໑. ຫິມວນ຺ຕສຸຕ຺ຕໍ

໑໘໒. ສາວຕ຺ຖິນິທານໍ. ‘‘ເສຍ຺ຍຖາປິ, ຠິກ຺ຂເວ, ຫິມວນ຺ຕໍ ປພ຺ພຕຣາຊານໍ ນິສ຺ສາຍ ນາຄາ ກາຍໍ ວຑ຺ເຒນ຺ຕິ, ພລໍ ຄາເຫນ຺ຕິ; ເຕ ຕຕ຺ຖ ກາຍໍ ວຑ຺ເຒຕ຺ວາ ພລໍ ຄາເຫຕ຺ວາ ກຸໂສພ຺ເຠ ໂອຕຣນ຺ຕິ, ກຸໂສພ຺ເຠ ໂອຕຣິຕ຺ວາ ມຫາໂສພ຺ເຠ ໂອຕຣນ຺ຕິ, ມຫາໂສພ຺ເຠ ໂອຕຣິຕ຺ວາ ກຸນ຺ນທິໂຍ ໂອຕຣນ຺ຕິ, ກຸນ຺ນທິໂຍ ໂອຕຣິຕ຺ວາ ມຫານທິໂຍ ໂອຕຣນ຺ຕິ, ມຫານທິໂຍ ໂອຕຣິຕ຺ວາ ມຫາສມຸທ຺ທສາຄຣໍ ໂອຕຣນ຺ຕິ; ເຕ ຕຕ຺ຖ ມຫນ຺ຕຕ຺ຕໍ ເວປຸລ຺ລຕ຺ຕໍ ອາປຊ຺ຊນ຺ຕິ ກາເຍນ; ເອວເມວ ໂຂ, ຠິກ຺ຂເວ, ຠິກ຺ຂຸ ສີລໍ ນິສ຺ສາຍ ສີເລ ປຕິຏ຺ຐາຍ ສຕ຺ຕ ໂພຊ຺ຌງ຺ເຄ ຠາເວນ຺ໂຕ ສຕ຺ຕ ໂພຊ຺ຌງ຺ເຄ ພຫຸລີກໂຣນ຺ໂຕ ມຫນ຺ຕຕ຺ຕໍ ເວປຸລ຺ລຕ຺ຕໍ ປາປຸຓາຕິ ຘມ຺ເມສຸ. ກຖຎ຺ຈ, ຠິກ຺ຂເວ, ຠິກ຺ຂຸ ສີລໍ ນິສ຺ສາຍ ສີເລ ປຕິຏ຺ຐາຍ ສຕ຺ຕ ໂພຊ຺ຌງ຺ເຄ ຠາເວນ຺ໂຕ ສຕ຺ຕ ໂພຊ຺ຌງ຺ເຄ ພຫຸລີກໂຣນ຺ໂຕ ມຫນ຺ຕຕ຺ຕໍ ເວປຸລ຺ລຕ຺ຕໍ ປາປຸຓາຕິ ຘມ຺ເມສູຕິ? ອິຘ, ຠິກ຺ຂເວ, ຠິກ຺ຂຸ ສຕິສມ຺ໂພຊ຺ຌງ຺ຄໍ ຠາເວຕິ ວິເວກນິສ຺ສິຕໍ ວິຣາຄນິສ຺ສິຕໍ ນິໂຣຘນິສ຺ສິຕໍ ໂວສ຺ສຄ຺ຄປຣິຓາມິໍ; ຘມ຺ມວິຈຍສມ຺ໂພຊ຺ຌງ຺ຄໍ ຠາເວຕິ…ເປ… ວີຣິຍສມ຺ໂພຊ຺ຌງ຺ຄໍ ຠາເວຕິ…ເປ… ປີຕິສມ຺ໂພຊ຺ຌງ຺ຄໍ ຠາເວຕິ…ເປ… ປສ຺ສທ຺ຘິສມ຺ໂພຊ຺ຌງ຺ຄໍ ຠາເວຕິ…ເປ… ສມາຘິສມ຺ໂພຊ຺ຌງ຺ຄໍ ຠາເວຕິ…ເປ… ອຸເປກ຺ຂາສມ຺ໂພຊ຺ຌງ຺ຄໍ ຠາເວຕິ ວິເວກນິສ຺ສິຕໍ ວິຣາຄນິສ຺ສິຕໍ ນິໂຣຘນິສ຺ສິຕໍ ໂວສ຺ສຄ຺ຄປຣິຓາມິໍ. ເອວໍ ໂຂ, ຠິກ຺ຂເວ, ຠິກ຺ຂຸ ສີລໍ ນິສ຺ສາຍ ສີເລ ປຕິຏ຺ຐາຍ ສຕ຺ຕ ໂພຊ຺ຌງ຺ເຄ ຠາເວນ຺ໂຕ ສຕ຺ຕ ໂພຊ຺ຌງ຺ເຄ ພຫຸລີກໂຣນ຺ໂຕ ມຫນ຺ຕຕ຺ຕໍ ເວປຸລ຺ລຕ຺ຕໍ ປາປຸຓາຕິ ຘມ຺ເມສູ’’ຕິ. ປຐມໍ.