໑໙. ເອກູນວີສຕິໂມ ປຣິຈ຺ເຉໂທ

ກງ຺ຂາວິຕຣຓວິສຸທ຺ຘິນິທ຺ເທໂສ

໑໒໒໗. ເອຕສ຺ສ ນາມຣູປສ຺ສ, ຊານິຕ຺ວາ ເຫຕຸປຈ຺ຈເຍ;

ກງ຺ຂາ ຕີສຸ ປນທ຺ຘາສຸ, ວິຕຣິຕ຺ວາ ຐິຕໍ ປນ.

໑໒໒໘. ກງ຺ຂາວິຕຣຓໍ ນາມ, ຎາຓໍ ຕໍ ສມຸທີຣິຕໍ;

ຕໍ ສມ຺ປາເທຕຸກາເມນ, ອຕ຺ຖກາເມນ ຠິກ຺ຂຸນາ.

໑໒໒໙. ນາມຣູປສ຺ສ ໂກ ເຫຕຸ, ໂກນຸ ວາ ປຈ຺ຈໂຍ ຠເວ;

ອາວຊ຺ຊິຕ຺ວາ ຕມິຈ຺ເຈວໍ, ຣູປກາຍສ຺ສ ຕາວເທ.

໑໒໓໐. ເກສາ ໂລມາ ນຂາ ທນ຺ຕາ, ຕໂຈ ມໍສໍ ນຫາຣຸ ຈ;

ອຏ຺ຐິມິຎ຺ຊຎ຺ຈ ວກ຺ກຎ຺ຈ, ຫທຍໍ ຍກນມ຺ປິ ຈ.

໑໒໓໑. ອິຈ຺ເຈວມາທິພາຕ຺ຕິໍສ-ໂກຏ຺ຐາສປຈ຺ຈຍສ຺ສ ຫິ;

ປຣິຄ຺ຄຓ຺ຫຕິ ກາຍສ຺ສ, ມນສາ ເຫຕຸປຈ຺ຈເຍ.

໑໒໓໒. ອວິຊ຺ຊາ ຕຓ຺ຫຸປາທານໍ, ກມ຺ມໍ ເຫຕຸ ຈຕຸພ຺ພິໂຘ;

ເອຕສ຺ສ ຣູປກາຍສ຺ສ, ອາຫາໂຣ ປຈ຺ຈໂຍ ມໂຕ.

໑໒໓໓. ຊນໂກ ເຫຕຸ ອກ຺ຂາໂຕ,

ປຈ຺ຈໂຍ ອນຸປາລໂກ;

ເຫຕ຺ວງ຺ກຸຣສ຺ສ ພີຊໍ ຕຸ,

ປຈ຺ຈຍາ ປຖວາທໂຍ.

໑໒໓໔. ອິຕິເມ ປຎ຺ຈ ຘມ຺ມາ ຫິ, ເຫຕຸປຈ຺ຈຍຕໍ ຄຕາ;

ອວິຊ຺ຊາທໂຍ ຕໂຍ ຕຕ຺ຖ, ມາຕາວ ອຸປນິສ຺ສຍາ.

໑໒໓໕. ຊນກໍ ປນ ກມ຺ມໍ ຕຸ, ປຸຕ຺ຕສ຺ສ ຫິ ປິຕາ ວິຍ;

ຘາຕີ ວິຍ ກຸມາຣສ຺ສ, ອາຫາໂຣ ຘາຣໂກ ຠເວ.

໑໒໓໖. ອິຈ຺ເຈວໍ ຣູປກາຍສ຺ສ, ໂສ ປຈ຺ຈຍປຣິຄ຺ຄຫໍ;

ກຕ຺ວາ ປຸນປິ ‘‘ຈກ຺ຂຸຎ຺ຈ, ຣູປມາໂລກເມວ ຈ.

໑໒໓໗. ປຏິຈ຺ຈ ຈກ຺ຂຸວິຎ຺ຎາຓໍ, ໂຫຕິ’’ອິຈ຺ເຈວມາທິນາ;

ນເຍນ ນາມກາຍສ຺ສ, ປຈ຺ຈຍໍ ປຣິຄຓ຺ຫຕິ.

໑໒໓໘. ໂສ ເອວໍ ນາມຣູປສ຺ສ, ວຸຕ຺ຕິໍ ທິສ຺ວານ ປຈ຺ຈຍາ;

ຍຖາ ເອຕຣຫິທໍ ຕຸ, ອຕີເຕປິ ຕເຖວິທໍ.

໑໒໓໙. ປຈ຺ຈຍາ ຈ ປວຕ຺ຕິຕ຺ຖ, ຕເຖວານາຄເຕປິ ຈ;

ປວຕ຺ຕິສ຺ສຕິ ອທ຺ຘາສຸ, ຕີສ຺ເວວໍ ອນຸປສ຺ສຕິ.

໑໒໔໐. ຕສ຺ເສວໍ ປສ຺ສໂຕ ຍາ ສາ, ປຸພ຺ພນ຺ເຕ ປຎ຺ຈຘາ ຕຖາ;

ອປຣນ຺ເຕ ສິຍາ ກງ຺ຂາ, ປຎ຺ຈຘາ ສມຸທີຣິຕາ.

໑໒໔໑. ປຈ຺ຈຸປ຺ປນ຺ເນປິ ອທ຺ຘາເນ, ຉພ຺ພິຘາ ປຣິກິຕ຺ຕິຕາ;

ສພ຺ພາ ຈານວເສສາວ, ໂຍຄິໂນ ສາ ປຫິຍ຺ຍຕິ.

໑໒໔໒. ເອໂກ ກມ຺ມວິປາການໍ, ວເສນາປິ ຈ ປຓ຺ຑິໂຕ;

ເອຕສ຺ສ ນາມຣູປສ຺ສ, ປຈ຺ຈຍໍ ປຣິຄຓ຺ຫຕິ.

໑໒໔໓. ກມ຺ມໍ ຈຕຸພ຺ພິຘໍ ທິຏ຺ຐ-ຘມ຺ມເວທນິຍໍ ຕຖາ;

ອຸປປຊ຺ຊາປຣາປຣິຍາ-ໂຫສິກມ຺ມວສາ ປນ.

ຕຕ຺ຖ ເອກຊວນວີຖິຍໍ ສຕ຺ຕສຸ ຈິຕ຺ເຕສຸ ກຸສລາ ວາ ອກຸສລາ ວາ ປຐມຊວນເຈຕນາ ທິຏ຺ຐຘມ຺ມເວທນີຍກມ຺ມໍ ນາມ. ຕໍ ອິມສ຺ມິໍເຍວ ອຕ຺ຕຠາເວ ວິປາກໍ ເທຕິ, ຕຖາ ອສກ຺ໂກນ຺ຕໍ ປນ ‘‘ອໂຫສິກມ຺ມໍ ນາໂຫສິ ກມ຺ມວິປາໂກ, ນ ຠວິສ຺ສຕິ ກມ຺ມວິປາໂກ, ນຕ຺ຖິ ກມ຺ມວິປາໂກ’’ຕິ ອິມສ຺ສ ຕິກສ຺ສ ວເສນ ອໂຫສິກມ຺ມໍ ນາມ ໂຫຕິ. ອຕ຺ຖສາຘິກາ ປນ ສຕ຺ຕມຊວນເຈຕນາ ອຸປປຊ຺ຊເວທນີຍກມ຺ມໍ ນາມ. ຕມນນ຺ຕເຣ ອຕ຺ຕຠາເວ ວິປາກໍ ເທຕິ, ຕຖາ ອສກ຺ໂກນ຺ຕໍ ວຸຕ຺ຕນເຍນ ອໂຫສິກມ຺ມໍ ນາມ ໂຫຕິ. ອຸຠິນ຺ນມນ຺ຕເຣ ປຎ຺ຈຊວນເຈຕນາ ອປຣາປຣິຍເວທນີຍກມ຺ມໍ ນາມ. ຕມນາຄເຕ ຍທາ ໂອກາສໍ ລຠຕິ, ຕທາ ວິປາກໍ ເທຕິ, ສຕິ ສໍສາຣປ຺ປວຕ຺ຕິຍາ ອໂຫສິກມ຺ມໍ ນາມ ນ ໂຫຕິ.

໑໒໔໔. ອປຣໍ ຈຕຸພ຺ພິຘໍ ກມ຺ມໍ, ຄຣຸກໍ ພຫຸລມ຺ປິ ຈ;

ອາສນ຺ນຎ຺ຈ ກຏຕ຺ຕາ ຈ, ກມ຺ມນ຺ຕິ ສມຸທີຣິຕໍ.

໑໒໔໕. ອຎ຺ຎໍ ຈຕຸພ຺ພິຘໍ ກມ຺ມໍ, ຊນກໍ ອຸປຖມ຺ຠກໍ;

ຕຖູປປີຬກໍ ກມ຺ມ-ມຸປຆາຕກເມວ ຈ.

ຕຕ຺ຖ ຊນກໍ ນາມ ກຸສລໍ ວາ ອກຸສລໍ ວາ ກມ຺ມໍ ປຏິສນ຺ຘິຍມ຺ປິ ປວຕ຺ເຕປິ ຣູປາຣູປວິປາກກ຺ຂນ຺ເຘ ຊເນຕິ. ອຸປຕ຺ຖມ຺ຠກໍ ປນ ວິປາກໍ ຊເນຕຸໍ ນ ສກ຺ໂກຕິ, ອຎ຺ເຎນ ກມ຺ເມນ ທິນ຺ນາຍ ປຏິສນ຺ຘິຍາ ຊນິເຕ ວິປາເກ ອຸປ຺ປຊ຺ຊນກສຸຂທຸກ຺ຂໍ ອຸປຕ຺ຖມ຺ເຠຕິ, ອທ຺ຘານໍ ປວຕ຺ເຕຕິ. ອຸປປີຬກໍ ປນ ອຎ຺ເຎນ ກມ຺ເມນ ທິນ຺ນາຍ ປຏິສນ຺ຘິຍາ ຊນິເຕ ວິປາເກ ອຸປ຺ປຊ຺ຊນກສຸຂທຸກ຺ຂໍ ປີເຬຕິ ພາຘຕິ, ອທ຺ຘານໍ ປວຕ຺ຕິຕຸໍ ນ ເທຕິ. ອຸປຆາຕກໍ ປນ ສຍໍ ກຸສລມ຺ປິ ອກຸສລມ຺ປິ ສມານໍ ອຎ຺ຎໍ ທຸພ຺ພລກມ຺ມໍ ຆາເຕຕ຺ວາ ຕສ຺ສ ວິປາກໍ ປຏິພາຫິຕ຺ວາ ອຕ຺ຕໂນ ວິປາກສ຺ສ ໂອກາສໍ ກໂຣຕິ. ເອວໍ ປນ ກມ຺ເມນ ໂອກາເສ ກເຕ ຕໍວິປາກມຸປ຺ປນ຺ນໍ ນາມ ໂຫຕິ. ອິຕິ ອິມໍ ທ຺ວາທສວິຘໍ ກມ຺ມໍ ກມ຺ມວຏ຺ເຏ ປກ຺ຂິປິຕ຺ວາ ເອວເມໂກ ກມ຺ມວິປາກວເສນ ນາມຣູປສ຺ສ ປຈ຺ຈຍປຣິຄ຺ຄຫໍ ກໂຣຕິ.

ອິຕິ ເອວໍ ກມ຺ມວິປາກວຏ຺ຏວເສນ ນາມຣູປສ຺ສ ປວຕ຺ຕິໍ ທິສ຺ວາ ‘‘ຍຖາ ອິທໍ ເອຕຣຫິ, ເອວມຕີເຕປິ ອທ຺ຘາເນ ກມ຺ມວິປາກວເສນ ປຈ຺ຈຍໂຕ ປວຕ຺ຕິຕ຺ຖ, ອນາຄເຕປິ ປວຕ຺ຕິສ຺ສຕີ’’ຕິ ອິຕິ ກມ຺ມຎ຺ເຈວ ວິປາໂກ ຈາຕິ ກມ຺ມວິປາກວເສນ ໂລໂກ ປວຕ຺ຕຕີຕິ ຕໍ ສມນຸປສ຺ສຕິ. ຕສ຺ເສວໍ ສມນຸປສ຺ສໂຕ ສພ຺ພາ ໂສຬສວິຘາ ກງ຺ຂາ ປຫິຍ຺ຍຕິ.

໑໒໔໖. ເຫຕຸຜລສ຺ສ ສມ຺ພນ຺ຘວເສເນວ ປວຕ຺ຕຕິ;

ເກວລໍ ນາມຣູປນ຺ຕິ, ສມ຺ມາ ສມນຸປສ຺ສຕິ.

໑໒໔໗. ເອວໍ ກາຣຓໂຕ ອຸທ຺ຘໍ, ກາຣຓໍ ນ ຈ ປສ຺ສຕິ;

ປາກປວຕ຺ຕິໂຕ ອຸທ຺ຘໍ, ນ ປາກປຏິເວທກໍ.

ເຕນາຫຸ ໂປຣາຓາ –

໑໒໔໘. ‘‘ກມ຺ມສ຺ສ ກາຣໂກ ນຕ຺ຖິ, ວິປາກສ຺ສ ຈ ເວທໂກ;

ສຸທ຺ຘຘມ຺ມາ ປວຕ຺ຕນ຺ຕິ, ເອເວຕໍ ສມ຺ມທສ຺ສນໍ.

໑໒໔໙. ເອວໍ ກມ຺ເມ ວິປາເກ ຈ, ວຕ຺ຕມາເນ ສເຫຕຸເກ;

ພີຊຣຸກ຺ຂາທິການໍວ, ປຸພ຺ພາ ໂກຏິ ນ ນາຍຕິ.

໑໒໕໐. ອນາຄເຕປິ ສໍສາເຣ, ອປ຺ປວຕ຺ຕິ ນ ທິສ຺ສຕິ;

ເອຕມຕ຺ຖມນຎ຺ຎາຍ, ຕິຕ຺ຖິຍາ ອສຍໍວສີ.

໑໒໕໑. ສຕ຺ຕສຎ຺ຎໍ ຄເຫຕ຺ວານ, ສສ຺ສຕຸຈ຺ເຉທທສ຺ສິໂນ;

ທ຺ວາສຏ຺ຐິທິຏ຺ຐິໍ ຄຓ຺ຫນ຺ຕິ, ອຎ຺ຎມຎ຺ຎວິໂຣຘິໂນ.

໑໒໕໒. ທິຏ຺ຐິພນ຺ຘນພທ຺ຘາ ເຕ, ຕຓ຺ຫາໂສເຕນ ວຸຍ຺ຫເຣ;

ຕຓ຺ຫາໂສເຕນ ວຸຍ຺ຫນ຺ຕາ, ນ ເຕ ທຸກ຺ຂາ ປມຸຈ຺ຈເຣ.

໑໒໕໓. ເອວເມຕໍ ອຠິຎ຺ຎາຍ, ຠິກ຺ຂຸ ພຸທ຺ຘສ຺ສ ສາວໂກ;

ຄມ຺ຠີຣໍ ນິປຸຓໍ ສຸຎ຺ຎໍ, ປຈ຺ຈຍໍ ປຏິວິຊ຺ຌຕິ.

໑໒໕໔. ກມ຺ມໍ ນຕ຺ຖິ ວິປາກມ຺ຫິ, ປາໂກ ກມ຺ເມ ນ ວິຊ຺ຊຕິ;

ອຎ຺ຎມຎ຺ຎໍ ອຸໂຠ ສຸຎ຺ຎາ, ນ ຈ ກມ຺ມໍ ວິນາ ຜລໍ.

໑໒໕໕. ຍຖາ ນ ສູຣິເຍ ອຄ຺ຄິ, ນ ມຓິມ຺ຫິ ນ ໂຄມເຍ;

ນ ເຕສໍ ພຫິ ໂສ ອຕ຺ຖິ, ສມ຺ຠາເຣຫິ ຈ ຊາຍຕິ.

໑໒໕໖. ຕຖາ ນ ອນ຺ໂຕ ກມ຺ມສ຺ສ, ວິປາໂກ ອຸປລພ຺ຠຕິ;

ພຫິທ຺ຘາປິ ນ ກມ຺ມສ຺ສ, ນ ກມ຺ມໍ ຕຕ຺ຖ ວິຊ຺ຊຕິ.

໑໒໕໗. ຜເລນ ສຸຎ຺ຎໍ ຕໍ ກມ຺ມໍ, ຜລໍ ກມ຺ເມ ນ ວິຊ຺ຊຕິ;

ກມ຺ມຎ຺ຈ ໂຂ ອຸປາທາຍ, ຕໂຕ ນິພ຺ພຕ຺ຕເຕ ຜລໍ.

໑໒໕໘. ນ ເຫຕ຺ຖ ເທໂວ ພ຺ຣຫ຺ມາ ວາ,

ສໍສາຣສ຺ສຕ຺ຖິ ກາຣໂກ;

ສຸທ຺ຘຘມ຺ມາ ປວຕ຺ຕນ຺ຕິ,

ເຫຕຸສມ຺ຠາຣປຈ຺ຈຍາ’’ຕິ.

໑໒໕໙. ເອວໍ ນານປ຺ປກາເຣຫິ, ນາມຣູປສ຺ສ ປຈ຺ຈຍໍ;

ປຣິຄ຺ຄເຫຕ຺ວາ ອທ຺ຘາສຸ, ຕຣິຕ຺ວາ ກງ຺ຂມຸຏ຺ຐິຕໍ.

໑໒໖໐. ກງ຺ຂາວິຕຣຓໍ ນາມ, ຎາຓໍ ຕໍ ສມຸທີຣິຕໍ;

ຘມ຺ມຏ຺ຐິຕິ ຍຖາຠູຕໍ, ຕໍ ສມ຺ມາທສ຺ສນນ຺ຕິປິ.

໑໒໖໑. ອິມິນາ ປນ ຎາເຓນ,

ສໍຍຸຕ຺ໂຕ ພຸທ຺ຘສາສເນ;

ໂຫຕິ ລທ຺ຘປຕິຏ຺ໂຐວ,

ໂສຕາປນ຺ໂນ ຫິ ຈູຬໂກ.

໑໒໖໒. ຕສ຺ມາ ສປຎ຺ໂຎ ປນ ອຕ຺ຖກາໂມ,

ໂຍ ນາມຣູປສ຺ສ ເຫຕຸປຈ຺ຈຍານິ;

ປຣິຄ຺ຄຫໍ ສາຘຸ ກໂຣຕິ ຘີໂຣ,

ຂິປ຺ປໍ ສ ນິພ຺ພານປຸຣໍ ອຸເປຕິ.

ອິຕິ ອຠິຘມ຺ມາວຕາເຣ ກງ຺ຂາວິຕຣຓວິສຸທ຺ຘິນິທ຺ເທໂສ ນາມ

ເອກູນວີສຕິໂມ ປຣິຈ຺ເຉໂທ.