ອກຸສລວິປາກວຓ຺ຓນາ

ຍຖາ ອຕິອິຏ຺ເຐ ອິຏ຺ຐມຊ຺ຌຕ຺ເຕ ຈ ອາຣມ຺ມເຓ ເວທນາເຠທສມ຺ຠວໂຕ ກຸສລວິປາກມໂນວິຎ຺ຎາຓຘາຕຸ ທຸວິຘາ ໂຫຕິ ໂສມນສ຺ສສຫຄຕາ, ອຸເປກ຺ຂາສຫຄຕາຕິ, ເອວໍ ອຕິອນິຏ຺ເຐ ອນິຏ຺ຐມຊ຺ຌຕ຺ເຕ ຈ ອາຣມ຺ມເຓ ເວທນາເຠໂທ ນຕ຺ຖີຕິ ອກຸສລວິປາກມໂນວິຎ຺ຎາຓຘາຕຸ ເອກວິຘາວາຕິ ‘‘ສຕ຺ຕາກຸສລວິປາການີ’’ຕິ ວຸຕ຺ຕໍ. ສຕິ ຫິ ຕຕ຺ຖ ເວທນາເຠເທ ອຕິອນິຏ຺ເຐ ໂທມນສ຺ເສນ ຠວິຕພ຺ພໍ, ນ ຈ ປຏິເຆນ ວິນາ ໂທມນສ຺ສໍ ອຸປ຺ປຊ຺ຊຕີຕິ. ກາຍວິຎ຺ຎາຓສ຺ສ ທຸກ຺ຂສຫຄຕາ ກຸສລວິປາເກ ວຸຕ຺ຕວິປຣິຍາເຍນ ເວທິຕພ຺ພາ. ເອຕ຺ຖ ຈ ອກຸສລວິປາເກສຸ ລພ຺ຠມານທຸກ຺ຂໍ ວິຍ ນາຕິກຏຸກາປິ ອຸເປກ຺ຂາ ເອກນ຺ຕນິຫີນສ຺ສ ອກຸສລສ຺ສ ວິປາກຠາວໂຕ ທຸກ຺ຂສຠາວຕ຺ຕາ ຫີນາ ເອວ. ນ ຫິ ອກຸສລສ຺ສ ວິປາໂກ ອທຸກ຺ໂຂ ໂຫຕິ, ອຸເປກ຺ຂາຠາໂວ ປນສ຺ສ ພລວຕາ ພາຘິຍມານສ຺ສ ປຏິປຫຣິຕຸໍ ອສກ຺ໂກນ຺ຕສ຺ສ ທຸພ຺ພລປຸຣິສສ຺ສ ເຕນ ກຣິຍມານພາຘສ຺ສ ອຸເປກ຺ຂນາ ວິຍາຕິ ທຏ຺ຐພ຺ພໍ. ອິມານິ…ເປ… ຈິຕ຺ຕານີຕິ ອິມານິ ສຕ຺ຕ ເອເກກສ຺ສ ອກຸສລສ຺ສ ວິປາກຈິຕ຺ຕານິ, ນ ປນ ກຸສລວິປາເກ ວິຍ ຕິເຫຕຸກາທິປຸຎ຺ຎວິເສເສນ. ອຸທ຺ຘຈ຺ຈສຫຄຕສ຺ສປິ ຫິ ປວຕ຺ຕິຍໍ ສຕ຺ເຕວ ວິປາກາ ລພ຺ຠນ຺ຕິ. ກສ຺ມາ ປເນຕ຺ຖ ຍຖາ ກຸສລວິປາກໍ ສເຫຕຸກມ຺ປິ ອຸທ຺ຘຏໍ, ນ ເອວໍ ອກຸສລວິປາກນ຺ຕິ? ເຫຕູນໍ ອສມ຺ຠວໂຕ. ໂລຠາທີນຎ຺ຫິ ເອກນ຺ຕສາວຊ຺ຊຕາຍ ອໂຍນິໂສມນສິກາຣເຫຕຸການໍ ນຕ຺ຖິ ວິປາກຠາໂວ, ອໂລຠາທີນມ຺ປິ ເອກນ຺ຕມນວຊ຺ຊສຠາວານໍ ວາ ກາຣຓສ຺ສ ຕພ຺ພິທູຣຕາຍ ນຕ຺ເຖວ ອກຸສລວິປາກຠາໂວ. ນ ຫິ ອໂລຠາທີນໍ ປຏິປກ຺ຂໂລຠາທໂຍ ເຕ ອຠິນິປ຺ຜາເທນ຺ຕິ, ຕສ຺ມາ ອິທໍ ສພ຺ພຖາ ສເຫຕຸປ຺ປວຕ຺ຕິຍາ ອສມ຺ຠວໂຕ ອເຫຕຸກເມວາຕິ.

ກມ຺ມກມ຺ມນິມິຕ຺ຕຄຕິນິມິຕ຺ເຕສູຕິ ເອຕ຺ຖ ອຕີຕຠເວ ອາຍູຫິຕໍ ອປຣາປຣິຍເວທນີຍໍ, ອຸປປຊ຺ຊເວທນີຍໍ ວາ ກມ຺ມໍ ກມ຺ມໍ ນາມ. ກມ຺ມກຣຓກາເລ ເຈຕນາຍ ຄຫິຕມາຣມ຺ມຓໍ ກມ຺ມນິມິຕ຺ຕໍ ນາມ. ອຸປປຊ຺ຊິຕພ຺ພຠວປຣິຍາປນ຺ໂນ ນຣກາທີສຸ ອຄ຺ຄິຊາລາທິວຓ຺ໂຓ ຄຕິນິມິຕ຺ຕໍ ນາມ.

໕໔. ອິເມຕິ ອກຸສລວິປາກາ. ເຕສໍ ອນິຏ຺ຐານິຏ຺ຐມຊ຺ຌຕ຺ຕວິສເຍສຸ ປວຕ຺ຕິວຈເນນ ຕພ຺ພິປຣິຍາເຍນ ກຸສລວິປາການໍ ອິຏ຺ຐອິຏ຺ຐມຊ຺ຌຕ຺ຕວິສເຍສຸ ປວຕ຺ຕິ ອຕ຺ຖໂຕ ອາປນ຺ນາຕິ ສາ ວິສຸໍ ນ ວຸຕ຺ຕາ. ສຸຂາທິຕ຺ຕຍຍຸຕ຺ຕາຕິ ສຸຂໂສມນສ຺ສຸເປກ຺ຂາຍຸຕ຺ຕາ.

‘‘ເອວ’’ນ຺ຕິອາທິ ຍຖາວຸຕ຺ຕວິປາການໍ ນິຄມນໍ.

ອກຸສລວິປາກວຓ຺ຓນາ ນິຏ຺ຐິຕາ.