ໂລກຸຕ຺ຕຣວິປາກວຓ຺ຓນາ

ມຄ຺ຄຈິຕ຺ຕສ຺ສ ວິຍ ຜລຈິຕ຺ຕສ຺ສ ມຄ຺ຄໂຍຄໂຕ ເຠທາຠາເວນ ‘‘ຈຕຸມຄ຺ຄໂຍຄໂຕ’’ຕິ ອວຕ຺ວາ ‘‘ຈຕຸມຄ຺ຄສມ຺ປຍຸຕ຺ຕຈິຕ຺ຕຜລຕ຺ຕາ’’ຕິ ວຸຕ຺ຕໍ, ຈຕູຫິ ອຣິຍມຄ຺ເຄຫິ ສມ຺ປຍຸຕ຺ຕກຸສລຈິຕ຺ຕສ຺ສ ຜລຕ຺ຕາ ຈຕຸພ຺ພິຘສາມຎ຺ຎຜລສມ຺ປຍຸຕ຺ຕຈິຕ຺ຕຠາວໂຕຕິ ອຕ຺ໂຖ. ໂສຕາປຕ຺ຕິມຄ຺ຄສ຺ສ ຜລໍ ຈິຕ຺ຕໍ ໂສຕາປຕ຺ຕິມຄ຺ຄຜລຈິຕ຺ຕໍ. ເອວໍ ເສເສສຸ. ມຄ຺ຄວີຖິຍໍ ທ຺ວິກ຺ຂຕ຺ຕຸໍ, ຕິກ຺ຂຕ຺ຕຸໍ ວາ ຜລສມາປຕ຺ຕິຍາ ອປຣິຈ຺ຉິນ຺ນປຣິມາຓໍ ປວຕ຺ຕມານມ຺ປິ ທ຺ວີສ຺ເວວ ຐາເນສຸ ປວຕ຺ຕິຍາ ທຸວິຘເມວ ໂຫຕີຕິ ອາຫ ‘‘ມຄ຺ຄວີຖິຜລສມາປຕ຺ຕິວເສນ ປວຕ຺ຕິໂຕ ທຸວິຘ’’ນ຺ຕິ.

໕໐-໑. ມຄ຺ຄສ຺ສານນ຺ຕເຣ ຜເລ ລພ຺ຠນ຺ຕິ ມຄ຺ຄາຄມນໂຕຕິ ອຘິປ຺ປາໂຍ. ມຄ຺ໂຄ ຫິ ອາຄມນໂຕ ‘‘ສຸຎ຺ຎໂຕ’’ຕິ ລທ຺ຘນາໂມ ສຄຸຓາລມ຺ພຓວເສນ ອນິມິຕ຺ຕອປ຺ປຓິຫິຕນາມມ຺ປິ ລຠຕີຕິ ຜລສ຺ສ ນາມຕ຺ຕຍມ຺ປິ ເທຕິ, ຕຖາ ອາຄມນໂຕ ອປ຺ປຓິຫິໂຕ ມຄ຺ໂຄ ສຄຸຓາຣມ຺ມຓວເສນ ອນິມິຕ຺ຕສຸຎ຺ຎຕອປ຺ປຓິຫິຕນາມໂກຕິ ຜລສ຺ສ ນາມຕ຺ຕຍມ຺ປິ ເທຕິ. ເອວຎ຺ຈ ກຕ຺ວາ ອຠິຘມ຺ເມ ເອເກກສ຺ສ ຜລສ຺ສ ຕີຓິ ຕີຓິ ນາມານິ ວຸຕ຺ຕານິ. ນນຸ ຈ ອຠິຘມ຺ເມ ‘‘ສຄຸຓາຣມ຺ມຓໂຕ ນາມໍ ອນຘິປ຺ເປຕ’’ນ຺ຕິ ວຸຕ຺ຕໍ? ສຈ຺ຈໍ ວຸຕ຺ຕໍ, ຕໍ ປນ ນາມລາຠໍ ສນ຺ຘາຍ, ນ ນາມທານໍ. ຕຕ຺ຖ ຫິ ວວຕ຺ຖານກຣຕ຺ຕາຠາວໂຕ ຕຖາ ອນຘິປ຺ເປຕໍ, ນ ອລພ຺ຠນໂຕ. ອິຘ ປນ ເອເກກສ຺ສ ຜລໍ ນາມຕ຺ຕຍມ຺ປິ ລຠຕີຕິ ວວຕ຺ຖານປ຺ປໂຍຊນາຠາວໂຕ ສຄຸຓາຣມ຺ມເຓຫິ ລທ຺ຘນາມທານສ຺ສ ອຘິປ຺ເປຕຕ຺ຕາ ຕິວິຘມ຺ປິ ນາມໍ ເທຕິ. ເອກນ຺ເຕນ ເຈຕໍ ເອວໍ ສມ຺ປຏິຈ຺ຉິຕພ຺ພໍ, ອິຕຣຖາ ວິປສ຺ສນາປິ ວິປສ຺ສໂຕ ລທ຺ຘນາມມຄ຺ຄສ຺ສ ຕໍ ນ ທເທຍ຺ຍາຕິ. ປຣຠາຄສ຺ມິນ຺ຕິ ອປຣຠາເຄ. ວຬຎ຺ຊນຜເລສູຕິ ສມາປຊ຺ຊນວເສນ ອນຸຠວິຕພ຺ພຜເລສຸ. ‘‘ວຬຎ຺ຊນຜເລສຸ ນາ’’ຕິ ມຄ຺ຄາຄມນໍ ສນ຺ຘາຍ ປຏິກ຺ຂິຕ຺ຕນ຺ຕິ ອາຫ ‘‘ວິປສ຺ສນາວເສເນວາ’’ຕິອາທິ. ວຬຎ຺ຊນຜລຎ຺ຫິ ວິສຸໍ ວິປສ຺ສນາວເສເນວ ນິພ຺ພຕ຺ຕຕີຕິ ຕສ຺ສ ຕໍວເສນ ນາມລາໂຠ. ຍທິ ເອວໍ ມຄ຺ຄສ຺ສ ວິຍ ອນິມິຕ຺ຕນາມລາໂຠ ນ ສິຍາ? ຕໍ ນ, ຍຖາ ມຄ຺ຄານນ຺ຕຣສ຺ສ ຜລສ຺ສ ວິຍ ວຬຎ຺ຊນກຜລສມາປຕ຺ຕິຍາປິ ມຄ຺ຄາຄມນໂຕ ຈ ຌານປຏິປທາເຠໂທ ໂຫຕິ, ເອວໍ ອນິມິຕ຺ຕນາມມ຺ປິ ລພ຺ຠຕີຕິ.

໕໒-໓. ໂຫນ຺ຕິ ສາຘິປຕີເນວາຕິ ເອຕ຺ຖ ກາຣຓໍ ວຸຕ຺ຕເມວ. ມຄ຺ຄຠາເວນາຕິ ໂສຬສຫິ ອາກາເຣຫິ ຈຕຸສຈ຺ຈປຏິເວຘກມຄ຺ຄຠາເວນ, ກິເລສມາຣຓວເສນ ຄມນສງ຺ຂາເຕນ, ນິພ຺ພານຕ຺ຖິເກຫິ ມຄ຺ຄິຕພ຺ພຠາວສງ຺ຂາເຕນ ວາ ມຄ຺ຄຠາເວນ. ຜລໍ…ເປ… ວຸຈ຺ຈຕີຕິ ສຍໍ ຜລຠາວມ຺ປິ ມຄ຺ຄສ຺ສ ຜລຕ຺ຕາ, ຕໍສທິສຕາຍ ວາ ຕມຸປາທາຍ ມຄ຺ໂຄຕິ ວຸຈ຺ຈຕິ ‘‘ມຄ຺ຄງ຺ຄໍ ມຄ຺ຄປຣິຍາປນ຺ນ’’ນ຺ຕິອາທີສູຕິ ອຘິປ຺ປາໂຍ.

ໂລກຸຕ຺ຕຣວິປາກວຓ຺ຓນາ ນິຏ຺ຐິຕາ.