ສມຖກມ຺ມຏ຺ຐານໍ

ຈຣິຕເຠທວຓ຺ຓນາ

໓. ຣາໂຄ ວ ຈຣິຕາ ປກຕີຕິ ຣາຄຈຣິຕາ. ເອວໍ ໂທສຈຣິຕາທໂຍປິ. ຈຣິຕສງ຺ຄໂຫຕິ ມູລຈຣິຕວເສນ ປຸຄ຺ຄລສງ຺ຄໂຫ, ສໍສຄ຺ຄວເສນ ປນ ເຕສຏ຺ຐິ ຈຣິຕາ ໂຫນ຺ຕິ. ວຸຕ຺ຕຎ຺ຫິ –

‘‘ຣາຄາທິເກ ຕິເກ ສຕ຺ຕ, ສຕ຺ຕ ສທ຺ຘາທິເກ ຕິເກ;

ເອກທ຺ວິຕິກມູລມ຺ຫິ, ມິສ຺ສໂຕ ສຕ຺ຕສຕ຺ຕກ’’ນ຺ຕິ.

ເອຕ຺ຖ ຫິ ຣາຄຈຣິຕາ ໂທສຈຣິຕາ ໂມຫຈຣິຕາ ຣາຄໂທສຈຣິຕາ ຣາຄໂມຫຈຣິຕາ ໂທສໂມຫຈຣິຕາ ຣາຄໂທສໂມຫຈຣິຕາຕິ ເອວໍ ຣາຄາທິເກ ຕິເກ ສຕ຺ຕກເມກໍ. ຕຖາ ສທ຺ຘາຈຣິຕາ ພຸທ຺ຘິຈຣິຕາ ວິຕກ຺ກຈຣິຕາ ສທ຺ຘາພຸທ຺ຘິຈຣິຕາ ສທ຺ຘາພຸທ຺ຘິວິຕກ຺ກຈຣິຕາ ພຸທ຺ຘິວິຕກ຺ກຈຣິຕາ ສທ຺ຘາພຸທ຺ຘິວິຕກ຺ກຈຣິຕາຕິ ສທ຺ຘາທິເກປິ ຕິເກ ເອກນ຺ຕິ ເອວໍ ທ຺ເວ ຕິເກ ອມິສ຺ເສຕ຺ວາ ຈຸທ຺ທສ ຈຣິຕາ ໂຫນ຺ຕິ. ຣາຄາທິຕິເກ ປນ ເອກທ຺ວິຕິກມູລວເສນ ສທ຺ຘາທິຕິເກນ ສຫ ໂຍຊິເຕ ຣາຄສທ຺ຘາຈຣິຕາ ຣາຄພຸທ຺ຘິຈຣິຕາ ຣາຄວິຕກ຺ກຈຣິຕາ ຣາຄສທ຺ຘາພຸທ຺ຘິຈຣິຕາ ຣາຄສທ຺ຘາວິຕກ຺ກຈຣິຕາ ຣາຄພຸທ຺ຘິວິຕກ຺ກຈຣິຕາ ຣາຄສທ຺ຘາພຸທ຺ຘິວິຕກ຺ກຈຣິຕາຕິ ຣາຄມູລນເຍ ເອກໍ ສຕ຺ຕກໍ, ຕຖາ ‘‘ໂທສສທ຺ຘາຈຣິຕາ ໂທສພຸທ຺ຘິຈຣິຕາ ໂທສວິຕກ຺ກຈຣິຕາ’’ຕ຺ຍາທິນາ ໂທສມູລນເຍປິ ເອກໍ, ‘‘ໂມຫສທ຺ຘາຈຣິຕາ’’ຕ຺ຍາທິນາ ໂມຫມູລນເຍປິ ເອກນ຺ຕິ ເອວໍ ເອກມູລນເຍ ສຕ຺ຕກຕ຺ຕຍໍ ໂຫຕິ. ຍຖາ ເຈຕ຺ຖ, ເອວໍ ທ຺ວິມູລກນເຍປິ ‘‘ຣາຄໂທສສທ຺ຘາຈຣິຕາ ຣາຄໂທສພຸທ຺ຘິຈຣິຕາ ຣາຄໂທສວິຕກ຺ກຈຣິຕາ’’ຕ຺ຍາທິນາ ສຕ຺ຕກຕ຺ຕຍໍ. ຕິມູລກນເຍ ປນ ‘‘ຣາຄໂທສໂມຫສທ຺ຘາຈຣິຕາ’’ຕ຺ຍາທິນາ ເອກໍ ສຕ຺ຕກນ຺ຕິ ເອວໍ ມິສ຺ສໂຕ ສຕ຺ຕສຕ຺ຕກວເສນ ເອກູນປຎ຺ຎາສ ຈຣິຕາ ໂຫນ຺ຕິ. ອິຕິ ອິມາ ເອກູນປຎ຺ຎາສ, ປຸຣິມາ ຈ ຈຸທ຺ທສາຕິ ເຕສຏ຺ຐິ ຈຣິຕາ ທຏ຺ຐພ຺ພາ. ເກຈິ ປນ ທິຏ຺ຐິຍາ ສທ຺ຘິໍ ‘‘ຈຕຸສຏ຺ຐີ’’ຕິ ວຓ຺ເຓນ຺ຕິ.

ຈຣິຕເຠທວຓ຺ຓນາ ນິຏ຺ຐິຕາ.

ຠາວນາເຠທວຓ຺ຓນາ

໔. ຠາວນາຍ ປຏິສງ຺ຂາຣກມ຺ມຠູຕາ, ອາທິກມ຺ມຠູຕາ ວາ ປຸພ຺ພຠາຄຠາວນາ ປຣິກມ຺ມຠາວນາ ນາມ. ນີວຣຓວິກ຺ຂມ຺ຠນໂຕ ປຏ຺ຐາຍ ໂຄຕ຺ຣຠູປຣິໂຍສານາ ກາມາວຈຣຠາວນາ ອຸປຈາຣຠາວນາ ນາມ. ອປ຺ປນາຍ ສມີປຈາຣິຕ຺ຕາ ຄາມູປຈາຣາທໂຍ ວິຍ. ມຫຄ຺ຄຕຠາວປ຺ປຕ຺ຕາ ອປ຺ປນາຠາວນາ ນາມ ອປ຺ປນາສງ຺ຂາຕວິຕກ຺ກປມຸຂຕ຺ຕາ. ສມ຺ປຍຸຕ຺ຕຘມ຺ເມຫິ ອາຣມ຺ມເຓ ອປ຺ເປນ຺ໂຕ ວິຍ ປວຕ຺ຕຕີຕິ ວິຕກ຺ໂກ ອປ຺ປນາ. ຕຖາ ຫິ ໂສ ‘‘ອປ຺ປນາ ພ຺ຍປ຺ປນາ’’ຕິ (ຘ. ສ. ໗) ນິທ຺ທິຏ຺ໂຐ. ຕປ຺ປມຸຂຕາວເສນ ປນ ສພ຺ເພປິ ມຫຄ຺ຄຕານຸຕ຺ຕຣຌານຘມ຺ມາ ‘‘ອປ຺ປນາ’’ຕິ ວຸຈ຺ຈນ຺ຕິ.

ຠາວນາເຠທວຓ຺ຓນາ ນິຏ຺ຐິຕາ.

ນິມິຕ຺ຕເຠທວຓ຺ຓນາ

໕. ປຣິກມ຺ມສ຺ສ ນິມິຕ຺ຕໍ ອາຣມ຺ມຓຕ຺ຕາຕິ ປຣິກມ຺ມນິມິຕ຺ຕໍ, ກສິຓມຓ຺ຑລາທິ. ຕເທວ ຈກ຺ຂຸນາ ທິຏ຺ຐໍ ວິຍ ມນສາ ອຸຄ຺ຄເຫຕພ຺ພໍ ນິມິຕ຺ຕໍ, ອຸຄ຺ຄຓ຺ຫນ຺ຕສ຺ສ ວາ ນິມິຕ຺ຕນ຺ຕິ ອຸຄ຺ຄຫນິມິຕ຺ຕໍ. ຕປ຺ປຏິຠາຄໍ ວຓ຺ຓາທິກສິຓໂທສຣຫິຕໍ ນິມິຕ຺ຕໍ ອຸປຈາຣປ຺ປນານໍ ອາຣມ຺ມຓຕ຺ຕາຕິ ປຏິຠາຄນິມິຕ຺ຕໍ.

໖. ປຖວີເຍວ ກສິຓໍ ເອກເທເສ ອຏ຺ຐຕ຺ວາ ອນນ຺ຕສ຺ສ ຜຣິຕພ຺ພຕາຍ ສກລຏ຺ເຐນາຕິ ປຖວີກສິຓໍ, ກສິຓມຓ຺ຑລໍ. ປຏິຠາຄນິມິຕ຺ຕໍ, ຕທາຣມ຺ມຓຎ຺ຈ ຌານໍ ‘ປຖວີກສິຓ’ນ຺ຕິ ວຸຈ຺ຈຕິ. ຕຖາ ອາໂປກສິຓາທີສຸປິ. ຕຕ຺ຖ ປຖວາທີນິ ຈຕ຺ຕາຣິ ຠູຕກສິຓານິ. ນີລາທີນິ ຈຕ຺ຕາຣິ ວຓ຺ຓກສິຓານິ, ປຣິຈ຺ຉິນ຺ນາກາໂສ ອາກາສກສິຓໍ, ຈນ຺ທາທິອາໂລໂກ ອາໂລກກສິຓນ຺ຕິ ທຏ຺ຐພ຺ພໍ.

໗. ອຸທ຺ຘໍ ຘຸມາຕໍ ສູນໍ ຉວສຣີຣໍ ອຸທ຺ຘຸມາຕໍ, ຕເທວ ກຸຈ຺ຉິຕຏ຺ເຐນອຸທ຺ຘຸມາຕກໍ. ເອວໍ ເສເສສຸປິ. ເສຕຣຕ຺ຕາທິນາ ວິມິສ຺ສິຕໍ ເຍຠຸຍ຺ເຍນ ນີລວຓ຺ຓໍ ຉວສຣີຣໍ ວິນີລກໍ ວິເສສໂຕ ນີລກນ຺ຕິ ກຕ຺ວາ. ວິສ຺ສວນ຺ຕປຸພ຺ພກໍ ວິປຸພ຺ພກໍ. ມຊ຺ເຌ ທ຺ວິຘາ ຉິນ຺ນໍ ວິຈ຺ຉິທ຺ທກໍ. ໂສຓສິງ຺ຄາລາທີຫິ ວິວິຘາກາເຣນ ຂາຍິຕໍ ວິກ຺ຂາຍິຕກໍ. ໂສຓສິງ຺ຄາລາທີຫິ ວິວິເຘນາກາເຣນ ຂຓ຺ຑິຕ຺ວາ ຕຕ຺ຖ ຕຕ຺ຖ ຂິຕ຺ຕໍ ວິກ຺ຂິຕ຺ຕກໍ. ກາກປທາທິອາກາເຣນ ສຕ຺ເຖນ ຫນິຕ຺ວາ ວິວິຘໍ ຂິຕ຺ຕໍ ຫຕວິກ຺ຂິຕ຺ຕກໍ. ໂລຫິຕປຄ຺ຆຣຓກໍ ໂລຫິຕກໍ. ກິມິກຸລປຄ຺ຆຣຓກໍ ປຸຬວກໍ. ອນ຺ຕມໂສ ເອກມ຺ປິ ອຏ຺ຐິ ອຏ຺ຐິກໍ.

໘. ອນຸ ອນຸ ສຣຓໍ ອນຸສ຺ສຕິ, ອຣຫຕາທິພຸທ຺ຘຄຸຓາຣມ຺ມຓາ ອນຸສ຺ສຕິ ພຸທ຺ຘານຸສ຺ສຕິ. ສ຺ວາກ຺ຂາຕຕາທິຘມ຺ມຄຸຓາຣມ຺ມຓາ ອນຸສ຺ສຕິ ຘມ຺ມານຸສ຺ສຕິ. ສຸປ຺ປຏິປນ຺ນຕາທິສໍຆຄຸຓາຣມ຺ມຓາ ອນຸສ຺ສຕິ ສໍຆານຸສ຺ສຕິ. ອຂຓ຺ຑຕາທິນາ ສຸປຣິສຸທ຺ຘສ຺ສ ອຕ຺ຕໂນ ສີລຄຸຓສ຺ສ ອນຸສ຺ສຣຓໍ ສີລານຸສ຺ສຕິ. ວິຄຕມລມຈ຺ເຉຣຕາທິວເສນ ອຕ຺ຕໂນ ຈາຄານຸສ຺ສຣຓໍ ຈາຄານຸສ຺ສຕິ. ‘‘ເຍຫິ ສທ຺ຘາທີຫິ ສມນ຺ນາຄຕາ ເທວາ ເທວຕ຺ຕໍ ຄຕາ, ຕາທິສາ ຄຸຓາ ມຍິ ສນ຺ຕີ’’ຕິ ເອວໍ ເທວຕາ ສກ຺ຂິຏ຺ຐາເນ ຐເປຕ຺ວາ ອຕ຺ຕໂນ ສທ຺ຘາທິຄຸຓານຸສ຺ສຣຓໍ ເທວຕານຸສ຺ສຕິ. ສພ຺ພທຸກ຺ຂູປສມຠູຕສ຺ສ ນິພ຺ພານສ຺ສ ຄຸຓານຸສ຺ສຣຓໍ ອຸປສມານຸສ຺ສຕິ. ຊີວິຕິນ຺ທ຺ຣິຍຸປຈ຺ເຉທຠູຕສ຺ສ ມຣຓສ຺ສ ອນຸສ຺ສຣຓໍ ມຣຓານຸສ຺ສຕິ. ເກສາທິກາຍໂກຏ຺ຐາເສ ຄຕາ ປວຕ຺ຕາ ສຕິ ກາຍຄຕາສຕິ. ອານຎ຺ຈ ອປານຎ຺ຈ ອານາປານໍ, ອສ຺ສາສປສ຺ສາສາ, ຕທາຣມ຺ມຓາ ສຕິ ອານາປານສ຺ສຕິ.

໙. ມິຊ຺ຊຕິ ສິນິຍ຺ຫຕີຕິ ເມຕ຺ຕາ, ມິຕ຺ເຕສຸ ຠວາຕິ ວາ ເມຕ຺ຕາ, ສາ ສຕ຺ຕານໍ ຫິຕສຸຂູປສໍຫຣຓລກ຺ຂຓາ. ປຣທຸກ຺ຂາປນຍນກາມຕາລກ຺ຂຓາ ກຣຸຓາ. ປຣສມ຺ປຕ຺ຕິປໂມທລກ຺ຂຓາ ມຸທິຕາ. ອິຏ຺ຐານິຏ຺ເຐສຸ ມຊ຺ຌຕ຺ຕາກາຣປ຺ປວຕ຺ຕິລກ຺ຂຓາ ອຸເປກ຺ຂາ. ອປ຺ປມາຓສຕ຺ຕາຣມ຺ມຓຕ຺ຕາ ອປ຺ປມຎ຺ຎາ. ອຸຕ຺ຕມວິຫາຣຠາວໂຕ, ອຸຕ຺ຕມານໍ ວາ ວິຫາຣຠາວໂຕ ພ຺ຣຫ຺ມວິຫາໂຣ.

໑໐. ຄມນປຣິເຍສນປຣິໂຠຄາທິປຈ຺ຈເວກ຺ຂຓວເສນ ກພຬີກາຣາຫາເຣ ປຏິກູລນ຺ຕິ ປວຕ຺ຕາ ສຎ຺ຎາ ອາຫາເຣ ປຏິກູລສຎ຺ຎາ.

໑໑. ປຖວີຘາຕຸອາທີນໍ ຈຕຸນ຺ນໍ ຘາຕູນໍ ສລກ຺ຂຓໂຕ ເກສາທິສສມ຺ຠາຣາທິໂຕ ຈ ວວຕ຺ຖານໍ ຈຕຸຘາຕຸວວຕ຺ຖານໍ.

໑໒. ອຣູເປ ອາຣມ຺ມເຓ ປວຕ຺ຕາ ອາຣຸປ຺ປາ.

ນິມິຕ຺ຕເຠທວຓ຺ຓນາ ນິຏ຺ຐິຕາ.

ສປ຺ປາຍເຠທວຓ຺ຓນາ

໑໓. ອິທານິ ຕສ຺ສ ຕສ຺ສ ປຸຄ຺ຄລສ຺ສ ຈຣິຕານຸກູລກມ຺ມຏ຺ຐານໍ ທສ຺ເສຕຸໍ ‘‘ຈຣິຕາສຸ ປນາ’’ຕ຺ຍາທິມາຫ. ຣາໂຄ ວ ຈຣິຕໍ ປກຕິ ເອຕສ຺ສາຕິ ຣາຄຈຣິໂຕ, ຣາຄພຫຸໂລ ປຸຄ຺ຄໂລ, ຣາຄສ຺ສ ອຸຊຸວິປຈ຺ຈນີກຠາວໂຕ ອສຸຠກມ຺ມຏ຺ຐານໍ ຕສ຺ສ ສປ຺ປາຍໍ. ອານາປານໍ ໂມຫຈຣິຕສ຺ສ, ວິຕກ຺ກຈຣິຕສ຺ສ ຈ ສປ຺ປາຍໍ ພຸທ຺ຘິວິສຍຠາເວນ ໂມຫປ຺ປຏິປກ຺ຂຕ຺ຕາ, ວິຕກ຺ກສນ຺ຘາວນສ຺ສ ນິວາຣກຕ຺ຕາ ຈ. ຉ ພຸທ຺ຘານຸສ຺ສຕິອາທໂຍ ສທ຺ຘາຈຣິຕສ຺ສ ສປ຺ປາຍາ ສທ຺ຘາວຸທ຺ຘິເຫຕຸຠາວໂຕ.

໑໗. ມຣຓອຸປສມສຎ຺ຎາວວຕ຺ຖານານິ ພຸທ຺ຘິຈຣິຕສ຺ສ ສປ຺ປາຍານິ ຄມ຺ຠີຣຠາວໂຕ ພຸທ຺ຘິຍາ ເອວ ວິສຍຕ຺ຕາ.

໑໘. ເສສານີຕິ ຈຕຸພ຺ພິຘຠູຕກສິຓອາກາສອາໂລກກສິຓອາຣຸປ຺ປຈຕຸກ຺ກວເສນ ທສວິຘານິ. ຕຕ຺ຖາປີຕິ ເຕສຸ ທສສຸ ກມ຺ມຏ຺ຐາເນສຸ. ປຸຖຸລໍ ໂມຫຈຣິຕສ຺ສ ສປ຺ປາຍໍ ສມ຺ພາເຘ ໂອກາເສ ຈິຕ຺ຕສ຺ສ ຠິຍ຺ໂຍໂສມຕ຺ຕາຍ ສມ຺ມຸຍ຺ຫນໂຕ. ຂຸທ຺ທກໍ ວິຕກ຺ກຈຣິຕສ຺ສ ສປ຺ປາຍໍ ມຫນ຺ຕາຣມ຺ມຓສ຺ສ ວິຕກ຺ກສນ຺ຘາວນປຈ຺ຈຍຕ຺ຕາ. ອຸຊຸວິປຈ຺ຈນີກໂຕ ເຈວ ອຕິສປ຺ປາຍຕາຍ ເຈຕໍ ວຸຕ຺ຕໍ. ຣາຄາທີນໍ ປນ ອວິກ຺ຂມ຺ຠິກາ, ສທ຺ຘາທີນໍ ວາ ອນຸປກາຣິກາ ກສິຓາທິຠາວນາ ນາມ ນຕ຺ຖິ.

ສປ຺ປາຍເຠທວຓ຺ຓນາ ນິຏ຺ຐິຕາ.

ຠາວນາເຠທວຓ຺ຓນາ

໑໙. ສພ຺ພຕ຺ຖາປີຕິ ຈຕ຺ຕາລີສກມ຺ມຏ຺ຐາເນສຸປິ ນຕ຺ຖິ ອປ຺ປນາ, ພຸທ຺ຘຄຸຓາທີນໍ ປຣມຕ຺ຖຠາວໂຕ, ອເນກວິຘຕ຺ຕາ, ເອກສ຺ສປິ ຄມ຺ຠີຣຠາວໂຕ ຈ. ພຸທ຺ຘານຸສ຺ສຕິອາທີສຸ ທສສຸ ກມ຺ມຏ຺ຐາເນສຸ ອປ຺ປນາວເສນ ສມາຘິສ຺ສ ປຕິຏ຺ຐາຕຸໍ ອສກ຺ກຸເຓຍ຺ຍຕ຺ຕາ ອປ຺ປນາຠາວໍ ອປ຺ປຕ຺ວາ ສມາຘິ ອຸປຈາຣຠາເວນ ປຕິຏ຺ຐາຕິ. ໂລກຸຕ຺ຕຣສມາຘິ, ປນ ທຸຕິຍຈຕຸຕ຺ຖາຣຸປ຺ປສມາຘິ ຈ ສຠາວຘມ຺ເມປິ ຠາວນາວິເສສວເສນ ອປ຺ປນໍ ປາປຸຓາຕິ. ວິສຸທ຺ຘິຠາວນານຸກ຺ກມວເສນ ຫິ ໂລກຸຕ຺ຕໂຣ ອປ຺ປນໍ ປາປຸຓາຕິ. ອາຣມ຺ມຓສມຕິກ຺ກມຠາວນາວເສນ ອາຣຸປ຺ປສມາຘິ. ອປ຺ປນາປ຺ປຕ຺ຕສ຺ເສວ ຫິ ຈຕຸຕ຺ຖຊ຺ຌານສມາຘິໂນ ອາຣມ຺ມຓສມຕິກ຺ກມນມຕ຺ຕໍ ໂຫຕິ.

໒໑. ປຎ຺ຈປິ ຌານານິ ເອເຕສມຕ຺ຖິ, ຕຕ຺ຖ ນິຍຸຕ຺ຕານີຕິ ວາ ປຎ຺ຈກຊ຺ຌານິການິ.

໒໒. ອສຸຠຠາວນາຍ ປຏິກູລາຣມ຺ມຓຕ຺ຕາ ຈຓ຺ຑໂສຕາຍ ນທິຍາ ອຣິຕ຺ຕພເລນ ນາວາ ວິຍ ວິຕກ຺ກພເລເນວ ຕຕ຺ຖ ຈິຕ຺ຕໍ ປວຕ຺ຕຕີຕິ ອສຸຠກມ຺ມຏ຺ຐາເນ ອວິຕກ຺ກຊ຺ຌານາສມ຺ຠວໂຕ ‘‘ປຐມຊ຺ຌານິກາ’’ຕິ ວຸຕ຺ຕໍ.

໒໓. ເມຕ຺ຕາກຣຸຓາມຸທິຕານໍ ໂທມນສ຺ສສຫຄຕພ຺ຍາປາທວິຫິໍສານຠິຣຕີນໍ ປຫາຍກຕ຺ຕາ ໂທມນສ຺ສປ຺ປຏິປກ຺ເຂນ ໂສມນສ຺ເສເນວ ສຫຄຕຕາ ຍຸຕ຺ຕາຕິ ‘‘ເມຕ຺ຕາທໂຍ ຕໂຍ ຈຕຸກ຺ກຊ຺ຌານິກາ’’ຕິ ວຸຕ຺ຕາ.

໒໔. ‘‘ສພ຺ເພ ສຕ຺ຕາ ສຸຂິຕາ ໂຫນ຺ຕຸ, ທຸກ຺ຂາ ມຸຈ຺ຈນ຺ຕຸ, ລທ຺ຘສຸຂສມ຺ປຕ຺ຕິໂຕ ມາ ວິຄຈ຺ຉນ຺ຕູ’’ຕິ ເມຕ຺ຕາທິວສປ຺ປວຕ຺ຕພ຺ຍາປາຣຕ຺ຕຍໍ ປຫາຍ ກມ຺ມສ຺ສກຕາທສ຺ສເນນ ສຕ຺ເຕສຸ ມຊ຺ຌຕ຺ຕາກາຣປ຺ປວຕ຺ຕຠາວນານິພ຺ພຕ຺ຕາຍ ຕຕ຺ຣມຊ຺ຌຕ຺ຕຸເປກ຺ຂາຍ ພລວຕຣຕ຺ຕາ ອຸເປກ຺ຂາພ຺ຣຫ຺ມວິຫາຣສ຺ສ ສຸຂສຫຄຕາສມ຺ຠວໂຕ ‘‘ອຸເປກ຺ຂາ ປຎ຺ຈມຊ຺ຌານິກາ’’ຕິ ວຸຕ຺ຕາ.

ຠາວນາເຠທວຓ຺ຓນາ ນິຏ຺ຐິຕາ.

ໂຄຈຣເຠທວຓ຺ຓນາ

໒໖. ຍຖາຣຫນ຺ຕິ ຕໍຕໍອາຣມ຺ມຓານຸຣູປໂຕ. ກສ຺ສຈິ ອາຣມ຺ມຓສ຺ສ ອປຣິພ຺ຍຕ຺ຕຕາຍ ‘‘ປຣິຍາເຍນາ’’ຕິ ວຸຕ຺ຕໍ.

໒໗. ກສິຓາສຸຠໂກຏ຺ຐາສານາປານສ຺ສຕີສ຺ເວວ ຫິ ປຣິພ຺ຍຕ຺ຕນິມິຕ຺ຕສມ຺ຠໂວຕິ.

໒໘. ປຖວີມຓ຺ຑລາທີສຸ ນິມິຕ຺ຕໍ ອຸຄ຺ຄຓ຺ຫນ຺ຕສ຺ສາຕິ ອາທິມ຺ຫິ ຕາວ ຈຕຸປາຣິສຸທ຺ຘິສີລໍ ວິໂສເຘຕ຺ວາ ທສວິຘໍ ປລິໂພຘໍ ອຸປຈ຺ຉິນ຺ທິຕ຺ວາ ປິຍຄຣຸຠາວນີຍາທິຄຸຓສມນ຺ນາຄຕໍ ກລ຺ຍາຓມິຕ຺ຕໍ ອຸປສງ຺ກມິຕ຺ວາ ອຕ຺ຕໂນ ຈຣິຍານຸກູລໍ ກມ຺ມຏ຺ຐານໍ ຄເຫຕ຺ວາ ອຏ຺ຐາຣສວິຘໍ ອນນຸຣູປວິຫາຣໍ ປຫາຍ ປຎ຺ຈງ຺ຄສມນ຺ນາຄເຕ ອນຸຣູປວິຫາເຣ ວິຫຣນ຺ຕສ຺ສ ເກສນຂຫຣຓາທິຂຸທ຺ທກປລິໂພຘຸປຈ຺ເຉທໍ ກຕ຺ວາ ກສິຓມຓ຺ຑລາທີນິ ປຸຣໂຕ ກຕ຺ວາ ອານາປານໂກຏ຺ຐາສາທີສຸ ຈິຕ຺ຕໍ ຐເປຕ຺ວາ ນິສີທິຕ຺ວາ ‘‘ປຖວີ ປຖວີ’’ຕ຺ຍາທິນາ ຕໍຕໍຠາວນານຸກ຺ກເມນ ປຖວີກສິຓາທີສຸ ຕໍຕທາຣມ຺ມເຓສຸ ນິມິຕ຺ຕໍ ອຸຄ຺ຄຓ຺ຫນ຺ຕສ຺ສ. ອຍເມຕ຺ຖ ສງ຺ເຂໂປ. ວິຕ຺ຖາຣໂຕ ປນ ຠາວນາ ວິສຸທ຺ຘິມຄ຺ຄໂຕ (ວິສຸທ຺ຘິ. ໑.໕໔ ອາທໂຍ) ຄເຫຕພ຺ພາ. ທຸວິຘມ຺ປິ ຫິ ຠາວນາວິຘານໍ ອິຘ ອາຈຣິເຍນ ອຕິສງ຺ເຂປໂຕ ວຸຕ຺ຕໍ, ຕທຕ຺ຖທສ຺ສນຕ຺ຖຎ຺ຈ ວິຕ຺ຖາຣນເຍ ອາຫຣິຍມາເນ ອຕິປ຺ປປຎ຺ໂຈ ສິຍາຕິ ມຍມ຺ປິ ຕໍ ນ ວິຕ຺ຖາເຣສ຺ສາມ. ຍທາ ປນ ຕໍ ນິມິຕ຺ຕໍ ຈິຕ຺ເຕນ ສມຸຄ຺ຄຫິຕນ຺ຕິ ເອວໍ ປວຕ຺ຕານຸປຸພ຺ພຠາວນາວເສນ ຍທາ ຕໍ ປຣິກມ຺ມນິມິຕ຺ຕໍ ຈິຕ຺ເຕນ ສມ຺ມາ ອຸຄ຺ຄຫິຕໍ ໂຫຕິ. ມໂນທ຺ວາຣສ຺ສ ອາປາຖມາຄຕນ຺ຕິ ຈກ຺ຂຸໍ ນິມ຺ມີເລຕ຺ວາ, ອຎ຺ຎຕ຺ຖ ຄນ຺ຕ຺ວາ ວາ ມນສິ ກໂຣນ຺ຕສ຺ສ ກສິຓມຓ຺ຑລສທິສເມວ ຫຸຕ຺ວາ ມໂນທ຺ວາຣິກຊວນານໍ ອາປາຖໍ ອາຄຕໍ ໂຫຕິ.

໒໙. ສມາຘິຍຕີຕິ ວິເສສໂຕ ຈິຕ຺ເຕກຄ຺ຄຕາປຕ຺ຕິຍາ ສມາຫິຕາ ໂຫຕິ.

໓໐. ຈິຕ຺ຕສມາຘານວເສນ ປຸຄ຺ຄໂລປິ ສມາຫິໂຕເຍວາຕິ ວຸຕ຺ຕໍ ‘‘ຕຖາ ສມາຫິຕສ຺ສາ’’ຕິ. ຕປ຺ປຏິຠາຄນ຺ຕິ ອຸຄ຺ຄຫນິມິຕ຺ຕສທິສໍ, ຕໂຕເຍວ ຫິ ຕໍ ‘‘ປຏິຠາຄນິມິຕ຺ຕ’’ນ຺ຕິ ວຸຈ຺ຈຕິ. ຕໍ ປນ ອຸຄ຺ຄຫນິມິຕ຺ຕໂຕ ອຕິປຣິສຸທ຺ຘໍ ໂຫຕິ. ວຕ຺ຖຸຘມ຺ມວິມຸຈ຺ຈິຕນ຺ຕິ ປຣມຕ຺ຖຘມ຺ມໂຕ ວິມຸຕ຺ຕໍ, ວຕ຺ຖຸຘມ຺ມໂຕ ວາ ກສິຓມຓ຺ຑລຄຕກສິຓໂທສໂຕ ວິນິມຸຕ຺ຕໍ. ຠາວນາຍ ນິພ຺ພຕ຺ຕຕ຺ຕາ ຠາວນາມຍໍ. ສມປ຺ປິຕນ຺ຕິ ສຸຏ຺ຐຸ ອປ຺ປິຕໍ.

໓໑. ຕໂຕ ປຏ຺ຐາຍາຕິ ປຏິຠາຄນິມິຕ຺ຕຸປ຺ປຕ຺ຕິໂຕ ປຏ຺ຐາຍ.

໓໓. ປຎ຺ຈສຸ ຌານງ຺ເຄສຸ ເອເກກາຣມ຺ມເຓ ອຸປ຺ປນ຺ນາວຊ຺ຊນານນ຺ຕຣໍ ຈຕຸປຎ຺ຈຊວນກຕິປຍຠວງ຺ຄໂຕ ປຣໍ ອຄນ຺ຕ຺ວາ ອປຣາປຣໍ ຌານງ຺ຄາວຊ຺ຊນສມຕ຺ຖຕາ ອາວຊ຺ຊນວສິຕາ ນາມ. ສມາປຊ຺ຊິຕຸກາມຕານນ຺ຕຣໍ ກຕິປຍຠວງ຺ຄໂຕ ປຣໍ ອຄນ຺ຕ຺ວາ ອຸປ຺ປນ຺ນາວຊ຺ຊນານນ຺ຕຣໍ ສມາປຊ຺ຊິຕຸໍ ສມຕ຺ຖຕາ ສມາປຊ຺ຊນວສິຕາ ນາມ. ເສຕຸ ວິຍ ສີຆໂສຕາຍ ນທິຍາ ໂອຆໍ ຠວງ຺ຄເວຄໍ ອຸປຈ຺ຉິນ຺ທິຕ຺ວາ ຍຖາປຣິຈ຺ຉິນ຺ນກາລໍ ຌານໍ ຐເປຕຸໍ ສມຕ຺ຖຕາ ຠວງ຺ຄປາຕໂຕ ຣກ຺ຂຓໂຍຄ຺ຍຕາ ອຘິຏ຺ຐານວສິຕາ ນາມ. ຍຖາ ປຣິຈ຺ຉິນ຺ນກາລໍ ອນຕິກ຺ກມິຕ຺ວາ ຌານໂຕ ວຸຏ຺ຐານສມຕ຺ຖຕາ ວຸຏ຺ຐານວສິຕາ ນາມ. ອຖ ວາ ຍຖາປຣິຈ຺ຉິນ຺ນກາລໂຕ ອຸທ຺ຘໍ ຄນ຺ຕຸໍ ອທຕ຺ວາ ຐປນສມຕ຺ຖຕາ ອຘິຏ຺ຐານວສິຕາ ນາມ. ຍຖາປຣິຈ຺ຉິນ຺ນກາລໂຕ ອນ຺ໂຕ ອວຸຏ຺ຐຫິຕ຺ວາ ຍຖາກາລວເສເນວ ວຸຏ຺ຐານສມຕ຺ຖຕາ ວຸຏ຺ຐານວສິຕາ ນາມາຕິ ອລມຕິປ຺ປປຎ຺ເຈນ. ປຈ຺ຈເວກ຺ຂຓວສິຕາ ປນ ອາວຊ຺ຊນວສິຕາຍ ເອວ ສິທ຺ຘາ. ອາວຊ຺ຊນານນ຺ຕຣຊວນາເນວ ຫິ ປຈ຺ຈເວກ຺ຂຓຊວນານິ ນາມ. ວິຕກ຺ກາທິໂອຬາຣິກງ຺ຄໍ ປຫານາຍາຕິ ທຸຕິຍຊ຺ຌານາທີຫິ ວິຕກ຺ກາທິໂອຬາຣິກງ຺ຄານໍ ຌານກ຺ຂເຓ ອນຸປ຺ປາທາຍ. ປທຫໂຕຕິ ປຣິກມ຺ມໍ ກໂຣນ຺ຕສ຺ສ. ຕສ຺ສ ປນ ອຸປຈາຣຠາວນາ ນິປ຺ຜນ຺ນາ ນາມ ໂຫຕິ ວິຕກ຺ກາທີສຸ ນິກນ຺ຕິວິກ຺ຂມ຺ຠນໂຕ ປຏ຺ຐາຍາຕິ ທຏ຺ຐພ຺ພໍ. ຍຖາຣຫນ຺ຕິ ຕໍຕໍຌານິກກສິຓາທິອາຣມ຺ມຓານຸຣູປໍ.

໓໖. ອາກາສກສິຓສ຺ສ ອຸຄ຺ຆາເຏຕຸໍ ອສກ຺ກຸເຓຍ຺ຍຕ຺ຕາ ວຸຕ຺ຕໍ ‘‘ອາກາສວຊ຺ຊິເຕສູ’’ຕິ. ກສິຓນ຺ຕິ ກສິຓປຏິຠາຄນິມິຕ຺ຕໍ. ອຸຄ຺ຆາເຏຕ຺ວາຕິ ອມນສິກາຣວເສນ ອຸທ຺ຘຣິຕ຺ວາ. ອນນ຺ຕວເສນ ປຣິກມ຺ມໍ ກໂຣນ຺ຕສ຺ສາຕິ ‘‘ອນນ຺ຕໍ ອາກາສໍ, ອນນ຺ຕໍ ອາກາສ’’ນ຺ຕິ ອາກາສໍ ອາຣພ຺ຠ ປຣິກມ຺ມໍ ກໂຣນ຺ຕສ຺ສ, ນ ປນ ເກວລໍ ‘‘ອນນ຺ຕໍ ອນນ຺ຕ’’ນ຺ຕິ. ເອວໍ ວິຎ຺ຎາຓຎ຺ຈາຍຕເນປິ. ‘‘ອນນ຺ຕ’’ນ຺ຕິ ອວຕ຺ວາປິ ‘‘ອາກາໂສ ອາກາໂສ (ວິສຸທ຺ຘິ. ໑.໒໗໖), ວິຎ຺ຎາຓໍ ວິຎ຺ຎາຓ’’ນ຺ຕິ (ວິສຸທ຺ຘິ. ໑.໒໘໑) ມນສິ ກາຕຸໍ ວຏ຺ຏຕີຕິ ອາຈຣິຍາ.

໓໙. ‘‘ສນ຺ຕເມຕໍ, ປຓີຕເມຕ’’ນ຺ຕິ ປຣິກມ຺ມໍ ກໂຣນ຺ຕສ຺ສາຕິ ອຠາວມຕ຺ຕາຣມ຺ມຓຕາຍ ‘‘ເອຕໍ ສນ຺ຕໍ, ເອຕໍ ປຓີຕ’’ນ຺ຕິ ຠາເວນ຺ຕສ຺ສ.

໔໐. ອວເສເສສຸ ຈາຕິ ກສິຓາທີຫິ ສຫ ອປ຺ປນາວຫກມ຺ມຏ຺ຐານໂຕ ອວເສເສສຸ ພຸທ຺ຘານຸສ຺ສຕິອາທີສຸ ອຏ຺ຐສຸ, ສຎ຺ຎາວວຕ຺ຖາເນສຸ ຈາຕິ ທສສຸ ກມ຺ມຏ຺ຐາເນສຸ. ປຣິກມ຺ມໍ ກຕ຺ວາຕິ ‘‘ໂສ ຠຄວາ ອິຕິປິ ອຣຫໍ, ອິຕິປິ ສມ຺ມາສມ຺ພຸທ຺ໂຘ’’ຕ຺ຍາທິນາ (ວິສຸທ຺ຘິ. ໑.໑໒໔) ວຸຕ຺ຕວິຘາເນນ ປຣິກມ຺ມໍ ກຕ຺ວາ. ສາຘຸກມຸຄ຺ຄຫິເຕຕິ ພຸທ຺ຘາທິຄຸຓນິນ຺ນໂປຓປພ຺ຠາຣຈິຕ຺ຕຕາວເສນ ສຸຏ຺ຐຸ ອຸຄ຺ຄຫິເຕ. ປຣິກມ຺ມຎ຺ຈ ສມາຘິຍຕີຕິ ປຣິກມ຺ມຠາວນາ ສມາຫິຕາ ນິປ຺ຜຊ຺ຊຕິ. ອຸປຈາໂຣ ຈ ສມ຺ປຊ຺ຊຕີຕິ ນີວຣຓານິ ວິກ຺ຂມ຺ເຠນ຺ໂຕ ອຸປຈາຣສມາຘິ ຈ ອຸປ຺ປຊ຺ຊຕິ.

໔໑. ອຠິຎ຺ຎາວເສນ ປວຕ຺ຕມານນ຺ຕິ ອຠິວິເສສໂຕ ຊານນຏ຺ເຐນ ອຠິຎ຺ຎາສງ຺ຂາຕໍ ອິທ຺ຘິວິຘາທິປຎ຺ຈໂລກິຍາຠິຎ຺ຎາວເສນ ປວຕ຺ຕມານໍ, ອຠິຎ຺ຎາປາທກປຎ຺ຈມຊ຺ຌານາ ວຸຏ຺ຐຫິຕ຺ວາຕິ ກສິຓານຸໂລມາທີຫິ ຈຸທ຺ທສຫາກາເຣຫິ (ວິສຸທ຺ຘິ. ໒.໓໖໕) ຈິຕ຺ຕໍ ປຣິທເມຕ຺ວາ ອຠິນີຫາຣກ຺ຂມໍ ກຕ຺ວາ ອຸເປກ຺ເຂກຄ຺ຄຕາໂຍຄໂຕ ອນຸຣູປຕ຺ຕາ ຈ ຣູປາວຈຣປຎ຺ຈມຊ຺ຌານເມວ ອຠິຎ຺ຎານໍ ປາທກໍ ປຕິຏ຺ຐາຠູຕໍ ປຖວາທິກສິຓາຣມ຺ມຓໍ ປຎ຺ຈມຊ຺ຌານໍ, ຕໍ ສມາປຊ຺ຊິຕ຺ວາ ຕໂຕ ວຸຏ຺ຐາຍ. ອຘິຏ຺ເຐຍ຺ຍາທິກມາວຊ຺ເຊຕ຺ວາຕິ ອິທ຺ຘິວິຘຎາຓສ຺ສ ປຣິກມ຺ມກາເລ ອຘິຏ຺ຐາຕພ຺ພໍ ວິກຸພ຺ພນີຍໍ ສຕາທິກໍ ໂກມາຣຣູປາທິກໍ, ທິພ຺ພໂສຕສ຺ສ ປຣິກມ຺ມກາເລ ຖູລສຸຂຸມເຠທໍ ສທ຺ທໍ, ເຈໂຕປຣິຍຎາຓສ຺ສ ປຣິກມ຺ມກາເລ ປຣສ຺ສ ຫທຍງ຺ຄຕວຓ຺ຓທສ຺ສເນນ ສຣາຄາທິເຠທໍ ຈິຕ຺ຕໍ, ປຸພ຺ເພນິວາສານຸສ຺ສຕິຎາຓສ຺ສ ປຣິກມ຺ມສມເຍ ປຸຣິມຠເວສຸ ຈຸຕິຈິຕ຺ຕາທິເຠທໍ ປຸພ຺ເພ ນິວຸຕ຺ຖກ຺ຂນ຺ຘໍ, ທິພ຺ພຈກ຺ຂຸສ຺ສ ປຣິກມ຺ມສມເຍ ໂອຠາສຜຣິຕຏ຺ຐານຄຕໍ ຣູປໍ ວາ ອາວຊ຺ເຊຕ຺ວາ.

ປຣິກມ຺ມໍ ກໂຣນ຺ຕສ຺ສາຕິ ‘‘ສຕໍ ໂຫມິ, ສຫສ຺ສໍ ໂຫມີ’’ຕ຺ຍາທິນາ ປຣິກມ຺ມໍ ກໂຣນ຺ຕສ຺ສ. ຣູປາທີສູຕິ ປຣິກມ຺ມວິສຍຠູເຕສຸ ຣູປປາທກຊ຺ຌານສທ຺ທປຣຈິຕ຺ຕປຸພ຺ເພນິວຸຕ຺ຖກ຺ຂນ຺ຘາທິເຠເທສຸ ອາຣມ຺ມເຓສຸ. ເອຕ຺ຖ ຫິ ອິທ຺ຘິວິຘຎາຓສ຺ສ ຕາວ ປາທກຊ຺ຌານໍ, ກາໂຍ, ຣູປາທິອຘິຏ຺ຐາເນ ຣູປາທີນິ ຈາຕິ ຉ ອາຣມ຺ມຓານິ. ຕຕ຺ຖ ປາທກຊ຺ຌານໍ ອຕີຕເມວ, ກາໂຍ ປຈ຺ຈຸປ຺ປນ຺ໂນ, ອິຕຣໍ ປຈ຺ຈຸປ຺ປນ຺ນມນາຄຕໍ ວາ. ທິພ຺ພໂສຕສ຺ສ ປນ ສທ຺ໂທເຍວ, ໂສ ຈ ໂຂ ປຈ຺ຈຸປ຺ປນ຺ໂນ. ປຣຈິຕ຺ຕວິຊານນາຍ ປນ ອຕີເຕ ສຕ຺ຕທິວເສສຸ, ອນາຄເຕ ສຕ຺ຕທິວເສສຸ ຈ ປວຕ຺ຕໍ ປຣິຕ຺ຕາທີສຸ ຍໍ ກິຎ຺ຈິ ຕິກາລິກໍ ຈິຕ຺ຕເມວ ອາຣມ຺ມຓໍ ໂຫຕີຕິ ມຫາອຏ຺ຐກຖາຈຣິຍາ (ວິສຸທ຺ຘິ. ໒.໔໑໖; ຘ. ສ. ອຏ຺ຐ. ໑໔໓໔).

ສງ຺ຄຫກາຣາ ປນ ‘‘ຈຕ຺ຕາໂຣປິ ຂນ຺ຘາ’’ຕິ (ຘ. ສ. ອຏ຺ຐ. ໑໔໓໔) ວທນ຺ຕິ, ກຖໍ ປນສ຺ສາ ປຈ຺ຈຸປ຺ປນ຺ນຈິຕ຺ຕາຣມ຺ມຓຕາ, ນນຸ ຈ ອາວຊ຺ຊນາຍ ຄຫິຕເມວ ອິທ຺ຘິຈິຕ຺ຕສ຺ສ ອາຣມ຺ມຓໍ ໂຫຕິ, ອາວຊ຺ຊນາຍ ຈ ປຈ຺ຈຸປ຺ປນ຺ນຈິຕ຺ຕມາຣມ຺ມຓໍ ກຕ຺ວາ ນິຣຸຊ຺ຌມານາຍ ຕໍສມກາລເມວ ປຣສ຺ສ ຈິຕ຺ຕມ຺ປິ ນິຣຸຊ຺ຌຕີຕິ ອາວຊ຺ຊນຊວນານໍ ກາລວເສນ ເອກາຣມ຺ມຓຕາ ນ ສິຍາ, ມຄ຺ຄຜລວີຖິໂຕ ອຎ຺ຎຕ຺ຖ ອາວຊ຺ຊນຊວນານໍ ກຖຎ຺ຈ ນານາຣມ຺ມຓຕາ ນ ອຘິປ຺ເປຕາຕິ? ອຏ຺ຐກຖາຍໍ (ວິສຸທ຺ຘິ. ໒.໔໑໖; ຘ. ສ. ອຏ຺ຐ. ໑໔໓໔) ຕາວ ສນ຺ຕຕິອທ຺ຘາປຈ຺ຈຸປ຺ປນ຺ນາຣມ຺ມຓຕາ ໂຍຊິຕາ. ອານນ຺ທາຈຣິໂຍ (ຘ. ສ. ມູລຏີ. ໑໔໓໔ ໂຖກ ວິສທິສໍ) ປນ ຠຓຕິ ‘‘ປາທກຊ຺ຌານໂຕ ວຸຏ຺ຐາຍ ປຈ຺ຈຸປ຺ປນ຺ນາທິວິຠາຄໍ ອກຕ຺ວາ ເກວລໍ ‘ອິມສ຺ສ ຈິຕ຺ຕໍ ຊານາມິ’ຈ຺ເຈວ ປຣິກມ຺ມໍ ກຕ຺ວາ ປຸນປິ ປາທກຊ຺ຌານໍ ສມາປຊ຺ຊິຕ຺ວາ ວຸຏ຺ຐາຍ ອວິເສເສເນວ ຈິຕ຺ຕໍ ອາວຊ຺ເຊຕ຺ວາ ຕິຓ຺ຓໍ, ຈຕຸນ຺ນໍ ວາ ປຣິກມ຺ມານໍ ອນນ຺ຕຣໍ ເຈໂຕປຣິຍຎາເຓນ ປຣສ຺ສ ຈິຕ຺ຕໍ ປຏິວິຊ຺ຌຕິ ຣູປໍ ວິຍ ທິພ຺ພຈກ຺ຂຸນາ. ປຈ຺ຉາ ກາມາວຈຣຈິຕ຺ເຕນ ສຣາຄາທິວວຕ຺ຖານມ຺ປິ ກໂຣຕິ ນີລາທິວວຕ຺ຖານໍ ວິຍ. ຕານິ ຈ ສພ຺ພານິ ອຠິມຸຂີຠູຕຈິຕ຺ຕາຣມ຺ມຓາເນວ, ອນິຏ຺ເຐ ຈ ຐາເນ ນານາຣມ຺ມຓຕາໂທໂສ ນຕ຺ຖິ ອຠິນ຺ນາກາຣປ຺ປວຕ຺ຕິໂຕ’’ຕິ. ປຸພ຺ເພນິວາສານຸສ຺ສຕິຎາຓສ຺ສ ປຸພ຺ເພ ນິວຸຕ຺ຖກ຺ຂນ຺ຘາ, ຂນ຺ຘປ຺ປຏິພທ຺ຘານິ ຈ ນາມໂຄຕ຺ຕານິ, ນິພ຺ພານຎ຺ຈ ອາຣມ຺ມຓໍ ໂຫຕິ, ທິພ຺ພຈກ຺ຂຸສ຺ສ ປນ ຣູປເມວ ປຈ຺ຈຸປ຺ປນ຺ນນ຺ຕິ ອຍເມເຕສໍ ອາຣມ຺ມຓວິຠາໂຄ. ຍຖາຣຫມປ຺ເປຕີຕິ ຕໍຕໍປຣິກມ຺ມານຸຣູປໂຕ ອປ຺ເປຕິ.

໔໒. ອິທານິ ອາຣມ຺ມຓານໍ ເຠເທນ ອຠິຎ຺ຎາເຠທໍ ທສ຺ເສຕຸໍ ‘‘ອິທ຺ຘິວິຘາ’’ຕ຺ຍາທິມາຫ. ອຘິຏ຺ຐານາທິ ອິທ຺ຘິປ຺ປເຠໂທ ເອຕິສ຺ສາຕິ ອິທ຺ຘິວິຘາ. ທິພ຺ພານໍ ໂສຕສທິສຕາຍ, ທິພ຺ພວິຫາຣສນ຺ນິສ຺ສິຕຕາຍ ຈ ທິພ຺ພຎ຺ຈ ຕໍ ໂສຕຎ຺ຈາຕິ ທິພ຺ພໂສຕໍ. ປເຣສໍ ຈິຕ຺ຕໍ ວິຎ຺ຎາຍຕິ ເອຕາຍາຕິ ປຣຈິຕ຺ຕວິຊານນາ. ອຕ຺ຕໂນ ສນ຺ຕາເນ ນິວຸຕ຺ຖວເສນ ເຈວ ໂຄຈຣນິວາສວເສນ ຈ ປຸພ຺ເພ ອຕີຕຠເວສຸ ຂນ຺ຘາທີນໍ ອນຸສ຺ສຣຓໍ ປຸພ຺ເພນິວາສານຸສ຺ສຕິ. ວຸຕ຺ຕນເຍນ ທິພ຺ພຎ຺ຈ ຕໍ ຈກ຺ຂຸ ຈາຕິ ທິພ຺ພຈກ຺ຂຸ. ‘ຈຸຕູປປາຕຎາຓ’ນ຺ຕິ ປນ ທິພ຺ພຈກ຺ຂຸເມວ ວຸຈ຺ຈຕິ. ຍຖາກມ຺ມູປຄຎາຓອນາຄຕໍສຎາຓານິປິ ທິພ຺ພຈກ຺ຂຸວເສເນວ ອິຊ຺ຌນ຺ຕິ. ນ ຫິ ເຕສໍ ວິສຸໍ ປຣິກມ຺ມໍ ອຕ຺ຖິ. ຕຕ຺ຖ ອນາຄຕໍສຎາຓສ຺ສ ຕາວ ອນາຄເຕ ສຕ຺ຕທິວສໂຕ ປຣໍ ປວຕ຺ຕນກໍ ຈິຕ຺ຕເຈຕສິກໍ ທຸຕິຍທິວສໂຕ ປຏ຺ຐາຍ ປວຕ຺ຕນກຎ຺ຈ ຍໍ ກິຎ຺ຈິ ອາຣມ຺ມຓໍ ໂຫຕິ. ຕຎ຺ຫິ ສວິສເຍ ສພ຺ພຎ຺ຎຸຕຎ຺ຎາຓຄຕິກນ຺ຕິ. ຍຖາ ກມ຺ມູປຄຎາຓສ຺ສ ປນ ກຸສລາກຸສລສງ຺ຂາຕາ ເຈຕນາ, ຈຕ຺ຕາໂຣປິ ວາ ຂນ຺ຘາ ອາຣມ຺ມຓນ຺ຕິ ທຏ຺ຐພ຺ພໍ.

ໂຄຈຣວເສນ ເຠໂທ ໂຄຈຣເຠໂທ.

ໂຄຈຣເຠທວຓ຺ຓນາ ນິຏ຺ຐິຕາ.

ສມຖກມ຺ມຏ຺ຐານວຓ຺ຓນາ ນິຏ຺ຐິຕາ.