ວຕ຺ຖຸສງ຺ຄຫວຓ຺ຓນາ

໖໔. ວຕ຺ຖຸວິຠາຄໂຕ, ຕພ຺ພຕ຺ຖຸກຈິຕ຺ຕປຣິຈ຺ເຉທວເສນ ຈ ສງ຺ຄໂຫ ວຕ຺ຖຸສງ຺ຄໂຫ. ວສນ຺ຕິ ເອເຕສຸ ຈິຕ຺ຕເຈຕສິກາ ຕນ຺ນິສ຺ສຍຕ຺ຕາຕິ ວຕ຺ຖູນິ.

໖໕. ຕານິ ກາມໂລເກ ສພ຺ພານິປິ ລພ຺ຠນ຺ຕິ ປຣິປຸຓ຺ຓິນ຺ທ຺ຣິຍສ຺ສ ຕຕ຺ເຖວ ອຸປລພ຺ຠນໂຕ. ປິ-ສທ຺ເທນ ປນ ອນ຺ຘພຘິຣາທິວເສນ ເກສຎ຺ຈິ ອສມ຺ຠວໍ ທີເປຕິ.

໖໖. ຆານາທິຕ຺ຕຍໍ ນຕ຺ຖິ ພ຺ຣຫ຺ມານໍ ກາມວິຣາຄຠາວນາວເສນ ຄນ຺ຘຣສໂຜຏ຺ຐພ຺ເພສຸ ວິຣຕ຺ຕຕາຍ ຕພ຺ພິສຍປ຺ປສາເທສຸປິ ວິຣາຄສຠາວໂຕ. ພຸທ຺ຘທສ຺ສນຘມ຺ມສ຺ສວນາທິອຕ຺ຖໍ ປນ ຈກ຺ຂຸໂສເຕສຸ ອວິຣຕ຺ຕຠາວໂຕ ຈກ຺ຂາທິທ຺ວຍໍ ຕຕ຺ຖ ອຸປລພ຺ຠຕິ.

໖໗. ອຣູປໂລເກ ສພ຺ພານິປິ ຉ ວຕ຺ຖູນິ ນ ສໍວິຊ຺ຊນ຺ຕິ ອຣູປີນໍ ຣູປວິຣາຄຠາວນາພເລນ ຕຕ຺ຖ ສພ຺ເພນ ສພ຺ພໍ ຣູປປ຺ປວຕ຺ຕິຍາ ອຠາວໂຕ.

໖໘. ປຎ຺ຈວິຎ຺ຎາຓາເນວ ນິສ຺ສຕ຺ຕນິຊ຺ຊີວຏ຺ເຐນ ຘາຕຸໂຍຕິ ປຎ຺ຈວິຎ຺ຎາຓຘາຕຸໂຍ.

໖໙. ມນນມຕ຺ຕາ ຘາຕຸ ມໂນຘາຕຸ.

໗໐. ມໂນເຍວ ວິສິຏ຺ຐວິຊານນກິຈ຺ຈໂຍຄໂຕ ວິຎ຺ຎາຓໍ ນິສ຺ສຕ຺ຕນິຊ຺ຊີວຏ຺ເຐນ ຘາຕຸ ຈາຕິ ມໂນວິຎ຺ຎາຓຘາຕຸ. ມນໂສ ວິຎ຺ຎາຓຘາຕູຕິ ວາ ມໂນວິຎ຺ຎາຓຘາຕຸ. ສາ ຫິ ມນໂຕເຍວ ອນນ຺ຕຣປຈ຺ຈຍໂຕ ສມ຺ຠູຍມນໂສເຍວ ອນນ຺ຕຣປຈ຺ຈຍຠູຕາຕິ ມນໂສ ສມ຺ພນ຺ຘິນີ ໂຫຕິ. ສນ຺ຕີຣຓຕ຺ຕຍສ຺ສ, ອຏ຺ຐມຫາວິປາການໍ, ປຏິຆທ຺ວຍສ຺ສ, ປຐມມຄ຺ຄສ຺ສ, ຫສິຕຸປ຺ປາທສ຺ສ, ປນ຺ນຣສຣູປາວຈຣານຎ຺ຈ ວເສນ ປວຕ຺ຕາ ຍຖາວຸຕ຺ຕມໂນຘາຕຸປຎ຺ຈວິຎ຺ຎາຓຘາຕູຫິ ອວເສສາ ມໂນວິຎ຺ຎາຓຘາຕຸ ສງ຺ຂາຕາ ຈ ຕິໍສ ຘມ຺ມາ ນ ເກວລໍ ມໂນຘາຕຸເຍວ, ຕຖາ ຫທຍໍ ນິສ຺ສາເຍວ ປວຕ຺ຕນ຺ຕີຕິ ສມ຺ພນ຺ໂຘ.

ສນ຺ຕີຣຓມຫາວິປາການິ ຫິ ເອກາທສ ທ຺ວາຣາຠາວໂຕ, ກິຈ຺ຈາຠາວໂຕ ຈ ອາຣຸປ຺ເປ ນ ອຸປ຺ປຊ຺ຊນ຺ຕິ. ປຏິຆສ຺ສ ອນີວຣຓາວຕ຺ຖສ຺ສ ອຠາວໂຕ ຕໍສຫຄຕໍ ຈິຕ຺ຕທ຺ວຍໍ ຣູປໂລເກປິ ນຕ຺ຖິ, ປເຄວ ອາຣຸປ຺ເປ. ປຐມມຄ຺ໂຄປິ ປຣໂຕໂຆສປຈ຺ຈຍາຠາເວ ສາວການໍ ອນຸປ຺ປຊ຺ຊນໂຕ, ພຸທ຺ຘປຈ຺ເຈກພຸທ຺ຘານຎ຺ຈ ມນຸສ຺ສໂລກໂຕ ອຎ຺ຎຕ຺ຖ ອນິພ຺ພຕ຺ຕນໂຕ, ຫສນຈິຕ຺ຕຎ຺ຈ ກາຍາຠາວໂຕ, ຣູປາວຈຣານິ ອຣູປີນໍ ຣູປວິຣາຄຠາວນາວເສນ ຕທາຣມ຺ມເຓສຸ ຌາເນສຸປິ ວິຣຕ຺ຕຠາວໂຕ ອຣູປຠເວ ນ ອຸປ຺ປຊ຺ຊນ຺ຕີຕິ ສພ຺ພານິປິ ເອຕານິ ເຕຕ຺ຕິໍສ ຈິຕ຺ຕານິ ຫທຍໍ ນິສ຺ສາເຍວ ປວຕ຺ຕນ຺ຕິ.

໗໑. ປຎ຺ຈຣູປາວຈຣກຸສລໂຕ ອວເສສານິ ທ຺ວາທສ ໂລກິຍກຸສລານິ, ປຏິຆທ຺ວຍໂຕ ອວເສສານິ ທສ ອກຸສລານິ, ປຎ຺ຈທ຺ວາຣາວຊ຺ຊນຫສນຣູປາວຈຣກິຣິເຍຫິ ອວເສສານິ ເຕຣສ ກິຣິຍຈິຕ຺ຕານິ, ປຐມມຄ຺ຄໂຕ ອວເສສານິ ສຕ຺ຕ ອນຸຕ຺ຕຣານິ ຈາຕິ ອິເມສໍ ວເສນ ທ຺ເວຈຕ຺ຕາລີສວິຘາ ມໂນວິຎ຺ຎາຓຘາຕຸສງ຺ຂາຕາ ຘມ຺ມາ ປຎ຺ຈໂວກາຣຠວວເສນ ຫທຍໍ ນິສ຺ສາຍ ວາ, ຈຕຸໂວກາຣຠວວເສນ ອນິສ຺ສາຍວາ ປວຕ຺ຕນ຺ຕິ.

໗໓. ກາເມ ຠເວ ຉວຕ຺ຖຸໍ ນິສ຺ສິຕາ ສຕ຺ຕ ວິຎ຺ຎາຓຘາຕຸໂຍ, ຣູເປ ຠເວ ຕິວຕ຺ຖຸໍ ນິສ຺ສິຕາ ຆານວິຎ຺ຎາຓາທິຕ຺ຕຍວຊ຺ຊິຕາ ຈຕຸພ຺ພິຘາ ວິຎ຺ຎາຓຘາຕຸໂຍ, ອາຣຸປ຺ເປ ຠເວ ອນິສ຺ສິຕາ ເອກາ ມໂນວິຎ຺ຎາຓຘາຕຸ ມຕາຕິ ໂຍຊນາ.

໗໔. ກາມາວຈຣວິປາກປຎ຺ຈທ຺ວາຣາວຊ຺ຊນປຏິຆທ຺ວຍຫສນວເສນ ສຕ຺ຕວີສຕິ ກາມາວຈຣານິ, ປນ຺ນຣສ ຣູປາວຈຣານິ, ປຐມມຄ຺ໂຄຕິ ເຕຈຕ຺ຕາລີສ ນິສ຺ສາເຍວ ຊາຍເຣ, ຕໂຕເຍວ ອວເສສາ ອາຣຸປ຺ປວິປາກວຊ຺ຊິຕາ ທ຺ເວຈຕ຺ຕາລີສ ນິສ຺ສາຍ ຈ ອນິສ຺ສາຍ ຈ ຊາຍເຣ, ປາກາຣຸປ຺ປາ ຈຕ຺ຕາໂຣ ອນິສ຺ສິຕາເຍວາຕິ ສມ຺ພນ຺ໂຘ.

ວຕ຺ຖຸສງ຺ຄຫວຓ຺ຓນາ ນິຏ຺ຐິຕາ.

ອິຕິ ອຠິຘມ຺ມຕ຺ຖວິຠາວິນິຍາ ນາມ ອຠິຘມ຺ມຕ຺ຖສງ຺ຄຫວຓ຺ຓນາຍ

ປກິຓ຺ຓກປຣິຈ຺ເຉທວຓ຺ຓນາ ນິຏ຺ຐິຕາ.