໔. ທຸຕິຍສໍເຠຊ຺ຊສຸຕ຺ຕໍ

໑໑໒໔. ‘‘ເສຍ຺ຍຖາປິ, ຠິກ຺ຂເວ, ຍຕ຺ຖິມາ ມຫານທິໂຍ ສໍສນ຺ທນ຺ຕິ ສເມນ຺ຕິ, ເສຍ຺ຍຖິທໍ – ຄງ຺ຄາ, ຍມຸນາ, ອຈິຣວຕີ, ສຣຠູ, ມຫີ, ຕໍ ອຸທກໍ ປຣິກ຺ຂຍໍ ປຣິຍາທານໍ ຄຈ຺ເຉຍ຺ຍ, ຐເປຕ຺ວາ ທ຺ເວ ວາ ຕີຓິ ວາ ອຸທກຜຸສິຕານິ. ຕໍ ກິໍ ມຎ຺ຎຖ, ຠິກ຺ຂເວ, ກຕມໍ ນຸ ໂຂ ພຫຸຕຣໍ – ຍໍ ວາ ສໍເຠຊ຺ຊອຸທກໍ ປຣິກ຺ຂີຓໍ ປຣິຍາທິນ຺ນໍ, ຍານິ ທ຺ເວ ວາ ຕີຓິ ວາ ອຸທກຜຸສິຕານິ ອວສິຏ຺ຐານີ’’ຕິ? ‘‘ເອຕເທວ, ຠນ຺ເຕ, ພຫຸຕຣໍ ສໍເຠຊ຺ຊອຸທກໍ ຍທິທໍ ປຣິກ຺ຂີຓໍ ປຣິຍາທິນ຺ນໍ; ອປ຺ປມຕ຺ຕການິ ທ຺ເວ ວາ ຕີຓິ ວາ ອຸທກຜຸສິຕານິ ອວສິຏ຺ຐານິ. ສງ຺ຂມ຺ປິ ນ ອຸເປນ຺ຕິ, ອຸປນິຘມ຺ປິ ນ ອຸເປນ຺ຕິ, ກລຠາຄມ຺ປິ ນ ອຸເປນ຺ຕິ ສໍເຠຊ຺ຊອຸທກໍ ປຣິກ຺ຂີຓໍ ປຣິຍາທິນ຺ນໍ ອຸປນິຘາຍ ທ຺ເວ ວາ ຕີຓິ ວາ ອຸທກຜຸສິຕານິ ອວສິຏ຺ຐານີ’’ຕິ. ‘‘ເອວເມວ ໂຂ, ຠິກ຺ຂເວ, ອຣິຍສາວກສ຺ສ…ເປ… ໂຍໂຄ ກຣຓີໂຍ’’ຕິ. ຈຕຸຕ຺ຖໍ.