຈມ຺ມາ, ຫຎ຺ຎນ຺ຕິ ເສຣິກາຕຸຣາ.

໑໕໕໖. ຕິລານິ ຕິລຍນ຺ເຕວ, ອຸຈ຺ຉຸຍນ຺ເຕວ ອຸຈ຺ຉຸໂຍ;

ອຸທຍພ຺ພຍາວສ຺ສໍ ເຕ, ປີຬຍນ຺ຕິ ອຠິຓ຺ຫໂສ.

໑໕໕໗. ມໂນຣມນວາກາຣາ, ວິປລ຺ລາສປຣິກ຺ຂຕາ;

ອິຣິຍາປຖສຎ຺ຉນ຺ນາ, ໂນປຕິຏ຺ຐນ຺ຕິ ທຸກ຺ຂໂຕ.

໑໕໕໘. ສງ຺ຂາເຣສຸ ປເນເຕສຸ, ເວທນາສ຺ສາທໂຣຘິໂນ;

ສາວ ສນ຺ທຸລສມ຺ພທ຺ຘາ, ສມ຺ໂມຫປຣິວາຣິຕາ.

໑໕໕໙. ‘‘ອທຸໍ ທຸກ຺ຂມິທໍ ທຸກ຺ຂ’’-ມິຕິ ສໍສາຣຈາຣິໂນ;

ທຸກ຺ຂເຫຕຸມຊານນ຺ຕາ, ສມ຺ຠມນ຺ຕິ ອວິທ຺ທສຸ.

໑໕໖໐. ສຸຂາກາຣມປສ຺ສນ຺ຕາ, ທຸກ຺ຂຠາຣນິປີຬິຕາ;

ປຕ຺ເຖນ຺ຕິ ທຸກ຺ຂເມວຎ຺ຎໍ, ພາລາ ພ຺ຍສນຠາຄິໂນ.

໑໕໖໑. ຈວນ຺ຕາ ອຸປປຊ຺ຊນ຺ຕາ, ຣຸກ຺ຂສາຂໍວ ມກ຺ກໂຏ;

ທຸກ຺ຂເມກໍ ວິມຸຈ຺ຈນ຺ຕິ, ຕໂຕ ຄຓ຺ຫນ຺ຕິ ຈາປຣໍ.

໑໕໖໒. ເຕ ທີຆຣຕ຺ຕໍ ໂສຈນ຺ຕິ, ຕຓ຺ຫາສລ຺ລສມປ຺ປິຕາ;

ທິຏ຺ຐິປາສສມຸເປຕາ, ມານຕ຺ຖມ຺ຠານຸສາຍິໂນ.

໑໕໖໓. ຕມາກາຣໍ ປນິຈ຺ເຈວໍ, ວິປສ຺ສນ຺ໂຕ ວິສາຣໂທ;

ທຸກ຺ຂານຸປສ຺ສນໍ ນາມ, ປຣິປາເຈຕິ ຠາວນໍ.

໑໕໖໔. ຘມ຺ມຏ຺ຐິຕິນິຍາມາ ຫິ, ຂນ຺ຘາຍຕນຘາຕຸໂຍ;

ອນຕ຺ຕາສສ຺ສຕນ຺ຕາ ຈ, ອີຫາໂຠຄວິວຊ຺ຊິຕາ.

໑໕໖໕. ປໂຍຊນມຘິຏ຺ຐາຍ, ນ ຕຸ ພ຺ຍາປາຣຍນ຺ຕິ ຈ;

ປຈ຺ຈຍປຈ຺ຈຍຸປ຺ປນ຺ນາ, ຊເນຕຸໍ ວາຖ ຊາຍິຕຸໍ.

໑໕໖໖. ຕຖາປິ ເຫຕຸສາມຄ຺ຄິ-ສມ຺ຠເວ ສມ຺ຠວນ຺ຕິ ເຕ;

ຕພ຺ຠາວຠາວິຠາເວນ, ອຎ຺ຎມຎ຺ຎປວຕ຺ຕິຕາ.

໑໕໖໗. ອຊາຍິຕຸໍ ນ ສກ຺ໂກນ຺ຕິ, ສຕິ ປຈ຺ຈຍສມ຺ຠເວ;

ປຈ຺ຈຍານມລາເຠ ຕຸ, ນ ຊາຍນ຺ຕິ ກຸທາຈນໍ.

໑໕໖໘. ນ ກິຎ຺ເຈຕ຺ຖ ອເປກ຺ຂິຕ຺ວາ, ສມຄ຺ຄາ ໂຫນ຺ຕິ ປຈ຺ຈຍາ;

ນ ຊເນຕຸໍ ນ ສກ຺ໂກນ຺ຕິ, ສມຄ຺ຄາ ຈ ກຸທາຈນໍ.

໑໕໖໙. ຍຖາປຈ຺ຈຍລາເຠນ, ປວຕ຺ຕນ຺ຕິ ຍຖາ ຕຖາ;

ຣກ຺ຂິຕາ ວາ ວິຘາຕາ ວາ, ນຕ຺ຖິ ອສ຺ສາມິກາ ຕຖາ.

໑໕໗໐. ‘‘ອຫໍ ມມ’’ນ຺ຕິ ຄຓ຺ຫນ຺ຕາ, ປຣິຓາເມນ຺ຕິ ອຎ຺ຎຖາ;

ວິສ຺ສສນ຺ຕາ ຫຣນ຺ເຕເຕ, ປຣາຠູຕາ ປລມ຺ຠິໂນ.

໑໕໗໑. ຣິຕ຺ຕາ ຕຸຈ຺ຉາ ຈ ສຸຎ຺ຎາ ຈ, ວິວິຕ຺ຕາ ສາຣວຊ຺ຊິຕາ;

ສລກ຺ຂຓປຣິຈ຺ຉິນ຺ນາ, ຘມ຺ມາ ນຕ຺ເຖຕ຺ຖ ປຸຄ຺ຄໂລ.

໑໕໗໒. ຊາຍມານາ ຈ ຊິຍ຺ຍນ຺ຕາ, ມິຍ຺ຍມານາ ຈ ສງ຺ຂຕາ;

ວິວສາ ປຣິວຕ຺ຕນ຺ຕິ, ວໂສ ເຕສໍ ນ ກຕ຺ຖຈິ.

໑໕໗໓. ນ ເຕສຸ ກສ຺ສຈິສ຺ເສຣໍ, ນ ເຕສຎ຺ຈຕ຺ຖິ ກຕ຺ຖຈິ;

ນ ຈຕ຺ຕນີຕິ ສງ຺ຂາຣາ, ອາຘິປຈ຺ຈວິວຊ຺ຊິຕາ.

໑໕໗໔. ກທລີປຕ຺ຕວຏ຺ຏີວ, ອຎ຺ຎມຎ຺ຎປຕິຏ຺ຐິຕາ;

ສຫຊາຕຄ຺ຆນີຠູຕາ, ໂນປຏ຺ຐນ຺ຕິ ອນຕ຺ຕໂຕ.

໑໕໗໕. ອຣູປນິສ຺ສິຕໍ ຣູປໍ, ອຣູປໍ ຣູປນິສ຺ສິຕໍ;

ຊຈ຺ຈນ຺ຘປີຐສປ຺ປີວ, ອຎ຺ຎມຎ຺ຎວວຕ຺ຖິຕໍ.

໑໕໗໖. ຍນ຺ຕສຸຕ຺ເຕນ ຍນ຺ຕໍວ, ກາຍຍນ຺ຕໍ ປວຕ຺ຕຕິ;

ນາມາວກຑ຺ຒິຕໍ ຕຕ຺ຖ, ນຕ຺ຖິ ອຕ຺ຕາ ສຍໍວສີ.

໑໕໗໗. ເຈໂຕວິປ຺ຜາຣນິປ຺ຜນ຺ນາ, ວາໂຍຘາຕຸສມຸຏ຺ຐິຕາ;

ອິຣິຍາປຖວິຎ຺ຎຕ຺ຕິວິກາຣາ ປາລກາ ມຕາ.