໑໘. ອຏ຺ຐາຣສໂມ ປຣິຈ຺ເຉໂທ

ທິຏ຺ຐິວິສຸທ຺ຘິນິທ຺ເທໂສ

໑໑໗໐. ສມາຘິໍ ປນ ສາຠິຎ຺ຎໍ, ຠາເວຕ຺ວາ ຕທນນ຺ຕຣໍ;

ຠາເວຕພ຺ພາ ຍໂຕ ປຎ຺ຎາ, ຠິກ຺ຂຸນາ ເຕນ ຘີມຕາ.

໑໑໗໑. ຕໂຕຫໍ ທານິ ວກ຺ຂາມິ, ປຎ຺ຎາຠາວນມຸຕ຺ຕມໍ;

ສມາເສເນວ ຠິກ຺ຂູນໍ, ປຣໍ ປີຕິສຸຂາວຫໍ.

໑໑໗໒. ກາ ປຎ຺ຎາ ປນ ໂກ ຈຕ຺ໂຖ,

ກິມສ຺ສາ ລກ຺ຂຓາທິກໍ;

ກຕິຘາ ສາ ກຖໍ ເຕນ,

ຠາເວຕພ຺ພາຕິ ວຸຈ຺ຈເຕ. –

໑໑໗໓. ປຎ຺ຎາ ວິປສ຺ສນາປຎ຺ຎາ, ປຸຎ຺ຎຈິຕ຺ຕສມາຍຸຕາ;

ປຊານາຕີຕິ ປຎ຺ຎາ ສາ, ຊານນາ ວາ ປກາຣໂຕ.

໑໑໗໔. ສຎ຺ຎາວິຎ຺ຎາຓປຎ຺ຎານໍ, ໂກ ວິເສໂສ ກິມນ຺ຕຣໍ;

ສຎ຺ຎາວິຎ຺ຎາຓປຎ຺ຎານໍ, ຊານນຕ຺ເຕ ສເມປິ ຈ.

໑໑໗໕. ຍາ ສຎ຺ຊານນມຕ຺ຕໍວ, ສຎ຺ຎາ ນີລາທິໂຕ ປນ;

ລກ຺ຂຓປ຺ປຏິເວຘໍ ຕຸ, ກາຕຸໍ ສກ຺ໂກຕິ ເນວ ສາ.

໑໑໗໖. ວິຎ຺ຎາຓໍ ປນ ຊານາຕິ, ນີລປີຕາທິໂຄຈຣໍ;

ສກ຺ໂກຕິປິ ອນິຈ຺ຈາທິລກ຺ຂຓໍ ປຏິວິຊ຺ຌິຕຸໍ.

໑໑໗໗. ອຸສ຺ສກ຺ກິຕ຺ວາ ນ ສກ຺ໂກຕິ, ມຄ຺ຄໍ ປາເປຕຸເມວ ຕໍ;

ປຎ຺ຎາ ວຸຕ຺ຕນຍໍ ກາຕຸໍ, ສກ຺ໂກຕິ ຕິວິຘມ຺ປິ ຕໍ.

໑໑໗໘. ອິເມສໍ ປນ ຕິຓ຺ຓມ຺ປິ, ວິເສໂສ ສມຸທີຣິໂຕ;

ສພ຺ເພສໍ ປນ ຘມ຺ມານໍ, ສຠາວປຏິເວຘນໍ.

໑໑໗໙. ລກ຺ຂຓໍ ປນ ປຎ຺ຎາຍ, ລກ຺ຂຓຎ຺ຎູຫິ ທີປິຕໍ;

ສມ຺ໂມຫນນ຺ຘກາຣສ຺ສ, ວິທ຺ຘໍສນຣສາ ມຕາ.

໑໑໘໐. ອສມ຺ໂມຫປຈ຺ຈຸປຏ຺ຐານາ, ສມາຘາສນ຺ນກາຣຓາ;

ເອວເມຕ຺ຖ ຈ ວິຎ຺ເຎຍ຺ຍາ, ປຎ຺ຎາຍ ລກ຺ຂຓາທິກາ.

ກຕິຘາຕິ ເອຕ຺ຖ –

໑໑໘໑. ລກ຺ຂເຓເນກຘາ ວຸຕ຺ຕາ,

ໂລກິກາໂລກິກາ ທ຺ວິຘາ;

ໂລກິເຍເນຕ຺ຖ ມຄ຺ເຄນ,

ຍຸຕ຺ຕາ ສາ ໂລກິກາ ສິຍາ.

໑໑໘໒. ໂລກຸຕ຺ຕເຣນ ມຄ຺ເຄນ, ຍຸຕ຺ຕາ ໂລກຸຕ຺ຕຣາ ມຕາ;

ຕິວິຘາປິ ສິຍາ ປຎ຺ຎາ, ຈິນ຺ຕາສຸຕມຍາທິໂຕ.

໑໑໘໓. ຕຕ຺ຖຕ຺ຕໂນວ ຈິນ຺ຕາຍ, ນິປ຺ຜນ຺ນຕ຺ຕາຕິ ຕສ຺ສ ສາ;

ໂຫຕິ ຈິນ຺ຕາມຍາ ປຎ຺ຎາ, ຠູຣິປຎ຺ເຎນ ເທສິຕາ.

໑໑໘໔. ປຣໂຕ ປນ ສຸຕ຺ວານ, ລທ຺ຘາ ປຎ຺ຎາ ອຍໍ ອິຘ;

ສຸເຕເນວ ຈ ນິປ຺ຜນ຺ນາ, ປຎ຺ຎາ ສຸຕມຍາ ມຕາ.

໑໑໘໕. ຍຖາ ວາປິ ຕຖາ ເຈຕ຺ຖ, ຠາວນາຍ ວເສນ ຕຸ;

ນິປ຺ຜນ຺ນາ ອປ຺ປນາປຕ຺ຕາ, ປຎ຺ຎາ ສາ ຠາວນາມຍາ.

໑໑໘໖. ປຏິສມ຺ຠິທາຈຕຸກ຺ກສ຺ສ, ວເສນ ຈຕຸຘາ ສິຍາ;

ອຕ຺ຖຘມ຺ມນິຣຸຕ຺ຕີສຸ, ຎາຓໍ ຎາເຓສຸ ຕີສຸປິ.

໑໑໘໗. ຍໍ ກິຎ຺ຈິ ປຈ຺ຈຍຸປ຺ປນ຺ນໍ, ວິປາກາ ຈ ກ຺ຣິຍາ ຕຖາ;

ນິພ຺ພານໍ ຠາສິຕຕ຺ໂຖ ຈ, ປຎ຺ເຈເຕ ອຕ຺ຖສຎ຺ຎິຕາ.

໑໑໘໘. ຜລນິພ຺ພຕ຺ຕໂກ ເຫຕຸ, ອຣິຍມຄ຺ໂຄ ຈ ຠາສິຕໍ;

ກຸສລາກຸສລຎ຺ເຈຕິ, ປຎ຺ເຈເຕ ຘມ຺ມສຎ຺ຎິຕາ.

໑໑໘໙. ຕສ຺ມິໍ ອຕ຺ເຖ ຈ ຘມ຺ເມ ຈ, ຍາ ສຠາວນິຣຸຕ຺ຕິ ຕຸ;

ນິຣຸຕ຺ຕີຕິ ຈ ນິທ຺ທິຏ຺ຐາ, ນິຣຸຕ຺ຕິກຸສເລນ ສາ.

໑໑໙໐. ຎາຓໍ ອາຣມ຺ມຓໍ ກຕ຺ວາ, ຕິວິຘໍ ປຈ຺ຈເວກ຺ຂໂຕ;

ເຕສຸ ຎາເຓສຸ ຍໍ ຎາຓໍ, ປຏິຠານນ຺ຕິ ຕໍ ມຕໍ.

໑໑໙໑. ປຣິຍຕ຺ຕິປຣິປຸຈ຺ຉາຫິ, ສວນາຘິຄເມຫິ ຈ;

ປຸພ຺ພໂຍເຄນ ຄຈ຺ຉນ຺ຕິ, ປເຠທໍ ປຏິສມ຺ຠິທາ.

ກຖໍ ຠາເວຕພ຺ພາຕິ ເອຕ຺ຖ –

໑໑໙໒. ຂນ຺ຘາທີສຸ ຫິ ຘມ຺ເມສຸ, ຠູມິຠູເຕສຸ ໂຍຄິນາ;

ອຸຄ຺ຄຫາທິວເສເນຕ຺ຖ, ກຕ຺ວາ ປຣິຈຍໍ ປນ.

໑໑໙໓. ສີລໍ ຈິຕ຺ຕວິສຸທ຺ຘິຎ຺ຈ, ສມ຺ປາເທຕ຺ວາ ຕໂຕ ປຣໍ;

ທິຏ຺ຐິສຸທ຺ຘາທໂຍ ປຎ຺ຈ, ສມ຺ປາເທນ຺ເຕນ ສຸທ຺ຘິຍາ.

໑໑໙໔. ຕາຍ ປຎ຺ຎາຍ ຍຸຕ຺ເຕນ, ຠີເຕນ ຊນນາທິໂຕ;

ຠາເວຕພ຺ພາ ຠວາຠາວໍ, ປຕ຺ຖຍນ຺ເຕນ ຠິກ຺ຂຸນາ.

໑໑໙໕. ຣູປຎ຺ຈ ເວທນາ ສຎ຺ຎາ, ສງ຺ຂາຣາ ເຈວ ສພ຺ພໂສ;

ວິຎ຺ຎາຓຎ຺ເຈຕິ ປຎ຺ເຈເຕ, ຂນ຺ຘາ ສມ຺ພຸທ຺ຘເທສິຕາ.

໑໑໙໖. ຕຕ຺ຖ ຍໍ ກິຎ຺ຈິ ຣູປໍ ຕໍ, ອຕີຕານາຄຕາທິກໍ;

ອຊ຺ຌຕ຺ຕໍ ວາ ພຫິທ຺ຘາ ວາ, ສຸຂຸໂມຬາຣິກມ຺ປິ ວາ.

໑໑໙໗. ຫີນໍ ວາປິ ປຓີຕໍ ວາ, ຍໍ ທູເຣ ຍຎ຺ຈ ສນ຺ຕິເກ;

ສພ຺ພໍ ຕເມກໂຕ ກຕ຺ວາ, ຣູປກ຺ຂນ຺ໂຘຕິ ວຸຈ຺ຈຕິ.

໑໑໙໘. ອິຕເຣສຸປິ ຍໍ ກິຎ຺ຈິ, ຕໍ ເວທຍິຕລກ຺ຂຓໍ;

ສພ຺ພໍ ຕເມກໂຕ ກຕ຺ວາ, ເວທນາກ຺ຂນ຺ຘຕາ ກຕາ.

໑໑໙໙. ຈິຕ຺ຕຊໍ ປນ ຍໍ ກິຎ຺ຈິ, ຕໍ ສຎ຺ຊານນລກ຺ຂຓໍ;

ສພ຺ພໍ ຕເມກໂຕ ກຕ຺ວາ, ສຎ຺ຎາກ຺ຂນ຺ໂຘຕິ ວຸຈ຺ຈຕິ.

໑໒໐໐. ຍໍ ກິຎ຺ຈິ ຈິຕ຺ຕສມ຺ຠູຕໍ, ອຠິສງ຺ຂາຣລກ຺ຂຓໍ;

ສພ຺ພໍ ຕເມກໂຕ ກຕ຺ວາ, ສງ຺ຂາຣກ຺ຂນ຺ຘຕາ ກຕາ.

໑໒໐໑. ຕຕ຺ຖ ຈິຕ຺ຕໍ ຕຸ ຍໍ ກິຎ຺ຈິ, ຕໍ ວິຊານນລກ຺ຂຓໍ;

ສພ຺ພໍ ຕເມກໂຕ ກຕ຺ວາ, ວິຎ຺ຎາຓກ຺ຂນ຺ຘຕາ ກຕາ.

໑໒໐໒. ຈຕ຺ຕາໂຣ ຈ ມຫາຠູຕາ, ອຸປາທາ ຈຕຸວີສຕິ;

ອຏ຺ຐວີສຕິຘາ ເຈຕໍ, ຣູປໍ ຣູປນ຺ຕິ ຄຓ຺ຫຕິ.

໑໒໐໓. ເອກາສີຕິຍາ ຈິຕ຺ເຕນ, ສໍຍຸຕ຺ຕາ ເວທນາທໂຍ;

ເວທນາສຎ຺ຎາສງ຺ຂາຣ-ວິຎ຺ຎາຓກ຺ຂນ຺ຘສຎ຺ຎິຕາ.

໑໒໐໔. ຈຕ຺ຕາໂຣຣູປິໂນ ຂນ຺ເຘ, ນາມນ຺ຕິ ປຣິຄຓ຺ຫຕິ;

ຣູປກ຺ຂນ຺ໂຘ ຠເວ ຣູປໍ, ນາມກ຺ຂນ຺ຘາ ອຣູປິໂນ.

໑໒໐໕. ຣຸປ຺ປນລກ຺ຂຓໍ ຣູປໍ, ນາມໍ ນມນລກ຺ຂຓໍ;

ອິຕິ ສງ຺ເຂປໂຕ ນາມ-ຣູປໍ ໂສ ປຣິຄຓ຺ຫຕິ.

໑໒໐໖. ຜາເລນ຺ໂຕ ວິຍ ຕາລສ຺ສ, ກນ຺ທໍ ຕຸ ຍມກໍ ທ຺ວິຘາ;

ວວຕ຺ຖເປຕິ ນາມຎ຺ຈ, ຣູປຎ຺ຈາຕິ ທ຺ວິຘາ ປນ.

໑໒໐໗. ນາມໂຕ ຣູປໂຕ ອຎ຺ໂຎ,

ສຕ຺ໂຕ ວາ ປຸຄ຺ຄໂລປິ ວາ;

ອຕ຺ຕາ ວາ ໂກຈິ ນຕ຺ຖີຕິ,

ນິຏ຺ຐໍ ຄຈ຺ຉຕິ ສພ຺ພທາ.

໑໒໐໘. ເອວໍ ວວຕ຺ຖເປຕ຺ວາ ໂສ, ນາມຣູປໍ ສຠາວໂຕ;

ສຕ຺ຕສມ຺ໂມຫຆາຕຕ຺ຖໍ, ພຫຸສຸຕ຺ຕວເສນິຘ.

໑໒໐໙. ນາມຣູປມຕ຺ຕຎ຺ເຎວ, ນຕ຺ຖິ ໂກຈິຘ ປຸຄ຺ຄໂລ;

ເອວເມຕ຺ຖ ປຓ຺ຑິໂຕ ໂປໂສ, ວວຕ຺ຖເປຕິ ຕໍ ປນ.

ວຸຕ຺ຕໍ ເຫຕໍ –

໑໒໑໐. ‘‘ຍຖາປິ ອງ຺ຄສມ຺ຠາຣາ,

ໂຫຕິ ສທ຺ໂທ ຣໂຖ ອິຕິ;

ເອວໍ ຂນ຺ເຘສຸ ສນ຺ເຕສຸ,

ໂຫຕິ ສຕ຺ໂຕຕິ ສມ຺ມຸຕີ’’ຕິ.

໑໒໑໑. ຍຖາປິ ທາຣຸຍນ຺ຕມ຺ປິ, ນິຊ຺ຊີວຎ຺ຈ ນິຣີຫກໍ;

ທາຣຸຣຊ຺ຊຸສມາໂຍເຄ, ຕໍ ຄຈ຺ຉຕິປິ ຕິຏ຺ຐຕິ.

໑໒໑໒. ຕເຖທໍ ນາມຣູປມ຺ປິ, ນິຊ຺ຊີວຎ຺ຈ ນິຣີຫກໍ;

ອຎ຺ຎມຎ຺ຎສມາໂຍເຄ, ຕໍ ຄຈ຺ຉຕິປິ ຕິຏ຺ຐຕິ.

ເຕນາຫຸ ໂປຣາຓາ –

໑໒໑໓. ‘‘ນາມຎ຺ຈ ຣູປຎ຺ຈ ອິຘຕ຺ຖິ ສຈ຺ຈໂຕ,

ນ ເຫຕ຺ຖ ສຕ຺ໂຕ ມນຸໂຊ ຈ ວິຊ຺ຊຕິ;

ສຸຎ຺ຎໍ ອິທໍ ຍນ຺ຕມິວາຠິສງ຺ຂຕໍ,

ທຸກ຺ຂສ຺ສ ປຸຎ຺ໂຊ ຕິຓກຏ຺ຐສາທິໂສ’’ຕິ.

໑໒໑໔. ອຎ຺ຎມຎ຺ຎູປນິສ຺ສາຍ, ທຓ຺ຑເກສຸ ຐິເຕສຸ ຫິ;

ເອກສ຺ມິໍ ປຕມາເນ ຕຸ, ຕເຖວ ປຕຕີຕໂຣ.

ເຕນາຫຸ ໂປຣາຓາ –

໑໒໑໕. ‘‘ຍມກໍ ນາມຣູປຎ຺ຈ, ອຸໂຠ ອຎ຺ໂຎຎ຺ຎນິສ຺ສິຕາ;

ເອກສ຺ມິໍ ຠິຊ຺ຊມານສ຺ມິໍ, ອຸໂຠ ຠິຊ຺ຊນ຺ຕິ ປຈ຺ຈຍາ’’ຕິ.

໑໒໑໖. ອຸຕິນ຺ນໍ ນາມຣູປານໍ, ນາມໍ ນິຕ຺ເຕຊເມຕ຺ຖ ຕໍ;

ສເກເນວ ຫິ ເຕເຊນ, ນ ສກ຺ໂກຕິ ປວຕ຺ຕິຕຸໍ.

໑໒໑໗. ນ ພ຺ຍາຫຣຕິ ໂນ ເສຕິ, ນ ຕິຏ຺ຐຕິ ນ ຄຈ຺ຉຕິ;

ນ ເຠເທຕິ ນ ໂຈເຣຕິ, ນ ຠຸຎ຺ຊຕິ ນ ຂາທຕິ.

໑໒໑໘. ຕຖາ ຣູປມ຺ປິ ນິຕ຺ເຕຊໍ, ວິນາ ນາມຎ຺ຈ ສພ຺ພຖາ;

ສເກເນວ ຫິ ເຕເຊນ, ນ ສກ຺ໂກຕິ ປວຕ຺ຕິຕຸໍ.

໑໒໑໙. ຠຸຎ຺ຊາມີຕິ ປິວາມີຕິ, ຂາທາມີຕິ ຕເຖວ ຈ;

ໂຣທາມີຕິ ຫສາມີຕິ, ຣູປສ຺ເສຕໍ ນ ວິຊ຺ຊຕິ.

໑໒໒໐. ນາມໍ ນິສ຺ສາຍ ຣູປໍ ຕຸ, ຣູປໍ ນິສ຺ສາຍ ນາມກໍ;

ປວຕ຺ຕຕິ ສທາ ສພ຺ພໍ, ປຎ຺ຈໂວກາຣຠູມິຍໍ.

໑໒໒໑. ອິມສ຺ສ ປນ ອຕ຺ຖສ຺ສ, ອາວິຠາວຕ຺ຖເມວ ຈ;

ຊຈ຺ຈນ຺ຘປີຐສປ຺ປີນໍ, ວຕ຺ຕພ຺ພາ ອຸປມາ ອິຘ.

໑໒໒໒. ຍຖາ ຫິ ນາວໍ ນິສ຺ສາຍ, ມນຸສ຺ສາ ຍນ຺ຕິ ອຓ຺ຓເວ;

ເອວໍ ຣູປມ຺ປິ ນິສ຺ສາຍ, ນາມກາໂຍ ປວຕ຺ຕຕິ.

໑໒໒໓. ຍຖາ ມນຸສ຺ເສ ນິສ຺ສາຍ, ນາວາ ຄຈ຺ຉຕິ ອຓ຺ຓເວ;

ເອວໍ ນາມມ຺ປິ ນິສ຺ສາຍ, ຣູປກາໂຍ ປວຕ຺ຕຕິ.

໑໒໒໔. ສຕ຺ຕສຎ຺ຎໍ ວິໂນເທຕ຺ວາ, ນາມຣູປສ຺ສ ສພ຺ພຖາ;

ຍາຖາວທສ຺ສນໍ ເອຕໍ, ‘‘ທິຏ຺ຐິສຸທ຺ຘີ’’ຕິ ວຸຈ຺ຈຕິ.

໑໒໒໕. ປຣິມຸຈ຺ຈິຕຸກາໂມ ຈ, ທຸກ຺ຂໂຕ ຊາຕິອາທິໂຕ;

ອນ຺ຕທ຺ວຍໍ ວິວຊ຺ເຊຕ຺ວາ, ຠາວເຍ ປນ ປຓ຺ຑິໂຕ.

໑໒໒໖. ທິຏ຺ຐິວິສຸທ຺ຘິມິມໍ ປຣິສຸທ຺ຘໍ,

ສຸຏ຺ຐຸຕຣໍ ຕຸ ກໂຣຕິ ນໂຣ ໂຍ;

ທິຏ຺ຐິຄຕານິ ມລານິ ອເສສໍ,

ນາສມຸເປນ຺ຕິ ຫິ ຕສ຺ສ ນຣສ຺ສ.

ອິຕິ ອຠິຘມ຺ມາວຕາເຣ ທິຏ຺ຐິວິສຸທ຺ຘິນິທ຺ເທໂສ ນາມ

ອຏ຺ຐາຣສໂມ ປຣິຈ຺ເຉໂທ.