໒໒. ພາວີສຕິໂມ ປຣິຈ຺ເຉໂທ

ຎາຓທສ຺ສນວິສຸທ຺ຘິນິທ຺ເທໂສ

໑໓໑໙. ອິໂຕ ປຣໍ ຕຸ ຠິກ຺ຂຸສ຺ສ, ໂຫຕິ ໂຄຕ຺ຣຠຸມານສໍ;

ອາວຊ຺ຊນິຍຐານຕ຺ຕາ, ມຄ຺ຄຈິຕ຺ຕສ຺ສ ຕໍ ປນ.

໑໓໒໐. ນ ຈປ຺ປຏິປທາຎາຓ-ທສ຺ສນໍ ວາ ຕເຖວ ຈ;

ຎາຓທສ຺ສນສຸທ຺ຘິໍ ວາ, ຠຊເຕ ນ ກຸທາຈນໍ.

໑໓໒໑. ອຸຠິນ຺ນມນ຺ຕຣາ ເອຕໍ, ອພ຺ໂພຫາຣິກເມວ ຕໍ;

ວິປສ຺ສນາຍ ໂສຕສ຺ມິໍ, ປຕິຕຕ຺ຕາ ວິປສ຺ສນາ.

໑໓໒໒. ໂປຖຸຊ຺ຊນິກໂຄຕ຺ຕໍ ວາ, ອຠິຠຸຍ຺ຍ ປວຕ຺ຕິໂຕ;

ໂຄຕ຺ຕໍ ວຸຈ຺ຈຕິ ນິພ຺ພານໍ, ຕໂຕ ຠວຕິ ໂຄຕ຺ຣຠຸ.

໑໓໒໓. ຎາຓໍ ຈຕູສຸ ມຄ຺ເຄສຸ, ຎາຓທສ຺ສນສຸທ຺ຘິກໍ;

ຕຕ຺ຖ ຕໍ ປຐມໍ ມຄ຺ຄໍ, ສມ຺ປາເທຕຸໍ ປນິຈ຺ຉຕາ.

໑໓໒໔. ອຎ຺ຎໍ ກິຎ຺ຈິປິ ກາຕພ຺ພໍ, ຠິກ຺ຂຸນາ ເຕນ ນຕ຺ຖິ ຕໍ;

ຍຎ຺ຫິ ເຕນ ຈ ກາຕພ຺ພໍ, ສິຍາ ຕໍ ກຕເມວ ຕຸ.

໑໓໒໕. ອນຸໂລມາວສານຎ຺ຫິ, ສູຣໍ ຕິກ຺ຂໍ ວິປສ຺ສນໍ;

ອຸປ຺ປາເທນ຺ເຕນ ຕໍ ສພ຺ພໍ, ກຕເມວ ຈ ໂຍຄິນາ.

໑໓໒໖. ຕສ຺ສານຸໂລມຎາຓສ຺ສ, ອນ຺ເຕ ຕຸ ອນິມິຕ຺ຕກໍ;

ວິສງ຺ຂາຣໍ ນິໂຣຘຎ຺ຈ, ນິພ຺ພານໍ ອມຕໍ ປທໍ.

໑໓໒໗. ໂຄຈຣໍ ກຸຣຸມານໍ ຕໍ, ນິພ຺ພານາຣມ຺ມເຓ ປນ;

ປຐມາວຊ຺ຊນຎ຺ເຈວ, ປຐມາໂຠຄຕາປິ ຈ.

໑໓໒໘. ມຄ຺ຄສ຺ສານນ຺ຕຣາທີຫິ, ປຈ຺ຈເຍຫິ ປນຈ຺ຉຫິ;

ຕສ຺ສ ປຈ຺ຈຍຠາວຎ຺ຈ, ສາຘຍນ຺ຕໍ ຕໂຕ ປນ.

໑໓໒໙. ວິປສ຺ສນາຍ ມຸທ຺ຘຎ຺ຫິ, ສິຂາປຕ຺ຕາຍ ຕາຍ ຕໍ;

ອຸປ຺ປຊ຺ຊຕິ ອນາວຕ຺ຕໍ-ຣມ຺ມຓໍ ຕສ຺ສ ໂຄຕ຺ຣຠຸ.

໑໓໓໐. ເອເກນາວຊ຺ຊເນເນວ, ເອກິສ຺ສາເຍວ ວີຖິຍາ;

ນານາຣມ຺ມຓຕາ ຈານຸ-ໂລມໂຄຕ຺ຣຠຸເຈຕສໍ.

໑໓໓໑. ຐຕ຺ວາ ອາວຊ຺ຊນຏ຺ຐາເນ, ຕມນາວຊ຺ຊນມ຺ປິ ຈ;

ມຄ຺ຄສ຺ສ ປນ ຕໍ ສຎ຺ຎໍ, ທຕ຺ວາ ວິຍ ນິຣຸຊ຺ຌຕິ.

໑໓໓໒. ມຄ຺ໂຄປິ ເຕນ ຕໍ ທິນ຺ນໍ, ອມຸຎ຺ຈິຕ຺ວາວ ສຎ຺ຫິຕໍ;

ຕໍ ຎາຓມນຸພນ຺ຘນ຺ໂຕ, ຊາຍເຕ ຕທນນ຺ຕຣໍ.

໑໓໓໓. ກທາຈິປິ ອນິພ຺ພິທ຺ຘປຸພ຺ພໍ ມຄ຺ໂຄ ປເນສ ຫິ;

ໂລຠໍ ໂທສຎ຺ຈ ໂມຫຎ຺ຈ, ວິທ຺ຘໍສນ຺ໂຕວ ຊາຍຕິ.

໑໓໓໔. ນ ເກວລມຍໍ ມຄ຺ໂຄ, ໂທສນາສນເມວ ຈ;

ກໂຣຕິ ອຖ ໂຂປາຍທ຺ວາຣານິປິ ປິເຘຕິ ຈ.

໑໓໓໕. ອນາມຕຄ຺ຄສໍສາຣວຏ຺ຏທຸກ຺ຂມໂຫທຘິໍ;

ອປາຣມຕິໂຆຣຎ຺ຈ, ໂສເສຕິ ຈ ອເສສໂຕ.

໑໓໓໖. ມິຈ຺ຉາມຄ຺ຄໍ ປນຏ຺ຐງ຺ຄໍ, ຊາຍມາໂນ ຈ ອຸຊ຺ຌຕິ;

ສພ຺ພເວຣຠຍາເນຕ຺ຖ, ນິຈ຺ຈໍ ວູປສເມຕິ ຈ.

໑໓໓໗. ພຸທ຺ຘສ຺ໂສຣສປຸຕ຺ຕຕ຺ຕໍ, ອຸປເນຕິ ນຍໍ ປນ;

ອານິສໍເສ ອເນເກປິ, ປວຕ຺ຕຍຕິ ໂຍຄິໂນ.

໑໓໓໘. ທາຍເກນານິສໍສານໍ, ອເນເກສມເນນ ຈ;

ອາທິມຄ຺ເຄນ ສໍຍຸຕ຺ຕໍ, ຎາຓນ຺ຕິ ຎາຓທສ຺ສນໍ.

ປຐມມຄ຺ຄຎາຓໍ.

໑໓໓໙. ຕສ຺ເສວານນ຺ຕຣໍ ຕສ຺ສ, ວິປາກາ ທ຺ເວປິ ຕີຓິ ວາ;

ຜລຈິຕ຺ຕານິ ຊາຍນ຺ເຕ, ນ ຊາຍນ຺ເຕ ຕໂຕ ປຣໍ.

໑໓໔໐. ເກຈິ ເອກຎ຺ຈ ທ຺ເວ ຕີຓິ, ຈຕ຺ຕາຣີຕິ ວທນ຺ຕິ ຕຸ;

ນ ປເນຕໍ ຄເຫຕພ຺ພໍ, ອຊານິຕ຺ວາ ວທນ຺ຕິ ເຕ.

໑໓໔໑. ເອກສ຺ສາເສວນໍ ນຕ຺ຖິ, ຕສ຺ມາ ທ຺ເວ ອນຸໂລມກາ;

ເຕຫິ ອາເສວນໍ ລທ຺ຘາ, ຕຕິຍໍ ໂຫຕິ ໂຄຕ຺ຣຠຸ.

໑໓໔໒. ຈຕຸຕ຺ຖໍ ມຄ຺ຄຈິຕ຺ຕໍ ຕຸ,

ຕສ຺ມາ ຕີຓິ ຜລານິ ຫິ;

ອນຸໂລມາ ຕໂຍ ໂຫນ຺ຕິ,

ຈຕຸຕ຺ຖໍ ໂຫຕິ ໂຄຕ຺ຣຠຸ.

໑໓໔໓. ປຎ຺ຈມໍ ມຄ຺ຄຈິຕ຺ຕຎ຺ຈ, ຜລານິ ທ຺ເວ ຕໂຕ ປນ;

ສຕ຺ຕຈິຕ຺ຕປຣມາວ, ເອກາວຊ຺ຊນວີຖິ ຫິ.

໑໓໔໔. ເອຕ຺ຕາວຕາ ປເນໂສ ຫິ, ໂສຕາປນ຺ໂນຕິ ວຸຈ຺ຈຕິ;

ຜລສ຺ສ ປຣິໂຍສາເນ, ຠວງ຺ໂຄຕ຺ຕຣຓໍ ສິຍາ.

໑໓໔໕. ຕໂຕ ຠວງ຺ຄໍ ຉິນ຺ທິຕ຺ວາ, ມຄ຺ຄເປກ຺ຂນເຫຕຸກໍ;

ອຸປ຺ປຊ຺ຊຕິ ມໂນທ຺ວາເຣ, ອາວຊ຺ຊນມໂນ ປນ.

໑໓໔໖. ຕສ຺ມິໍ ນິຣຸທ຺ເຘ ມຄ຺ຄສ຺ສ, ປຈ຺ຈເວກ຺ຂຓສຎ຺ຎິຕາ;

ຊວນານິ ຫິ ຊາຍນ຺ເຕ, ສຕ຺ເຕວ ປຏິປາຏິຍາ.

໑໓໔໗. ເອເສວ ຈ ນໂຍ ເຎຍ຺ໂຍ, ຜລາທີນມ຺ປິ ເປກ຺ຂເນ;

ປຈ຺ຈເວກ຺ຂຓຎາຓານິ, ຠວນ຺ເຕກູນວີສຕິ.

໑໓໔໘. ມຄ຺ໂຄ ຜລໍ ປຫີນາ ຈ, ກິເລສາ ອວສິຏ຺ຐກາ;

ນິພ຺ພານຎ຺ເຈຕິ ປຎ຺ເຈເຕ, ປຈ຺ຈເວກ຺ຂຓຠູມິໂຍ.

໑໓໔໙. ເອວໍ ໂສ ປຈ຺ຈເວກ຺ຂິຕ຺ວາ, ໂສຕາປນ຺ໂນປປຕ຺ຕິຍາ;

ໂຍຄມາຣຠເຕ ຘີໂຣ, ທຸຕິຍາຍ ຈ ຠູມິຍາ.

໑໓໕໐. ຂນ຺ຘປຎ຺ຈກສງ຺ຂາຕໍ, ຕໍ ສງ຺ຂາຣຄຕໍ ປຸນ;

ອນິຈ຺ຈໍ ທຸກ຺ຂມນຕ຺ຕາຕິ, ຎາເຓນ ປຣິມຊ຺ຊຕິ.

໑໓໕໑. ຕໂຕ ວິປສ຺ສນາວີຖິ-ໂມຄາຫຕິ ຈ ຕາວເທ;

ຕສ຺ເສວໍ ປຏິປນ຺ນສ຺ສ, ເຫຏ຺ຐາ ວຸຕ຺ຕນເຍນ ຕຸ.

໑໓໕໒. ຕໂຕ ສງ຺ຂາຣຸເປກ຺ຂາຍ, ອວສາເນ ຕເຖວ ຈ;

ເອກາວຊ຺ຊນວາຣສ຺ມິໍ, ໂຄຕ຺ຣຠຸສ຺ສ ອນນ຺ຕຣໍ.

໑໓໕໓. ພ຺ຍາປາທກາມຣາຄານໍ, ຕນຸຠາວໍ ຕຸ ສາຘຍໍ;

ສກທາຄາມິມຄ຺ໂຄຍໍ, ຊາຍເຕ ທຸຕິໂຍ ປນ.

ທຸຕິຍມຄ຺ຄຎາຓໍ.

໑໓໕໔. ອິມສ຺ສາປິ ຈ ຎາຓສ຺ສ, ເຫຏ຺ຐາ ວຸຕ຺ຕນເຍນິຘ;

ຜລຈິຕ຺ຕານິ ເຎຍ຺ຍານິ, ວິຎ຺ຎຸນາ ທ຺ເວປິ ຕີຓິ ວາ.

໑໓໕໕. ເອຕ຺ຕາວຕາ ປເນໂສ ຫິ, ສກທາຄາມິ ນາມຍໍ;

ສກິເທວ ອິມໍ ໂລກໍ, ອາຄນ຺ຕ຺ວານ຺ຕກໂຣ ຠເວ.

໑໓໕໖. ເຫຏ຺ຐາ ວຸຕ຺ຕນເຍເນວ, ປຎ຺ຈຘາ ປຈ຺ຈເວກ຺ຂຓໍ;

ເອວໍ ໂສ ປຈ຺ຈເວກ຺ຂິຕ຺ວາ, ສກທາຄາມິປຕ຺ຕິຍາ.

໑໓໕໗. ໂຍຄມາຣຠເຕ ຘີໂຣ, ຕຕິຍາຍ ຈ ຠູມິຍາ;

ພ຺ຍາປາທກາມຣາຄານໍ, ປຫານາຍ ຈ ປຓ຺ຑິໂຕ.

໑໓໕໘. ຂນ຺ຘປຎ຺ຈກສງ຺ຂາຕໍ, ຕໍ ສງ຺ຂາຣຄຕໍ ປນ;

ອນິຈ຺ຈໍ ທຸກ຺ຂມນຕ຺ຕາຕິ, ຎາເຓນ ປຣິມຊ຺ຊຕິ.

໑໓໕໙. ຕໂຕ ວິປສ຺ສນາວີຖິ-ໂມຄາຫຕິ ຈ ຕາວເທ;

ຕສ຺ເສວໍ ປຏິປນ຺ນສ຺ສ, ເຫຏ຺ຐາ ວຸຕ຺ຕນເຍນ ຕຸ.

໑໓໖໐. ຕໂຕ ສງ຺ຂາຣຸເປກ຺ຂາຍ, ອວສາເນ ຕເຖວ ຈ;

ເອກາວຊ຺ຊນວີຖິມ຺ຫິ, ໂຄຕ຺ຣຠຸສ຺ສ ອນນ຺ຕຣໍ.

໑໓໖໑. ພ຺ຍາປາທກາມຣາຄານໍ, ມູລຆາຕໍ ຕຸ ສາຘຍໍ;

ຕສ຺ສານາຄາມິມຄ຺ໂຄຍໍ, ຊາຍເຕ ຕຕິໂຍ ປນ.

ຕຕິຍມຄ຺ຄຎາຓໍ.

໑໓໖໒. ອິມສ຺ສາປິ ຈ ຎາຓສ຺ສ, ເຫຏ຺ຐາ ວຸຕ຺ຕນເຍນິຘ;

ປວຕ຺ຕິ ຜລຈິຕ຺ຕານໍ, ເວທິຕພ຺ພາ ວິຠາວິນາ.

໑໓໖໓. ເອຕ຺ຕາວຕາ ປເນໂສປິ, ໂຫຕິນາຄາມິ ນາມຍໍ;

ຕຕ຺ເຖວ ປຣິນິພ຺ພາຍີ, ອນາວຕ຺ຕິສຠາວໂຕ.

໑໓໖໔. ເຫຏ຺ຐາ ວຸຕ຺ຕນເຍເນວ, ປຎ຺ຈຘາ ປຈ຺ຈເວກ຺ຂຓໍ;

ເອວໍ ໂສ ປຈ຺ຈເວກ຺ຂິຕ຺ວາ, ອນາຄາມິຣິຍສາວໂກ.

໑໓໖໕. ໂຍຄມາຣຠເຕ ຘີໂຣ, ຈຕຸຕ຺ຖາຍ ຈ ຠູມິຍາ;

ປຕ຺ຕິຍາຣູປຣາຄາທິ-ປຫານາຍ ຈ ປຓ຺ຑິໂຕ.

໑໓໖໖. ຕເຖວ ສງ຺ຂາຣຄຕໍ, ອນິຈ຺ຈາທິວເສນ ໂສ;

ປຣິວຕ຺ຕຕິ ຎາເຓນ, ຕເຖວ ປຣິມຊ຺ຊຕິ.

໑໓໖໗. ຕໂຕ ວິປສ຺ສນາວີຖິ-ໂມຄາຫຕິ ຈ ຕາວເທ;

ຕສ຺ເສວໍ ປຏິປນ຺ນສ຺ສ, ເຫຏ຺ຐາ ວຸຕ຺ຕນເຍນ ຕຸ.

໑໓໖໘. ຕໂຕ ສງ຺ຂາຣຸເປກ຺ຂາຍ, ອວສາເນ ຕເຖວ ຈ;

ເອກາວຊ຺ຊນວາຣສ຺ມິໍ, ໂຄຕ຺ຣຠຸສ຺ສ ອນນ຺ຕຣໍ.

໑໓໖໙. ຕສ຺ສາຣຫຕ຺ຕມຄ຺ໂຄຍໍ,

ຊາຍເຕ ຕຸ ຕໂຕ ປຣໍ;

ຣູປຣາຄາທິໂທສານໍ,

ວິທ຺ຘໍສາຍ ກໂຣ ປນ.

ຈຕຸຕ຺ຖມຄ຺ຄຎາຓໍ.

໑໓໗໐. ອິມສ຺ສາປິ ຈ ຎາຓສ຺ສ, ເຫຏ຺ຐາ ວຸຕ຺ຕນເຍນິຘ;

ປວຕ຺ຕິ ຜລຈິຕ຺ຕານໍ, ເວທິຕພ຺ພາ ວິຠາວິນາ.

໑໓໗໑. ເອຕ຺ຕາວຕາ ປເນໂສ ຫິ,

ອຣຫາ ນາມ ອຏ຺ຐໂມ;

ອຣິໂຍ ປຸຄ຺ຄໂລ ໂຫຕິ,

ມຫາຂີຓາສໂວ ອຍໍ.

໑໓໗໒. ອນຸປ຺ປຕ຺ຕສທຕ຺ໂຖ ຈ,

ຂີຓສໍໂຍຊໂນ ມຸນິ;

ສເທວກສ຺ສ ໂລກສ຺ສ,

ທກ຺ຂິເຓຍ຺ໂຍ ອນຸຕ຺ຕໂຣ.

໑໓໗໓. ເອຕ຺ຕາວຕາ ຈຕສ຺ໂສປິ, ຎາຓທສ຺ສນສຸທ຺ຘິໂຍ;

ຫິຕຕ຺ຖາຍ ຈ ຠິກ຺ຂູນໍ, ສງ຺ເຂເປເນວ ທສ຺ສິຕາ.

໑໓໗໔. ສທ຺ເຘນ ສມ຺ມາ ປນ ຠາວນີຍາ,

ອຣິຍາຍ ປຎ຺ຎາຍ ຈ ຠາວນາຍ;

ວິສຸທ຺ຘິກາເມນ ຕໂປຘເນນ,

ຠວກ຺ຂຍໍ ປຕ຺ຖຍຕາ ພຸເຘນ.

ອິຕິ ອຠິຘມ຺ມາວຕາເຣ ຎາຓທສ຺ສນວິສຸທ຺ຘິນິທ຺ເທໂສ ນາມ

ພາວີສຕິໂມ ປຣິຈ຺ເຉໂທ.