໑໒. ທ຺ວາທສໂມ ປຣິຈ຺ເຉໂທ

ປຎ຺ຎຕ຺ຕິນິທ຺ເທໂສ

ເອຕ຺ຖາຫ – ‘‘ກິໍ ເອຕ຺ຕກເມວ ເຎຍ຺ຍໍ, ອຸທາຫຸ ອຎ຺ຎມ຺ປິ ອຕ຺ຖີ’’ຕິ? ອຕ຺ຖິ ປຎ຺ຎຕ຺ຕິ ນາມາຕິ. ສາ ປເນສາ ປຎ຺ຎເປຕພ຺ພໂຕ, ປຎ຺ຎາປນໂຕ ຈ ‘‘ປຎ຺ຎຕ຺ຕີ’’ຕິ ວຸຈ຺ຈຕິ. ເຕເນວາຫ – ‘‘ຍາ ເຕສໍ ເຕສໍ ຘມ຺ມານໍ ສງ຺ຂາ ສມຎ຺ຎາ ປຎ຺ຎຕ຺ຕິ ໂວຫາໂຣ ນາມໍ ນາມກມ຺ມໍ ນາມເຘຍ຺ຍໍ ນິຣຸຕ຺ຕິ ພ຺ຍຎ຺ຊນໍ ອຠິລາໂປ’’ຕິ. ຕຕ຺ຖ ສງ຺ຂາຍຕີຕິ ສງ຺ຂາ, ກຖີຍຕີຕິ ອຕ຺ໂຖ. ກິນ຺ຕິ ກຖີຍຕິ? ‘‘ອຫ’’ນ຺ຕິ ‘‘ມມ’’ນ຺ຕິ ‘‘ປໂຣ’’ຕິ ‘‘ປຣສ຺ສາ’’ຕິ ‘‘ມຎ຺ໂຈ’’ຕິ ‘‘ປີຐ’’ນ຺ຕິ ອເນເກຫິ ອາກາເຣຫິ ກຖີຍຕີຕິ ສງ຺ຂາ. ສມຎ຺ຎາຍຕີຕິ ສມຎ຺ຎາ. ປຎ຺ຎາປີຍຕີຕິ ປຎ຺ຎຕ຺ຕິ. ໂວຫຣີຍຕີຕິ ໂວຫາໂຣ. ກິນ຺ຕິ ໂວຫຣີຍຕິ? ‘‘ອຫ’’ນ຺ຕິ ‘‘ມມ’’ນ຺ຕິ ‘‘ປໂຣ’’ຕິ ‘‘ປຣສ຺ສາ’’ຕິ ‘‘ມຎ຺ໂຈ’’ຕິ ‘‘ປີຐ’’ນ຺ຕິ. ເອວໍ ຕາວ ປຎ຺ຎເປຕພ຺ພໂຕ ປຎ຺ຎຕ຺ຕີຕິ ວຸຕ຺ຕາ. ‘‘ອຫ’’ນ຺ຕິ ຫິ ຣູປາທໂຍ ຘມ຺ເມ ອຸປາທາຍ ປຏິຈ຺ຈ ກາຣຓໍ ກຕ຺ວາ ຍຖາ ເຕ ຣູປາທໂຍ ຘມ຺ມາ ອຸປ຺ປາທວຍວນ຺ໂຕ, ນ ເອວໍວິຘາ, ເກວລໍ ໂລກສງ຺ເກເຕນ ສິທ຺ຘາ ຍາ ອຍໍ ‘‘ອຫ’’ນ຺ຕິ ກຖີຍຕິ ເຈວ ປຎ຺ຎາປີຍຕິ ຈ, ເອສາ ປຎ຺ຎຕ຺ຕີຕິ ອຕ຺ໂຖ.

ອິທານິ ປຎ຺ຎາປນໂຕ ປຎ຺ຎຕ຺ຕິໍ ປກາເສຕຸໍ ‘‘ນາມໍ ນາມກມ຺ມ’’ນ຺ຕິອາທິມາຫ. ຕຕ຺ຖ ນາມນ຺ຕິ ຕໍ ຕໍ ຘມ຺ມໍ ‘‘ເອສ ອິຕ຺ຖນ຺ນາໂມ ນາມາ’’ຕິ ປຎ຺ຎເປຕິ, ຕສ຺ມາ ຕໍ ປຎ຺ຎຕ຺ຕີຕິ ປວຸຈ຺ຈຕິ. ນາມກມ຺ມນ຺ຕິອາທີນິ ຕສ຺ສາ ເອວ ເວວຈນານິ. ອຍໍ ປຎ຺ຎາປນໂຕ ປຎ຺ຎຕ຺ຕິ ນາມ.

ສາ ປເນສາ ຕຊ຺ຊາປຎ຺ຎຕ຺ຕິ ອຸປາທາປຎ຺ຎຕ຺ຕິ ອຸປນິຘາປຎ຺ຎຕ຺ຕີຕິ ຕິວິຘາ ໂຫຕິ. ຕຕ຺ຖ ຕຊ຺ຊາປຎ຺ຎຕ຺ຕິ ນາມ ຈກ຺ຂຸໂສຕຣູປສທ຺ທປຖວີເຕໂຊວາໂຍຕິອາທິນຍປ຺ປວຕ຺ຕາ. ອຸປາທາປຎ຺ຎຕ຺ຕິ ປນ ສມູຫາສມູຫວເສນ ທຸວິຘາ ໂຫຕິ. ຕຕ຺ຖ ສມູຫປຎ຺ຎຕ຺ຕິ ນາມ ຣູປາຣູປຘມ຺ເມສຸ ເອກສ຺ສ ວາ ພຫູນໍ ວາ ນາມໍ ຄເຫຕ຺ວາ ສມູຫເມໂວປາທາຍ ວຸຈ຺ຈຕິ. ກຖໍ? ອຈ຺ຉຕຣຈ຺ຉຆຏປຏາທິປ຺ປເຠທາ. ອຍໍ ສມູຫປຎ຺ຎຕ຺ຕິ ນາມ. ອສມູຫປຎ຺ຎຕ຺ຕິ ປນ ທິສາກາສກາລນິມິຕ຺ຕາຠາວນິໂຣຘາທິເຠທາ.

ຍທາ ປນ ສາ ວິຊ຺ຊມານໍ ປຣມຕ຺ຖໍ ໂຊຕຍຕິ, ຕທາ ‘‘ວິຊ຺ຊມານປຎ຺ຎຕ຺ຕີ’’ຕິ ປວຸຈ຺ຈຕິ. ຍທາ ອວິຊ຺ຊມານໍ ສມູຫາສມູຫເຠທໍ ນາມມຕ຺ຕໍ ໂຊຕຍຕິ, ຕທາ ‘‘ອວິຊ຺ຊມານປຎ຺ຎຕ຺ຕີ’’ຕິ ປວຸຈ຺ຈຕິ. ທຸວິຘາປິ ປເນສາ ໂສຕທ຺ວາຣຊວນານນ຺ຕຣໍ ຄຫິຕປຸພ຺ພສງ຺ເກຕມໂນທ຺ວາຣຊວນວິຎ຺ຎາເຓນ ວິຎ຺ຎາຍຕິ. ຍາຍ ຄຫິຕປຸພ຺ພສງ຺ເກເຕນ ມໂນທ຺ວາຣຊວນວິຎ຺ຎາເຓນ ປຎ຺ຎາປີຍຕິ. ຍໍ ສນ຺ຘາຍ ‘‘ວິຊ຺ຊມານປຎ຺ຎຕ຺ຕິ, ອວິຊ຺ຊມານປຎ຺ຎຕ຺ຕິ, ວິຊ຺ຊມາເນນ ອວິຊ຺ຊມານປຎ຺ຎຕ຺ຕິ, ອວິຊ຺ຊມາເນນ ວິຊ຺ຊມານປຎ຺ຎຕ຺ຕິ, ວິຊ຺ຊມາເນນ ວິຊ຺ຊມານປຎ຺ຎຕ຺ຕິ, ອວິຊ຺ຊມາເນນ ອວິຊ຺ຊມານປຎ຺ຎຕ຺ຕີ’’ຕິ ຉກ຺ກນໂຍ ວຸຕ຺ໂຕ. ຕຕ຺ຖ ປຣມຕ຺ຖໂຕ ວິຊ຺ຊມານານໍ ຣູປາທີນໍ ປຎ຺ຎາປນາ ວິຊ຺ຊມານປຎ຺ຎຕ຺ຕິ. ຕຖາ ອວິຊ຺ຊມານານມິຕ຺ຖິປຸຣິສາທີນໍ ປຎ຺ຎາປນາ ອວິຊ຺ຊມານປຎ຺ຎຕ຺ຕິ. ຐເປຕ຺ວາ ປນ ວຈນຕ຺ຖໍ ເກນຈິ ອາກາເຣນ ອນຸປລພ຺ຠມານານໍ ປຎ຺ຈມສຈ຺ຈາທີນໍ, ຕິຕ຺ຖິຍປຣິກປ຺ປິຕານໍ ວາ ປກຕິປຸຣິສາທີນໍ ປຎ຺ຎາປນາປິ ອວິຊ຺ຊມານປຎ຺ຎຕ຺ຕິເຍວ. ‘‘ເຕວິຊ຺ໂຊ, ຉຬຠິຎ຺ໂຎ’’ຕິ ເອວມາທິນຍປ຺ປວຕ຺ຕາ ວິຊ຺ຊມາເນນ ອວິຊ຺ຊມານປຎ຺ຎຕ຺ຕິ. ‘‘ອິຕ຺ຖິສທ຺ໂທ, ປຸຣິສສທ຺ໂທ’’ຕິ ເອວມາທິກາ ອວິຊ຺ຊມາເນນ ວິຊ຺ຊມານປຎ຺ຎຕ຺ຕິ. ‘‘ຈກ຺ຂຸວິຎ຺ຎາຓໍ, ໂສຕວິຎ຺ຎາຓ’’ນ຺ຕິ ເອວມາທິກາ ວິຊ຺ຊມາເນນ ວິຊ຺ຊມານປຎ຺ຎຕ຺ຕິ. ‘‘ຂຕ຺ຕິຍກຸມາໂຣ, ພ຺ຣາຫ຺ມຓກຸມາໂຣ, ຠິກ຺ຂຸກຸມາໂຣ’’ຕິ ເອວມາທິກາ ອວິຊ຺ຊມາເນນ ອວິຊ຺ຊມານປຎ຺ຎຕ຺ຕີຕິ ເອວໍ ວຸຕ຺ຕາ ຉ ປຎ຺ຎຕ຺ຕິໂຍປິ ເອຕ຺ເຖວ ສງ຺ຄຫໍ ຄຈ຺ຉນ຺ຕິ. ອຍໍ ອຸປາທາປຎ຺ຎຕ຺ຕິ ນາມ.

ອຸປນິຘາປຎ຺ຎຕ຺ຕິປິ ເອຕິສ຺ສາ ເອວ ປເຠທາ, ສາ ປນ ‘‘ທີຆໍ ອຸປນິຘາຍ ຣສ຺ໂສ, ຣສ຺ສໍ ອຸປນິຘາຍ ທີໂຆ’’ຕິອາທິນຍປ຺ປວຕ຺ຕາ ‘‘ກປຓໍ ມານຸສກໍ ຣຊ຺ຊໍ ທິພ຺ພສຸຂໍ ອຸປນິຘາຍາ’’ຕິ ເອວມາທິກາ ຈ, ຕສ຺ມາ ປຎ຺ຎເປຕພ຺ພໂຕ ຈ ປຎ຺ຎາປນໂຕ ຈ ປຎ຺ຎຕ຺ຕີຕິ ເວທິຕພ຺ພາ. ສມຎ຺ຎາ ສມຕ຺ຕາ.

໗໗໘. ປຣມຕ຺ຖໂຕ ຈ ປຎ຺ຎຕ຺ຕິ, ຕຕິຍາ ໂກຏິ ນ ວິຊ຺ຊຕິ;

ທ຺ວີສຸ ຐາເນສຸ ກຸສໂລ, ປຣວາເທສຸ ນ ກມ຺ປຕິ.

ອິຕິ ອຠິຘມ຺ມາວຕາເຣ ປຎ຺ຎຕ຺ຕິນິທ຺ເທໂສ ນາມ

ທ຺ວາທສໂມ ປຣິຈ຺ເຉໂທ.