ຈຕຸຠູມກກຸສລວຓ຺ຓນາ

໒໘. ເອວໍ ຈຕຸຠູມກກຸສລຈິຕ຺ຕໍ ສຣູປໂຕ ນິທ຺ທິສິຕ຺ວາ ອິທານິ ຕໍ ນິຄເມນ຺ໂຕ ອາຫ ‘‘ກາເມ ອຏ຺ເຐວາ’’ຕິອາທິ. ຕຕ຺ຖ ກາເມຕິ ກາມຠເວ. ຕຖາ ‘‘ຣູເປ’’ຕິອາທີສຸ.

໒໙. ກຸສລາກຸສລາປຄເຕນາຕິ ກຸສລາກຸສລກມ຺ມໂຕ ອປຄເຕນ. ອຄ຺ຄມຄ຺ຄສ຺ສ ຫິ ອຸປ຺ປນ຺ນກາລໂຕ ປຏ຺ຐາຍ ອຣຫໂຕ ສພ຺ພານິ ກຸສລາກຸສລກມ຺ມານິ ປຫີນານິ ນາມ ໂຫນ຺ຕິ ປຈ຺ຈຍເວກລ຺ເລນ ປຏິສນ຺ຘິທາເນ ອສມຕ຺ຖຠາວໂຕ. ຍໂຕ ຈ ອຣິຍມຄ຺ຄຎາຓໍ ‘‘ກມ຺ມກ຺ຂຍກຣ’’ນ຺ຕິ ວຸຈ຺ຈຕິ. ອຖ ວາ ອເຫຕຸອປຈ຺ຈຍວິສຸຊ຺ຌນສ຺ສ ອຠາວໂຕ ກິເລສສມຸຈ຺ເຉທເກນ ມຄ຺ຄກຸສເລນ ອກຸສເລຫິ ອປຄເຕນ. ກຸສເລ ກຸສເລນາຕິ ກຸຈ຺ຉິຕານໍ ສລນາທີຫິ ກຸສລສງ຺ຂາຕາຍ ປຏິປຕ຺ຕິຍໍ ເທສນຸປ຺ປາທນາທີສຸ ເຉເກນ. ມຸນິນາຕິ ອຸຠຍໂລກມຸນນເກນ ອຄ຺ຄຜລຎາເຓນ, ສພ຺ພຎ຺ຎຸຕຎ຺ຎາເຓນ ວາ ສມນ຺ນາຄຕຕ຺ຕາ ມຸນິນາ. ເຕນາຫ –

‘‘ໂຍ ມຸນາຕິ ອຸໂຠ ໂລເກ, ມຸນິ ເຕນ ປວຸຈ຺ຈຕີ’’ຕິ.

ວສິນາຕິ ຉຬຠິຎ຺ຎຕາຍ ປຣເມນ ຈິຕ຺ຕວສິຠາເວນ ສມນ຺ນາຄຕຕ຺ຕາ, ຌານາທີສຸ ປຎ຺ຈວິຘວສິສພ຺ຠາວໂຕ ຈ ວສິຠູເຕນ ວສິຠາວູປຄຕິນ຺ທ຺ຣິເຍນ.

ຈຕຸຠູມກກຸສລວຓ຺ຓນາ ນິຏ຺ຐິຕາ.