໕. ສງ຺ຄາຣວສຸຕ຺ຕໍ

໒໓໖. ສາວຕ຺ຖິນິທານໍ. ອຖ ໂຂ ສງ຺ຄາຣໂວ ພ຺ຣາຫ຺ມໂຓ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຠຄວຕາ ສທ຺ຘິໍ ສມ຺ໂມທິ. ສມ຺ໂມທນີຍໍ ກຖໍ ສາຣຓີຍໍ ວີຕິສາເຣຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ໂນ ໂຂ ສງ຺ຄາຣໂວ ພ຺ຣາຫ຺ມໂຓ ຠຄວນ຺ຕໍ ເອຕທໂວຈ –

‘‘ໂກ ນຸ ໂຂ, ໂຠ ໂຄຕມ, ເຫຕຸ, ໂກ ປຈ຺ຈໂຍ ເຍເນກທາ ທີຆຣຕ຺ຕໍ ສຊ຺ຌາຍກຕາປິ ມນ຺ຕາ ນປ຺ປຏິຠນ຺ຕິ, ປເຄວ ອສຊ຺ຌາຍກຕາ? ໂກ ປນ, ໂຠ ໂຄຕມ, ເຫຕຸ, ໂກ ປຈ຺ຈໂຍ ເຍເນກທາ ທີຆຣຕ຺ຕໍ ອສຊ຺ຌາຍກຕາປິ ມນ຺ຕາ ປຏິຠນ຺ຕິ, ປເຄວ ສຊ຺ຌາຍກຕາ’’ຕິ?

‘‘ຍສ຺ມິໍ ໂຂ, ພ຺ຣາຫ຺ມຓ, ສມເຍ ກາມຣາຄປຣິຍຸຏ຺ຐິເຕນ ເຈຕສາ ວິຫຣຕິ ກາມຣາຄປເຣເຕນ, ອຸປ຺ປນ຺ນສ຺ສ ຈ ກາມຣາຄສ຺ສ ນິສ຺ສຣຓໍ ຍຖາຠູຕໍ ນປ຺ປຊານາຕິ, ອຕ຺ຕຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ນ ຊານາຕິ ນ ປສ຺ສຕິ, ປຣຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ນ ຊານາຕິ ນ ປສ຺ສຕິ, ອຸຠຍຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ນ ຊານາຕິ ນ ປສ຺ສຕິ; ທີຆຣຕ຺ຕໍ ສຊ຺ຌາຍກຕາປິ ມນ຺ຕາ ນປ຺ປຏິຠນ຺ຕິ, ປເຄວ ອສຊ຺ຌາຍກຕາ.

‘‘ເສຍ຺ຍຖາປິ, ພ຺ຣາຫ຺ມຓ, ອຸທປຕ຺ໂຕ ສໍສຏ຺ໂຐ ລາຂາຍ ວາ ຫລິທ຺ທິຍາ ວາ ນີລິຍາ ວາ ມຎ຺ຊິຏ຺ຐາຍ ວາ. ຕຕ຺ຖ ຈກ຺ຂຸມາ ປຸຣິໂສ ສກໍ ມຸຂນິມິຕ຺ຕໍ ປຈ຺ຈເວກ຺ຂມາໂນ ຍຖາຠູຕໍ ນ ຊາເນຍ຺ຍ ນ ປສ຺ເສຍ຺ຍ. ເອວເມວ ໂຂ, ພ຺ຣາຫ຺ມຓ, ຍສ຺ມິໍ ສມເຍ ກາມຣາຄປຣິຍຸຏ຺ຐິເຕນ ເຈຕສາ ວິຫຣຕິ ກາມຣາຄປເຣເຕນ, ອຸປ຺ປນ຺ນສ຺ສ ຈ ກາມຣາຄສ຺ສ ນິສ຺ສຣຓໍ ຍຖາຠູຕໍ ນປ຺ປຊານາຕິ, ອຕ຺ຕຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ນ ຊານາຕິ ນ ປສ຺ສຕິ, ປຣຕ຺ຖມ຺ປິ…ເປ… ອຸຠຍຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ນ ຊານາຕິ ນ ປສ຺ສຕິ; ທີຆຣຕ຺ຕໍ ສຊ຺ຌາຍກຕາປິ ມນ຺ຕາ ນປ຺ປຏິຠນ຺ຕິ, ປເຄວ ອສຊ຺ຌາຍກຕາ.

‘‘ປຸນ ຈປຣໍ, ພ຺ຣາຫ຺ມຓ, ຍສ຺ມິໍ ສມເຍ ພ຺ຍາປາທປຣິຍຸຏ຺ຐິເຕນ ເຈຕສາ ວິຫຣຕິ ພ຺ຍາປາທປເຣເຕນ, ອຸປ຺ປນ຺ນສ຺ສ ຈ ພ຺ຍາປາທສ຺ສ ນິສ຺ສຣຓໍ ຍຖາຠູຕໍ ນປ຺ປຊານາຕິ, ອຕ຺ຕຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ນ ຊານາຕິ ນ ປສ຺ສຕິ, ປຣຕ຺ຖມ຺ປິ…ເປ… ອຸຠຍຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ນ ຊານາຕິ ນ ປສ຺ສຕິ; ທີຆຣຕ຺ຕໍ ສຊ຺ຌາຍກຕາປິ ມນ຺ຕາ ນປ຺ປຏິຠນ຺ຕິ, ປເຄວ ອສຊ຺ຌາຍກຕາ.

‘‘ເສຍ຺ຍຖາປິ, ພ຺ຣາຫ຺ມຓ, ອຸທປຕ຺ໂຕ ອຄ຺ຄິນາ ສນ຺ຕຕ຺ໂຕ ປກ຺ກຸຖິໂຕ [ປກ຺ກຸຘິໂຕ (ກ.), ອຸກ຺ກຏ຺ຐິໂຕ (ສີ.), ອຸກ຺ກຸຏ຺ຐິໂຕ (ສ຺ຍາ.)] ອຸສ຺ມຸທກຊາໂຕ [ອຸສ຺ສທກຊາໂຕ (ສີ.), ອຸສ຺ມາທກຊາໂຕ (ສ຺ຍາ.)]. ຕຕ຺ຖ ຈກ຺ຂຸມາ ປຸຣິໂສ ສກໍ ມຸຂນິມິຕ຺ຕໍ ປຈ຺ຈເວກ຺ຂມາໂນ ຍຖາຠູຕໍ ນ ຊາເນຍ຺ຍ ນ ປສ຺ເສຍ຺ຍ. ເອວເມວ ໂຂ, ພ຺ຣາຫ຺ມຓ, ຍສ຺ມິໍ ສມເຍ ພ຺ຍາປາທປຣິຍຸຏ຺ຐິເຕນ ເຈຕສາ ວິຫຣຕິ ພ຺ຍາປາທປເຣເຕນ, ອຸປ຺ປນ຺ນສ຺ສ ຈ ພ຺ຍາປາທສ຺ສ ນິສ຺ສຣຓໍ ຍຖາຠູຕໍ ນປ຺ປຊານາຕິ, ອຕ຺ຕຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ນ ຊານາຕິ ນ ປສ຺ສຕິ, ປຣຕ຺ຖມ຺ປິ ຕສ຺ມິໍ ສມເຍ…ເປ… ອຸຠຍຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ນ ຊານາຕິ ນ ປສ຺ສຕິ; ທີຆຣຕ຺ຕໍ ສຊ຺ຌາຍກຕາປິ ມນ຺ຕາ ນປ຺ປຏິຠນ຺ຕິ, ປເຄວ ອສຊ຺ຌາຍກຕາ.

‘‘ປຸນ ຈປຣໍ, ພ຺ຣາຫ຺ມຓ, ຍສ຺ມິໍ ສມເຍ ຖິນມິທ຺ຘປຣິຍຸຏ຺ຐິເຕນ ເຈຕສາ ວິຫຣຕິ ຖິນມິທ຺ຘປເຣເຕນ, ອຸປ຺ປນ຺ນສ຺ສ ຈ ຖິນມິທ຺ຘສ຺ສ ນິສ຺ສຣຓໍ ຍຖາຠູຕໍ ນປ຺ປຊານາຕິ, ອຕ຺ຕຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ນ ຊານາຕິ ນ ປສ຺ສຕິ, ປຣຕ຺ຖມ຺ປິ…ເປ… ອຸຠຍຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ນ ຊານາຕິ ນ ປສ຺ສຕິ; ທີຆຣຕ຺ຕໍ ສຊ຺ຌາຍກຕາປິ ມນ຺ຕາ ນປ຺ປຏິຠນ຺ຕິ, ປເຄວ ອສຊ຺ຌາຍກຕາ.

‘‘ເສຍ຺ຍຖາປິ, ພ຺ຣາຫ຺ມຓ, ອຸທປຕ຺ໂຕ ເສວາລປຓກປຣິໂຍນທ຺ໂຘ. ຕຕ຺ຖ ຈກ຺ຂຸມາ ປຸຣິໂສ ສກໍ ມຸຂນິມິຕ຺ຕໍ ປຈ຺ຈເວກ຺ຂມາໂນ ຍຖາຠູຕໍ ນ ຊາເນຍ຺ຍ ນ ປສ຺ເສຍ຺ຍ. ເອວເມວ ໂຂ, ພ຺ຣາຫ຺ມຓ, ຍສ຺ມິໍ ສມເຍ ຖິນມິທ຺ຘປຣິຍຸຏ຺ຐິເຕນ ເຈຕສາ ວິຫຣຕິ ຖິນມິທ຺ຘປເຣເຕນ, ອຸປ຺ປນ຺ນສ຺ສ ຈ ຖິນມິທ຺ຘສ຺ສ ນິສ຺ສຣຓໍ ຍຖາຠູຕໍ ນປ຺ປຊານາຕິ, ອຕ຺ຕຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ນ ຊານາຕິ ນ ປສ຺ສຕິ, ປຣຕ຺ຖມ຺ປິ…ເປ… ອຸຠຍຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ນ ຊານາຕິ ນ ປສ຺ສຕິ; ທີຆຣຕ຺ຕໍ ສຊ຺ຌາຍກຕາປິ ມນ຺ຕາ ນປ຺ປຏິຠນ຺ຕິ, ປເຄວ ອສຊ຺ຌາຍກຕາ.

‘‘ປຸນ ຈປຣໍ, ພ຺ຣາຫ຺ມຓ, ຍສ຺ມິໍ ສມເຍ ອຸທ຺ຘຈ຺ຈກຸກ຺ກຸຈ຺ຈປຣິຍຸຏ຺ຐິເຕນ ເຈຕສາ ວິຫຣຕິ ອຸທ຺ຘຈ຺ຈກຸກ຺ກຸຈ຺ຈປເຣເຕນ, ອຸປ຺ປນ຺ນສ຺ສ ຈ ອຸທ຺ຘຈ຺ຈກຸກ຺ກຸຈ຺ຈສ຺ສ ນິສ຺ສຣຓໍ ຍຖາຠູຕໍ ນປ຺ປຊານາຕິ, ອຕ຺ຕຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ນ ຊານາຕິ ນ ປສ຺ສຕິ, ປຣຕ຺ຖມ຺ປິ…ເປ… ອຸຠຍຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ນ ຊານາຕິ ນ ປສ຺ສຕິ; ທີຆຣຕ຺ຕໍ ສຊ຺ຌາຍກຕາປິ ມນ຺ຕາ ນປ຺ປຏິຠນ຺ຕິ, ປເຄວ ອສຊ຺ຌາຍກຕາ.

‘‘ເສຍ຺ຍຖາປິ, ພ຺ຣາຫ຺ມຓ, ອຸທປຕ຺ໂຕ ວາເຕຣິໂຕ ຈລິໂຕ ຠນ຺ໂຕ ອູມິຊາໂຕ. ຕຕ຺ຖ ຈກ຺ຂຸມາ ປຸຣິໂສ ສກໍ ມຸຂນິມິຕ຺ຕໍ ປຈ຺ຈເວກ຺ຂມາໂນ ຍຖາຠູຕໍ ນ ຊາເນຍ຺ຍ ນ ປສ຺ເສຍ຺ຍ. ເອວເມວ ໂຂ, ພ຺ຣາຫ຺ມຓ, ຍສ຺ມິໍ ສມເຍ ອຸທ຺ຘຈ຺ຈກຸກ຺ກຸຈ຺ຈປຣິຍຸຏ຺ຐິເຕນ ເຈຕສາ ວິຫຣຕິ ອຸທ຺ຘຈ຺ຈກຸກ຺ກຸຈ຺ຈປເຣເຕນ, ອຸປ຺ປນ຺ນສ຺ສ ຈ ອຸທ຺ຘຈ຺ຈກຸກ຺ກຸຈ຺ຈສ຺ສ ນິສ຺ສຣຓໍ ຍຖາຠູຕໍ ນປ຺ປຊານາຕິ, ອຕ຺ຕຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ນ ຊານາຕິ ນ ປສ຺ສຕິ, ປຣຕ຺ຖມ຺ປິ…ເປ… ອຸຠຍຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ນ ຊານາຕິ ນ ປສ຺ສຕິ; ທີຆຣຕ຺ຕໍ ສຊ຺ຌາຍກຕາປິ ມນ຺ຕາ ນປ຺ປຏິຠນ຺ຕິ, ປເຄວ ອສຊ຺ຌາຍກຕາ.

‘‘ປຸນ ຈປຣໍ, ພ຺ຣາຫ຺ມຓ, ຍສ຺ມິໍ ສມເຍ ວິຈິກິຈ຺ຉາປຣິຍຸຏ຺ຐິເຕນ ເຈຕສາ ວິຫຣຕິ ວິຈິກິຈ຺ຉາປເຣເຕນ, ອຸປ຺ປນ຺ນາຍ ຈ ວິຈິກິຈ຺ຉາຍ ນິສ຺ສຣຓໍ ຍຖາຠູຕໍ ນປ຺ປຊານາຕິ, ອຕ຺ຕຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ນ ຊານາຕິ ນ ປສ຺ສຕິ, ປຣຕ຺ຖມ຺ປິ…ເປ… ອຸຠຍຕ຺ຖມ຺ປິ… ທີຆຣຕ຺ຕໍ ສຊ຺ຌາຍກຕາປິ ມນ຺ຕາ ນປ຺ປຏິຠນ຺ຕິ, ປເຄວ ອສຊ຺ຌາຍກຕາ.

‘‘ເສຍ຺ຍຖາປິ, ພ຺ຣາຫ຺ມຓ, ອຸທປຕ຺ໂຕ ອາວິໂລ ລຸຬິໂຕ ກລລີຠູໂຕ ອນ຺ຘກາເຣ ນິກ຺ຂິຕ຺ໂຕ. ຕຕ຺ຖ ຈກ຺ຂຸມາ ປຸຣິໂສ ສກໍ ມຸຂນິມິຕ຺ຕໍ ປຈ຺ຈເວກ຺ຂມາໂນ ຍຖາຠູຕໍ ນ ຊາເນຍ຺ຍ ນ ປສ຺ເສຍ຺ຍ. ເອວເມວ ໂຂ, ພ຺ຣາຫ຺ມຓ, ຍສ຺ມິໍ ສມເຍ ວິຈິກິຈ຺ຉາປຣິຍຸຏ຺ຐິເຕນ ເຈຕສາ ວິຫຣຕິ ວິຈິກິຈ຺ຉາປເຣເຕນ, ອຸປ຺ປນ຺ນາຍ ຈ ວິຈິກິຈ຺ຉາຍ ນິສ຺ສຣຓໍ ຍຖາຠູຕໍ ນປ຺ປຊານາຕິ, ອຕ຺ຕຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ນ ຊານາຕິ ນ ປສ຺ສຕິ, ປຣຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ນ ຊານາຕິ ນ ປສ຺ສຕິ, ອຸຠຍຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ນ ຊານາຕິ ນ ປສ຺ສຕິ; ທີຆຣຕ຺ຕໍ ສຊ຺ຌາຍກຕາປິ ມນ຺ຕາ ນປ຺ປຏິຠນ຺ຕິ, ປເຄວ ອສຊ຺ຌາຍກຕາ. ອຍໍ ໂຂ, ພ຺ຣາຫ຺ມຓ, ເຫຕຸ ອຍໍ ປຈ຺ຈໂຍ ເຍເນກທາ ທີຆຣຕ຺ຕໍ ສຊ຺ຌາຍກຕາປິ ມນ຺ຕາ ນປ຺ປຏິຠນ຺ຕິ, ປເຄວ ອສຊ຺ຌາຍກຕາ.

‘‘ຍສ຺ມິຎ຺ຈ ໂຂ, ພ຺ຣາຫ຺ມຓ, ສມເຍ ນ ກາມຣາຄປຣິຍຸຏ຺ຐິເຕນ ເຈຕສາ ວິຫຣຕິ ນ ກາມຣາຄປເຣເຕນ, ອຸປ຺ປນ຺ນສ຺ສ ຈ ກາມຣາຄສ຺ສ ນິສ຺ສຣຓໍ ຍຖາຠູຕໍ ປຊານາຕິ, ອຕ຺ຕຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ຊານາຕິ ປສ຺ສຕິ, ປຣຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ຊານາຕິ ປສ຺ສຕິ, ອຸຠຍຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ຊານາຕິ ປສ຺ສຕິ; ທີຆຣຕ຺ຕໍ ອສຊ຺ຌາຍກຕາປິ ມນ຺ຕາ ປຏິຠນ຺ຕິ, ປເຄວ ສຊ຺ຌາຍກຕາ.

‘‘ເສຍ຺ຍຖາປິ, ພ຺ຣາຫ຺ມຓ, ອຸທປຕ຺ໂຕ ອສໍສຏ຺ໂຐ ລາຂາຍ ວາ ຫລິທ຺ທິຍາ ວາ ນີລິຍາ ວາ ມຎ຺ຊິຏ຺ຐາຍ ວາ. ຕຕ຺ຖ ຈກ຺ຂຸມາ ປຸຣິໂສ ສກໍ ມຸຂນິມິຕ຺ຕໍ ປຈ຺ຈເວກ຺ຂມາໂນ ຍຖາຠູຕໍ ຊາເນຍ຺ຍ ປສ຺ເສຍ຺ຍ. ເອວເມວ ໂຂ, ພ຺ຣາຫ຺ມຓ, ຍສ຺ມິໍ ສມເຍ ນ ກາມຣາຄປຣິຍຸຏ຺ຐິເຕນ ເຈຕສາ ວິຫຣຕິ ນ ກາມຣາຄປເຣເຕນ, ອຸປ຺ປນ຺ນສ຺ສ ຈ ກາມຣາຄສ຺ສ ນິສ຺ສຣຓໍ ຍຖາຠູຕໍ ປຊານາຕິ…ເປ….

‘‘ປຸນ ຈປຣໍ, ພ຺ຣາຫ຺ມຓ, ຍສ຺ມິໍ ສມເຍ ນ ພ຺ຍາປາທປຣິຍຸຏ຺ຐິເຕນ ເຈຕສາ ວິຫຣຕິ ນ ພ຺ຍາປາທປເຣເຕນ, ອຸປ຺ປນ຺ນສ຺ສ ຈ ພ຺ຍາປາທສ຺ສ ນິສ຺ສຣຓໍ ຍຖາຠູຕໍ ປຊານາຕິ, ອຕ຺ຕຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ຊານາຕິ ປສ຺ສຕິ, ປຣຕ຺ຖມ຺ປິ…ເປ… ອຸຠຍຕ຺ຖມ຺ປິ… ທີຆຣຕ຺ຕໍ ອສຊ຺ຌາຍກຕາປິ ມນ຺ຕາ ປຏິຠນ຺ຕິ, ປເຄວ ສຊ຺ຌາຍກຕາ.

‘‘ເສຍ຺ຍຖາປິ, ພ຺ຣາຫ຺ມຓ, ອຸທປຕ຺ໂຕ ນ ອຄ຺ຄິນາ ສນ຺ຕຕ຺ໂຕ ນ ປກ຺ກຸຖິໂຕ ນ ອຸສ຺ມຸທກຊາໂຕ, ຕຕ຺ຖ ຈກ຺ຂຸມາ ປຸຣິໂສ ສກໍ ມຸຂນິມິຕ຺ຕໍ ປຈ຺ຈເວກ຺ຂມາໂນ ຍຖາຠູຕໍ ຊາເນຍ຺ຍ ປສ຺ເສຍ຺ຍ. ເອວເມວ ໂຂ, ພ຺ຣາຫ຺ມຓ, ຍສ຺ມິໍ ສມເຍ ນ ພ຺ຍາປາທປຣິຍຸຏ຺ຐິເຕນ ເຈຕສາ ວິຫຣຕິ ນ ພ຺ຍາປາທປເຣເຕນ, ອຸປ຺ປນ຺ນສ຺ສ ຈ ພ຺ຍາປາທສ຺ສ ນິສ຺ສຣຓໍ ຍຖາຠູຕໍ ປຊານາຕິ, ອຕ຺ຕຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ຊານາຕິ ປສ຺ສຕິ, ປຣຕ຺ຖມ຺ປິ…ເປ… ອຸຠຍຕ຺ຖມ຺ປິ… ທີຆຣຕ຺ຕໍ ອສຊ຺ຌາຍກຕາປິ ມນ຺ຕາ ປຏິຠນ຺ຕິ, ປເຄວ ສຊ຺ຌາຍກຕາ.

‘‘ປຸນ ຈປຣໍ, ພ຺ຣາຫ຺ມຓ, ຍສ຺ມິໍ ສມເຍ ນ ຖິນມິທ຺ຘປຣິຍຸຏ຺ຐິເຕນ ເຈຕສາ ວິຫຣຕິ ນ ຖິນມິທ຺ຘປເຣເຕນ, ອຸປ຺ປນ຺ນສ຺ສ ຈ ຖິນມິທ຺ຘສ຺ສ ນິສ຺ສຣຓໍ ຍຖາຠູຕໍ ປຊານາຕິ, ອຕ຺ຕຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ຊານາຕິ ປສ຺ສຕິ, ປຣຕ຺ຖມ຺ປິ…ເປ… ອຸຠຍຕ຺ຖມ຺ປິ … ທີຆຣຕ຺ຕໍ ອສຊ຺ຌາຍກຕາປິ ມນ຺ຕາ ປຏິຠນ຺ຕິ, ປເຄວ ສຊ຺ຌາຍກຕາ.

‘‘ເສຍ຺ຍຖາປິ, ພ຺ຣາຫ຺ມຓ, ອຸທປຕ຺ໂຕ ນ ເສວາລປຓກປຣິໂຍນທ຺ໂຘ. ຕຕ຺ຖ ຈກ຺ຂຸມາ ປຸຣິໂສ ສກໍ ມຸຂນິມິຕ຺ຕໍ ປຈ຺ຈເວກ຺ຂມາໂນ ຍຖາຠູຕໍ ຊາເນຍ຺ຍ ປສ຺ເສຍ຺ຍ. ເອວເມວ ໂຂ, ພ຺ຣາຫ຺ມຓ, ຍສ຺ມິໍ ສມເຍ ນ ຖິນມິທ຺ຘປຣິຍຸຏ຺ຐິເຕນ ເຈຕສາ ວິຫຣຕິ ນ ຖິນມິທ຺ຘປເຣເຕນ, ອຸປ຺ປນ຺ນສ຺ສ ຈ ຖິນມິທ຺ຘສ຺ສ ນິສ຺ສຣຓໍ ຍຖາຠູຕໍ ປຊານາຕິ, ອຕ຺ຕຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ຊານາຕິ ປສ຺ສຕິ, ປຣຕ຺ຖມ຺ປິ…ເປ… ອຸຠຍຕ຺ຖມ຺ປິ… ທີຆຣຕ຺ຕໍ ອສຊ຺ຌາຍກຕາປິ ມນ຺ຕາ ປຏິຠນ຺ຕິ, ປເຄວ ສຊ຺ຌາຍກຕາ.

‘‘ປຸນ ຈປຣໍ, ພ຺ຣາຫ຺ມຓ, ຍສ຺ມິໍ ສມເຍ ນ ອຸທ຺ຘຈ຺ຈກຸກ຺ກຸຈ຺ຈປຣິຍຸຏ຺ຐິເຕນ ເຈຕສາ ວິຫຣຕິ ນ ອຸທ຺ຘຈ຺ຈກຸກ຺ກຸຈ຺ຈປເຣເຕນ, ອຸປ຺ປນ຺ນສ຺ສ ຈ ອຸທ຺ຘຈ຺ຈກຸກ຺ກຸຈ຺ຈສ຺ສ ນິສ຺ສຣຓໍ ຍຖາຠູຕໍ ປຊານາຕິ, ອຕ຺ຕຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ຊານາຕິ ປສ຺ສຕິ, ປຣຕ຺ຖມ຺ປິ…ເປ… ອຸຠຍຕ຺ຖມ຺ປິ… ທີຆຣຕ຺ຕໍ ອສຊ຺ຌາຍກຕາປິ ມນ຺ຕາ ປຏິຠນ຺ຕິ, ປເຄວ ສຊ຺ຌາຍກຕາ.

‘‘ເສຍ຺ຍຖາປິ, ພ຺ຣາຫ຺ມຓ, ອຸທປຕ຺ໂຕ ນ ວາເຕຣິໂຕ ນ ຈລິໂຕ ນ ຠນ຺ໂຕ ນ ອູມິຊາໂຕ. ຕຕ຺ຖ ຈກ຺ຂຸມາ ປຸຣິໂສ ສກໍ ມຸຂນິມິຕ຺ຕໍ ປຈ຺ຈເວກ຺ຂມາໂນ ຍຖາຠູຕໍ ຊາເນຍ຺ຍ ປສ຺ເສຍ຺ຍ. ເອວເມວ ໂຂ, ພ຺ຣາຫ຺ມຓ, ຍສ຺ມິໍ ສມເຍ ນ ອຸທ຺ຘຈ຺ຈກຸກ຺ກຸຈ຺ຈປຣິຍຸຏ຺ຐິເຕນ ເຈຕສາ ວິຫຣຕິ ນ ອຸທ຺ຘຈ຺ຈກຸກ຺ກຸຈ຺ຈປເຣເຕນ, ອຸປ຺ປນ຺ນສ຺ສ ຈ ອຸທ຺ຘຈ຺ຈກຸກ຺ກຸຈ຺ຈສ຺ສ ນິສ຺ສຣຓໍ ຍຖາຠູຕໍ ປຊານາຕິ, ອຕ຺ຕຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ຊານາຕິ ປສ຺ສຕິ, ປຣຕ຺ຖມ຺ປິ…ເປ… ອຸຠຍຕ຺ຖມ຺ປິ… ທີຆຣຕ຺ຕໍ ອສຊ຺ຌາຍກຕາປິ ມນ຺ຕາ ປຏິຠນ຺ຕິ, ປເຄວ ສຊ຺ຌາຍກຕາ.

‘‘ປຸນ ຈປຣໍ, ພ຺ຣາຫ຺ມຓ, ຍສ຺ມິໍ ສມເຍ ນ ວິຈິກິຈ຺ຉາປຣິຍຸຏ຺ຐິເຕນ ເຈຕສາ ວິຫຣຕິ ນ ວິຈິກິຈ຺ຉາປເຣເຕນ, ອຸປ຺ປນ຺ນາຍ ຈ ວິຈິກິຈ຺ຉາຍ ນິສ຺ສຣຓໍ ຍຖາຠູຕໍ ປຊານາຕິ [ປຊານາຕິ ປສ຺ສຕິ (ສ຺ຍາ.)], ອຕ຺ຕຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ຊານາຕິ ປສ຺ສຕິ, ປຣຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ຊານາຕິ ປສ຺ສຕິ; ອຸຠຍຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ຊານາຕິ ປສ຺ສຕິ; ທີຆຣຕ຺ຕໍ ອສຊ຺ຌາຍກຕາປິ ມນ຺ຕາ ປຏິຠນ຺ຕິ, ປເຄວ ສຊ຺ຌາຍກຕາ.

‘‘ເສຍ຺ຍຖາປິ, ພ຺ຣາຫ຺ມຓ, ອຸທປຕ຺ໂຕ ອຈ຺ໂຉ ວິປ຺ປສນ຺ໂນ ອນາວິໂລ ອາໂລເກ ນິກ຺ຂິຕ຺ໂຕ. ຕຕ຺ຖ ຈກ຺ຂຸມາ ປຸຣິໂສ ສກໍ ມຸຂນິມິຕ຺ຕໍ ປຈ຺ຈເວກ຺ຂມາໂນ ຍຖາຠູຕໍ ຊາເນຍ຺ຍ ປສ຺ເສຍ຺ຍ. ເອວເມວ ໂຂ, ພ຺ຣາຫ຺ມຓ, ຍສ຺ມິໍ ສມເຍ ນ ວິຈິກິຈ຺ຉາປຣິຍຸຏ຺ຐິເຕນ ເຈຕສາ ວິຫຣຕິ ນ ວິຈິກິຈ຺ຉາປເຣເຕນ, ອຸປ຺ປນ຺ນາຍ ຈ ວິຈິກິຈ຺ຉາຍ ນິສ຺ສຣຓໍ ຍຖາຠູຕໍ ປຊານາຕິ, ອຕ຺ຕຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ຊານາຕິ ປສ຺ສຕິ, ປຣຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ຊານາຕິ ປສ຺ສຕິ, ອຸຠຍຕ຺ຖມ຺ປິ ຕສ຺ມິໍ ສມເຍ ຍຖາຠູຕໍ ຊານາຕິ ປສ຺ສຕິ; ທີຆຣຕ຺ຕໍ ອສຊ຺ຌາຍກຕາປິ ມນ຺ຕາ ປຏິຠນ຺ຕິ, ປເຄວ ສຊ຺ຌາຍກຕາ. ອຍໍ ໂຂ, ພ຺ຣາຫ຺ມຓ, ເຫຕຸ ອຍໍ ປຈ຺ຈໂຍ ເຍເນກທາ ທີຆຣຕ຺ຕໍ ອສຊ຺ຌາຍກຕາປິ ມນ຺ຕາ ປຏິຠນ຺ຕິ, ປເຄວ ສຊ຺ຌາຍກຕາ.

‘‘ສຕ຺ຕິເມ, ພ຺ຣາຫ຺ມຓ, ໂພຊ຺ຌງ຺ຄາ ອນາວຣຓາ ອນີວຣຓາ ເຈຕໂສ ອນຸປກ຺ກິເລສາ ຠາວິຕາ ພຫຸລີກຕາ ວິຊ຺ຊາວິມຸຕ຺ຕິຜລສຈ຺ຉິກິຣິຍາຍ ສໍວຕ຺ຕນ຺ຕິ. ກຕເມ ສຕ຺ຕ? ສຕິສມ຺ໂພຊ຺ຌງ຺ໂຄ ໂຂ, ພ຺ຣາຫ຺ມຓ, ອນາວຣໂຓ ອນີວຣໂຓ ເຈຕໂສ ອນຸປກ຺ກິເລໂສ ຠາວິໂຕ ພຫຸລີກໂຕ ວິຊ຺ຊາວິມຸຕ຺ຕິຜລສຈ຺ຉິກິຣິຍາຍ ສໍວຕ຺ຕຕິ…ເປ… ອຸເປກ຺ຂາສມ຺ໂພຊ຺ຌງ຺ໂຄ ໂຂ, ພ຺ຣາຫ຺ມຓ, ອນາວຣໂຓ ອນີວຣໂຓ ເຈຕໂສ ອນຸປກ຺ກິເລໂສ ຠາວິໂຕ ພຫຸລີກໂຕ ວິຊ຺ຊາວິມຸຕ຺ຕິຜລສຈ຺ຉິກິຣິຍາຍ ສໍວຕ຺ຕຕິ. ອິເມ ໂຂ, ພ຺ຣາຫ຺ມຓ, ສຕ຺ຕ ໂພຊ຺ຌງ຺ຄາ ອນາວຣຓາ ອນີວຣຓາ ເຈຕໂສ ອນຸປກ຺ກິເລສາ ຠາວິຕາ ພຫຸລີກຕາ ວິຊ຺ຊາວິມຸຕ຺ຕິຜລສຈ຺ຉິກິຣິຍາຍ ສໍວຕ຺ຕນ຺ຕີ’’ຕິ. ເອວໍ ວຸຕ຺ເຕ ສງ຺ຄາຣໂວ ພ຺ຣາຫ຺ມໂຓ ຠຄວນ຺ຕໍ ເອຕທໂວຈ – ‘‘ອຠິກ຺ກນ຺ຕໍ, ໂຠ ໂຄຕມ…ເປ… ອຸປາສກໍ ມໍ ຠວໍ ໂຄຕໂມ ຘາເຣຕຸ ອຊ຺ຊຕຄ຺ເຄ ປາຓຸເປຕໍ ສຣຓໍ ຄຕ’’ນ຺ຕິ. ປຎ຺ຈມໍ.