໑໖. ໂສຬສໂມ ປຣິຈ຺ເຉໂທ

ອຠິຎ຺ຎານິທ຺ເທໂສ

໑໐໔໓. ອິໂຕ ປຣໍ ກຣິສ຺ສາມິ, ປຎ຺ຎາສຸທ຺ຘິກຣໍ ປຣໍ;

ປຎ຺ຈນ຺ນມ຺ປິ ອຠິຎ຺ຎານໍ, ມຸຂມຕ຺ຕນິທສ຺ສນໍ.

໑໐໔໔. ຣູປາຣູປສມາປຕ຺ຕີ,

ນິພ຺ພຕ຺ເຕຕ຺ວາ ປນຏ຺ຐປິ;

ໂລກິກາປິ ອຠິຎ຺ຎາໂຍ,

ຠາເວຕພ຺ພາ ວິຠາວິນາ.

໑໐໔໕. ຈຕຸຕ຺ຖຊ຺ຌານມຕ຺ເຕປິ, ສຸຈິຓ຺ຓວສິນາ ສຕາ;

ອນຸໂຍຄມຠິຎ຺ຎາສຸ, ກາຕຸໍ ວຕ຺ຕຕິ ໂຍຄິໂນ.

໑໐໔໖. ອຠິຎ຺ຎາ ນາມ ຠິກ຺ຂູນໍ, ສາຠິຎ຺ຎານໍ ອນຸຕ຺ຕໂຣ;

ອລງ຺ກາໂຣ ຫິ ຕາຓນ຺ຕິ, ສຕ຺ຖນ຺ຕິ ຈ ປວຸຈ຺ຈຕິ.

໑໐໔໗. ນິພ຺ພຕ຺ຕິຕາສ຺ວຠິຎ຺ຎາສຸ, ໂຍຄາວຈຣຠິກ຺ຂຸນາ;

ສມາຘິຠາວນາ ຫິສ຺ສ, ຕທາ ນິຏ຺ຐງ຺ຄຕາ ສິຍາ.

໑໐໔໘. ທິພ຺ພານິ ຈກ຺ຂຸໂສຕານິ, ອິທ຺ຘິຈິຕ຺ຕວິຊານນໍ;

ປຸພ຺ເພນິວາສຎາຓນ຺ຕິ, ປຎ຺ຈາຠິຎ຺ຎາ ອິມາ ສິຍຸໍ.

໑໐໔໙. ກສິຓານຸໂລມຕາທີຫິ, ຈຕຸທ຺ທສນເຍຫິ ຈ;

ທເມຕພ຺ພມຠິຎ຺ຎາໂຍ, ປຕ຺ຕຸກາເມນ ມານສໍ.

໑໐໕໐. ທນ຺ເຕ ສມາຫິເຕ ສຸທ຺ເຘ, ປຣິໂຍທາເຕ ອນງ຺ຄເຓ;

ນຸປກ຺ເລເສ ມຸທຸຠູເຕ, ກມ຺ມນີເຍ ຐິຕາຈເລ.

໑໐໕໑. ອິຕິ ອຏ຺ຐງ຺ຄສມ຺ປນ຺ເນ, ຈິຕ຺ເຕ ອິທ຺ຘິວິຘາຍ ຈ;

ອຠິນີຫຣຕິ ເຈ ຈິຕ຺ຕໍ, ສິຊ຺ຌຕິທ຺ຘິວິກຸພ຺ພນໍ.

໑໐໕໒. ອຠິຎ຺ຎາປາທກຊ຺ຌານໍ, ສມາປຊ຺ຊ ຕໂຕ ປນ;

ວຸຏ຺ຐາຍ ຫິ ສຕໍ ວາປິ, ສຫສ຺ສໍ ວາ ຍທິຈ຺ຉຕິ.

໑໐໕໓. ‘‘ສຕໍ ໂຫມິ ສຕໍ ໂຫມີ’’-ຈ຺ເຈວໍ ກຕ຺ວານ ມານສໍ;

ອຠິຎ຺ຎາປາທກຊ຺ຌານໍ, ສມາປຊ຺ຊ ຕໂຕ ປນ.

໑໐໕໔. ວຸຏ຺ຐາຍ ປຸນຘິຏ຺ຐາຕິ,

ສຫາຘິຏ຺ຐານເຈຕສາ;

ສຕໍ ໂຫຕິ ຫິ ໂສ ໂຍຄີ,

ສຫສ຺ສາທີສ຺ວຍໍ ນໂຍ.

໑໐໕໕. ປາທກຊ຺ຌານຈິຕ຺ຕໍ ຕຸ, ນິມິຕ຺ຕາຣມ຺ມຓໍ ສິຍາ;

ປຣິກມ຺ມມນາເນຕ຺ຖ, ສຕາຣມ຺ມຓິການິ ຕຸ.

໑໐໕໖. ຕທາຘິຏ຺ຐານຈິຕ຺ຕມ຺ປິ, ສຕາຣມ຺ມຓເມວ ຕໍ;

ປຸພ຺ເພ ວຸຕ຺ຕປ຺ປນາຈິຕ຺ຕໍ, ວິຍ ໂຄຕ຺ຣຠຸນນ຺ຕຣໍ.

໑໐໕໗. ຕເມກໍ ຊາຍເຕ ຕຕ຺ຖ, ຈຕຸຕ຺ຖຊ຺ຌານິກໍ ມໂນ;

ປຣິກມ຺ມວິເສໂສວ, ເສສໍ ປຸພ຺ພສມໍ ອິຘ.

ອິທ຺ຘິວິຘຎາຓໍ.

໑໐໕໘. ທິພ຺ພໂສຕມິທໍ ຕຕ຺ຖ, ຠາເວຕພ຺ພໍ ກຖໍ ສິຍາ;

ອຠິຎ຺ຎາປາທກຊ຺ຌານໍ, ສມາປຊ຺ຊ ຕໂຕ ປຸນ.

໑໐໕໙. ວຸຏ຺ຐາຍ ປຣິກມ຺ເມນ, ກາມາວຈຣເຈຕສາ;

ສທ຺ໂທ ອາວຊ຺ຊິຕພ຺ໂພວ, ມຫນ຺ໂຕ ສຸຂຸໂມປິ ຈ.

໑໐໖໐. ຕສ຺ເສວໍ ປນ ສທ຺ທສ຺ສ, ນິມິຕ຺ຕໍ ມນສິ ກຸພ຺ພໂຕ;

ທິພ຺ພໂສຕມິທານິສ຺ສ, ອຸປ຺ປຊ຺ຊິສ຺ສຕິ ຕໍ ອິຕິ.

໑໐໖໑. ສທ຺ເທສ຺ວຎ຺ຎຕຣໍ ສທ຺ທໍ, ກຕ຺ວາ ອາຣມ຺ມຓໍ ຕໂຕ;

ອຸປ຺ປຊ຺ຊິຕ຺ວາ ນິຣຸທ຺ເຘ ຕຸ, ມໂນທ຺ວາຣາວຊ຺ຊເນ ປຸນ.

໑໐໖໒. ຊວນານິ ຫິ ຊາຍນ຺ເຕ, ຕສ຺ສ ຈຕ຺ຕາຣິ ປຎ຺ຈ ວາ;

ປຸຣິມາເນຕ຺ຖ ຈິຕ຺ເຕສຸ, ຕີຓິ ຈຕ຺ຕາຣິ ວາ ປນ.

໑໐໖໓. ປຣິກມ຺ໂມປຈາຣານຸ-ໂລມໂຄຕ຺ຣຠຸນາມກາ;

ຈຕຸຕ຺ຖໍ ປຎ຺ຈມໍ ວາປິ, ອປ຺ປນາຈິຕ຺ຕມີຣິຕໍ.

໑໐໖໔. ສຫຊາຕໍ ຕຸ ຍໍ ຎາຓໍ, ອປ຺ປນາມານເສນ ຫິ;

ຕໍ ຎາຓໍ ທິພ຺ພໂສຕນ຺ຕິ, ວທນ຺ຕິ ສຸຕໂກວິທາ.

໑໐໖໕. ຖາມຊາຕໍ ກໂຣນ຺ເຕນ, ຕໍ ຎາຓໍ ເຕນ ໂຍຄິນາ;

‘‘ເອຕ຺ຖນ຺ຕຣຄຕໍ ສທ຺ທໍ, ສຸຓາມີ’’ຕິ ຈ ເຈຕສາ.

໑໐໖໖. ອງ຺ຄຸລໍ ທ຺ວງ຺ຄຸລໍ ຠິຍ຺ໂຍ,

ວິທຕ຺ຖິ ຣຕນໍ ຕຖາ;

ຄາໂມ ເທໂສ ຕໂຕ ຍາວ,

ຈກ຺ກວາຬາ ຕໂຕ ປຣໍ.

໑໐໖໗. ອິຈ຺ເຈວໍ ຕຸ ປຣິຈ຺ຉິຊ຺ຊ, ວຑ຺ເຒຕພ຺ພໍ ຍຖາກ຺ກມໍ;

ເອໂສ ອຘິຄຕາຠິຎ຺ໂຎ, ປາທກາຣມ຺ມເຓນ ຕຸ.

໑໐໖໘. ຜຸຏ຺ໂຐກາສຄເຕ ສທ຺ເທ, ສພ຺ເພ ປນ ສຸຓາຕິ ໂສ;

ສຸຓນ຺ໂຕ ປາຏິເຍກ຺ກມ຺ປິ, ສລ຺ລກ຺ເຂຕຸໍ ປໂຫຕິ ໂສ.

ທິພ຺ພໂສຕຎາຓໍ.

໑໐໖໙. ກຖໍ ປນຸປ຺ປາເທຕພ຺ພໍ, ເຈໂຕປຣິຍມານສໍ;

ທິພ຺ພຈກ຺ຂຸວເສເນວ, ອິທໍ ຎາຓໍ ປນິຊ຺ຌຕິ.

໑໐໗໐. ອາໂລກໍ ປນ ວຑ຺ເຒຕ຺ວາ, ຕສ຺ມາ ທິພ຺ເພນ ຈກ຺ຂຸນາ;

ຫທຍໍ ປນ ນິສ຺ສາຍ, ວຕ຺ຕມານໍ ຕຸ ໂລຫິຕໍ.

໑໐໗໑. ທິສ຺ວາ ປຣສ຺ສ ວິຎ຺ເຎຍ຺ຍໍ,

ໂຫຕິ ຈິຕ຺ຕໍ ຕຸ ຠິກ຺ຂຸນາ;

ໂສມນສ຺ສຍຸເຕ ຈິຕ຺ເຕ,

ໂລຫິຕໍ ໂລຫິຕໍ ສິຍາ.

໑໐໗໒. ໂທມນສ຺ສຍຸເຕ ຈິຕ຺ເຕ, ວຕ຺ຕມາເນ ຕຸ ກາຬກໍ;

ອຸເປກ຺ຂາສຫິເຕ ຈິຕ຺ເຕ, ຕິລເຕລູປມໍ ສິຍາ.

໑໐໗໓. ຕສ຺ມາ ປຣສ຺ສ ສຕ຺ຕສ຺ສ, ທິສ຺ວາ ຫທຍໂລຫິຕໍ;

ເຈໂຕປຣິຍຎາຓໍ ຕໍ, ກາຕພ຺ພໍ ຖາມຕໍ ຄຕໍ.

໑໐໗໔. ເອວໍ ຖາມຄເຕ ຕສ຺ມິໍ, ຍຖານຸກ຺ກມໂຕ ປນ;

ຈິຕ຺ຕເມວ ວິຊານາຕິ, ວິນາ ໂລຫິຕທສ຺ສນໍ.

໑໐໗໕. ກາມາວຈຣຈິຕ຺ຕຎ຺ຈ, ຣູປາຣູເປສຸ ມານສໍ;

ສພ຺ພເມວ ວິຊານາຕິ, ສຣາຄາທິປ຺ປເຠທກໍ.

ເຈໂຕປຣິຍຎາຓໍ.

໑໐໗໖. ປຸພ຺ເພນິວາສຎາເຓນ, ກຕ຺ຕພ຺ພາ ຕທນຸສ຺ສຕິ;

ຕໍ ສມ຺ປາເທຕຸກາເມນ, ອາທິກມ຺ມິກຠິກ຺ຂຸນາ;

ຌານານິ ປນ ຈຕ຺ຕາຣິ, ສມາປຊ຺ຊານຸປຸພ຺ພໂຕ.

໑໐໗໗. ອຠິຎ຺ຎາປາທກຊ຺ຌານາ, ວຸຏ຺ຐາຍ ຫິ ຕໂຕ ປຸນ;

ຠິກ຺ຂຸນາ ວຊ຺ຊິຕພ຺ພາວ, ນິສຊ຺ຊາ ສພ຺ພປຈ຺ຉິມາ.

໑໐໗໘. ຕໂຕ ປຠຸຕິ ສພ຺ພມ຺ປິ, ປຏິໂລມກ຺ກມາ ປນ;

ສພ຺ພມາວຊ຺ຊິຕພ຺ພໍ ຕໍ, ທິວເສ ຣຕ຺ຕິຍໍ ກຕໍ.

໑໐໗໙. ປຏິໂລມກ຺ກເມເນວ, ທຸຕິເຍ ຕຕິເຍປິ ຈ;

ທິວເສ ປກ຺ຂມາເສສຸ, ຕຖາ ສໍວຈ຺ຉເຣສຸປິ.

໑໐໘໐. ຍາວ ອສ຺ມິໍ ຠເວ ສນ຺ຘິ, ຕາວ ເຕນ ຈ ຠິກ຺ຂຸນາ;

ກຕມາວຊ຺ຊິຕພ຺ພໍ ຕໍ, ປຸຣິມສ຺ມິໍ ຠເວປິ ຈ.

໑໐໘໑. ຈຸຕິກ຺ຂເຓປິ ນິພ຺ພຕ຺ຕໍ, ນາມຣູປຎ຺ຈ ສາຘຸກໍ;

ເອວມາວຊ຺ຊິເຕ ຕສ຺ມິໍ, ນາມຣູເປ ຍທາ ປນ.

໑໐໘໒. ຕເທວາຣມ຺ມຓໍ ກຕ຺ວາ, ນາມຣູປໍ ຈຸຕິກ຺ຂເຓ;

ມໂນທ຺ວາເຣ ມນກ຺ກາໂຣ, ອຸປ຺ປຊ຺ຊຕິ ຕທາ ປນ.

໑໐໘໓. ອາວຊ຺ຊເນ ນິຣຸທ຺ຘສ຺ມິໍ, ຕເທວາຣມ຺ມຓໍ ປນ;

ກຕ຺ວາ ຊວນຈິຕ຺ຕານິ, ໂຫນ຺ຕິ ຈຕ຺ຕາຣິ ປຎ຺ຈ ວາ;

ປຸພ຺ເພ ວຸຕ຺ຕນເຍເນວ, ເສສໍ ເຎຍ຺ຍໍ ວິຠາວິນາ.

໑໐໘໔. ປຣິກມ຺ມາທິນາມານິ, ປຸຣິມານິ ຠວນ຺ຕິ ຕຸ;

ປຈ຺ຉິມໍ ອປ຺ປນາຈິຕ຺ຕໍ, ຣູປາວຈຣິກໍ ຠເວ.

໑໐໘໕. ເຕນ ຈິຕ຺ເຕນ ຍໍ ຎາຓໍ, ສໍຍຸຕ຺ຕໍ ເຕນ ຍາ ປນ;

ສໍຍຸຕ຺ຕາ ສຕິ ສາ ປຸພ຺ເພ-ນິວາສານຸສ຺ສຕີຣິຕາ.

ປຸພ຺ເພນິວາສານຸສ຺ສຕິຎາຓໍ.

໑໐໘໖. ຣູປໍ ປສ຺ສິຕຸກາເມນ, ຠິກ຺ຂຸນາ ທິພ຺ພຈກ຺ຂຸນາ;

ກສິຓາຣມ຺ມຓໍ ຌານໍ, ອຠິຎ຺ຎາປາທກໍ ປນ.

໑໐໘໗. ອຠິນີຫາຣກ຺ຂມໍ ກຕ຺ວາ, ເຕໂຊກສິຓເມວ ວາ;

ໂອທາຕກສິຓໍ ວາປິ, ອາໂລກກສິຓມ຺ປິ ວາ.

໑໐໘໘. ອິເມສຸ ກຕປຸຎ຺ເຎຫິ, ກສິເຓສຸ ຈ ຕີສຸປິ;

ອາໂລກກສິຓໍ ເອຕ຺ຖ, ເສຏ຺ຐນ຺ຕິ ປຣິທີປິຕໍ.

໑໐໘໙. ຕສ຺ມາ ຕມິຕຣໍ ວາປິ, ອຸປ຺ປາເທຕ຺ວາ ຍຖາກ຺ກມໍ;

ອຸປຈາຣຠູມິຍໍເຍວ, ຐຕ຺ວາ ຕໍ ປນ ປຓ຺ຑິໂຕ.

໑໐໙໐. ວຑ຺ເຒຕ຺ວານ ຐເປຕພ຺ພໍ, ນ ອຸປ຺ປາເທຍ຺ຍ ອປ຺ປນໍ;

ອຸປ຺ປາເທຕິ ສເຈ ໂຫຕິ, ປາທກຊ຺ຌານນິສ຺ສິຕໍ.

໑໐໙໑. ຌານສ຺ສ ວຑ຺ຒິຕສ຺ສນ຺ໂຕ-ຄຕໍ ຣູປໍ ຕຸ ໂຍຄິນາ;

ປສ຺ສິຕພ຺ພໍ ຠເວ ຣູປໍ, ປສ຺ສໂຕ ປນ ຕສ຺ສ ຕໍ.

໑໐໙໒. ປຣິກມ຺ມສ຺ສ ວາໂຣ ຫິ, ອຕິກ຺ກມຕິ ຕາວເທ;

ອາໂລໂກປິ ຕໂຕ ຕສ຺ສ, ຂິປ຺ປມນ຺ຕຣຘາຍຕິ.

໑໐໙໓. ຕສ຺ມິໍ ອນ຺ຕຣຫິເຕ ຣູປ-ຄຕມ຺ປິ ຈ ນ ທິສ຺ສຕິ;

ເຕນາຖ ປາທກຊ຺ຌານໍ, ປວິສິຕ຺ວາ ຕໂຕ ປຸນ.

໑໐໙໔. ວຸຏ຺ຐາຍ ປນ ອາໂລໂກ, ຜຣິຕພ຺ໂພວ ຠິກ຺ຂຸນາ;

ເອວໍ ອນຸກ຺ກເມເນວ, ອາໂລໂກ ຖາມວາ ສິຍາ.

໑໐໙໕. ‘‘ອາໂລໂກ ເອຕ຺ຖ ໂຫຕູ’’ຕິ,

ຍຕ຺ຕກໍ ຐານເມວ ໂສ;

ປຣິຈ຺ຉິນ຺ທຕິ ຕຕ຺ເຖວ,

ອາໂລໂກ ປນ ຕິຏ຺ຐຕິ.

໑໐໙໖. ທິວສມ຺ປິ ນິສີທິຕ຺ວາ, ປສ຺ສໂຕ ໂຫຕິ ທສ຺ສນໍ;

ຕິຓຸກ຺ກາຍ ຄໂຕ ມຄ຺ຄໍ, ປຸຣິເສຕ຺ຖ ນິທສ຺ສນໍ.

໑໐໙໗. ອຸປ຺ປາທນກ຺ກໂມປິສ຺ສ, ຕຕ຺ຣາຍໍ ທິພ຺ພຈກ຺ຂຸໂນ;

ວຸຕ຺ຕປ຺ປກາຣຣູປໍ ຕໍ, ກຕ຺ວາ ອາຣມ຺ມຓໍ ປນ.

໑໐໙໘. ມໂນທ຺ວາເຣ ມນກ຺ກາເຣ, ຊາເຕ ຍານິ ຕເທວ ຈ;

ຣູປໍ ອາຣມ຺ມຓໍ ກຕ຺ວາ, ຊາຍນ຺ຕິ ຊວນານິ ຫິ.

໑໐໙໙. ກາມາວຈຣຈິຕ຺ຕານິ, ຕານິ ຈຕ຺ຕາຣິ ປຎ຺ຈ ວາ;

ເຫຏ຺ຐາ ວຸຕ຺ຕນເຍເນວ, ເສສໍ ເຎຍ຺ຍໍ ວິຠາວິນາ.

໑໑໐໐. ອຕ຺ຖສາຘກຈິຕ຺ຕໍ ຕໍ, ຈຕຸຕ຺ຖຊ຺ຌານິກໍ ມຕໍ;

ຕໍຈິຕ຺ຕສໍຍຸຕໍ ຎາຓໍ, ທິພ຺ພຈກ຺ຂຸນ຺ຕິ ວຸຈ຺ຈຕິ.

໑໑໐໑. ອນາຄຕໍສຎາຓສ຺ສ, ຍຖາກມ຺ມຸປຄສ຺ສ ຈ;

ປຣິກມ຺ມໍ ວິສຸໍ ນຕ຺ຖິ, ອິຊ຺ຌນ຺ຕິ ທິພ຺ພຈກ຺ຂຸນາ.

໑໑໐໒. ຈຸຕູປປາຕຎາຓມ຺ປິ, ທິພ຺ພຈກ຺ຂຸນ຺ຕິ ວາ ປນ;

ອຕ຺ຖໂຕ ເອກເມເວທໍ, ພ຺ຍຎ຺ຊເນ ປນ ນານຕາ.

ທິພ຺ພຈກ຺ຂຸຎາຓໍ.

໑໑໐໓. ໂຍຘ ສຸຓາຕິ ກໂຣຕິ ຈ ຈິຕ຺ເຕ,

ຄນ຺ຖມິມໍ ປຣມໍ ປນ ຠິກ຺ຂຸ;

ໂສ ອຠິຘມ຺ມມຫຓ຺ຓວປາຣໍ,

ຍາຕິ ອເນນ ຕເຣນ ຕຣິຕ຺ວາ.

ອິຕິ ອຠິຘມ຺ມາວຕາເຣ ອຠິຎ຺ຎານິທ຺ເທໂສ ນາມ

ໂສຬສໂມ ປຣິຈ຺ເຉໂທ.