໑໗. ສຕ຺ຕຣສໂມ ປຣິຈ຺ເຉໂທ

ອຠິຎ຺ຎາຣມ຺ມຓນິທ຺ເທໂສ

໑໑໐໔. ອນາຄຕໍສຎາຓຎ຺ຈ, ຍຖາກມ຺ມຸປຄມ຺ປິ ຈ;

ປຎ຺ຈ ອິທ຺ຘິວິຘາທີນິ, ສຕ຺ຕາຠິຎ຺ຎາ ອິມາ ປນ.

໑໑໐໕. ເອຕາສໍ ປນ ສຕ຺ຕນ຺ນໍ, ອຠິຎ຺ຎານມິໂຕ ປຣໍ;

ປວກ຺ຂາມິ ສມາເສນ, ອາຣມ຺ມຓວິນິຈ຺ຉຍໍ.

໑໑໐໖. ອາຣມ຺ມຓຕ຺ຕິກາ ວຸຕ຺ຕາ, ເຍ ຈຕ຺ຕາໂຣ ມເຫສິນາ;

ສຕ຺ຕນ຺ນເມຕ຺ຖ ຎາຓານໍ, ສມ຺ປວຕ຺ຕິໍ ສຸຓາຖ ເມ.

໑໑໐໗. ຕຕ຺ຖ ອິທ຺ຘິວິຘຎາຓໍ, ປຣິຕ຺ຕາທີສຸ ສຕ຺ຕສຸ;

ອາຣມ຺ມຓວິຠາເຄສຸ, ປວຕ຺ຕຕິ ກຖໍ ປນ.

໑໑໐໘. ກາເຍນາທິສ຺ສມາເນນ, ຄນ຺ຕຸກາໂມ ຍທາຠເວ;

ຈິຕ຺ຕສນ຺ນິສ຺ສິຕໍ ກຕ຺ວາ, ກາຍໍ ຈິຕ຺ຕວເສນ ຕໍ.

໑໑໐໙. ມຫຄ຺ຄເຕ ຈ ຈິຕ຺ຕສ຺ມິໍ, ສມາໂຣເປຕິ ໂສ ຕທາ;

ກາຍາຣມ຺ມຓໂຕ ຎາຓໍ, ປຣິຕ຺ຕາຣມ຺ມຓໍ ສິຍາ.

໑໑໑໐. ທິສ຺ສມາເນນ ກາເຍນ, ຄນ຺ຕຸກາໂມ ຍທາ ຠເວ;

ກາຍສນ຺ນິສ຺ສິຕໍ ກຕ຺ວາ, ຈິຕ຺ຕໍ ກາຍວເສນ ຕໍ.

໑໑໑໑. ປາທກຊ຺ຌານຈິຕ຺ຕໍ ຕໍ, ກາເຍ ໂຣເປຕິ ໂສ ຕທາ;

ຌານາຣມ຺ມຓໂຕ ຎາຓໍ, ຕໍ ມຫຄ຺ຄຕໂຄຈຣໍ.

໑໑໑໒. ອນາຄຕມຕີຕຎ຺ຈ, ກໂຣຕິ ວິສຍໍ ຍທາ;

ອຕີຕາຣມ຺ມຓໍ ໂຫຕິ, ຕທານາຄຕໂຄຈຣໍ.

໑໑໑໓. ກາເຍນ ທິສ຺ສມາເນນ, ຄມເນ ປນ ຠິກ຺ຂຸໂນ;

ປຈ຺ຈຸປ຺ປນ຺ໂນ ຠເວ ຕສ຺ສ, ໂຄຈໂຣຕິ ວິນິທ຺ທິເສ.

໑໑໑໔. ກາຍໍ ຈິຕ຺ຕວເສນາປິ, ຈິຕ຺ຕໍ ກາຍວເສນ ວາ;

ປຣິຓາມນກາລສ຺ມິໍ, ອຊ຺ຌຕ຺ຕາຣມ຺ມຓໍ ສິຍາ.

໑໑໑໕. ພຫິທ຺ຘາຣມ຺ມຓໍ ໂຫຕິ, ພຫິທ຺ຘາຣູປທສ຺ສເນ;

ເອວມິທ຺ຘິວິຘໍ ຎາຓໍ, ສມ຺ປວຕ຺ຕຕິ ສຕ຺ຕສຸ.

໑໑໑໖. ປຈ຺ຈຸປ຺ປນ຺ເນ ປຣິຕ຺ເຕ ຈ, ພຫິທ຺ຘຊ຺ຌຕ຺ຕິເກສຸປິ;

ຈຕູສ຺ເວເຕສຸ ຘມ຺ເມສຸ, ທິພ຺ພໂສຕໍ ປວຕ຺ຕຕິ.

໑໑໑໗. ປຈ຺ຈຸປ຺ປນ຺ໂນ ປຣິຕ຺ໂຕ ຈ, ສທ຺ໂທ ອາຣມ຺ມຓໍ ຍໂຕ;

ປຣິຕ຺ຕາຣມ຺ມຓໍ ປຈ຺ຈຸ-ປ຺ປນ຺ນາຣມ຺ມຓຕໍ ຄຕໍ.

໑໑໑໘. ອຕ຺ຕໂນ ກຸຈ຺ຉິສທ຺ທສ຺ສ, ສວເນປິ ປຣສ຺ສ ຈ;

ອຊ຺ຌຕ຺ຕາຣມ຺ມຓຎ຺ເຈວ, ພຫິທ຺ຘາຣມ຺ມຓມ຺ປິ ຈ.

໑໑໑໙. ເຈໂຕປຣິຍຎາຓມ຺ປິ, ປຣິຕ຺ຕາທີສຸ ອຏ຺ຐສຸ;

ອາຣມ຺ມຓວິຠາເຄສຸ, ປວຕ຺ຕຕິ ກຖໍ ປນ.

໑໑໒໐. ປຣິຕ຺ຕາຣມ຺ມຓໍ ໂຫຕິ, ປຣິຕ຺ຕານໍ ປຊານເນ;

ຊານເນ ມຊ຺ຌິມານໍ ຕຸ, ຕໍ ມຫຄ຺ຄຕໂຄຈຣໍ.

໑໑໒໑. ຊານເນ ປນ ມຄ຺ຄສ຺ສ, ຜລສ຺ສາປິ ປຊານເນ;

ຕທາ ປນສ຺ສ ຎາຓສ຺ສ, ອປ຺ປມາໂຓວ ໂຄຈໂຣ.

໑໑໒໒. ຕໍ ມຄ຺ຄາຣມ຺ມຓໍ ໂຫຕິ, ມຄ຺ຄຈິຕ຺ຕສ຺ສ ຊານເນ;

ປຣິຍາເຍເນເວຕສ຺ສ, ມຄ຺ຄາຣມ຺ມຓຕາ ມຕາ.

໑໑໒໓. ອຕີເຕ ສຕ຺ຕທິວສ-ພ຺ຠນ຺ຕເຣ ຈ ຍທາ ປນ;

ອນາຄເຕ ຕຖາ ສຕ຺ຕ-ທິວສພ຺ຠນ຺ຕເຣປິ ຈ.

໑໑໒໔. ປເຣສໍ ປນ ຈິຕ຺ຕສ຺ສ, ຊານເນ ສມຸທີຣິຕໍ;

ອຕີຕາຣມ຺ມຓຎ຺ເຈວ, ຕທານາຄຕໂຄຈຣໍ.

໑໑໒໕. ກຖຎ຺ຈ ປນ ຕໍ ປຈ຺ຈຸປ຺ປນ຺ນໂຄຈຣຕໍ ຄຕໍ;

ປຈ຺ຈຸປ຺ປນ຺ນໍ ຕິຘາ ວຸຕ຺ຕໍ, ຂຓສນ຺ຕຕິອທ຺ຘໂຕ.

໑໑໒໖. ຕຕ຺ຖ ຕິກ຺ຂຓສມ຺ປຕ຺ຕໍ, ປຈ຺ຈຸປ຺ປນ຺ນຂຓາທິກໍ;

ເອກທ຺ເວສນ຺ຕຕິວາຣປຣິຍາປນ຺ນມິທໍ ປນ.

໑໑໒໗. ສນ຺ຕຕິປຈ຺ຈຸປ຺ປນ຺ນນ຺ຕິ, ອາຫຸ ສນ຺ຕຕິໂກວິທາ;

ເອກພ຺ຠວປຣິຈ຺ຉິນ຺ນໍ, ປຈ຺ຈຸປ຺ປນ຺ນນ຺ຕິ ປຈ຺ຉິມໍ.

໑໑໒໘. ຂຓາທິກຕ຺ຕຍໍ ປຈ຺ຈຸ-ປ຺ປນ຺ນໍ ຕມາຫຸ ເກຈິຘ;

ເຈໂຕປຣິຍຎາຓສ຺ສ, ໂຫຕິ ອາຣມ຺ມຓໍ ອິຕິ.

໑໑໒໙. ຍຖາ ຈ ປຸປ຺ຜມຸຏ຺ຐິມ຺ຫິ, ອຸກ຺ຂິຕ຺ເຕ ຄຄເນ ປນ;

ອວສ຺ສໍ ເອກເມກສ຺ສ, ວຓ຺ຏໍ ວຓ຺ເຏນ ວິຊ຺ຌຕິ.

໑໑໓໐. ເອວໍ ມຫາຊນສ຺ສາປິ, ຈິຕ຺ເຕ ອາວຊ຺ຊິເຕ ປນ;

ເອກສ຺ສ ຈິຕ຺ຕເມເກນ, ອວສ຺ສໍ ປນ ວິຊ຺ຌຕິ.

໑໑໓໑. ເຍນາວຊ຺ຊຕິ ຈິຕ຺ເຕນ, ເຍນ ຊານາຕິ ເຈຕສາ;

ເຕສໍ ທ຺ວິນ຺ນໍ ສຫຏ຺ຐານາ-ຠາວໂຕ ຕໍ ນ ຍຸຊ຺ຊຕິ.

໑໑໓໒. ຊວນາວຊ຺ຊນານໍ ຕຸ, ນານາຣມ຺ມຓປຕ຺ຕິໂຕ;

ອນິຏ຺ເຐ ປນ ຫິ ຐາເນ, ອຍຸຕ຺ຕນ຺ຕິ ປກາສິຕໍ.

໑໑໓໓. ຕສ຺ມາ ສນ຺ຕຕິອທ຺ຘານ-ປຈ຺ຈຸປ຺ປນ຺ນານເມວ ຕຸ;

ວເສນ ປຈ຺ຈຸປ຺ປນ຺ນໍ ຕໍ, ໂຫຕິ ອາຣມ຺ມຓໍ ອິທໍ.

໑໑໓໔. ປຈ຺ຈຸປ຺ປນ຺ນມ຺ປິ ອທ຺ຘາຂ຺ຍໍ, ອິທໍ ຊວນວາຣໂຕ;

ທີເປຕພ຺ພນ຺ຕິ ນິທ຺ທິຏ຺ຐໍ, ຕຕ຺ຣາຍໍ ທີປນານໂຍ.

໑໑໓໕. ຍທາ ປຣສ຺ສ ຈິຕ຺ຕຎ຺ຫິ, ຎາຕຸມາວຊ຺ຊຕິທ຺ຘິມາ;

ອາວຊ຺ຊນມໂນ ຕສ຺ສ, ປຈ຺ຈຸປ຺ປນ຺ນຂຓວ຺ຫຍໍ.

໑໑໓໖. ອາຣມ຺ມຓໍ ຕທາ ກຕ຺ວາ, ເຕນ ສທ຺ຘິໍ ນິຣຸຊ຺ຌຕິ;

ຊວນານິ ຫິ ຊາຍນ຺ເຕ, ຕສ຺ສ ຈຕ຺ຕາຣິ ປຎ຺ຈ ວາ.

໑໑໓໗. ເອເຕສໍ ປຈ຺ຉິມໍ ຈິຕ຺ຕໍ, ອິທ຺ຘິຈິຕ຺ຕມຸທີຣິຕໍ;

ກາມາວຈຣຈິຕ຺ຕານິ, ເສສານີຕິ ວິນິທ຺ທິເສ.

໑໑໓໘. ເອເຕສໍ ປນ ສພ຺ເພສໍ, ນິຣຸທ຺ຘໍ ຕຸ ຕເທວ ຈ;

ຈິຕ຺ຕໍ ອາຣມ຺ມຓໍ ໂຫຕິ, ຕສ຺ມາ ສພ຺ພານິ ຕານິປິ.

໑໑໓໙. ເອກາຣມ຺ມຓຕໍ ຍນ຺ຕິ, ນ ນານາຣມ຺ມຓານິ ຫິ;

ອທ຺ຘາວສາ ຠເວ ປຈ຺ຈຸ-ປ຺ປນ຺ນາຣມ຺ມຓໂຕ ປນ.

໑໑໔໐. ເອກາຣມ຺ມຓຠາເວປິ, ອິທ຺ຘິມານສເມວ ຈ;

ປຣສ຺ສ ຈິຕ຺ຕໍ ຊານາຕິ, ເນຕຣານິ ຍຖາ ປນ.

໑໑໔໑. ຈກ຺ຂຸທ຺ວາເຣ ຕຸ ວິຎ຺ຎາຓໍ, ຣູປໍ ປສ຺ສຕິ ເນຕຣໍ;

ເອວເມວ ຈ ຕໍ ອິທ຺ຘິ-ຈິຕ຺ຕເມວ ຈ ຊານາຕິ.

໑໑໔໒. ປຣຈິຕ຺ຕາຣມ຺ມຓຕ຺ຕາ, ພຫິທ຺ຘາຣມ຺ມຓໍ ສິຍາ;

ເຈໂຕປຣິຍຎາຓມ຺ປິ, ອຏ຺ຐສ຺ເວວ ປວຕ຺ຕຕິ.

໑໑໔໓. ປຸພ຺ເພນິວາສຎາຓມ຺ປິ, ປຣິຕ຺ຕາທີສຸ ອຏ຺ຐສຸ;

ອາຣມ຺ມຓວິຠາເຄສຸ, ປວຕ຺ຕຕິ ກຖໍ ປນ.

໑໑໔໔. ກາມາວຈຣຂນ຺ຘານໍ, ສມນຸສ຺ສຣເຓ ປນ;

ປຣິຕ຺ຕາຣມ຺ມຓໍເຍວ, ໂຫຕີຕິ ປຣິທີປເຍ.

໑໑໔໕. ຣູປາວຈຣິກາຣຸປ຺ປຂນ຺ຘານຸສ຺ສຣເຓ ປນ;

ຠວຕີຕິ ຫິ ຎາຕພ຺ພໍ, ຕໍ ມຫຄ຺ຄຕໂຄຈຣໍ.

໑໑໔໖. ອຕີເຕ ອຕ຺ຕນາ ມຄ຺ຄໍ, ຠາວິຕໍ ຕຸ ຜລມ຺ປິ ວາ;

ສມນຸສ຺ສຣໂຕ ເອວ-ປ຺ປມາຓາຣມ຺ມຓໍ ສິຍາ.

໑໑໔໗. ສມນຸສ຺ສຣໂຕ ມຄ຺ຄໍ, ມຄ຺ຄາຣມ຺ມຓເມວ ຕໍ;

ອຕີຕາຣມ຺ມຓໍເຍວ, ໂຫຕິ ເອກນ຺ຕໂຕ ອິທໍ.

໑໑໔໘. ເຈໂຕປຣິຍຎາຓມ຺ປິ, ຍຖາກມ຺ມຸປຄມ຺ປິ ຈ;

ອຕີຕາຣມ຺ມຓາ ໂຫນ຺ຕິ, ກິຎ຺ຈາປິ ອຖ ໂຂ ປນ.

໑໑໔໙. ເຈໂຕປຣິຍຎາຓສ຺ສ, ສຕ຺ຕທ຺ທິວສພ຺ຠນ຺ຕຣໍ;

ອຕີຕໍ ຈິຕ຺ຕເມວສ຺ສ, ອາຣມ຺ມຓມຸທີຣິຕໍ.

໑໑໕໐. ອຕີເຕ ເຈຕນາມຕ຺ຕໍ, ຍຖາກມ຺ມຸປຄສ຺ສປິ;

ປຸພ຺ເພນິວາສຎາຓສ຺ສ, ນຕ຺ຖິ ກິຎ຺ຈິ ອໂຄຈຣໍ.

໑໑໕໑. ອຊ຺ຌຕ຺ຕາຣມ຺ມຓໍ ອຕ຺ຕ-ຂນ຺ຘານຸສ຺ສຣເຓ ສິຍາ;

ພຫິທ຺ຘາຣມ຺ມຓໍ ອຎ຺ຎ-ຂນ຺ຘານຸສ຺ສຣເຓ ຠເວ.

໑໑໕໒. ສຣເຓ ນາມໂຄຕ຺ຕສ຺ສ, ຕໍ ນວຕ຺ຕພ຺ພໂຄຈຣໍ;

ປຸພ຺ເພນິວາສຎາຓມ຺ປິ, ອຏ຺ຐສ຺ເວວ ປວຕ຺ຕຕິ.

໑໑໕໓. ປຈ຺ຈຸປ຺ປນ຺ເນ ປຣິຕ຺ເຕ ຈ, ພຫິທ຺ຘຊ຺ຌຕ຺ຕິເກສຸປິ;

ຈຕູສ຺ເວເຕສຸ ຘມ຺ເມສຸ, ທິພ຺ພຈກ຺ຂຸ ປວຕ຺ຕຕິ.

໑໑໕໔. ທິພ຺ພໂສຕສມໍ ທິພ຺ພ-ຈກ຺ຂຸອາຣມ຺ມຓກ຺ກເມ;

ຣູປໍ ສທ຺ໂທຕິ ທ຺ວິນ຺ນໍ ຕຸ, ອຍເມວ ວິເສສຕາ.

໑໑໕໕. ອນາຄຕໍສຎາຓມ຺ປິ, ປຣິຕ຺ຕາທີສຸ ອຏ຺ຐສຸ;

ອາຣມ຺ມຓວິຠາເຄສຸ, ປວຕ຺ຕຕິ ກຖໍ ປນ.

໑໑໕໖. ນິພ຺ພຕ຺ຕິສ຺ສຕິ ຍໍ ກາມາ-ວຈເຣຕິ ປຊານໂຕ;

ປຣິຕ຺ຕາຣມ຺ມຓໍ ໂຫຕິ, ຣູປາຣູເປສ຺ວນາຄເຕ.

໑໑໕໗. ນິພ຺ພຕ຺ຕິສ຺ສຕິ ຍຎ຺ຈາປິ, ສິຍາ ມຫຄ຺ຄຕໂຄຈຣໍ;

ຠາເວສ຺ສຕິ ອຍໍ ມຄ຺ຄໍ, ຜລໍ ສຈ຺ຉິກຣິສ຺ສຕິ.

໑໑໕໘. ເອວໍ ປຊານເນ ອປ຺ປ-ມາຓາຣມ຺ມຓຕໍ ຠເວ;

ມຄ຺ຄໍ ຠາເວສ຺ສຕິຈ຺ເຈວ, ຊານເນ ມຄ຺ຄໂຄຈຣໍ.

໑໑໕໙. ເອກນ຺ເຕນ ອິທໍ ຎາຓໍ, ໂຫຕານາຄຕໂຄຈຣໍ;

ເຈໂຕປຣິຍໍ ຕຸ ກິຎ຺ຈາປິ, ໂຫຕານາຄຕໂຄຈຣໍ.

໑໑໖໐. ອຖ ໂຂ ປນ ຕໍ ສຕ຺ຕ-ທິວສພ຺ຠນ຺ຕຣໍ ປນ;

ຈິຕ຺ຕເມວ ຈ ຊານາຕິ, ນ ຫິ ຕໍ ອຎ຺ຎໂຄຈຣໍ.

໑໑໖໑. ອນາຄຕໍສຎາຓສ຺ສ, ອນາຄຕໍສໂຄຈຣໍ;

‘‘ອຫໍ ເທໂວ ຠວິສ຺ສາມິ’’-ຈ຺ເຈວມຊ຺ຌຕ຺ຕໂຄຈຣໍ.

໑໑໖໒. ‘‘ຕິສ຺ໂສ ຜຸສ຺ໂສ ອມຸຕ຺ຣາຍໍ,

ນິພ຺ພຕ຺ຕິສ຺ສຕິນາຄເຕ’’;

ອິຈ຺ເຈວໍ ຊານເນ ຕສ຺ສ,

ພຫິທ຺ຘາຣມ຺ມຓໍ ສິຍາ.

໑໑໖໓. ຊານເນ ນາມໂຄຕ຺ຕສ຺ສ, ຍສ຺ສ ກສ຺ສຈິນາຄເຕ;

ປຸພ຺ເພນິວາສຎາຓໍວ, ຕໍ ນວຕ຺ຕພ຺ພໂຄຈຣໍ.

໑໑໖໔. ຍຖາກມ຺ມຸປຄຎາຓໍ, ປຣິຕ຺ຕາທີສຸ ປຎ຺ຈສຸ;

ອາຣມ຺ມຓວິຠາເຄສຸ, ປວຕ຺ຕຕິ ກຖໍ ປນ.

໑໑໖໕. ຊານເນ ກາມກມ຺ມສ຺ສ, ປຣິຕ຺ຕາຣມ຺ມຓໍ ສິຍາ;

ຕຖາ ມຫຄ຺ຄຕກມ຺ມສ຺ສ, ຕໍ ມຫຄ຺ຄຕໂຄຈຣໍ.

໑໑໖໖. ອຕີຕເມວ ຊານາຕິ, ຕສ຺ມາ ຈາຕີຕໂຄຈຣໍ;

ອຊ຺ຌຕ຺ຕາຣມ຺ມຓໍ ໂຫຕິ, ອຕ຺ຕໂນ ກມ຺ມຊານເນ.

໑໑໖໗. ພຫິທ຺ຘາຣມ຺ມຓໍ ໂຫຕິ, ປຣກມ຺ມປຊານເນ;

ເອວໍ ປວຕ຺ຕິ ຎາຕພ຺ພາ, ຍຖາກມ຺ມຸປຄສ຺ສປິ.

໑໑໖໘. ສຕ຺ຕນ຺ນມ຺ປິ ອຠິຎ຺ຎານໍ, ວຸຕ຺ໂຕ ອາຣມ຺ມຓກ຺ກໂມ;

ເອຕ຺ຖ ວຸຕ຺ຕນເຍເນວ, ເວທິຕພ຺ໂພ ວິຠາວິນາ.

໑໑໖໙. ວິວິຘຕ຺ຖວຓ຺ຓປເທຫິ ສມ຺ປນ຺ນໍ,

ມຘຸຣຕ຺ຖມຕິນີຫຣໍ ຄນ຺ຖໍ;

ໂສຕຸຊນສ຺ສ ຫທຍປີຕິກຣໍ,

ສຸເຓຍ຺ຍ ໂກຈິ ມນຸໂຊ ສເຈຕໂນ.

ອິຕິ ອຠິຘມ຺ມາວຕາເຣ ອຠິຎ຺ຎາຣມ຺ມຓນິທ຺ເທໂສ ນາມ

ສຕ຺ຕຣສໂມ ປຣິຈ຺ເຉໂທ.