໘. ປຣິຎ຺ຎາຕສຸຕ຺ຕໍ

໔໐໔. ‘‘ຈຕ຺ຕາໂຣເມ, ຠິກ຺ຂເວ, ສຕິປຏ຺ຐານາ. ກຕເມ ຈຕ຺ຕາໂຣ? ອິຘ, ຠິກ຺ຂເວ, ຠິກ຺ຂຸ ກາເຍ ກາຍານຸປສ຺ສີ ວິຫຣຕິ ອາຕາປີ ສມ຺ປຊາໂນ ສຕິມາ, ວິເນຍ຺ຍ ໂລເກ ອຠິຊ຺ຌາໂທມນສ຺ສໍ. ຕສ຺ສ ກາເຍ ກາຍານຸປສ຺ສິໂນ ວິຫຣໂຕ ກາໂຍ ປຣິຎ຺ຎາໂຕ ໂຫຕິ. ກາຍສ຺ສ ປຣິຎ຺ຎາຕຕ຺ຕາ ອມຕໍ ສຈ຺ຉິກຕໍ ໂຫຕິ.

‘‘ເວທນາສຸ ເວທນານຸປສ຺ສີ ວິຫຣຕິ ອາຕາປີ ສມ຺ປຊາໂນ ສຕິມາ, ວິເນຍ຺ຍ ໂລເກ ອຠິຊ຺ຌາໂທມນສ຺ສໍ. ຕສ຺ສ ເວທນາສຸ ເວທນານຸປສ຺ສິໂນ ວິຫຣໂຕ ເວທນາ ປຣິຎ຺ຎາຕາ ໂຫນ຺ຕິ. ເວທນານໍ ປຣິຎ຺ຎາຕຕ຺ຕາ ອມຕໍ ສຈ຺ຉິກຕໍ ໂຫຕິ.

‘‘ຈິຕ຺ເຕ ຈິຕ຺ຕານຸປສ຺ສີ ວິຫຣຕິ ອາຕາປີ ສມ຺ປຊາໂນ ສຕິມາ, ວິເນຍ຺ຍ ໂລເກ ອຠິຊ຺ຌາໂທມນສ຺ສໍ. ຕສ຺ສ ຈິຕ຺ເຕ ຈິຕ຺ຕານຸປສ຺ສິໂນ ວິຫຣໂຕ ຈິຕ຺ຕໍ ປຣິຎ຺ຎາຕໍ ໂຫຕິ. ຈິຕ຺ຕສ຺ສ ປຣິຎ຺ຎາຕຕ຺ຕາ ອມຕໍ ສຈ຺ຉິກຕໍ ໂຫຕິ.

‘‘ຘມ຺ເມສຸ ຘມ຺ມານຸປສ຺ສີ ວິຫຣຕິ ອາຕາປີ ສມ຺ປຊາໂນ ສຕິມາ, ວິເນຍ຺ຍ ໂລເກ ອຠິຊ຺ຌາໂທມນສ຺ສໍ. ຕສ຺ສ ຘມ຺ເມສຸ ຘມ຺ມານຸປສ຺ສິໂນ ວິຫຣໂຕ ຘມ຺ມາ ປຣິຎ຺ຎາຕາ ໂຫນ຺ຕິ. ຘມ຺ມານໍ ປຣິຎ຺ຎາຕຕ຺ຕາ ອມຕໍ ສຈ຺ຉິກຕໍ ໂຫຕີ’’ຕິ. ອຏ຺ຐມໍ.