໕. ອຸຓ຺ຓາຠພ຺ຣາຫ຺ມຓສຸຕ຺ຕໍ

໘໒໗. ເອວໍ ເມ ສຸຕໍ – ເອກໍ ສມຍໍ ອາຍສ຺ມາ ອານນ຺ໂທ ໂກສມ຺ພິຍໍ ວິຫຣຕິ ໂຆສິຕາຣາເມ. ອຖ ໂຂ ອຸຓ຺ຓາໂຠ ພ຺ຣາຫ຺ມໂຓ ເຍນາຍສ຺ມາ ອານນ຺ໂທ ເຕນຸປສງ຺ກມິ; ອຸປສງ຺ກມິຕ຺ວາ ອາຍສ຺ມຕາ ອານນ຺ເທນ ສທ຺ຘິໍ ສມ຺ໂມທິ. ສມ຺ໂມທນີຍໍ ກຖໍ ສາຣຓີຍໍ ວີຕິສາເຣຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ໂນ ໂຂ ອຸຓ຺ຓາໂຠ ພ຺ຣາຫ຺ມໂຓ ອາຍສ຺ມນ຺ຕໍ ອານນ຺ທໍ ເອຕທໂວຈ – ‘‘ກິມຕ຺ຖິຍໍ ນຸ ໂຂ, ໂຠ ອານນ຺ທ, ສມເຓ ໂຄຕເມ ພ຺ຣຫ຺ມຈຣິຍໍ ວຸສ຺ສຕີ’’ຕິ? ‘‘ຉນ຺ທປ຺ປຫານຕ຺ຖໍ ໂຂ, ພ຺ຣາຫ຺ມຓ, ຠຄວຕິ ພ຺ຣຫ຺ມຈຣິຍໍ ວຸສ຺ສຕີ’’ຕິ.

‘‘ອຕ຺ຖິ ປນ, ໂຠ ອານນ຺ທ, ມຄ຺ໂຄ ອຕ຺ຖິ ປຏິປທາ ເອຕສ຺ສ ຉນ຺ທສ຺ສ ປຫານາຍາ’’ຕິ? ‘‘ອຕ຺ຖິ ໂຂ, ພ຺ຣາຫ຺ມຓ, ມຄ຺ໂຄ ອຕ຺ຖິ ປຏິປທາ ເອຕສ຺ສ ຉນ຺ທສ຺ສ ປຫານາຍາ’’ຕິ.

‘‘ກຕໂມ ປນ, ໂຠ ອານນ຺ທ, ມຄ຺ໂຄ ກຕມາ ປຏິປທາ ເອຕສ຺ສ ຉນ຺ທສ຺ສ ປຫານາຍາ’’ຕິ? ‘‘ອິຘ, ພ຺ຣາຫ຺ມຓ, ຠິກ຺ຂຸ ຉນ຺ທສມາຘິປ຺ປຘານສງ຺ຂາຣສມນ຺ນາຄຕໍ ອິທ຺ຘິປາທໍ ຠາເວຕິ, ວີຣິຍສມາຘິ…ເປ… ຈິຕ຺ຕສມາຘິ…ເປ… ວີມໍສາສມາຘິປ຺ປຘານສງ຺ຂາຣສມນ຺ນາຄຕໍ ອິທ຺ຘິປາທໍ ຠາເວຕິ – ອຍໍ ໂຂ, ພ຺ຣາຫ຺ມຓ, ມຄ຺ໂຄ ອຍໍ ປຏິປທາ ເອຕສ຺ສ ຉນ຺ທສ຺ສ ປຫານາຍາ’’ຕິ.

‘‘ເອວໍ ສນ຺ເຕ, ໂຠ ອານນ຺ທ, ສນ຺ຕກໍ ໂຫຕິ ໂນ ອສນ຺ຕກໍ. ຉນ຺ເທເນວ ຉນ຺ທໍ ປຊຫິສ຺ສຕີຕິ – ເນຕໍ ຐານໍ ວິຊ຺ຊຕິ’’. ‘‘ເຕນ ຫິ, ພ຺ຣາຫ຺ມຓ, ຕຎ຺ເຎເວຕ຺ຖ ປຏິປຸຈ຺ຉິສ຺ສາມິ. ຍຖາ ເຕ ຂເມຍ຺ຍ ຕຖາ ຕໍ ພ຺ຍາກເຣຍ຺ຍາສິ. ຕໍ ກິໍ ມຎ຺ຎສິ, ພ຺ຣາຫ຺ມຓ, ອໂຫສິ ເຕ ປຸພ຺ເພ ຉນ຺ໂທ ‘ອາຣາມໍ ຄມິສ຺ສາມີ’ຕິ? ຕສ຺ສ ເຕ ອາຣາມຄຕສ຺ສ ໂຍ ຕຊ຺ໂຊ ຉນ຺ໂທ ໂສ ປຏິປ຺ປສ຺ສທ຺ໂຘ’’ຕິ? ‘‘ເອວໍ, ໂຠ’’. ‘‘ອໂຫສິ ເຕ ປຸພ຺ເພ ວີຣິຍໍ ‘ອາຣາມໍ ຄມິສ຺ສາມີ’ຕິ? ຕສ຺ສ ເຕ ອາຣາມຄຕສ຺ສ ຍໍ ຕຊ຺ຊໍ ວີຣິຍໍ ຕໍ ປຏິປ຺ປສ຺ສທ຺ຘ’’ນ຺ຕິ? ‘‘ເອວໍ, ໂຠ’’. ‘‘ອໂຫສິ ເຕ ປຸພ຺ເພ ຈິຕ຺ຕໍ ‘ອາຣາມໍ ຄມິສ຺ສາມີ’ຕິ? ຕສ຺ສ ເຕ ອາຣາມຄຕສ຺ສ ຍໍ ຕຊ຺ຊໍ ຈິຕ຺ຕໍ ຕໍ ປຏິປ຺ປສ຺ສທ຺ຘ’’ນ຺ຕິ? ‘‘ເອວໍ, ໂຠ’’. ‘‘ອໂຫສິ ເຕ ປຸພ຺ເພ ວີມໍສາ ‘ອາຣາມໍ ຄມິສ຺ສາມີ’ຕິ? ຕສ຺ສ ເຕ ອາຣາມຄຕສ຺ສ ຍາ ຕຊ຺ຊາ ວີມໍສາ ສາ ປຏິປ຺ປສ຺ສທ຺ຘາ’’ຕິ? ‘‘ເອວໍ, ໂຠ’’.

‘‘ເອວເມວ ໂຂ, ພ຺ຣາຫ຺ມຓ, ໂຍ ໂສ ຠິກ຺ຂຸ ອຣຫໍ ຂີຓາສໂວ ວຸສິຕວາ ກຕກຣຓີໂຍ ໂອຫິຕຠາໂຣ ອນຸປ຺ປຕ຺ຕສທຕ຺ໂຖ ປຣິກ຺ຂີຓຠວສໍໂຍຊໂນ ສມ຺ມທຎ຺ຎາ ວິມຸຕ຺ໂຕ, ຕສ຺ສ ໂຍ ປຸພ຺ເພ ຉນ຺ໂທ ອໂຫສິ ອຣຫຕ຺ຕປ຺ປຕ຺ຕິຍາ, ອຣຫຕ຺ຕປ຺ປຕ຺ເຕ [ອຣຫຕ຺ເຕ ປຕ຺ເຕ (ສີ. ສ຺ຍາ. ກໍ.)] ໂຍ ຕຊ຺ໂຊ ຉນ຺ໂທ ໂສ ປຏິປ຺ປສ຺ສທ຺ໂຘ; ຍໍ ປຸພ຺ເພ ວີຣິຍໍ ອໂຫສິ ອຣຫຕ຺ຕປ຺ປຕ຺ຕິຍາ, ອຣຫຕ຺ຕປ຺ປຕ຺ເຕ ຍໍ ຕຊ຺ຊໍ ວີຣິຍໍ ຕໍ ປຏິປ຺ປສ຺ສທ຺ຘໍ; ຍໍ ປຸພ຺ເພ ຈິຕ຺ຕໍ ອໂຫສິ ອຣຫຕ຺ຕປ຺ປຕ຺ຕິຍາ, ອຣຫຕ຺ຕປ຺ປຕ຺ເຕ ຍໍ ຕຊ຺ຊໍ ຈິຕ຺ຕໍ ຕໍ ປຏິປ຺ປສ຺ສທ຺ຘໍ; ຍາ ປຸພ຺ເພ ວີມໍສາ ອໂຫສິ ອຣຫຕ຺ຕປ຺ປຕ຺ຕິຍາ, ອຣຫຕ຺ຕປ຺ປຕ຺ເຕ ຍາ ຕຊ຺ຊາ ວີມໍສາ ສາ ປຏິປ຺ປສ຺ສທ຺ຘາ. ຕໍ ກິໍ ມຎ຺ຎສິ, ພ຺ຣາຫ຺ມຓ, ອິຕິ ເອວໍ ສນ຺ເຕ, ສນ຺ຕກໍ ວາ ໂຫຕິ ໂນ ອສນ຺ຕກໍ ວາ’’ຕິ?

‘‘ອທ຺ຘາ, ໂຠ ອານນ຺ທ, ເອວໍ ສນ຺ເຕ, ສນ຺ຕກໍ ໂຫຕິ ໂນ ອສນ຺ຕກໍ. ອຠິກ຺ກນ຺ຕໍ, ໂຠ ອານນ຺ທ, ອຠິກ຺ກນ຺ຕໍ, ໂຠ ອານນ຺ທ! ເສຍ຺ຍຖາປິ, ໂຠ ອານນ຺ທ, ນິກ຺ກຸຊ຺ຊິຕໍ ວາ ອຸກ຺ກຸຊ຺ເຊຍ຺ຍ, ປຏິຈ຺ຉນ຺ນໍ ວາ ວິວເຣຍ຺ຍ, ມູຬ຺ຫສ຺ສ ວາ ມຄ຺ຄໍ ອາຈິກ຺ເຂຍ຺ຍ, ອນ຺ຘກາເຣ ວາ ເຕລປຊ຺ໂຊຕໍ ຘາເຣຍ຺ຍ – ຈກ຺ຂຸມນ຺ໂຕ ຣູປານິ ທກ຺ຂນ຺ຕີຕິ; ເອວເມວໍ ໂຠຕາ ອານນ຺ເທນ ອເນກປຣິຍາເຍນ ຘມ຺ໂມ ປກາສິໂຕ. ເອສາຫໍ, ໂຠ ອານນ຺ທ, ຕໍ ຠວນ຺ຕໍ ໂຄຕມໍ ສຣຓໍ ຄຈ຺ຉາມິ ຘມ຺ມຎ຺ຈ ຠິກ຺ຂຸສງ຺ຆຎ຺ຈ. ອຸປາສກໍ ມໍ ຠວໍ ອານນ຺ໂທ ຘາເຣຕຸ ອຊ຺ຊຕຄ຺ເຄ ປາຓຸເປຕໍ ສຣຓໍ ຄຕ’’ນ຺ຕິ. ປຎ຺ຈມໍ.