໒. ມຫປ຺ຜລສຸຕ຺ຕໍ

໘໒໔. ‘‘ຈຕ຺ຕາໂຣເມ, ຠິກ຺ຂເວ, ອິທ຺ຘິປາທາ ຠາວິຕາ ພຫຸລີກຕາ ມຫປ຺ຜລາ ໂຫນ຺ຕິ ມຫານິສໍສາ. ກຖໍ ຠາວິຕາ ຈ, ຠິກ຺ຂເວ, ຈຕ຺ຕາໂຣ ອິທ຺ຘິປາທາ ກຖໍ ພຫຸລີກຕາ ມຫປ຺ຜລາ ໂຫນ຺ຕິ ມຫານິສໍສາ? ອິຘ, ຠິກ຺ຂເວ, ຠິກ຺ຂຸ ຉນ຺ທສມາຘິປ຺ປຘານສງ຺ຂາຣສມນ຺ນາຄຕໍ ອິທ຺ຘິປາທໍ ຠາເວຕິ – ‘ອິຕິ ເມ ຉນ຺ໂທ ນ ຈ ອຕິລີໂນ ຠວິສ຺ສຕິ, ນ ຈ ອຕິປ຺ປຄ຺ຄຫິໂຕ ຠວິສ຺ສຕິ, ນ ຈ ອຊ຺ຌຕ຺ຕໍ ສໍຂິຕ຺ໂຕ ຠວິສ຺ສຕິ, ນ ຈ ພຫິທ຺ຘາ ວິກ຺ຂິຕ຺ໂຕ ຠວິສ຺ສຕິ’. ປຈ຺ຉາປຸເຣສຎ຺ຎີ ຈ ວິຫຣຕິ – ຍຖາ ປຸເຣ ຕຖາ ປຈ຺ຉາ, ຍຖາ ປຈ຺ຉາ ຕຖາ ປຸເຣ; ຍຖາ ອໂຘ ຕຖາ ອຸທ຺ຘໍ, ຍຖາ ອຸທ຺ຘໍ ຕຖາ ອໂຘ; ຍຖາ ທິວາ ຕຖາ ຣຕ຺ຕິໍ, ຍຖາ ຣຕ຺ຕິໍ ຕຖາ ທິວາ. ອິຕິ ວິວເຏນ ເຈຕສາ ອປຣິໂຍນທ຺ເຘນ ສປ຺ປຠາສໍ ຈິຕ຺ຕໍ ຠາເວຕິ.

‘‘ວີຣິຍສມາຘິ…ເປ… ຈິຕ຺ຕສມາຘິ…ເປ… ວີມໍສາສມາຘິປ຺ປຘານສງ຺ຂາຣສມນ຺ນາຄຕໍ ອິທ຺ຘິປາທໍ ຠາເວຕິ – ‘ອິຕິ ເມ ວີມໍສາ ນ ຈ ອຕິລີນາ ຠວິສ຺ສຕິ, ນ ຈ ອຕິປ຺ປຄ຺ຄຫິຕາ ຠວິສ຺ສຕິ, ນ ຈ ອຊ຺ຌຕ຺ຕໍ ສໍຂິຕ຺ຕາ ຠວິສ຺ສຕິ, ນ ຈ ພຫິທ຺ຘາ ວິກ຺ຂິຕ຺ຕາ ຠວິສ຺ສຕິ’. ປຈ຺ຉາປຸເຣສຎ຺ຎີ ຈ ວິຫຣຕິ – ຍຖາ ປຸເຣ ຕຖາ ປຈ຺ຉາ, ຍຖາ ປຈ຺ຉາ ຕຖາ ປຸເຣ; ຍຖາ ອໂຘ ຕຖາ ອຸທ຺ຘໍ, ຍຖາ ອຸທ຺ຘໍ ຕຖາ ອໂຘ; ຍຖາ ທິວາ ຕຖາ ຣຕ຺ຕິໍ, ຍຖາ ຣຕ຺ຕິໍ ຕຖາ ທິວາ. ອິຕິ ວິວເຏນ ເຈຕສາ ອປຣິໂຍນທ຺ເຘນ ສປ຺ປຠາສໍ ຈິຕ຺ຕໍ ຠາເວຕິ. ເອວໍ ຠາວິຕາ ໂຂ, ຠິກ຺ຂເວ, ຈຕ຺ຕາໂຣ ອິທ຺ຘິປາທາ ເອວໍ ພຫຸລີກຕາ ມຫປ຺ຜລາ ໂຫນ຺ຕິ ມຫານິສໍສາ.

‘‘ເອວໍ ຠາວິເຕສຸ ໂຂ, ຠິກ຺ຂເວ, ຠິກ຺ຂຸ ຈຕູສຸ ອິທ຺ຘິປາເທສຸ ເອວໍ ພຫຸລີກເຕສຸ ອເນກວິຫິຕໍ ອິທ຺ຘິວິຘໍ ປຈ຺ຈນຸໂຠຕິ – ເອໂກປິ ຫຸຕ຺ວາ ພຫຸຘາ ໂຫຕິ…ເປ… ຍາວ ພ຺ຣຫ຺ມໂລກາປິ ກາເຍນ ວສໍ ວຕ຺ເຕຕິ…ເປ….

‘‘ເອວໍ ຠາວິເຕສຸ ໂຂ, ຠິກ຺ຂເວ, ຠິກ຺ຂຸ ຈຕູສຸ ອິທ຺ຘິປາເທສຸ ເອວໍ ພຫຸລີກເຕສຸ, ອາສວານໍ ຂຍາ ອນາສວໍ ເຈໂຕວິມຸຕ຺ຕິໍ ປຎ຺ຎາວິມຸຕ຺ຕິໍ ທິຏ຺ເຐວ ຘມ຺ເມ ສຍໍ ອຠິຎ຺ຎາ ສຈ຺ຉິກຕ຺ວາ ອຸປສມ຺ປຊ຺ຊ ວິຫຣຕີ’’ຕິ. ທຸຕິຍໍ.