໒໑. ເອກວີສຕິໂມ ປຣິຈ຺ເຉໂທ

໑໒໙໘. ອຏ຺ຐຎາຓວເສເນວ, ສິຂາປກ຺ກາ ວິປສ຺ສນາ;

ນວມໍ ປຏິປທາຎາຓ-ທສ຺ສນນ຺ຕິ ປວຸຈ຺ຈຕິ.

໑໒໙໙. ອຏ຺ຐ ຎາຓານິ ນາເມຕ຺ຖ, ເວທິຕພ຺ພານິ ວິຎ຺ຎຸນາ;

ອຸປກ຺ເລສວິນິມຸຕ຺ຕໍ, ຎາຓໍ ສຸວິສທໍ ປນ.

໑໓໐໐. ອຸທຍພ຺ພເຍ ຈ ຠງ຺ເຄ ຈ, ຠເຍ ອາທີນເວ ຕຖາ;

ນິພ຺ພິທາປສ຺ສນາຎາຓໍ, ຎາຓໍ ມຸຈ຺ຈິຕຸກມ຺ຍຕາ.

໑໓໐໑. ປຏິສງ຺ຂາ ຈ ສງ຺ຂາເຣ, ອຸເປກ຺ຂາຎາຓມຏ຺ຐມໍ;

ອິມານິ ອຏ຺ຐ ຎາຓານິ, ນວມໍ ສຈ຺ຈານຸໂລມກໍ.

໑໓໐໒. ສຈ຺ຈານຸໂລມຎາຓນ຺ຕິ, ອນຸໂລມໍ ປວຸຈ຺ຈຕິ;

ຕໍ ສມ຺ປາເທຕຸກາເມນ, ໂຍຄາວຈຣຠິກ຺ຂຸນາ.

໑໓໐໓. ອຸທຍພ຺ພຍຎາຓໍ ຕໍ, ອາທິໍ ກຕ຺ວາ ປນຏ຺ຐສຸ;

ເອເຕສຸ ປນ ຎາເຓສຸ, ໂຍໂຄ ກຣຓິໂຍ ປນ.

໑໓໐໔. ຍຖານຸກ຺ກມໂຕ ຕສ຺ສ, ເຕສຸ ຎາເຓສຸ ອຏ຺ຐສຸ;

ອນິຈ຺ຈາທິວເສເນວ, ໂຍຄໍ ກຕ຺ວາ ຐິຕສ຺ສ ຫິ.

໑໓໐໕. ອນິຈ຺ຈໍ ທຸກ຺ຂມນຕ຺ຕາຕິ, ສງ຺ຂາເຣ ອນຸປສ຺ສໂຕ;

ອຏ຺ຐນ຺ນໍ ປນ ຎາຓານໍ, ວເສນ ປນ ໂຍຄິໂນ.

໑໓໐໖. ວິປສ຺ສນາ ສິຂາປຕ຺ຕາ, ໂຫຕິ ວຸຏ຺ຐານຄາມິນີ;

ສຈ຺ຈານຸໂລມຎາຓນ຺ຕິ, ອຍເມວ ປວຸຈ຺ຈຕິ.

໑໓໐໗. ສງ຺ຂາຣຸເປກ຺ຂາຎາຓໍ ຕໍ, ອາເສວນ຺ຕສ຺ສ ໂຍຄິໂນ;

ອິທານິ ຕສ຺ສ ມຄ຺ໂຄ ຈ, ສມຸປ຺ປຊ຺ຊິສ຺ສຕີຕິ ຫິ.

໑໓໐໘. ສງ຺ຂາຣຸເປກ຺ຂາ ສງ຺ຂາເຣ, ອນິຈ຺ຈາ ທຸກ຺ຂາຕິ ວາ ຕຖາ;

ສມ຺ມສິຕ຺ວາ ຠວງ຺ຄໍ ຕຸ, ປຸນ ໂວຕຣເຕວ ສາ.

໑໓໐໙. ຠວງ຺ຄານນ຺ຕຣໍ ສງ຺ຂາຣຸ-ເປກ຺ຂາຄຕນເຍນ ຕຸ;

ອນິຈ຺ຈາທິວເສເນວ, ສງ຺ຂາເຣ ປນ ໂຄຈຣໍ.

໑໓໑໐. ກຸຣຸມານໍ ມໂນທ຺ວາເຣ, ຊາຍຕາວຊ຺ຊນໍ ຕໂຕ;

ຠວງ຺ຄາວຏ຺ຏນໍ ກຕ຺ວາ, ຊາຕສ຺ສານນ຺ຕຣໍ ປນ.

໑໓໑໑. ສງ຺ຂາເຣ ໂຄຈຣໍ ກຕ຺ວາ, ປຐມໍ ຊວນມານສໍ;

ອຸປ຺ປຊ຺ຊຕີຕິ ຕໍ ຈິຕ຺ຕໍ, ປຣິກມ຺ມນ຺ຕິ ວຸຈ຺ຈຕິ.

໑໓໑໒. ຕທນນ຺ຕຣເມວຎ຺ຎໍ, ສງ຺ຂາຣາຣມ຺ມຓໍ ປຸນ;

ທຸຕິຍໍ ຊວນໍ ໂຫຕິ, ອຸປຈາຣນ຺ຕິ ຕໍ ມຕໍ.

໑໓໑໓. ຕທນນ຺ຕຣໍ ຕໍ ໂຫຕິ, ຕຖາ ສງ຺ຂາຣໂຄຈຣໍ;

ຕຕິຍໍ ຊວນຈິຕ຺ຕໍ, ອນຸໂລມນ຺ຕິ ສຎ຺ຎິຕໍ.

໑໓໑໔. ປຸຣິມານໍ ປນຏ຺ຐນ຺ນໍ, ຎາຓານໍ ອນຸໂລມໂຕ;

ໂພຘິປກ຺ຂິຍຘມ຺ມານໍ, ອຸທ຺ຘຎ຺ຈ ອນຸໂລມໂຕ.

໑໓໑໕. ເຕເນວ ຕໍ ຫິ ສຈ຺ຈານຸໂລມຎາຓໍ ປວຸຈ຺ຈຕິ;

ອິທໍ ຫິ ປນ ສຈ຺ຈານຸ-ໂລມຎາຓໍ ມເຫສິນາ.

໑໓໑໖. ‘‘ວຸຏ຺ຐານຄາມິນີຍາ ຫິ, ປຣິໂຍສານ’’ນ຺ຕິ ຠາສິຕໍ;

ເຎຍ຺ຍໍ ສພ຺ພປກາເຣນ, ປຣິໂຍສານນ຺ຕິ ໂຄຕ຺ຣຠຸ.

໑໓໑໗. ອິຕິເນເກຫິ ນາເມຫິ, ກິຕ຺ຕິຕາຍາ ມເຫສິນາ;

ວຸຏ຺ຐານຄາມິນີ ສນ຺ຕາ, ປຣິສຸທ຺ຘາ ວິປສ຺ສນາ.

໑໓໑໘. ວຸຏ຺ຐາຕຸກາໂມ ສໍສາຣທຸກ຺ຂປງ຺ກາ ມຫພ຺ຠຍາ;

ກເຣຍ຺ຍ ສຕຕໍ ຕຕ຺ຖ, ໂຍຄໍ ປຓ຺ຑິຕຊາຕິໂກ.

ອິຕິ ອຠິຘມ຺ມາວຕາເຣ ປຏິປທາຎາຓທສ຺ສນວິສຸທ຺ຘິນິທ຺ເທໂສ ນາມ

ເອກວີສຕິໂມ ປຣິຈ຺ເຉໂທ.