໒໐. ວີສຕິໂມ ປຣິຈ຺ເຉໂທ

ມຄ຺ຄາມຄ຺ຄຎາຓທສ຺ສນວິສຸທ຺ຘິນິທ຺ເທໂສ

໑໒໖໓. ກລາປສມ຺ມສເນເນວ,

ໂຍໂຄ ກຣຓິໂຍ ສິຍາ;

ມຄ຺ຄາມຄ຺ເຄ ຕຸ ຎາຓໍ ຕ-

ມຘິຄນ຺ຕຸໍ ປນິຈ຺ຉຕາ.

໑໒໖໔. ປຈ຺ຈຸປ຺ປນ຺ນສ຺ສ ຘມ຺ມສ຺ສ, ນິພ຺ພຕ຺ຕິ ອຸທໂຍ ມໂຕ;

ວໂຍ ວິປຣິຓາໂມຕິ, ຕສ຺ເສວ ສມຸທີຣິຕາ.

໑໒໖໕. ອນຸປສ຺ສນາປິ ຎາຓນ຺ຕິ, ວຣຎາເຓນ ເທສິຕໍ;

ໂສ ປເນວໍ ປຊານາຕິ, ໂຍຄາວຈຣມາຓໂວ.

໑໒໖໖. ອິມສ຺ສ ນາມຣູປສ຺ສ, ປຸພ຺ເພ ອຸປ຺ປຕ຺ຕິໂຕ ປນ;

ນິຈໂຍ ຣາສິ ວາ ນຕ຺ຖິ, ຕຖາ ອຸປ຺ປຊ຺ຊໂຕປິ ຈ.

໑໒໖໗. ຣາສິໂຕ ນິຈຍາ ວາປິ, ນຕ຺ຖິ ອາຄມນນ຺ຕິ ຈ;

ຕຖາ ນິຣຸຊ຺ຌມານສ຺ສ, ນ ທິສາຄມນນ຺ຕິ ຈ.

໑໒໖໘. ນິຣຸທ຺ຘສ຺ສາປິ ເອກສ຺ມິໍ, ຐາເນ ນຕ຺ຖິ ຈໂຍຕິ ຈ;

ເອຕ຺ຖ ວີຓູປມາ ວຸຕ຺ຕາ, ເອຕສ຺ສຕ຺ຖສ຺ສ ທີປເນ.

໑໒໖໙. ອຸທພ຺ພຍມນກ຺ກາຣເມວໍ ສງ຺ເຂປໂຕ ປນ;

ກຕ຺ວາ ຕສ຺ເສວ ຎາຓສ຺ສ, ວິຠງ຺ຄສ຺ສ ວເສນ ຕຸ.

໑໒໗໐. ‘‘ອວິຊ຺ຊາສມຸທຍາ ຣູປສມຸທໂຍ’’ຕິ ຫິ ອາທິນາ;

ນເຍເນເກກຂນ຺ຘສ຺ສ, ອຸທຍພ຺ພຍທສ຺ສເນ.

໑໒໗໑. ທສ ທສາຕິ ກຕ຺ວານ, ວຸຕ຺ຕາ ປຎ຺ຎາສລກ຺ຂຓາ;

ເຕສໍ ປນ ວເສນາປິ, ຘມ຺ເມ ສມນຸປສ຺ສຕິ.

໑໒໗໒. ເອວໍ ຣູປຸທໂຍ ໂຫຕິ, ເອວມສ຺ສ ວໂຍ ອິຕິ;

ອຸເທຕິ ເອວໍ ຣູປມ຺ປິ, ເອວໍ ຣູປໍ ຕຸ ເວຕິ ຈ.

໑໒໗໓. ເອວໍ ປຈ຺ຈຍໂຕເປຕ຺ຖ, ຂຓໂຕ ອຸທຍພ຺ພຍໍ;

ປສ຺ສໂຕ ສພ຺ພຘມ຺ມາ ຈ, ປາກຏາ ໂຫນ຺ຕິ ຕສ຺ສ ເຕ.

໑໒໗໔. ອຸທເກ ທຓ຺ຑຣາຊີວ, ອາຣຄ຺ເຄຣິວ ສາສໂປ;

ວິຊ຺ຊຸປ຺ປາທາວ ຘມ຺ມາ ເຕ, ປຣິຕ຺ຕຏ຺ຐາຍິໂນ ສິຍຸໍ.

໑໒໗໕. ກທລີສຸປິນາລາຕຈກ຺ກມາຍຸປມາ ອິເມ;

ອສາຣາ ປນ ນິສ຺ສາຣາ, ຫຸຕ຺ວາ ຂາຍນ຺ຕິ ໂຍຄິໂນ.

໑໒໗໖. ເອວເມຕ຺ຕາວຕາ ເຕນ, ອຸທຍພ຺ພຍທສ຺ສນໍ;

ລກ຺ຂຓານິ ຈ ປຎ຺ຎາສ, ປຏິວິຊ຺ຌ ຐິຕໍ ປນ.

໑໒໗໗. ຎາຓໍ ອຘິຄຕໍ ໂຫຕິ, ຕຣຸຓໍ ປຐມໍ ປນ;

ຍສ຺ສ ຈາຘິຄມາ ໂຍຄີ, ໂຫຕາຣທ຺ຘວິປສ຺ສໂກ.

໑໒໗໘. ວິປສ຺ສນາຍ ເຫຕາຍ,

ກຣຸຓາຍາຖ ໂຍຄິໂນ;

ວິປສ຺ສກສ຺ສ ຊາຍນ຺ເຕ,

ອຸປກ຺ເລສາ ທເສວິເມ.

໑໒໗໙. ໂອຠາໂສ ປີຕິ ປສ຺ສທ຺ຘິ, ຎາຓໍ ສທ຺ຘາ ສຕີ ສຸຂໍ;

ອຸເປກ຺ຂາ ວີຣິຍໍ ນິກນ຺ຕີຕິ, ອຸປກ຺ເລສາ ທເສວິເມ.

໑໒໘໐. ສມ຺ປຕ຺ຕປຏິເວຘສ຺ສ, ໂສຕາປນ຺ນາທິໂນປິ ຈ;

ຕຖາ ວິປ຺ປຏິປນ຺ນສ຺ສ, ອຸປກ຺ເລສາ ນ ຊາຍເຣ.

໑໒໘໑. ສມ຺ມາວ ປຏິປນ຺ນສ຺ສ, ຍຸຕ຺ຕໂຍຄສ຺ສ ຠິກ຺ຂຸໂນ;

ສທາ ວິປສ຺ສກສ຺ເສວ, ອຸປ຺ປຊ຺ຊນ຺ຕິ ກິຣສ຺ສຸ ເຕ.

໑໒໘໒. ວິປສ຺ສນາຍ ໂອຠາໂສ, ໂອຠາໂສຕິ ປວຸຈ຺ຈຕິ;

ຕສ຺ມິໍ ປນ ສມຸປ຺ປນ຺ເນ, ໂຍຄາວຈຣຠິກ຺ຂຸ ໂສ.

໑໒໘໓. ມຄ຺ຄປ຺ປຕ຺ໂຕ ຜລປ຺ປຕ຺ໂຕ, ອຫມສ຺ມີຕິ ຄຓ຺ຫຕິ;

ອມຄ຺ຄໍເຍວ ມຄ຺ໂຄຕິ, ຕສ຺ເສວໍ ປນ ຄຓ຺ຫໂຕ.

໑໒໘໔. ເອວໍ ວິປສ຺ສນາວີຖິ,

ໂອກ຺ກນ຺ຕາ ນາມ ໂຫຕິ ສາ;

ໂອຠາສເມວ ໂສ ຠິກ຺ຂຸ,

ອສ຺ສາເທນ຺ໂຕ ນິສີທຕິ.

໑໒໘໕. ປີຕິ ວິປ຺ປສ຺ສນາປີຕິ, ຕສ຺ສ ຕສ຺ມິໍ ຂເຓ ປນ;

ຕທາ ປຎ຺ຈວິຘາ ປີຕິ, ຊາຍນ຺ເຕ ຂຸທ຺ທິກາທິກາ.

໑໒໘໖. ວິປສ຺ສນາຍ ປສ຺ສທ຺ຘິ, ປສ຺ສທ຺ຘີຕິ ປວຸຈ຺ຈຕິ;

ໂຍຄິໂນ ກາຍຈິຕ຺ຕານິ, ປສ຺ສທ຺ຘາເນວ ໂຫນ຺ຕິ ຫິ.

໑໒໘໗. ລຫູນິ ຈ ມຸທູເນວ, ກມ຺ມຎ຺ຎາເນວ ໂຫນ຺ຕິ ຫິ;

ປສ຺ສທ຺ຘາທີຫິ ໂສ ຠິກ຺ຂຸ, ອນຸຄ຺ຄຫິຕມານໂສ.

໑໒໘໘. ອມານຸສິໍ ຣຕິໍ ນາມ,

ອນຸໂຠຕິ ອນຸຕ຺ຕຣໍ;

ຍໍ ສນ຺ຘາຍ ຈ ຄາຖາໂຍ,

ຠາສິຕາ ຫິ ມເຫສິນາ.

໑໒໘໙. ‘‘ສຸຎ຺ຎາຄາຣໍ ປວິຏ຺ຐສ຺ສ, ສນ຺ຕຈິຕ຺ຕສ຺ສ ຠິກ຺ຂຸໂນ;

ອມານຸສີ ຣຕິ ໂຫຕິ, ສມ຺ມາ ຘມ຺ມໍ ວິປສ຺ສໂຕ.

໑໒໙໐. ‘‘ຍໂຕ ຍໂຕ ສມ຺ມສຕິ, ຂນ຺ຘານໍ ອຸທຍພ຺ພຍໍ;

ລຠຕີ ປີຕິປາໂມຊ຺ຊໍ, ອມຕໍ ຕໍ ວິຊານຕ’’ນ຺ຕິ.

໑໒໙໑. ຎາຓາທໂຍ ອຸປກ຺ເລສາ, ເຎຍ຺ຍາ ວຸຕ຺ຕນເຍນິຘ;

ເອເຕ ທສ ອຸປກ຺ເລສາ, ວຊ຺ຊນີຍາວ ໂຍຄິນາ.

໑໒໙໒. ເອຕ຺ໂຖຠາສາທໂຍ ຘມ຺ມາ,

ອຸປກ຺ເລສສ຺ສ ວຕ຺ຖຸໂຕ;

ອຸປກ຺ເລສາຕິ ນິທ຺ທິຏ຺ຐາ,

ອຸປກ຺ເລສນິກນ຺ຕິ ຕຸ.

໑໒໙໓. ຕໍ ຕມາວຊ຺ຊມານສ຺ສ, ຠາວນາ ປຣິຫາຍຕິ;

ອສຕ຺ເຕ ສຕ຺ຕສຎ຺ຎີ ຈ, ໂຫຕິ ອປ຺ປສ຺ສຸໂຕ ນໂຣ.

໑໒໙໔. ສພ຺ໂພຠາສາທໂຍ ຘມ຺ເມ, ນ ມຄ຺ໂຄຕິ ວິຈາຣຍໍ;

ມຄ຺ໂຄ ວິປສ຺ສນາຎາຓໍ, ອິຈ຺ເຈວໍ ປນ ປຓ຺ຑິໂຕ.

໑໒໙໕. ວວຕ຺ຖເປຕິ ມຄ຺ຄຎ຺ຈ, ອມຄ຺ຄຎ຺ເຈວ ເຈຕສາ;

ຕສ຺ສ ເຈວໍ ອຍໍ ມຄ຺ໂຄ, ນາຍໍ ມຄ຺ໂຄຕິ ໂຍຄິໂນ.

໑໒໙໖. ມຄ຺ຄາມຄ຺ຄຎ຺ຈ ວິຎ຺ຎາຍ, ຐິຕຎາຓມິທໍ ປນ;

ມຄ຺ຄາມຄ຺ເຄສຸຎາຓນ຺ຕິ, ຠູຣິຎາເຓນ ເທສິຕໍ.

໑໒໙໗. ມຄ຺ຄາມຄ຺ຄຎາຓທສ຺ສເນສຸ ໂກວິທາ,

ສາຣາສາຣເວທິໂນ ສມາຫິຕາຫິຕາ;

ມຄ຺ຄາມຄ຺ຄຎາຓທສ຺ສນນ຺ຕິ ຕໍ ອິທໍ,

ພຸທ຺ຘາ ພຸທ຺ຘສາວກາ ວທນ຺ຕິ ວາທິໂນ.

ອິຕິ ອຠິຘມ຺ມາວຕາເຣ ມຄ຺ຄາມຄ຺ຄຎາຓທສ຺ສນວິສຸທ຺ຘິນິທ຺ເທໂສ

ນາມ ວີສຕິໂມ ປຣິຈ຺ເຉໂທ.